Колхозонь эряф/1939/05-6/Тядясь/1
[ 15 ]
| М. Горький.
|
| ТЯДЯСЬ |
| Омбоце пялькссь |
Шить лядыкс пингоц йотась лятфнематнень сьормав туманцост, стака сизефть эса, конац кемоста кутмордазе теланц и седиенц. Серай пятнакс комотнесь афоцька офицернясь, пиндолдсь Павелонь бронзовай шамац, пеедсть Андреень сельмонза.
Тядясь якась комнатать эзга, озсесь вальмять ваксс, ванондсь ульцяв, тага якась меки-васу, кепсезе сельме кунонц, тркстыесь, варжакснесь и мысляфтома, мезе бди вешендсь. Симсь ведьта, симоманц апак янгафтт, и ашезь валов мяштьсонза тоскань и обидань пидезь пиди коцамась. Шись кафтова керьфоль, сонь ушеткссонза ульсь содержания, а тяни сонь эздонза сембось шудесь, сонь инголенза келемсь ризфу пустышь, шерьхксь аф шарьхкодеви кизефкссь:
— Мезе ина тяни?
Сась Корсуновась. Сон яфиезень кядензон, иватькшнесь, авардьсь и кенерькшнесь, топиезень пильгонзон, мезе бди мярьгондсь и надияфнесь, кинди бди гразясь. Сембе тя ашезе токсе тядять седиенц.
— Аха! — кулезе сон Марьянь крикондайнь вайгяленц. — Токазь, таки, народть седиенц. Лоткась фабрикась, — марнек лоткась!
— Да, да! — прянь шуказь сетьмоняста корхтась тядясь, а сельмонза сонь апак чипоряк ванондозь сянь, мезсь арась ни йотафокс, тусь сонь эздонза Андреень и Павелонь мархта марса. Авардемать сон ашель авардев, — седиец кирендсь, коськсь, трванза станя жа коськсть, и кургсонза ашесть сатне селькне. Трнатсть кяденза, копорьстонза мелкай трнатомаса тркстыесь кедец.
Илять састь жандарматне. Тядясь васьфтезень синь апак дивандак, аф пелезь. Синь сувасть шумназь, и синь эсост ульсь мезе бди кеняртьф, довольнай. Тюжа шама офицерсь корхтась пеень низелфтозь:
— Ну-с, — кода эрятада? Колмоцеда васетькшнетяма минь, а?
Тядясь мезевок ашель корхта, трванзон нолсезень коське кяленц мархта. Офицерсь корхтась лама, поучительна, эста тядясь марязе, што офицерти приятна корхтамс. Но сонь валонза ашесть пачкотькшне тядяти, ашесть шоря теенза. Аньцек мзярда сон мярьгсь:
— Тон тонць виноватат, матушкай, кда ашеть машта эсь цьорацень тонафтомонза шкайть и оцязорть кельгома...
Кенкш лангса ащезь и лангозонза апак ватт тядясь потмораста отвечась:
— Да, — тейнек судьятне — иттне. Синь лувсамазь минь виноватокс мес минь кадондсаськ синь тяфтама ки лангса.
— Мезе? — ивадсь офицерсь. — Сяда кайгиста!
— Мон корхтан: судьятне — иттне! — куфкстозь тага азозе тядясь.
Эста офицерсь корхтазевсь мезень бди колга вишкста и кяжиста, но сонь валонза шарондсть перьфпяльге, тядять ашезь токсе.
Понятойкс ульсь Корсунова Марьясь. Сон ащесь тядять ваксса, но лангозонза ашель ван, и мзярда офицерсь пшкятькшнесь тейнза кодамовок кизефксса, сон тейнза эряскодозь и алу сюконякшнезь, фкя лаца отвечакшнесь:
— Аф содаса, ваше благородие! Авась мон аф образованнаян, вятян торговля, эсь глупайшидон мезевок аф содан...
