Колхозонь эряф/1941/05/Велень пожар
| Н. Щедрин
|
| Велень пожар |
| (Кати ёфкс, кати быль) |
Софониха велеса, шинь кучка пяли, лиссь пожар. Тя тиевсь июньскяй вишке сокамать пингста. И алятне, и аватне — сембе ульсть паксяса. Азончнезь: мольсь велеть вакска солдаткя, озась завальнять лангс, таргась трубканясонза и тусь. А сондедонза меле крьвязсь.
Велесь палсь марнек. Аньцек илядсь пялец ся порядкать, косотольхть сёротне. Мужикне фкя частста юмафтозь сембонь и арасть нищайкс. Палсь Просковья баба, ды нинге Татювонь цёрокшкац Петька. Алятне и аватне, няемок туста качамть, кадозь сокаснон и алашаснон, ласьксть паксяста, кода цятнада иретьфт. Но араламс ашель мезе ни. Пароль, што жуватасна ашельхть кудса, да назёмснон аньцек тяда ингольне ускозь паксяв, а то саволь ёфси хоть кулок. Иттне, конат, пожаронь минутане, налхксесть ульцяса, пуромсть ляи и ёжефтома аварьдсть. Подростка стирнятне, конатнень кядьсост ёмла шабатольхть, эвотьфста ванцть седькс араф куттнень и наружа лисьф пянакуттнень лангс.
Татю ульсь отькорь и нинге од ава. Котошка киза тяда инголе кулось сонь мирдец, но сон мольфтезе хозяйстванц. Панць мирти пяле наделонкса, сонць сокась, лядсь и нусь. Сонь ульсь кафксошка кизоса фкя цёрац, Петька, конань эса сон ваймовок ашезь маря и конань эса няйсь ни будущай мужик. Сон сонцьке эсь прянц няезе мужикокс и корхнесь:
— Мон, тядяй, мужик улян... христьянин.
Сембе велесь сонь кельгозе. Цёрокшсь ульсь оржа и ласковай, и якась ни школав. Бывала, моли велева атятнень вакска:
— Ну, кода, мужиконя, лезнят тядяцти? — кизефнесазь атятне.
— Лезнян.
Сяка пингть ульцясь прутцевсь мужицкяй всякай хламса; мужикти сембе питнихть, сембе эрявихть. Кудазорхне, синцень кудэряйснон мархта, кажнайсь шарондсь эсь палф юрхта вастованза, и каннезь сембонь, мезе повондсь сельме инголест: сире подошва, шямоню эска, шляя пакш, сошник пялькс и лият. Кой-конатнень илядсть целайста седялсна, но сяс мес времась [ 43 ]вачель (Пятрувонь постсь), тоседялхне ульсть шавот. Сембонди содаф фкя анциня, конац кемоньшка киза „сускомнят“ кочксесь, ласькондсь мековасу и юватькшнесь:
— Коса монь панарозе? коса? кие сявозе? азондость: кие?
Авдотья баба якась мековасу ульцява и сембонди няфнезень внутреннай займань кафта палф выигрышнай билетонзон. Палсть крайсна: кучкасна несколька купон мархта илядсть целайста.
— Шять максыхть! — бассезе сонь Михей старостась: — вона, и номерсновок няевихть (целайста илятф купоттнень эса); меле баяравась Питерса кармай хлопотиндама.[1])
Атятне пуромкшнесть марс и арьсекшнезь мирской нуждать. Сембонь шамасост ульсь сёрматф душевнай мука; кой-конатнень сельмостост лиссть сельмоветть. Решили: молемс сембе мирти, сюконямс фкя вотчинань шабра велети, штоба максольхть приют палыхненди, мзярс аф улихть тифт хотя кодама-кодама временнай помещеният. Сяльде прважазь старостать и кучсть ластя ошу, управав, пособиянкса и страховканкса.
Сась велень батюшкась и, якамок мужикнень ёткова, бассезень синь.
