Колхозонь эряф/1940/01-2/Талантливай поэт-лингвист
| ТАЛАНТЛИВАЙ ПОЭТ-ЛИНГВИСТ |
1939 кизонь декабрьста топодсь сяда киза коминь васенце поэтть Иван Алексеевич Куратовть шачема шистонза сявомок.
И. А. Куратов коминь литературать основоположникоц, талантливай поэт-лингвист. Сон лама работась литературнай кяльть лангса.
Русскяй княсне и оцязорхне крёзть, нагайкать и винать вельде ветесятт кизода ламос коминь народть кирнезь стака эксплуатациянь ала, конац сембода пяк вишкомсь XIX векть васенце пяльксстонза. Коминь народть ашель сонцень писменностец, аньцек комозце пяльксонц сонь маштсь лувома рузкс.
Но коминь народть юрнай творческяй духоц оцязоронь самодержавияти ашезь матов. Сон эрясь народнай ёфкснень, моротнень, свадьбань ольксематнень эса — устнай народнай творчестваса, конань лангса ашель вийсна оцязоронь сатрапнень. Ня ёфксне, моротне азондсть народнай горять, бесправиять, кабалать колга. Печальнай ульсь тя народть поэзияц, но сон эрясь. Сон ашезь машфтов аф кельме пря чиновниконди, аф колониальнай гнетти. Коминь народнай поэзиять колга эсь очерксонза пяк цебярьста сьормадсь Пушкинть современникоц — Н. И. Надеждин.
Надеждинть, „Телескоп“ журналть издателенц и редакторонц, оцязоронь правительствась панезе ссылкас, сяс мес сон журналсонза печатлась эсь ялганц Чаадаевть „Философскяй сёрманзон“. Надеждинть панезь Усть-Сысольск ошу (тяни Сыктывкарсь — Коминь автономнай советскяй республикать столицац).
Надеждин тонадозе коминь кяльть, бытть и оцю мяльса кармась сёрматкшнема и тонафнема тя народть устнай поэзиянь произведениянзон. Эсь очерксонза сон сёрмады, што „коминь народнай поэзиясь простой, правилафтома, безыскусственнай, сонь аш школьнай сановитостец, салоннай кокетствац, аш классическяй парикоц, романтическяй сакалняц, и аф ваномок тянь лангс, ули эряфоц, волшебнай, очаровательнай прелестец. Тяфтама фалу и везде — народнай поэзиясь...“
Фет Тютчевти лемтьф стихотворениясонза сьормадсь:
Чукчатнень аш Анакреонцна, |
Ня стихнень эса Фет азсь крепостникнень мяльснон, конат лувондозь, што культурань ценносттнень, наукать, искусствать, [ 93 ]литературать поэзиять может тиендемс аньцек дворянствась, нароттне жа, сембода пяк конат ащихть культурнай развитиянь низкай уровеньцна, тянди аф способнайхть.
„Чукчатнень аш Анакреонцна, афи ули сон“, — тяфта эряви шарьхкодемс тя стихсь. И тевсь тяса аф чукчатнень лангса, сяс мес тя народть Фет сявозе символкс человечествать ся пяльксонцты, конанцты бта природась ашезь макс способность тиендемс культурнай ценностть, конанцты, бта, аф шарьхкодеви древняй Грециять, русскяй дворянствать культурац.
Мзярда Фет тяфта сёрмадсь, сон ашезь сода фкя пяк интереснай явления: коминь народть ульсь ни Анакреоноц! Тютчевти посланиять кучемда кеветие кизода инголе Анакреонть лама моронзон эсь кялезонза ётафтозень коминь поэтсь И. А. Куратов.
Иван Алексеевич Куратов шачсь 1839 кизоня. Аляц сонь ульсь пономарькс, а сяда меле дьяконкс. Тядяц ульсь крестьянка. Иван Куратовти ёрасть сатомс духовнай карьера. Но мзярда тейнза топодсь кемонь кизот, аляц сонь кулось. Оцю семьясна эрясь беднайста, тядяц пичедезь старандась идензонды максомс „образования“, максомс синь кодамовок школас тонафнема. Севернай якшама фкя тялоня тядяц идензон мархта мольсть Сыктывкару. Сыктывкару сонь идензон школав ашезь прима. Тяста синь тусть — Яренск русскяй ошу, ётасть кафта сядошка вайгельбе ялга. Ламос мольсть. Няйсть лама вачаши, якшама. Тяса, оцязоронь чиновникнень пильгс ламос комсемада меле, ёлма Куратовть (будущай поэтть) примазь духовнай школав. Тядяц пяк кенярдсь: цёрац тонады и арай попокс.