[ 17 ]— Ну, лоткак! — мярьгондсь офицерсь, усанзон шерьфтезь.
Сон сюконякшнесь и, салаваня тейнза кукишень няфнезь, тошкась тядяти:
— На-ка вага, суск!
Тейнза мярьгсь Власовати обысконь тиемда. Сон кармась чипорямост сельмонзон, тетькозень синь офицерть лангс и эводезь мярьгсь:
— Ваше благородие, мон тянь тиема аф маштан!
Сон топадезе пильгонц, ивадсь. Марьясь нолдазень сельмонзон и сетьмоняста эняльгодс тядяти:
— Мес мля, — юксыть пунятнень, Пелагея Ниловна...
Сонь платьянц варчсемста и щупамста, сон, верс якстерьготф шамат, тошкась:
— Ах, пинетне, а?
— Тон кати мезе корхтат тоса? — кяжиста ивадсь офицерсь, варжакснесь ужети, коса Марьясь вешендсь.
— Авань тевонь колга, ваше благородие! — мотерьгодсь эводезь Марьясь.
Мзярда сон тядяти мярьгсь протоколти подписенц путомда, тядясь аф маштозь сьормадозь, печатнай, эчкста пиндолды букваса кагодть ланга сьормадсь:
— „Рабочай ломанень вдовой авась Пелагея Власова“.
— Мезе тон сьормадоть? Мезенди тянь? — ивадсь офицерсь, брезгавазь сьормозе шаманц и тоса мзелдозь мярьгсь:
— Дикарьхть...
Синь тусть. Тядясь арась вальмять, ваксс, путозень мяштезонза кядензон и сельмонь апак чипоряк мезеньгя апак няйхть кувать ванць видеста, инголи, кеподемок вяри сельме кунонзон, чипордазень трванзон и сяшкава сускозень пейнзон, што аф ламос ащезь нльня маряйкстомсть. Лампать эса палсь керосинць, толсь кецердсь и мадондсь. Тядясь уфась сонь лангозонза и лядсь шовдас. Думфтома тоскливай равжа дуцясь пяшкодезе сонь мяштенц, стакалгафнезе сонь седиенц тотнаманц. Стяда ащесь сон кувать — сизесть пильгонза и сельмонза. Марязе, кода вальмя алу лоткась Марьясь и ирецта вайгяльса ивадсь:
— Пелагея! Удат? Нужань няинязе, сюдуфкязе, — удок!
Тядясь апак кайсек мадсь вастонзонза и курок, бта прась крхка омодс, ваясь стака онти.
Онцтонза сон няи песоконь тюжя панда шяйть тона бокса, ошу молема кить лангса. Сонь крайсонза, карафть вельксса, конац мольсь лоткненди, коста сявондсть песок, ащесь Павелсь и Андреень вайгяльса сетьмоста, гайнязь морась:
— Вставай, подымайся, рабочий народ...
Тядясь мольсь пандть вакска кить эзга и, путомок кядь лапанц конязонза, ванць цьоранц лангс. Голубой менельть фонца сонь фигурац няевсь шарьхкодевиста и резкайста. Тядясь виздсь малазонза нежедеманц, сяс мес ульсь пеки. И сонь кядьсонза станяжа ульсь — идь. Тусь сяда тов. Паксяса иттне налхксть мячса, синь эздост ламоль, и мячсь якстерель. Идсь сонь кядьстонза венемсь иттнень йоткс молема и кайгиста аварьгодсь. Сон тейнза максозе мяштенц и мрдась меки, а панда пряса ащесть ни солдатт и сонь каршезонза латцезь штыкснон. Сон вишкста тусь ласькозь церькавти, конац ащесь паксять кучкаса, акша, тьождя церькавти, конац строяф бта дуцяста и пяк сери. Тоса кинь бди калмасть, лазкссь ульсь оцю, равжа наглуха шавф лангакс мархта. Но попсь и дьяконць якасть церькавть эзга акша ризаса и морафтсть:
— Христос воскресе из мертвых...