— Кие максозе? — шкайсь! — корхтась сон: — кие сявозе? — шкайсь! Неушта сон аф содасы?
Мужикне апак каштортт тейнза сюконясть.
— А тинь тяда пичеде! — корхтась сяда тов батюшкась: — кодама праваста? Мес? Кода? Кие мярьгсь? Жуватанте — лядсть, модань урядама орудиянте целайнят, наземсь ускф — мезе нинге моданяти эряви? А тинь гневондатада! Вов меле управась строямс нолдай ярмакт; помещицась — нуждающайхненди сёроня кучи; и монга стане... дряй мон аф озондан, инксононт? Мон аф аньцек тинь инксонт, но и сембонь инкса озондан. „И сембе православнай християттнень“ — вов кода.
Тага сюконясть мужикне, а корхтафкшу батюшкась мольфтезе:
— Кда шкайда пелемать карматада седисонт ванфтома да божий храму усердна якама, так афи няйсасть, кода шкайсь сторицаса касьтядязь. Сёротне тядде надияфнихть козя нума. Озипне цебярхть; яровойхне, бог даст, петевихть. Сяльде рамасасть баяравать луганц — вов тинь и ульхтяда тише мархта. Усктада усфкянь-кафтонянь — ванат, и ярмаконянте кошяльсонт [ 44 ]кармайхть улема; а тоса озипне, рознят базару усктада — тага ярмакт, а мекпяли, и пинемнят — тожа ярмакт. Сай кизоть афи няйсасть, кода кяжи толть мархта машфтф хижинантень вастса кармайхть мазолдома од, удобнай, оцю кутт, и сембе тинь карматада эряма эсост, кажнайсь эсь смоковницанц ала, и пяк радостнайста и весяласта астада спасиба эсь шкайнтенди тейнть благодеяниянь кучемать инкса. Вов няйсасть.
А Татю беспомощнайста якась палф куд вастованза, сюволясь крфай шочкнень и серьгятькшнесь:
— Петь, а Петь, косат тон, кельгомняй? Юватть! — И ашезе маря, кода сире атясь Калистратыч корхтась тейнза:
— Ванк, аф вири ли сон ворьгодсь? Эзьке мон няине сонь. Ащень озада куд куцеманятнень лангса, мзярда тинь кудонте крьвязсь. Ванан: шаронды Петька горенцява, панарнянц яфии. Мон пешкодан тейнза: тостятьк, матаняй, кенкшть, тостятьк! Аньцек шарондсь сон, шарондсь, а сяльде мезевок ашезь карма няевома. Наверна, вири тусь эводемать эзда.
Но Татю, мезевок ашезь маря, аньцек седиец сязенчневсь пакшкянь-пакшкя.
— Петь, а Петь! Косат тон, кельгомняй? Юватть! — марявсь сонь уркодомац велеряй ломаттнень марстонь корхтамаснон ёткса.
Мекпяли, кафтошка ломаненди ужяльгодсь, и састь тейнза лездома. Сюволязь праф поталакть и сонь качаму обломканзон алда музь цёранять пондонянц. Сембе тела и шама бокоц, кона ульсь вяря, арась аф содави равжа массакс, но кона бокоц ащесь тияксть ширеса, илядсь апак токак.
Татю тятярьгодсь, сельме инголенза шобдалгодсь, и мяштьстонза сембе велеть келес лиссь седиень сязи уркодомац.
— Шкабаваз! няйсак ли?
