Колхозонь эряф/1940/04/Чапаевсь/4
[ 58 ]
| IV |
| Александров-Гайсь |
Федоронди азондозь, што поездса сонь Алгаю (тяфта нюрьхкяняста мярьгондсть Александров-Гайти) пачфтьсазь цють ли аф омбоце шиня. А тоса лиссь, што Ершовса, Урбахса и Краснай Кутса — пересадкат. Колма пересадкат — шутка ли азомс! Кие 1919-це кизоня арнесь машинакитнень эзга, ся верондай, што ки лангса кирдемс колма пересадкат — тевсь мучительнай [ 59 ]и ёфси аф тёждя. Приблизительнай лувкснень коряс, средняй нормати пачфтезь, Федорсь лувозе, што тя арнемась сяви недяляшка и пялешка. Сяс арьсесь оду, Дергачнень эса валгсь, сявсь алашат и тусь перекладнойхнень лангса: тяста видеста Александров-Гаи сяда ведьгемонь вайгяльбет.
И оду степь, просторхт, голубой горизонтт, ловонь пефтома келет. Кой-коса эвондасть ни солаф вастт — равчкоткшнихть илештьф модать бугорнянза. Кда аш вию варма, шить эжди шинясь, лямбе, — значит курок тундась сай моразь. Степть эзга велетне тяса шурот: комсь ветие — колмоньгемонь вайгяльбет фкять эзда омбоцети; эряйхть синь топоцта, замкнутай эряфса; тяса и невестатка лия велетненди кржа макссихть, — синценнетнень мархта тиендеви тевсна, сембе и сембонди сатнихть ёфсикс. Эрь велесь — бта афоцю республика: эсь прянц марясы афзависимайкс, киньге мархта и мезьсонга аф нуждандай, ули оцю склонностец башка эрямати. Ня оцю велетне, конатнень пачк сави ётнемс Алгаю, кирдсть пяк оцю роль уральскяй степнень гражданскяй войнаснон историяса: Осинов-Гайсь, Орлов-Гайсь, Куриловась... Ня велетне макссть аф аньцек башка доброволецт, — синь макссть анок якстерь полкт. Виде, што няка жа велетнень эзда аф кржа кулакта тусть белайхненди, но лядонды несомненнайкс, што сяськомась фалу ульсь якстерьхнень ширеса. Мзярда Куриловав 1918-це кизоня яцесь казарась и, тозкстонь кулакнень мярьгомаснон коряс, кармась фатнемост советскяй работникнень, — кеподсь сембе огромнай велень массась, вооружиндась пря, кие мезе мусь, шавозень казакнень, лятксснон панезень ёфси и эста жа арьсесь тиемс эсь особай полкснон: тейнза лем ульсь путф Куриловскяй. Примерна тяфтама жа обстановкаса ульсть тифт и лия тостонь полкне: Домашкинскяйсь, Пугачевскяйсь, Стенька Разинонь, Новоузенскяйсь, Малоузенскяйсь, Краснокутскяйсь. Синь васенда пуропневсть сянкса, штоба араламс эсь родной велеснон; боецне и командирхне (комиссархт эста нинге ашельхть) ульсть сембе тяка велень жа. Ладямась ульсь, содаф, пяк цебярь; тяка ломаттне фкя фкянь содасть кемоньца лувондови кизот, сидеста ульсть кунардонь ялгат, ламотнень содондозь и родственнай отношениятне — Куриловскяй полкса служендасть, кепотьксонди сявомс, алясь вете цёранзон мархта. Ульсть, азсаськ, и стама тефтка, што мзярда-бди маластонь ялгатне вдрук явондсть: фкясь тушендсь белайхнень мархта, омбоцесь молендсь якстерьармеецокс, родной полкозонза; ульсть и нинге сяда дивандафты тефт, мзярда фкя семьять членонза явондсть кафта пяльксова: фкясь белайхненди, омбоцесь якстерьхненди.
Сембе ня тостонь полкне, конат пуроптфт эсь велеснон араламаснон инкса, курок ульсть вынужденнайхть событиятнень молемаснон пингста кадомс родной васттнень, тумс ичкози уральскяй степненди, тоста Колчакть каршес, Колчакть эзда — оду степненди, степнень эзда — панскяй польскяй фронту.