Дьяконць яфиезе кадилать, сюконякшнесь тядяти, пеедсь, сонь шяяренза ульсть пяк рыжайхть и шамац весяла, кода Самойлофонь. Вярде куполть эзда прашендсть кели, кода нардамась, шить лученза. Кафцьке клироснень эса сетьмоста морафтсть цьоранят:
— Христос воскресе из мертвых...
— Сявомс синь! — вдрук ивадсь попсь церькавть кучкас лотказь. Сонь лангстонза юмась ризась, шамазонза эвондасть шаржу кяжи усат. Сембе тусть ласькозь, дьяконцьке тусь ласькозь, йордамок шири кадилать, фатязе прянц кядензон мархта кода хохолсь. Тядясь иднять прафтозе кияксу, ломаттнень пильгалу, синь ласьксть иднять вакска, голыш телать лангс пелезь [ 18 ]ванондозь, а тядясь арась плманжа лангс и ивадсь тейст:
— Тясть кадонда итть! Сявость сонь...
— Христос воскресе из мертвых...
Морафтсь хохолсь копоренц фтала кядензон кирдезь и пеедсь.
Тядясь комась, кеподезе иднять и озафтозе тесонь усфть лангс, конанц ваксса валомня мольсь. Николайсь и рахась, сонць корхтась:
— Макссть тейнь стака работа...
Ульцяса ульсь урдас, куттнень вальмаснон эзда варжакснесть ломатть и вяшкондсть, иватькшнесть, яфиезь кядьснон. Шись маниель, валдста палсь шись, а эшкс косонга ашель.
— Морак, щакай! — корхтась хохолсь. — Тяфтама эряфсь!
И хохолсь морась, сембе звукнень эсь вайгяленц мархта паннезь. Тядясь мольсь сонь мельганза: вдрук пупордась, вишкста кармась лиема пефтома крхкас, и тя крхкась эвфтезь урокондсь сонь каршезонза...
Тядясь сргозсь дрожазь. Кода бта кинь бди казяма, стама кядь фатязе сонь седиенц и, кяжиста налхксезь, сетьмоняста люпшни эсонза.
Настойчивайста унась работама серьгядемась, тядясь шарьхкодсь, што тя омбоцесь ни. Комнатаса коса повсь усксевсть книгатне, сембось токафоль вастстонза, сюволяф, киякссь урдаскотф.
Тядясь стясь и, апак штак, шкаенди апак озонтт, кармась комнатать урядама. Кухняса сельминголенза повсь кумаць пакш мархта палкась, сон мяльфтеме сявозе сонь кядезонза и йоразе яцемс пянакуд алу, но, куфкстомок, валхтозе сонь эздонза знамять лятксонц, цебярьста ашкордазе якстерь лоскодть и прдазе сонь зепозонза, а палкать синдезе плманжанц мархта и йордазе томбалангу. Тоса штазень кельме ведьса вальмятнень и кияксть, путозе самоварть, щакшнесь. Озась кухняв вальмять ваксс, тага сонь инголенза арась кизефкс:
— Мезе ина тяни тиемс?
Мзярда лядьсь мялезонза, што сон нинге ашезь озонда, тядясь стяда арась обраснень инголи, несколька секундань ащемда меле тага озась — седиец ульсь шава.
Ульсь странна сетьме, — кода бта ломаттне, конат пяк иватькшнесть исяк ульцяса, тячи кяшендсть кудга и аф каштордозь думандайхть необычнай шить колга.