Йоню цёранять мяльс пяк ашезь ту духовнай школаса суровай, палочнай дисциплинась. Яренскяй школаса ученикнень пиксселезь аш мезенксонга. Будущай „пастырьхнень“ пикссезь стане, што шовдава панарсна сашендовсть начфнемс лямбе ведьса, штоба аерфтомс сонь веры ранатнень эзда. Сембода лама сатнесь коренной населениянь ученикненди.
Сяда меле Куратов фкя эпиграммасонза тяфта азозень мялензон эсь тонафтыенц колга:
Монь тонафтызе пилезон най торась, |
Яренскяй духовнай школать аделамда меле Куратов ступиндась тонафнема Вологодскяй духовнай семинарияв. Тяса сон салаване знакомондакшни „гражданскяй“, светскяй литературать мархта: апак лотксек лувонды Пушкинть, Гогольть, Лермонтовть, Плещевть, и русскяй лия поэттнень и писательхнень. Тяса сон васенцеда кармась арьсема эсь судьбанц и сяда товолдонь деятельностенц колга. 1857 кизоня семинаристть тетрадьсонза эвондакшнихть васенце стихонза коминь кяльса. Тя [ 94 ]кизоня сьорматф „Коми кыв“ („Коминь кяльсь") „Корысть и кулэм“ („Атясь и куломась“) и лама лия стихотворениянза.
Куратов кармась пяк кельгомонза поэзиять, прокс арьсезе аердомс духовнай карьерать эзда и арамс народнай учителькс. Вологодскяй семинариясь сонь кучезе Москуву, духовнай академияв, но Куратов ступиндась Казанскяй университету, коса кармась тонафнема восточнай кялень факультетса. 1862 кизоня сон мрдась шачема вастозонза и колма кизот работась приходскяй школаса младшай учителькс.
Куратов нюрьхкяня эряфстонза тя кизотнень пингста работась сембодонга лама. Аф ваномок сянь лангс, што пяк лац содальхце латынть, греческяй, французскяй, немецкяй и лия кяльхнень, сон нинге тонафнесыне синь, оцю мяльса работай родной кяленц проблеманзон лангса, тонафнесы фольклорть, лама сёрмады. Сон сёрмады стихт и морот, конат ётнихть кургста кургс, синь морсесазь коминь лама велева и мянь Сыктывкарса. Тя пингста жа сон сёрмадозе эсь оцю статьянц коминь кяльть колга.
Но аф ламос тейнза савсь работамс и эрямс эсь родинасонза. 1865 к. Куратовть кучезь военно-судебнай чиновникокс Средняй Азияв. Тя ульсь замаскированнай ссылкакс. Куратовть панезь ичкози родной вастонзон, кяленц эзда, конань вельде сон мог сяда товонга видендемс народть ёткса „вреднай идеят“. Сонь панезь революционнай стихонзон инкса, конат ульсть шарфтфт оцязоронь стройть, Александр II каршес.
Куратов, мярьгат, содазе шачема вастонц эзда ичкозе куломанц и 1865 кизоня сёрмадсь гневнай стихотворения, конань эса прощандай родной крайнц мархта:
Тон ворьгодть, ворьть, проклятай киза! |
Шачема вастонц эзда ичкозе, чужбинаса ламос эрямась губиндазе Куратовть. Оцязоронь слугатне, панемок Куратовть Средняй Азияв, сатозь эсь цельснон. Куратов кулось чужбинаса, мзярда тейнза ульсь аньцек 36 киза.
Куратов, кода прогрессивнай интеллигенциянь активнай деятель, ащесь коминь народть культуранц инкса.
Полемическяй лемфтема стихотворениясонза, кона сёрматф 1866 кизоня, Куратов эсь противниконзон, буржуазнай националисттнень каршес сёрмадсь:
Сялондозь месть спорятада? Рузкс аль ненецокс, суомикс, — |
Коминь народть культуранц колга поэтть арьсеманза ётасть эряфс аньцек 60 кизода меле. Да и Куратовть сембе творчестванц Коминь народсь кармась содамонза аньцек 1932 кизоня. Тя кизоня Коминь кяльса ульсь нолдаф Куратовть стихонь книгац „Гижед Чукэр“ (сочинениянь сборник). Сонь эзонза кочкафт поэтть 60 лама оригинальнай стихотворениянза, народнай лама ёфкст, конатнень сёрмадозень сон, и Коминь кяльс ётафтф лама стихотворениясна Пушкинть, Кольцовть, Гейнеть, Беранжеть, Шиллерть, Вольтерть, народнай сербскяй, казахскяй морот и лият. Ня перевоттне корхтайхть сянь колга, што Куратов ульсь пяк образованнай лингвист, што сон содаль лама кяль. Куратовть племянниконзон азондомаснон коряс, сон содась комозьда лама восточнай и европейскяй кяль.