[ 60 ]Лиятнень мархта марса заслуженнай — геройскяй полкокс лувондовсь мусульманскяйсь, конанц эса ульсь кемнилие национальность; тя полкть эса сембода ламоль киргизда, конатнень тяда инголе апак ужяльтть и совозьфтема эксплоатировандакшнезень зажиточнай тунеяднай казачествась, конанц пефтома пяк афолезь няй. Ня добровольческяй полкне тиендсть афкукс героическяй тефт: снарядфтома, патронфтома, кальдявста и афсатомшкаста вооруженнайста, кяпе — крхтапа — синь кувать кирдсть, кемоста и храбрайста тюрсть, ламоксть и сатфкс мархта пикссезь советскяй властть каршес кепотьф уральскяй казачествать. Боевой ширде синь ащесть фалу цебярьста ушетксть эзда сявомок и аделамати молемс; политическяй ширде синь кенерсть аф эстакиге и аф эстакиге фатязь и шарьхкодезь вишкоптьф социальнай тюремать туфталонц и эшканц: лафча дисциплинась, „волять“ колга своеобразнай арьсемасна, комсоставть кочксевоманц инкса кувака пингонь тюремась, центраста сашенды задачатнень и директиватнень аф яснайста и аф точнайста шарьхкодемасна, — сембе ня признакне нинге кувать—кувать отличандакшнезь ня молодецкяй добровольческяй, эхярь крестьянскяй полкнень центральнай Россиянь полкнень эзда.
Александров-Гайсь кржаса мезьса отличандакшни лия „гайхнень“ эзда — Орлов-Гайть, Осипов-Гайть эзда, да, пожалуй, и сембе степной велетнень эзда, конат пяк похожайхтельхть фкя фкянь лангс: велеса куттне фкя фкаста ащихть ичкозе, просторнай, кучка видесь рдазу, пензон эса аф лисемшка-аф ётамшка. Ся пинкнень Александров-Гайсь ульсь пяк оживленнай вастокс: тяса ульсть бригадать штабоц, политическяй отделсь, различнай командат, боевой частьть. Шильнай Балкать, Бай-Турганть и Порт-Артурть, Уральскяйть шири — сембе шири мольсь вишке движения, кирневсь соткс от воинскяй частьтнень мархта, то руководящай центратнень мархта; апак лотксек мольсть повозкатне, тушендсть и сашендсть од ломаттне; ков-бди эряскодсть фкя вастса ащемань аф кельги кавалеристтне, крестьянскяй подводатнень лангса мольсть и люкасть гордай верблюттнень лангса целай воинскяй караватт, усксесть тяста, усксесть тяза, шамнезь, вачксезь, — сембе вастова вишкста мольсь эряфсь: тяфтамкс сон, наверна, аф сяда инголе, аф сяда меле Александров-Гайса ашель. Тозкстонь „интеллигенциясь“ площадть тейса и главнай ульцява эрь илядня тиенькшнесь гуляндамат ярманканнетнень лаца, и тяса, содаф ашесть нува якстерьармеецне, конат ся пингти очаровандазь алгайскяй авань персоналть аф пяледа кржанц.
Бригадать политическяй отделоц пингста пингс организовандакшнесь митинкт кода якстерьармеецненди, стане и шоряфт. Ня митинкнень эса сембода пяк азонкшневсь стереотипнай „текущий пингсь“. Велеряйхнень таргамс политическяй эряфс, содаф, ульсь сяда стака, чем якстерьармеецнень, — нят [ 61 ]пуромкшнесть охотнайста, кулхцондсть мяль вельде, эняльдсть пуропнемс синь сяда сидеста, азондомс сяда лама и сяда подробнайняста. Мяльсь пяк цебярь, но сонь пяшкотькшнемс сашендовсь аф фалу и аф аньцек политическяй вийхнень афсатомаснон сюнеда, аф, вийда ся васттненди и эстонь пинкнень, пожалы, ульсь и сатомшка, — сидеста серьгятькшнемс митинкненди и пуромксненди ашельхть кода военнай обстановкать сюнеда: перьфпяле казакт, врьгятемс могут апак учт, кда пуромфста сатсазь аф вооружиндаф боецнень, могут тиемс аф кржа бедада.