Вдрук сонь мялезонза лядьсь картина, конанц сон весть няендезе откс пингстонза: Заусайлов господиттнень сире парксост ульсь оцю прудсна, конанц эса кассть кукшиннят. Сьоксень серай шиста сон мольсь прудть вакска и сонь кучкастонза няйсь венч. Прудсь шовдаль, покойнайль, и венчсь бта ульсь петфтаф равжа ведти, конац грустнайста мазептьф тюжя лопатнень мархта. Седи ризф, аф содаф горя яфодсь ломаньфтома и веслафтома ся венчть эзда, конац ульсь ськамонза, ащесь фкя вастса кулоф лопатнень йоткса матовай ведть лангса. Тядясь эста кувать ащесь прудть берягонц эса, сонць думандась — кие тяфта сяряфтозе венчть берягть эзда, мезенди? Ся шиня илять кулезь, што прудти йордась пря Заусайлофнень приказчикснон урьвац, апак сеенькшнек равжа шаярь и вишке мольф йомла авась.
Тядясь шамаванза йотафтозе кяденц, и сонь мыслянза трнатозь тусь уема исяконь впечатлениятнень вельфкя. Синь мархтост фатяфста, сон озада ащесь кувать, лоткафтомок сельмонзон кельмоф чашка чайть лангс, а сонь седисонза касондсь желаниясь няемс кинь-кинь простой йону ломанень и кизефнемс сонь ломань колга.
И, кода бта сонь желаниянцты отвечазь, обедта меле эвондась Николай Ивановичсь. Но мзярда тядясь няезе сонь, сонь вдрук фатязе пелемась, и, шумбракстоманцты апак отвечак, сон сетьмоняста корхтазевсь:
— Ай, батюшканязе, вов ни зря тон сать! Тя аф осторожна! Вдь сяфтядязь тонь, кда няйхтядязь.
Тядять кяденц кемоста люпшнемста, сон петезень очканзон и, малакстомок эсь шаманц тядять малас, азозе тейнза эряскадозь корхтазь:
— Мон, содасак ли, корхтань Павелонь и Андреень мархта, што кда синь арестовандасазь, — омбоце шинякигя мон должнан йотафтомс эряма тонь ошу! — корхтась сон ласковайста и заботендазь. — Ширесонт ульсь обыск?
[ 19 ]— Ульсь. Сюволязь, шорязь. Ня ломаттнень аш аф визькссна, аф совестьсна! — ивадьсь тядясь.
— Мезенди тейст виздемас? — кеподемок лафтувонзон, мярьгсь Николайсь и ушедсь азондома, мес тядяти эряви эрямс ошса.
Тядясь кулхцондозе ялгань заботливай вайгяльть, ванць лангозонза лофтанаста пеедезь и, сонь доказательстванзон апак шарьхкотть, дивандась тя ломанти и ласковай довериянь чувстванцты.
— Кда тяфта мярьгсь Пашась, — мярьгсь тядясь, — и аф тесниндатя тонь...
Сон лоткафтозе тядять:
— Тянь колга тят пичедь. Мон эрян ськамон, аньцек шуроста сашенды ширезон сестразе.
— Тяфтак кшида ярхцама аф карман, — марявиста арьсесь тядясь.
— Кда ули мяльце — тев муви! — мярьгсь Николайсь.
Тядяти тевонь колга арьсемать эса апак аерфтт содонфоль ни ялгаснон мархта цьоранц и Андрейнь работаснон мархта представлениясь. Тядясь шаштсь Николайнь малас, варжакстсь сонь сельмозонза и кизефтезе:
— Муви?
— Монь хозяйствазе аф оцюня, холостяцкяй...
— Мон аф сянь колга, аф кудоннеть колга! — сетьмоняста мярьгсь тядясь.
И грустнайста куфкстсь, эсь прянц марязе сингордафста сянь мархта, што сон ашезе шарьхкодь тядять. Николайсь, близорукай сельмосонза мзелдозь, думандазь мярьгсь:
— Вов кда ба Павелонь мархта васьфтемста тон тяряфтолеть куляксамс сонь кядьстонза сят крестьяттнень адресснон, конат кизефнесть газетат...