Тя уркодомать марязе батюшкаське, и, шарьхкотьф, эряскодсь басямонза:
— Пеняцят? — корхтась сон ласковай укоризна мархта: — а Иовонь мяляфтсак? Аф? Так мон тейть лятьфтаса! Сон ульсь козя и слава мархта, ульсть иденза, стаданза и сокровищанза — и вдруг, шкайть мярьгоманц коряс, сембе сонь кядьстонза ульсть нелькфт: и иденза, и жуватанза, ялганза, а сонць ульсь урмаськофтф проказаса, паньф ошста и ащесь боком ош ортатнень ваксса назем лангса. Пинетне нолсезь сонь рананзон... пинетне! Но сембонь тянь инкса, сон аф аньцек ашезь карма пеняцяма, но сяда пяк кармась кельгомонза шкайть, кона максозе сонь. И шкайсь, няемок сонь тяфтама преданностенц, варжакстсь лангозонза. Аф лама пингонь ётазь Иов ульсь и шумбра, и козя, и славацка ингольцеть коряс сяда кассь. Стаданза сяда лама, иденза шачсть сатомшка, валса азомс, сембе...
Однака, и батюшкать азондоманзовок пачкотькшнесть Татювонди смутнай и мялень мольфти шумонь формаса. Сонь [ 45 ]сельмонза ванцть ся кить лангс, кона явфнезе Петькань шамаста целайста илятф бокть седькс арафть эзда, и сетьмоста тошкась:
— Шкабаваз! Няйсак ли?
Усадьбаса, ся пингть, добрай баяравась, Анна Андреевна Копейщиковась, празновандазе эсь шачема шинц. Пуромсь аф лама, но искренняй ялгат: предводительсь Кипящев аванц мархта, исправниксь Шипящев племянницанц мархта, а нинге Иван Иваныч Глаз, партикулярнай ломанць, конань колга корхнесть, што сонь пингстонза кяльце сускфста эряви кирдемс. Впрочем, сяс мес тяса ульсть сембе стама ломатть, конатнень пингста тожа эрявсь кяльце кирдемс сотфста (сонць Анна Андреевна корхтась, што сон кати-коса „служай“), то Иван Иваныч марязе прянц тя компанияса пяк удобнайста. Ульсь тяса и батюшкаське поп-аванц мархта.
Анна Андреевна ульсь генералонь удава, кизонза малость нильгемоньда ламоль, нинге мазы и особенна цебярьста няевсь роскошнай бюстонц мархта балхнень и вечерхнень эса, коса обязательна декольте и сонь бюстоц приковывал эстейнза сембе возрастонь и сембе оружиянь ломаттнень сельмованфснон. Но сон раз навсегда мярьгсь эстейнза: ни-ни — тя аделаф! И сембе эсь прянц максозе эсь идензонды. Тянкса светса сонь колганза корхнельхть: — тя святой, а патриотизмать инкса: тя кеме патрицианка! Кода и сембе русскяй даматне, сон корхтась французскяй кяльса, содалезе аф ламда арифметикать, аф ламда географиять и аф ламда мифологиять, (ах, тя беднай Ледась!), ламос эрясь границать тона бокса, а мекольдень пингть арась патриоткакс и кармась кельгомонза „добрай русскяй народть“. Колма кизот тяда инголе сон якась родной Корбылевав и сяда меле эрь кизонда яксесь тоза. Покойнай мирденцты саду строясь мавзолей и эрь шиня озончнесь. Кинь мархтонга ашезь знакомондакшне, „порядкань“ испытаннай „ялгадонза“ башка, хозяйства ашезь вяте, а моданц макссезе мужикненди пачк и, кода няеви, ульсь экономкакс. Сонь ульсь цёрац Сережа, кемготува кизоса правовед, и кемзисемге кизоса стирец Верочка, эрек особась, кона тожа аф ламда содалезе арифметикать и аф ламда мифологиять.
Баярхне мрдасть церькавста и озсесть ни завтракама, мзярда ласьксть азомонза, што Софонихась палы. Батюшкась эстокиге тусь палыхнень корхнема; лядыхне ласьксть вальмятненди и ванцть. Качамонь оцю туцять эшксста толсь ашезь няев, но качамсь вармать коряс лийсь видеста усадьбав, и комнататнень эса марявсь сонь сяпи шинец. Ломатть тожа ашесть няев, но киге пожарти ласьксть шабра велень крестьянонь и дворовайнь толпат.