Политическяй отделса эста прякс ащесь петербургскяй рабочайсь Николай Николаевич Ежиковсь, нинге ёфси од ломанць, комсь кафтувошка кизостось, но кенерьфсь, ёнусь и серьезнайсь. Ежиковсь ся пингста ульсь и бригадань комиссаркс. Велеса аф аньцек команднай составсь и якстерьармеецне, но и эряйхневок относились Николай Николаевиченди оцю уважения мархта. Сонь кельголезь простой, ёну ласковай валонкса, сянкса, мес зря изь макссе обещаният, а кда весть макссь вал, валонц пяшкотькшнезе, сянкса, мес велеса ашельхть кодамовок беспорядкат, и тя правас коря лувондовсь якстерьармеецнень лангс сонь моральнай воздействиянцты. А боецне кельголезь сонь — сембода пяк кельголезь сянкса, што похоттнень эса сон фалу ульсь синь мархтост, бойхнень эса сон сонць ащесь пеке кедь лангса и ласьксь цепть эса, прянц вятезе кода равнай ялга.
Эряви азомс, што ся пинкнень — 1919-це кизоть васенце пяльксстонза — Якстерь армияса вообще апак ладяколь кода эряви политическяй работась. Сонь форманц и методонзон ашезь сотце, и ламосна политработникне, сембода пяк младшай комиссархне, ульсть проста сембода сознательнай боецокс, конат эсь примерснон мархта няфнезь, кода Якстерь армиянь воинти эряви кирдемс вачашить, обувкафтома и одежафтома якшамть, кода эрявихть сяськондемс стака похоттнень сталмоснон и лишенияснон, кода эряви тюремс эрекста, а кда эряви спокойнайста, честнайста куломс. Апак лотксек бойхне ашесть макссе возможность недялянь и нльне ковонь пингс ётафтомс хотя ба кодама-кодама сосредоточеннай и систематическяй работа. Лотксесть, случайнай „политналеттнень“ лангс, а настоящай политическяй работать кадондозь сяда цебярь пингонь самс. Ялександров-Гайть тейса обстановкась ульсь аф сяда кальдяв, аф сяда цебярь, чем лия васттнень эса; резерватне ульсть ёмланят, ваймамаса синь ащесть аф кувать, а боецнень главнай массасна апак полафнек ащесть ляцендемань линиять эса. Политическяй отделонь работникне, сяда башка, конат вятсть „озада ащезь“ работа, сяка тевсь политотделста арнесть позицияв, тоза усксесть литература, од распоряженият, инструкцият и руководстват, латцесть тоса соткс комиссархнень мархта, партийнай ячейкатнень мархта, [ 62 ]инструктировандакшнезь нятнень и тонатнень, кда удалакшнесь, вятсть работа и якстерьармеецнень ёткса, а кда малаткшнесь нуждась — кадондозь эсь инструкцияснон, сявондсть винтовкат и тушендсть бойс. Как раз ся шитнень, мартть васень шинзон, бригаднай политотделть колма сотрудниконза юмасть афровнай тюремаса, мзярда лощинава потасть меки аф лама якстерьармеецнень мархта пяк лама казакнень яцемаснон пингста.
Крестьянскяй полкнень эса политическяй работникнень авторитетсна кирневсь аньцек кода Якстерь армиянь мужественнай и честнай воинонь авторитет. Николай Николаевичень тя тевса путнезь пяк сери вастс, и боецнень ёткса сонь путнезь сембода цебярь кепотьксонди.
Мартть васень шинзонды позициятне ульсть Порт-Артурть — ёмла и вдребезги тапаф поселкать тейса, конац ащесь Сломихинскяй станицати молема кить лангса (Алгайть эзда несколька кемоньца лувондови вайгяльбет); тя станицать пачк можналь лисемс Уральск — Лбищенск — Сахарнай — Гурьев оцю кити. Армиясь, конанц центрац ульсь Уральскяйса, арьсесь маладонь пингть кеподемс общай наступления и комбинированнай действиятнень вельде казакнень панемс васенда сяда ичкозине Уральскяйть эзда, а тоса и ёфси машфтомс казацкяй армиять. Александров-Гайть эзда эрьхтемась должналь прважавомс Сломихинскяй станицать шири, и сяда меле наступлениясь эрявсь вишкоптемс Чижинскяй шяйть туркс, лисемс Уральскяй—Гурьевскяй оцю трактти. Тя маневрать мархта персевсь кись казаконь частьтненди, конат потайхть якстерь войскатнень люпштамаснон эзда, Уральскяйть ширеса. Наступлениянь шись маласоль. Алгайскяй бригадась аноклакшнесь пяк вишкста.
Кодак аньцек пачкодсь станицав, Федорсь тусь политотделу. Тоса сонь сявозь Николай Николаевиченди. Сон, равжа оцю орса щафста, прясонза пяк отала вазьса, валенкаса, ащесь озад а шава, сери, ёфси апак уштт кабинетса. Ащесь ськамонза и кельмоть эзда якстерь трнаты суронзон мархта сюволясь кагодонь ворохть эса, конат ащесть шрать лангса.