— Мон содасайне синь! — ивадьсь сон кенярдезь. — Мусайне и сембонь тиса, кда мярьгат. Кие думандай, што мон кандан запрещеннайхть? Фабрикав каннень — слава тебе, господи!
Вдруг тядять кеподсь мялец тумс ков бди китнень эзга, вирьхнень и велетнень вакска, копорьсонза кяскавня мархта, кядьсонза палка мархта.
— Тон, лефкскяй, путомака монь тя тевти, мон эняльдян тейть! — корхтась тядясь. — Мон тейнть везде молян. Сембе губерниятнень эзга, сембе китнень мусайне. Карман якама тялонда и кизонда, — мянь калмоти тумозон, — странницакс — дряй тя тейнь кальдяв долясь?
Тядять седисонза стакаль, мзярда сон эсь прянц няезе кутфтома странницакс, конац анци Христа ради велень куттнень вальмала.
Николайсь салаваня сявозе тядять кяденц и судордазе эсь лямбе кяденц мархта. Тоса, варжакстомок часттнень лангс мярьгсь:
— Тянь колга минь карматама корхтама сяда меле!
— Лефкскязе! — ивадсь тядясь. — Иденьке, минь седиеньконь сембода дорогой пакшсна, воляснон и эсь эряфснон макссесазь, юмсихть эсь прянь апак ужяльтть, — а мезе мля мон, тядясь?
Николаень шамац лофташкадсь, сон сетьмоняста корхтазевсь, сонць ласковайста ужяльдезь ванць тядять лангс:
— Мон, содасак ли, тяка весть кулян тяфтама валхт...
— Мезе мон могу азомс? — печальнайста прянц шуказь пшкядьсь тядясь и вийфтома яфодезь келептезень кядензон. — Кда ба монь улельхть валне, штоба азомс эсь тядянь седиезень колга...
Тядясь стясь, бта кеподезе вий, конац касондсь сон мяштьсонза и пяшкотькшнезе прянц кяжень валхнень самаснон мархта.
— Аварьгадольхть ба ламотне... Нльня кяжихне, совостьфтепне...
Николайсь станяжа стясь, тага варжакстсь часттнень лангс.
— Тяфта арьсеськ — тон йотат эряма ошу монь ширезон?
Тядясь апак корхтак люкштядезе прянц.
— Мзярда? Тон куроконя! — эняльгадсь сон и ляпоняста поладозе:
— Тейнь, права, кармай улема тревожна тонь инксот!
Тядясь дивандазь варжакстсь лангозонза, — мезенди сон эряви тейнза? Прянц комафтомок, смутяфста мзелдозь, сон ащесь тядять ингоде сутулайста, близорукайста, простой равжа пиджакса щафста, и сембось сонь лангсонза ульсь тейнза чужой...
[ 20 ]— Тонь улихть ярмакне? — кизефтезе Николайсь, алу ванозь...
— Аш!
Николайсь вишкста зепстонза таргазе кошелеконц, панжезе сонь и тядяти венептсь ярмакт.
— Вов, пожалуйста, сявить...
Тядясь невольна пейдезевсь и, прянь шерьфтезь, корхтазевсь.
— Сембось — лиякс! И ярмакневок питнефтопт! Ломаттне синь инксост ваймоснон юмафнесазь, а тейть синь — аш мезевок! Кода бта ломаттненди милостенди эсь видесот кирдьсайть...
Николайсь валомня рахазевсь.
— Пяк аф удобнай и аф приятнай тевсь — ярмакне! Фалу аф пара и сявондемс синь и макксемс...
Сон сявозе тядеть кяденц, кемоста люпштазе и нингя весть эняльгадсь тейнза:
— Тк тон куроконя!
И кода фалу сятка, тусь.
Сонь ильхтемдонза меле тядясь думандась:
— Тяфтама добрай, а ашезе ризфта шизень.
И тядясь ашезь шархкодь — тя аф пара тейнза или аньцек дивандафнесы?