Коопераци ужез кырыжатӥсьёс (Усков)

Коопераци ужез кырыжатӥсьёс Автор: Пётр Михайлович Усков

Источник: 38-тӥ номеро «Ленин Сюрес» газет (11-тӥ июле 1931-тӥ аре), 3-тӥ бам

Тодӥськоды дыр тӥ, эшъёс, газетъёсмес лыдӟисьёс, азямы сылӥсь дано ужъёсты, промышленностьмес юнматонъёсты. Вань кужымез люкаса, кужым борды мылкыдэз лякыса, тросгес вуз поттыны тыршиськомы, сое гуртъёсы но кӧня ке вуттӥськомы. Вузъёсмес нош коопераци люкылэ, контрактаци понна но мар сётылэ. Со куспын ик кудӥз кооператоръёсмы кырыжало, ас родняоссэ тросгес гажало.

Кылсярысь, кыдёкын ик ӧвӧл — Ярысь, Бозино гуртэз вераломы. Н. И. Лапин эш отын сельпо тӧромы. Бызем сузэрезлы ботинка со сётэм, яратэ видно сузэрзэ сокем. Сузэрез нош членэ но пырымтэ, коопераци ужлы номырин но юрттымтэ. Братэзлы нош лэзем толстовка, братэзлэн кышноезлы — ботинка. Бызьымтэ сузэрез но ӧвӧл азьтэм, куинь метыр басма басьтэм. Озьы родня выжыосыз сярысь сюлмаськем, калыклэсь чик но ӧвӧл возьдаськем.

Яр епо но ассэгес яратэ, вузъёссэ отделенняосаз ысъяны вунэтэ. Тужгес ик Еловской сельпо «сюрпиын» улэ, уг сюрылы солэн лавкаяз вуз та учыре. Ярын басма но мар сётъяло, аванс понна шальёсын кузьмало. Контрактацилы но вуззы вань. Нош Еловин ялам кылемын берлань. Кин татын янгыш, малы Еловолы сётэмын «кузь быж», правленнязы дыр вералоз, азьпала шонергес товарзэс но люкылоз.

Мусояськись кунян кык искалэз нонэ шуо. Чеберъяськись мурт но кык епоез «кыске» шуо. Озьы Кожиль с-советысь Сомов милиционер туэ, кык паёк басьтыса улэ: голоши басьтэ Глаз горпоысь, ботинка — Кожиль сельпоысь. Тӥни озьы сельпо тӧро ужа, милиционеръёслы ботинкаосты вуза. Собере крестьянъёсмы кутско ӝожкыны, тӧроез кулэ вылэм, пе, воштыны.