Кабинетса убранствась убогай: шра да стул — сяда башка аш мезевок. А шрать лангса — дряннай, трёшниконь тии карандашень пенят, подозрительнай урдаз мархта лампадканя, улема — ся чернилаль, ваденьф ручка, конац сяда похожаель штань свеця лангс, эсь тиф пресс-папье, кафта политическяй книганят, кодама-бди „деловой“ журнал и целай ворох, разнай лаца кагодонь беспорядочнай ляпя мар. Шумбракстсть, содафтсть фкя фкянь. Федорсь тейнза няфтезе телеграммать, конань эса Фрунзесь корхтась, што „Клычков ялгась кучсеви александров-гайскяй группас работань вятема.“ (Бригадась тиендевсь группакс, — тиендевсть од частьть).
Ежиковсь каготкять лангс варжакстсь кода-бди [ 63 ]рассеяннайста и апак корхтак сонь мрдафтозе Федоронди. А тоса апак учт:
— Аде-ка, — корхтай, — мон сяфтя тонь. Чайда, што ли, симат, да и ваймат кида меле...
Федоронь мялецоль тяникиге Ежиковонь мархта вятемс деловой корхтама, куляксамс общай военнай положениять, политическяй работать состояниянц, перспективатнень, примаф мератнень, возможносттнень, — лиякс мярьгомс, — эстакиге кундамс тевс. Но Ежиковсь стане курок и заботендазь прважазе сонь эсь квартиразонза, стане охотнайста добувась лакафтф ведь и кши, што деловой корхтамась мзярс савсь кадомс. Комната сон занцесь пяк оцю шава квартираса; кучкаса зал, бокова — комнатанят; синь эздост фкяти лоткась и Федорсь. Залса ащесь рояль, и Ежиковсь, кодак аньцек озафтозе Федоронь шрать ваксс, мольсь рояльть тейс и фкять омбоцеть меле кармась кальдявняста морсема революционнай морот. Комнатаса кельмоль и увфоль.
Валом-валом ушедсь корхтамась. Федорсь ванць Николай Николаевичень од лофтана и суровай шаманц лангс касондсь мялец лангозонза ванондозь и марясь аф азомшка кеняндема сянь шарьхкодеманц эзда, што тяфтама цебярь цёрась тяса вяти руководства политическяй работать лангса. Кода тяфта эрси обычна, синь фкя частста кенерсть фкя фкянди азондомс эсь биографияснон, эсь ингольдень партийнай работаснон историянц и обстановканц, кода повсть фронту и мезе учсихть маладонь пингть. Корхтамась кода-бта мольсь ёфси нормальна, а Федоронди сембе няевсь, што Ежиковсь кати ков-бди эряскоды, кати нервничендай, кати обижаф мезть-бди мархта и аф довольнай. Шаманц коряс няевсь, што тя виде вайме, открытай и простой ломань, а тяни сон нльне Федоронь сельмоска изь варжакста вестевок видеста, — сембе чипорясыне сельмонзон да эхярь ваны кияксти, шовсесыне кядензон, аф ащи фкя вастса, сяка тевсь комотни, пеетькшни искусственна и аф виде ваймот, пяк ни предупредительна и эряскадозь семботь мархта согласиндакшни...
Мезень шяйтан, мес тяфта?, — эстейнза макссесь кизефкс Федорсь и ашезе сода, кода отвечамс, кода шарьхкодемс Ежиковонь.
Мольсть политотделу, кельме кабинету, и тяса корхнемась эсь эзонза примась пцтай официальнай направления. Ежиковсь сонць корхтась кржа и мезеньге колга изь азонда, а аньцек кулхцонткшнезень Федоронь кизефксонзон и нюрьхкяняста отвечакшнесь тейст — аф охотнаста, коськста, кода бта нльне аф мяль вельде. Мзярда кивок сувсесь сотрудникнень эзда, Ежиковсь сонь васьфнезе кенярдезь и ушеткшнесь пефтома кувака корхнема и, кода няевсь, ёфси аф эрявикс. Кда ба Ежиковонь эзда вообще можналь няемс кялень шовси — месть тяса дивандакшнемс ба? Но Федорсь правильнайста лувозе, што [ 64 ]тонац — нльне ёфси мекланкт — скупой корхтамаста и сембода пяк — деловой обстановкаса: тяса сон или максси распоряженият, или азондсы и объясняндакшнесы сяшкава, конашкава вешсы тянь сонць тевсь. Сяс Николай Николаевичень искусственнайста лишнаень корхтамац тага Клычковонди няевсь аф нормальнайста, и тага дивандась сон, мес ба шарондомс шири Ежиковти сонь, Федоронь мархта корхнематнень эзда, и тяшкава кенярькшнемс васенце сувси сотрудникти?