— Тинь волянте, господат, — мярьгсь, мекпяли, Анна Андреевна: — а мон не могу илядомс равнодушнай ванондыкс. Вдь [ 46 ]синь — моннет. Кяжи ломаттне явфтомазь минь, — надиян, временна, — но мон все-таки мяляфтса, што синь — моннет.
Но сонь ашезь када ськамонза самоотверженнай подвигонь тиема и сембе компаниясь тусь сонь мельганза.
— Да и вообще тя минь долгоньке, — сяда тов корхтась Анна Андреевна. — Кда ня крестьяттне улельхть нльне афи монь, все-таки минь священнай обязанностеньке — улемс тоса, коса страдандайхть. Минь беднайгодоме, минь обжафтама... но минь сембонь юкстаськ. Минь мяляфтсаськ аньцек сянь, што минь лангозонк ваны страждущай ёмла брадоньке!
Содамок, што ся шиня рабочайхненди и дворовайхненди пидесть кшит, сон мярьгсь керсемс несколька кши пакшкянь-пакшкя и кандомс палыхненди.
— А ванды тага пидетяда кшит минценнетненди... эряви жа! Да тясть юкста салса почедомс!
Валса азомс, тиезе сембонь, мезе ульсь сонь властьсонза, и, мекпяли фатязе портмонетонц, мярьгсь: тя всякай случайнди! И Верочкась, тядянц лангс ванозь, сявозе заветнай валда монета мархта кошелеконц.
Компаниясь лоткась веле пети, но Верочкась и мамзель Шипящевась ашесть кирде и тусть ульцява веле потму.
— Азость мужикненди, што тейст мон кафта четвертть розь жертвондан! — пешкодсь синь мельгаст Анна Андреевна.
Ветешка минутада меле Верочкась сельмоведь мархта ласьксь меки.
— Ах, тядякай! — мярьгсь сон: — тоса ули беднай ава, конань палсь цёраняц! Ах, кодама страшна... Мезе сонь мархтонза тиендеви! Батюшкась корхни эсонза, а сон аф кулхцондсы, аньцек мярьгонди: Шкабаваз! Няйсак ли? Тядякай! Тя ужасна, ужасна, ужасна!
— Ужяль беднайсь; но кодамат тон, однака, нервнаят, Вера! — тись упрек тейнза Анна Андреевна. — Тяфта аф эряви, монь другозе! Эрь мезьса промысел — тя васендакиге эряви мяляфтомс! Конешна... Тя оцю юмафкссь: но эряйхть и аф тяфтапт, а минь покориндакшнетяма и кирттяма! Мяляфтсайть Баймаковонь крахонц и минь текущай счетоньконь... Макссесь 6 процентт... и мезе ина! Впрочем, цёфксть басняса аф аннесазь. — Господа! — мярьгсь сон вакссонза ащихненди: — тийхтяма аф оцю пожертвования беднай страдалец-тядять пользас! Кие мзяра может!
Сонць трнаты кядьса лихтсь портмонетстонза десятирублевай каготкя, путозе сонь кядьлапшенц лангс и венептезе кяденц. Верочкась эстокиге путозе тоза сембе эсь кошелеконц: инжихне тож а лихтсть мелкай несколька ассигнация. Аньцек Иван Иваныч Глаз шарфтсь шири и вяшкондсь. Пуромсь колмогемоньшка цалковай.
— Ну, вов, кандыть тейнза! — мярьгсь Анна Андреевна стиренцты: — азк, што светсь аф добрай ломаньфтома. Да [ 47 ]нинге весть азк мужиконятненди розть колга... кафта четвертть! Да кши кандсть ли? Мярьк, штоба яволезь! Тя васень вачашить ётафтомс!
Верочкась вишкста ласькозь тусь. Тейнза тя минутаня няевсь, што сон — ангел-хранитель и менелень лазурьса сиянь паця мархта лиенди, кядьсонза колмогемонь цалковай.