Куратовть стихонзон тонафнемста няеви, кода кассь сонь мировоззренияц, кода поэтсь курокста макссесь вайгяль ся пингонь событиятнень колга.
Ленин корхтась, што „эрь национальнай культураса улихть кафта национальнай культурат. Ули Пурышкевичнень, Гучковфнень и Струветнень великорусскяй культурасна, — но ули великорусскяй культура, конац характеризовандакшневи Чернышевскяйть и Плехановть лемснон мархта. Улихть тяфтама жа кафта культурат Украинаса, кода и Германияса, Францияса, Англияса, еврейхнень и ст тов“. (Ленин, XVII т. 143 стр.).
Тяфта жа коминь народтьке ульсть кафта национальнай культуранза: Чеусов, Лыткин господатнень культурасна, конат сюконякшнесть самодержавнай кямоть инголе, и ётай веконь 60 кизотнень пингста прогрессивнай интеллигенциять, революционнай народничествать культурасна. Мекольцетнень ёткс смелста можна лувомс И. А. Куратов. Сонь сёрманзон эзда няеви, што сон ащесь эстонь пингонь русскяй фейербахианствать передовой идеянзон ширеса и политическяй убеждениянзон коряс ащесь маласа Чернышевскяйти и Добролюбовти.
Революцияда ингольдень печатьса Куратовть лемоц пцтай аф васьфневи. Коминь буржуазнай националисттненди стане жа ульсь аф выгодна няфнемс народти Куратовть творчестванц. И ёфси аф случайна, што Куратовть сембода цебярь, революционнай стихонзон рукописьснон коминь национальносттне ворьфтезь Финляндияв белоэмигранть Жаков профессорть велде. Аньцек мекольдень кизотнень пингста омба масторхнень мархта культурнай связень Всесоюзнай обществать лезксонц вельде ня стихне арасть достояниякс народти.
Аф случайна и сявок, што тяни лангти лифтьф народонь врагсь, матерай буржуазнай национальностсь и контрреволюционерсь „Коминь литературать“ колга статьять автороц Советскяй [ 96 ]Оцю энциклопедияса Куратовть колга ашезь му мезе азомс сяда цебярь тяда башка, што „Куратов — коми-националист, народник, творчествац сонь ащи сентиментальнай лирикакс“. Тянь васть тя „авторсь“ тя жа статьяса оцю васта максси Жаков профессорти, конац сембе эряфонц пингста действительна ульсь — буржуазнай национал-шовинизмань яркай представителькс.
Куратовть лирикац, конанц эса улихть символикань элементт, ёфси аф сентиментальнай. Сон ащесь кеме протестокс самодержавиять каршес. Тяфта „Музазти“ стихотворениясонза, конац сёрматф 1866 кизоня, Куратов азозе сембе эсь ненавистенц церкавонь ханжатненди, самодержавияти, конац люпшнезе ломанень живой мыслять, оцязорти. Тяка стихотворениясь корхтай сянь колга, што Куратов арьсесь сёрмадомс оцю поэма, коса ёразень няфтемс народть муканзон, горянзон и ёрась азомс протест эксплоататорхнень и оцязорть каршес:
Курок, курок (тянди мон пяк кеман) |
И. А. Куратов учителькс работаманц кизонзон нингста сёрмадсь лама стихт, конатнень эса народнай творчествань кяльса кайги шумбра рахамась, народнай выдумкась, шуткась, сёрмадсь лама стих, конат ащихть Анакреонть стихонзон лаца вию, керы сатиракс.
Кинь колга сёрматф, кепотьксонди, тяфтама стихотворениясь, трудна шарьхкодемс, но апак эльбятть можна азомс, што стама ханжанди, конатнень колга сон корхтай „Музазти“ стихотворенияса:
Лама тевда тиендят тон |
Мзярс Куратов апак аерфттоль эсь шачема-касома вастстонза, родной кяленц эзда, конань сон фкя стихсонза лемнесы [ 97 ]„кельговикс“, аф ваномок кальдяв эряфть лангс, бодростсь аф кадондсы сонь.
Ульцянь стирьхненди-цёратненди сёрматф народнай моронзон эса Куратов смелста ваны инголи, надияй:
Эряфоньконь колга мора |
Средняй Азияв панемдонза меле Куратовть кадондсазь оптимистическяй мяльхне. Шовдашись, невежествась ульсть поэтть перьф, конац арьсесь эсь народонц культурнай касоманц колга, сонь сай пингонь валда эряфонц колга.
