Колхозонь эряф/1941/03/Золотой узерь
| ЗОЛОТОЙ УЗЕРЬ |
Эрясь-ащесь белай светса удавань цёра. Сон одста нинге тонадсь плотничендама. Работакшнесь ломанень пяльге, эсь кудсонзонга. Тяфта трязе эсь сире тядянц.
Весть вов тусь сон вири, лесонкса, ялга. Керсь кодама эряви шуфтт, и сась симомац.
Маласонза ульсь эрьхке. Сявозе узеренц кядезонза и тусь ся эрьхкти симома. Симомстонза афи шарьхкодсь, кода узерец курьгодсь берякста и ваясь.
Ведсь крхка. «Аф муви, аф таргави тяни», — арьси цёрась и озась эрьхке трвав и кармась авардема. Авардсь кувать али аф кувать, лиссь вирьста атя и корхтай цёрати:
— Цёра, мес тон тяфта авардят?
Цёрась азондозе беданц, и атясь комотсь ведти. Таргась ведьста золотой узерь и кизефнесы цёрать:
— Тя тонь узерсь?
Цёрась отвечай:
— Аф, атяй, монь аф тяфтама узерезе.
Таргась атясь сиянь узерь:
— Тя тонь узерсь?
— Аф монь.
Чопафтсь атясь колмоцеда ведти, таргась простой узерь и кизефтезе:
— Тя — тонь?
— Ага, вага тя — монь.
Максозе атясь узерть и мярьгсь цёрати:
— Раз тон аф жаднаят, сявить ня узерьхненьге: золотойтьке и сияннетьке. — Лихтезень пол алдонза и максозень.
Сась цёрась куду, кармась эряма, — козякодсь и рьвяясь.
Марязе велестост фкя козясь, кодама паваз угадякшнесь беднай аляти, и мяльшась сяда оцю козяши сатомс. Сявсь кядезонза узерь и тусь вири пенгянь керома.
Мольсь сон сяка жа васту, музе ся эрьхкть, нолдазе узеренц ведти и сонць аварьгодсь нарошна.
Лиссь сяка атясь и кизефтезе алять:
— Мес тон авардят? Кодама бедаце?
— Кода тейне аф авардемс? Монь узерезе ваясь тя эрьхкти, лия тейне аф рамави.
[ 76 ]Чопафтсь атясь ведти и таргазе козять сонцень простой узеренц.
— Тя тонь узерце? — кизефтезе сонь.
— Аф, тя аф монь...
Тага чопафтсь ведти. Таргась сиянь узерь и кизефтезе:
— Аля, тя тонь?
— Аф, монь сяда цебярь узерезе.
Тага чопафтсь атясь ведти и таргась золотой узерь.
Козясь кенярдсь:
— Ага, вага тя — монь узерезе!
Атясь мярьгсь козяти:
— Раз тяфта жаднаят, то на тондейть узерцень. — И венептезе алять сонцень шямоню узеренц. Сяльде атясь чопафтсь меки ведти и ашезь лисе. А козясь тянемс учси эсонза.
| Сёрмадозе Юртаев Егор Васильевич (Ельниковскяй райононь Сире-Пиченгуж веле). |