Нюрьхкяня ответтнень эзда можналь шарьходемс, што партийнай ячейкат везде улихть; товарищескяй суттне работайхть отлична; литература ули, лекцият, пуромкст и митинкт ётафневихть регулярна и сатфкс мархта и ст. тов и ст. тов, — фкя валса, тевсь ладяф образцовайста, и Федоронди ушеткшнемс и вишкопнемс работась, пожалай што, и афоле сави, сяс мес сон сась сембе аноконяти.
Кда азомс видеть, Федорсь и сонцьке эсь прянц марязе сатомшка стакаста лия работати кундамста. Сон тя пингс фронтса ашель, тяса мезевок изь сода и сяс Ежиковонь тейнза „тонафтомс“ ашель кода, да и сась сон сембода седивакскань мяль мархта работама, — аф мярьгондемс, а работамс: субординациять колга кизефксть шири сон мяль изь шарфне. Васенцедакиге корхтамста сон тянь колга азозе Николай Николаевиченди и сонь потмораста корхтаманц эзда ашезе шарьхкоде, парста или аф парста сон примазе сонь виде ваймот корхтаманц. Тяни кабинетса беседовандамста и скупой, люпштаф ответтнень получакшнемста, Клычковсь арьсесь действондамс пяк салаване и тактичнайста сяс, мес подозревандазе, што тонац обижаф сонь сей кучеманц мархта, конац Ежиковонь путнезе подчиненнай положенияс и валхнезе вярде вастть эзда, коза сон кемокстась кода бригадаса, стане и сонценьге Алгайть эса. Тя пингс сон ульсь единственнай авторитетнай политическяй центракс: тейнза мольсть сембе тефне, сонь ширденза сембе и фалу вешендсть ответ — аньцек ськамонза сонь ширденза, сяда башка киньге ширде ашесть вешенде. А тяни вдруг сась тя Клычковсь — целай группать политическяй главац, кона группати бригадась сувсесь аньцек кода часть... Баста! Сери вастоц может шерьхкозевомс. Клычковсь Ежиковонь афламнянь афламнянь может сяряфтомс и аерфтомс господствующай позициять эзда, — вов сомнениятне, конат, Федоронь койса, должеттольхть волновандамс Николай Николаевичень, вов туфталхне, конатнень сюнеда аф кяшендевиста аф ялгакс кармасть ванома Федоронь лангс синь: фкя фкянь мархта знакомондамадост меле фкя да пяле частта меле ни.
Оржаста ванць Клычковсь, сяда тов ашезь карма кизефнема и организаторонь марямать коряс шарьхкодезе, мезе эряви тейнза тиемс.
Васенцесь, сон арьсезе знакомондамс фактически, документтнень и отчеттнень коряс, бригадать работанц мархта, кда аф [ 65 ]Ежиковонь вельле, то сонь помощниконзон и сотрудниконзон вельде сатомс синь вельдест официальнай отчетт и всякай сведеният.
Омбоцесь, сон арьсезе сатомс сянь, штоба серьгядемс партийнай ячейкань, культкомиссиянь, контрхозкомиссиянь афоцю совещаният — конференцият, военкомонь пуромкст и ст. тов. Тя лезды тейнза сразу лама няемс и шарьхкодемс.
Сяда меле сон срхксесь ётамс частьтнень и ваномс тоса работать доподлиннайста молеманц и меколи, сай пингонь бойхнень эса ёрась улемс сонць кода рядовой боец и тянь мархта сатомс эсьтейнза цебярь ялгань и эрек ломанень лем. Тя обстоятельствась кармай кирдема влияния сембе сонь сай пингонь политическяй работанц сатфксонц или афсатфксонц лангс
Маластонь несколька шитнень, мянь наступлениять самс, Федорсь настойчивайста тиендезень эсь инголенза путф задачатнень. Сон аф весть ни беседовандась и организационнай, и культурно-просветительнай, и информационнай отделениятнень эса, но сембе вастова васьфнесь инголявак содаф кальдяв и аф ялгань прием: Ежиковонь влиянияц марявсь сембе вастса. Стакаста тейнза сякокс жа удалась получамс сатомшкаста подробнай отчет марнек работать состояниянц колга. Докладсь пяшксель общай вастта, — тя афсатыксть кемонень, сядонь крда васьфнезе Федорсь и сяда меленьге, мзярда примась сяда оцю политическяй работа. Кода эрьси, корхнемась ушеткшни „Адамть“ эзда, тоса молихть корхтаматне „хаотическяй состояниять колга“, конац ульсь васенце пингть, тоса азондови, што „работась латцеви“, но кой-кона вастса нинге „аф кода эряви“; докладсь аделави примаф лама „плодотворнай мероприятиятнень“ мархта, конат, корхтамска аш месть, аерфнесазь сембе уликс афсатыкснень.
