Jump to content

Колхозонь эряф/1939/10/М. Ю. Лермонтов/Лермонтовть творчествац. Лирикац

Add links
From Wikisource
←
Эряфоц
Колхозонь эряф (1939), № 10 Октябрь
edited by Чумаков И. Ф.
М. Ю. Лермонтов. Лермонтовть творчествац. Лирикац
Поэманза. Романтическяй поэманза
→
263729Колхозонь эряф (1939), № 10 Октябрь — М. Ю. Лермонтов. Лермонтовть творчествац. Лирикац
 
[ 31 ]

ЛЕРМОНТОВТЬ ТВОРЧЕСТВАЦ

Лермонтов — гениальнай художник, конац аф кувака пингонь йотамс сьормадсь лама первокласснай произведеният, конат сувасть русскяй литературать золотой фондс.

Лермонтов великай и кода поэт, и кода драматург, и кода прозаик.

ЛИРИКАЦ

Михаил Юрьевич сьормадсь 400-шка лирическяй стихотворения, конат тематикань коряс условна можнат явомс вете основной разделга. Ня разделхне тага явондовихть группава.

Васень разделсь ащи политическяй лирикаста, конац характернай няфневи чувстванзон страстностенц мархта. Политическяй стихонзон эса Лермонтов сембода пяк няфтезе эсь прянц кода декабристонь вайгялень полады. Политическяй лирикац эсь тематиканц коряс условна можна явомс 4 группава:

Стихонзон васень группасна няфнесы поэтть отношениянц оцязорть мархта дворянскяй обществати.

Лермонтовть музац пяшксе гневда и ненавистьта народть врагонзон каршес. Поэтсь сембе вийса разоблачандакшнесыне пошлостьснон, лживостьснон, эгоизмаснон, паразитизмаснон, трусостьснон дворяттнень, конат способнайхть предательствати, коварствати, гнуснай шавондоматненди и ломаттнень лангса насилияти. Синь эряфсна шава, аш эсонза творческяй порыфт. Везде няеви чувствань продажность и подлость. Политическяй стихонь валда примеркс ащи „Поэтть куломац“ произведенияц (1837). Великай Пушкинти седи вакскань кельгоманц азондомста Лермонтов лихтезень лангу социальнай причинатнень, конатнень сюнеда кулось поэтсь и конань травондазь оцязоронь пинетне. Сон штафтозе сембе человечествать инголе ся фактть, што оцязоронь палачне кяжень пандома кочказь подлай проходимецть Дантесонь. Эсь сатиранц оржанц Лермонтов нолдазе [ 32 ]оцязоронь пинетнень каршес, конат жаднай толпакс пуромфтольхть тронть перьф. Сон клейминдазень синь вечнай позорса и инголявак азозе, што сай грознай и беспощаднай суд, и эста тя аеркс сворати марнек эсь равжа версонза аф штави поэтть праведнай вероц.

Рабствати и народть палачензонды аердамац гневнайста лакай эряскодомбачк сьорматф „Прощай, немытая Россия“ стихсонза (1841). Авторсь няйсы обществать классова явондовоманц: фкя ширеса, роскош и разврат потмоса эряйхть куя тираттне, конат эсь пряснон перязь жандармскяй штыкса; а омбоце ширеса нужа потмоса, якшамса и вачса, страданияс йордафста эряй люпштаф народсь. Поэтсь старандай мянемс жандармериять оржа кенжензон эзда, штоба сяда малав шаштомс люпштаф народти.

Дворянствати аердаманц Лермонтов няфтезе „Первое января“ стихотворениясонза. Внешняй лоскть и блескть эшксста сон няйсь подлай ломатть. Сонь седиезонза шачсь мяль, штоба валхтомс синь шамастост маскать, „коламс синь весялашиснон и йордамс шамазост кшнинь стих, конац валф горечса и кяжса“.

Ся пингонь од поколениять трагизманц Лермонтов няфтезе „Дума“ стихотворениясонза (1838).

Сембода цебярь од вийхнень мяльсноль плодотворнайста работамс родинань пользас, но оцязоронь режимсь ашезь макссе возможность од поколенияти няфтемс сонцень творческяй способностензон. Синь путфтольхть бездействияс „йотамс мирть эзга слетфтома, аф максомс векненди плодовитай мысля, аф гениень ушетф труд“. Но Лермонтов корхнекшнесь, што од ломаттнень сембода цебярь представительснон седиса палы тол, и хотя „ваймосост ащи кодама-бди салавань кельме“, но версост палы толсь рана или поздна лиси лангу.

Политическяй стихонзон омбоце группасна лемтьф революциять колга кизефксти. „30 июля 1830“ стихотворениясонза поэтсь ненавистьса корхтай французскяй корольть колга, мярьги тейнза тиран.