И вдруг — ангел-хранительсь.
— На тейть, матаняй! Тядязе кучезень! — корхтась Верочкась, венептемок ярмакнень.
Татю мезевок ашезь шарьхкоде, нльне ашезь варжакста милостынять лангс.
— Сявить, строптивай! — корхнезе сонь батюшкась: — добрай баяраватне ужяльттядязь, а тон аф сявсайть.
Нльне мужичокне интересовандасть и кармасть корхнемонза:
— Сявить, Татю акай, сявить, кли макссихть! Кудонди кондястихть... Сявить!
Татю афи шерьхкозевсь.
Верочкась ащесь мзярс, путозень ярмакнень мастору и тусь огорчённайста. Батюшкась кеподезень синь.
— Ну, кда тонь аф мяльце сявомс, — мярьгсь сон: — так мон синь церковнай украшениянди карьхцясайне. Вов минь паникадиланьке кальдяв, так минь таштонять ломс макссаськ, да ня ярмакнень мархта марса добуватама од! Уледа свидетелькс, православнайхть!
— Тядяй, сон ашезень сяве! — корхтась Верочкась сельмоведь мархта вайгяльса.
Дивандазевсть.
— Однака, тя душоксь синь эсост нинге ули! ашезь лихтев! — загадочнайста мярьгсь Глазсь.
Но тя случайста Анна Андреевна ашезь согласинда сонь мархтонза.
— Ули душоксна — тя виде; но аф эряви юмафнемс сельме ингольде сонь крхка горянц! Аньцек тядянь седись может шарьхкодемс, мезе стамсь юмафтомс... цёрацень.
Предсказанияц батюшкать видекс лиссь. Кафтошка кизода меле мон ётань Софонихать вакска и няень сущай метаморфоза. Сире палф васттнень эса ащесь сери и ингольцетнень коряс просторнай, од кудонь порядка. Прясна, правда, ульсть [ 48 ]вельхтяфт шужярьса, но кода щёткаса сеентьфтольхть, стане, што сельмоце ашезь пичетькшне аф шужярь панкснень, аф нюрьги пакшкятнень лангс. Од струпне пиндолдсть шить каршеса, кода ваткаф алнят. Аньцек Татьянань куд вастса валяндасть апак кочкак палф голбешкат, а сонць велеста тусь кати-коза. Улема, святой васттнень эзга шаронды, христозть лемса. Мужикне эрясть дружнайста и, кода няеви, исправнайста. Работасть мяль мархта, выкупнойхнень и мирской платешнень паннезь недоимкафтома, пяшкотькшнезь повинносттнень: рекрутскяйть, улавоннеть и кинь тиемать. Кда жа мезе эрявсь сяда башка, то и сяньге пяшкотькшнезь мяль мархта.
Шипящев исправниксь аф содасы, кода шнамс синь.
— Тя велесь монь — васенце номерса! — корхтай сон.
Шкабавазсь лездоза, цёрат!
- ↑ Факт. 1872 кизоня сашендсь авторти крестьянка Заозерья велеста (Углицкяй уездонь) и няфнесь крайге палфкафта или колма билетт, но стане, што купоттнень целайста илятф кучкастост няевсть и билетть, и сериять номерсна. Мон эняльдень кой-кона добрай содафоненди ходатайствовандамс банкаса. Сембонди няевсь, што тевсь лиси; но банкать эстонь управляющайц г. Ламанский, рассудил илякс. Полафтомс билеттнень или пандомс синь инксост нльне нарицательнай питнесна оказался невозможнайкс. Тя, кода няйсасть, польза банкати. Вов тяфта истиннай сановникне вантфтсазь казнать интересонзон.
(Прим. Н. Щедринть).
 This is a translation and has a separate copyright status from the original text. The license for the translation applies to this edition only.
| ||||
| Original: |
| |||
| Translation: |
| |||