Лиякс азомс, гордай валхнень ёткста можналь шарьхкодемс, што полкнень эзга сатомшкаста лац и виде ваймот усксевихть книшкатне и тиендевихть библиотеканятне; сёрмас тонафтомань школатне ёфси лоткафтозь эсь деятельностьснон боевой операциятнень сюнеда, а мзярда синь работасть, то эзост яксекшнесть кальдявста, всякай комиссиятне кода бта эряйхть формальна и организовандафт сембе вастова, но синь работаснон колга точнай сведеният аш; митинкт ётафневихть, но шуроста, сянкса вов любительскяй кружокне спектакльхть тиендихть сидеста, и ваномост якайхть охотнайста. Тяфтама жа марнек докладсь. Кой кодама представления работать колга, конешна, макссесь и тя коськя реляциянясь, сякокс жа Федорсь сембода пяк надьясь частьтнень ланга личнай молеманц и тозк работать мархта непосредственнай знакомствать лангс.
Тяряфтсь сон тердемс кой-кона комиссархнень, — инголивок содаф кальдяв отношения сон васьфтсь тясонга; назначендась ячейкань представителень пуромкс, — сон и ёфси изь пуром; [ 66 ]назначендась митинг, но политотделсь тянь колга пачфтсь куля лафчста, и пуромсь ёфси случайнай публика, ведьгемоньшка — кодгемоньшка ломань.
Тевсь изь моль. Кувать тяфта молемс ашель кода. Федорсь аньцек учсезе Чапаевонь саманц; тя самась, верондась сон, керсы гордиев сюлмоть, няфтьсы уликс положениять сембе афшарьхкодеви ширенц.
Омботь — ули наступления. Мес ина тя пингс изь са Чапаевсь? Федорсь кучсь кизефтема армияв, но ответ ашезь получа. Ванды кеподихть Казаконь Таловкать лангс, Порт-Артурть шири мекольдень частьтне; наступлениять самс синь кармайхть улема исходнай пункттнень эса.
Штабса назначендаф мекольдень заседанияса мекольцеда ванондови наступлениянь детальнайста тиф планць. Наступлениясь кармай вятевома фкя пингста колма вастова; арьсеф аф сяшкава апак учсемать лангс, конашкава эсь общай организованностьснон и минь техниканьконь, сембода пяк пулеметтнень, преобладаниянц лангс. Федорсь, конац эста нинге кальдявста шарьхкотькшнезень военнай кизефкснень, внимательнайста кулхцонкшнезе семботь, мезе корхневсь тя военнай советса, но сонць обсуждениятненди и споряматненди изь сувсе, аньцек ванондсь фкя, омбоце, колмоце „спецть“ шамас и думандась:
„А тя — кали предатель? И кали сембе тя пафоссь — аньцек фикция, прянь няфнема, минь брадоньконь сельмонзон пяшкотькшнемасна? А ванды, кодак аньцек сембось ули анок, кали ялгатнень эзда синь арайхть врагокс?“
И сембода пяк оржа сельмоса ваймонь шуроста тарксезь сон ванондсь полковникть, бригадать командиронц шамас.
Но комбригть шамац ульсь стама, мезсь аф кепси пелема, — сразу малатьфти эсь малазонза, мярьгонди верондамс.
„А сякокс жа тон, комиссар, ульхть на чеку“!
„Советть“ заседанияц аделаф. Сембе тушендсь штабста.
Ся шиня шиньберьф и иляденьберьф фкясь омбоцеть мельге, транспортсь транспортть мельге, караванць караванть мельге тушендсть Казачяй Таловкать шири. Шамондсь Александров-Гайсь. Ванды туйхть мекольцетне: сон ляды сиротакс и беззащитнайкс.