„Пяк лама ломань шавоть сей,
Тон валыть честнай верть, тиран!
Вов тя позорсь аф штави тейть!“

„Предсказаниясонза“ (1830) Лермонтов надияй революциять саманцты: „Россияв курок стама киза сай, оцязорть пряста сонь коронац прай“. „Наводнениянц“ эса морять образса, оцязоронь дворецть каршес нападенияса, рисовандави народнай революциянь картина.

Стихонь колмоце группаса няфневи Лермонтовть касф интересоц историческяй прошлайти. „Умирающай гладиаторсонза“ поэтсь клейминдасы рабовладельческяй Римть. Минута пингонь развлечениять инкса рабовладелецнень празднай верхушкасна максселезень рапнень страшнай и мучительнай куломас.

[ 33 ]Лермонтовонь лама произведениясонза няфневи оцю интерес Новгородти. Сон дивандай Новгород эряйхнень гражданскяй качестваснон лангс, конат тюрендсть эсь независимостьснон и свободать инкса. Оцю мяльса Лермонтов тонафнесы Пугачевскяй восстаниянь эпохать, русскяй народть героическяй тюреманц лия масторонь захватчикнень каршес — Француснень каршес, конат 1812 кизоня врьгятнесть русскяй модать лангс. „Бородино“ стихотворениясонза (1837) пяк оцю мяльса няфтезе простой русскяй солдатть, конац Наполеононь мархта тюремста эсь натурасонза няфтсь богатырскяй качестват.

Стихонь нилеце группать эса стама стихт, конатнень эса Лермонтов няфненсы сонцень седи вакскань кельгоманц и преданностенц эсь родинанцты. „Родина“ стихотворениясонза (1841) сон корхтай: „Келькса мон отчизназень, но страннай кельгомаса“. Тя „страннай“ кельгомась — эсь родинанц седи вакска кемоста кельгомац. Лермонтов арьси няемс эсь отчизнанц освобожденнайста рабствань цепнень эзда.

Лермонтовонь стихонза омбоце разделснон эса няфневи сонь отношенияц эряфти и природати.

Лермонтов ульсь бурнай, мятежно-протестующай натуракс. Духонь тя мятежностец няфтезе эсь прянц эряфти Лермонтовонь отношениясонза.

„Ангел“ стихотворениясонза няфтьф аф азомшка оцю противоречия поэтть свободолюбивай идеалонц и действительностть йоткса. Райскяй морось максф кода идеальнай эряфнь символ. Мастор лангонь эряфть скучнай моронза символизировандазь ломаттнень модать лангса эряфснон.

Кемонь кизода меле „Морская царевна“ балладасонза алегорическяй формаса тага азф тяка жа мыслясь: поэтсь няфнесы, конашкава аф мазы и кальдяв действительностсь мялень пети мечтать ваксста.

Пошлай и коварнай дворянскяй обществать каршес тюремасонза Лермонтовти сашендовсь лияста кирдемс временнай поражения, конац тиендсь сонь седиезонза тоска и пессимизма; эряфсь тейнза няевсь кода страданиянь и горечень сплошной крьня. Эсь грустенц и тосканц поэтсь азозе лама лирическяй стихотворениясонза, конанди образецокс можна азондомс „И скучно, и грустно“ стихотворениянц (1840), коса эряфть сон лувондсы „пустой и глупай шутканди“. Но Лермонтовть пессимизмац ульсь мятежно-протестующай, а сяс и прогрессивнайль.

Частнай собственностсь ломаттнень тиезень эгоистичнайкс, равнодушнайкс лиянь горяти и страданиятненди, фкя фкянь мархта вечна аф ладяйкс. Поэтть тянь колга мыслянза азонфт „Три пальмы“ (1833), „Валерикса“ (1840) стихотворениясонза, коса няфтьфт войнать ужасонза. Лермонтов старандай лангу [ 34 ]лихтемс социальнай туфталхнень, конатнень сюнеда тиендевихть войнатне.

Величественнай природась пцтай везде каршек латцеви ломанти. Природась голь пяк мазы, таинственнай, способнай арьсемс, марямс и эрямс настоящай, полнай эряфса.

„Когда волнуется желтеющая нива“ стихотворениясонза (1837) няфневихть поэтть крхка переживаниянза, конат тиевсть русскяй пейзашнень лангс ванозь. Тундань картинать, тюжялгоды паксять лангс ваномста Лермонтов маряй эстетическяй наслаждениянь чувства, кона панцесыне сонь пичефксонц и ризфонц.

„Пиче“ (1841) символическяй стихотворениянц няфни лувити кафта аф фкя лаца картинат: одинокай, почана ловса вельхтяф пиче, конанди идеалкс ащи пяк мазы пальмась. Пичсь максф кода символ пяк одареннай ломаненди, конац путф стама условияс, конатнень эса тейнза няфтевихть эсь способностенза. Морозса ковандаф пичсь путф бездеятельностьс.