Бта „пейзажнай“ „Венч“ стихотворениясонза Куратов корхтай самай тя шовдашить и невежествать колга, конань каршес тюремс сонь — аф саты вийц:
Ляйге, вишке шудить каршес |
Но уить вийц венчть панемс аф сатни, мярьгат ведьатясь уски эсонза фталу, и сон обижафста, сельмеведеньбачк ивади:
Ой, ой, нинге тяка вастса |
Куратов, лингвистсь, цебярьста содальхце рузонь кяльтьке, но, аф ваномок тянь лангс, сон фкявок строчка ашезь сьормад лия кяльса, коминь кяльда башка. Сон седивакска кельгольхце эсь кяленц, поэзиять. Поэтсь содазе, што эряфонц пингста сонь стихонза аф улихть печатлафт, но, аф ваномок тянь лангс, мзярдонга ашезе кадонда сёрмадоманц.
Куратов тонафнезе эсь родной кяленц. Коминь кяльть сембодонга аф сатомшка исследовандакшнезь специалисттне, конат тонафнезь восточно-алтайскяй кяльхнень.
Куратовть рузкс сёрматф статьяц „Зырянскяй кяльсь“, конань печатлазе „Вологодскяй губернскяй ведомосттне“ газетась, лингвисттненди пяк интереснай тяниенге. Тя статьять эзда няеви, конашкава оцюволь поэтть лингвистическяй содамашиц. Куратов няфнесы коминь кяльть лия кяльхнень ёткса вастонц, сонь наречиянзон, этимологическяй и синтаксическяй форманзон, фонетиканц и логиканц колга.
„Чиста зырянскяй кяльть объемоц пяк ёлма, тянди туфталсь ащи зыряттнень историческяй судьбаснон эса и ся вастть эса, конань синь занцесазь. Христианствать примамда меле (XV [ 98 ]вексь) тя народсь ульсь патриархальнай состоянияса; сонь ашель государствац, законодательствац и мзярошкадонга высока знаменательнай религияц. Зярынскяй кяльса аш валхт, конатнень мархта можналь азомс:
1) оцязор, князь, подчиненнай, господин, раб, милость, суд, казнь, свобода, неволя...
2) закон, честь, порядка, уважения, благородность...
3) кельгомс, думандамс и ст. тов. Но зырянскяй кяльть объемонц эзда шарфттама сонь содержаниянцты. Содержаниянь оригинальность коря зырянскяй кяльсь — тя Европань фкя инь цебярь кяльсь. Корхтайхть, што греческяй кяльсь сембодонга козясь глагольнай формань лувксс и свойствас коря, но корхтайхть сят, кит цебярьста и основательна аф содасазь севернай кой-кона кяльхнень“.
„Минь кяленьке заботендай корхтамать сжатостенц колга, штоба афоль юмсе сонь вийц“, — корхтай Куратов тя статьянц тезисонзон эзда фкаса.
Куратовть стихонза формальнай ширде вернайхть тя тезисти. Синь кой-мзярда сяшкава скупойхть валса, што труднат ётафтомс рузонь козя кяльти.
Тя ширде Куратов ащи оцю интересокс аф аньцек коминь касы од советскяй поэзияти и советскяй читательти, но и максы оцю интерес братскяй народонь поэттненди синь кялезост ётафтфста. Сонь эздонза можна тонафнемс, кода эряви сёрмадомс нюрьхкяняста и поэтически содержательнайста, интереснайста, читателень кели массатненди шарьхкодевиста.
Куратовть поэзияц эряви использовандамс мокшень писательхненди эсь творческяй касомасост. Тянкса маластонь пингть эрявихть ётафтомс мокшень кяльти сонь основной оригинальнай произведениянзон. Тевсь стака, но тиемшка. Тянь колга корхтай А. Чекашкинть и В. Волковть васенце опытсна.
Тя кизоня январьста Коминь народсь отмечандакшнесы эсь народнай поэтонц И. А. Куратовонь шачемда меле сяда кизотнень топодемаснон. Тя сяка жа пингоне ащи праздникокс минь Союзсонок лия нароттнендиге. Куратов, конанц эряфонц пингста исть лисенде стихотворениянза, тяни корхтазевсь лама кяльса: рузонь, грузинскяй, казахскяй, татаронь, мокшень, эрзянь и лия кяльса. Советскяй властсь И. А. Куратовонь творчестванц максозе народти.