Вельф мазы кизонь веть, цифторды тяшттнень лангс ваномась „Выхожу один я на дорогу“ стихотворениясонза (1841) сетьмофнесы поэтть, касфни эзонза мяль сетьме и спокойнай эряфть колга и няфнесы поэтть душевнай сизефшинц.

Колмоце разделсь ащи стама стихотворениятнень эзда, конатнень эса няфневи Лермонтовть взглядоц поэтть и поэзиять рольснон лангс. „Поэт“ стихотворениясонза (1838) Михаил Юрьевич тиенди сравнения поэтть судьбанцты и кинжалть йоткса. Истиннай поэтсь ульсь и должен улемс дупнень лангса властителькс, сонь звуконза должетт тюрема серептемс боецнень. Стихсь, конац ащи благороднай мысляста, кода вечевой пайгсь, должен тиемс мужества и марс пуроптомс ломаттнень вийснон.

Негодования мархта корхтай авторсь празднай барствать колга, конац поэтть эзда пчкясь няель шут, скоморох и лишандакшнесы художникть сонь пяк оцю назначениянц эзда.

„Пророконц“ эса (1841) тиендеви сравнения поэтть и пророкть йоткса. Поэтсь обязан тердемс человечествать тюрема правдать и кельгомать торжестваснон инкса. Чвану и празднай обществась презрения мархта ваны пророкть лангс, травондасы, преследовандасы, кевса йоряй сонь лангозонза, но поэтсь должен лядомс кемокс и непоколебимайкс эсь убеждениянзон эса и пачфнемс пети сонцень ответственнай и почетнай роленц.

Нилеце разделсь. Тяза минь сувафнесаськ ся стихнень, коса няфтьф поэтть потмаширдень, душевнай эряфоц.

Стихонзон фкя группасна лемтьф поэтть мрачнай мялензонды, эряфти сонь равнодушиянцты, ваймонц пингта инголе сиредеманцты. Тяфтапт „Не смейся над моей пророческой тоской“ (1837), „Еврейская мелодия“ (1836) и лия стихонза.

Омбоце группась няфнесы поэтть одиночестванц эса стака и пичефксу чувстванц, сяс мес сон йордаф скитанияс. Тяза [ 35 ]лувондовихть „Дубовый листок“ (1841), „Утес“ (1841) стихотворениянза.

Меколи, улихть стихонза, конат няфнесазь ваймонц мятежностенц, вии стихийнай порывонц свободати, независимостти. „Парус“ (1832) стихотворениясонза Лермонтов тиенди сравнения эсь прянц и одинокай парусть йоткса, конац ба учи буря и эряскоды молемс сонь каршезонза. Эсь эряфонц смысланц Лермонтов няйсы тюремать эзда.

Ветеце разделсь ащи Лермонтовонь пяк лама кельгомань лирическяй стихотворениянзон эзда. Лермонтовть кельгомань лирикац максф аф Пушкинонь лаца; Лермонтовти келгомась аф ащи радостень, весельянь и павазонь источникокс, а сембода лама случайста — трагическяй чувствакс, ломанень страданиянь источникокс. „Теректь казненза“ (1839), „Тамара“ (1841) стихонзон эса кельгомась няфтьф кода страсть, конац шополгофнесы сембонь, вяти эсь мельганза неизбежнай кулома.

Лия стихонзон эзда маряви сетьме, задушевнай грусть, конац тиевсь разлукать сюнеда („Они любили друг друга так долго и нежно“ (1841).

Меколи, тоскась тиендеви сянь сюнеда, мес аш фкя фкянь ширде фкя лацтонь кельгома. „Русалкасонза“ (1836) русалкать тоскац азонкшневи мазы мороть эса, коса корхтави сянь колга, што красавец-витязсь, конань русалкатне сявозь ведть потмаксс, мезевок аф корхтай и афи кельгсы русалкать.

Лермонтовскяй оцю лирикати анализонь тиемста знаменитай критиксь Белинскяй максси тяфтама справедливай вывод:

„Мыслянь глубинас, поэтическяй образонь роскошс, поэтическяй обоняниянь увлекательнай пяк оцю вийс, эряфонь полнотас и типическяй оригинальностьс коре, толонь фонтан лаца лиси пяк лама вийс коря сонь созданиянза ащихть стамкс, кодапт эрсихть великай поэттнень“.

 
 

(примечание редактора вики-библиотеки) Ссылки на произведения, перечисленные в этой статье:

Retrieved from "https://wikisource.org/w/index.php?title=Колхозонь_эряф/1939/10/М._Ю._Лермонтов/Лермонтовть_творчествац._Лирикац&oldid=855328"