Колхозонь эряф/1939/05-6/М. Е. Салтыков-Щедрин
[ 3 ]
| М. Е. САЛТЫКОВ-ЩЕДРИН |
Майть 10-це шистонза топоди 50 кизот ся пингти, кода кулось великай русскяй писателсь Михаил Евграфович Салтыков-Щедрин. Сон аф аньцек русскяй, но и сембе мировой классическяй литературать эса занци оцю и почетнай васта.
Салтыков-Щедрин шачсь январть 27-це шистонза 1826 кизоня. „Итькс и од пингонь кизоне ульсть свидетелькс крепостной правать сембода вишке пингонцты“, — сьормады сон „Пошехонская старина“ произведениясонза.
Помещикнень самодурстваснонды и жестокостьснонды крепостной крестьяттнень лангса ашельхть кодамовок границат и тя пяк возмущандакшнезе будущай писательть. Тя возмущениянц сон няфтезе ни 1847—1848 кизотнень „Противоречия“ и „Запутанное дело“ васень повестензон эса, конатнень инкса оцязоронь правительствась панезе сонь Вяткав ссылкас.
Вяткань ссылкаса писательсь ащесь 8 кизот. Оцю наблюдательностенц вельде сон сембе ширде тонадозень провинциальнай чиновничествать и административнай механизмать. Ня наблюдениянзон коряс Салтыков-Щедрин сьормадозе „Губернские очерки“ произведениянц, конань эса пачк няфтезе обанкротившай николаевскяй режимть, конань писательсь лац содалезе, сяс мес сонь сознательнай эряфоц ушедсь Николай первайнь оцязоркс улеманц пингста.
„Губернскяй очеркнень“ пяк оцюволь успехсна. Синь эсост мезевок апак корхтаколь 1853—1856 кизотнень крымскай войнать колга, но и лувити пяк лац шарьхкодевсь, мес крепостническяй монархиясь, конань сивозь сивондьсы продажнай чиновничествась, тапафоль тя войнать эса.
60-це кизотнень пингста эпохать эзда Салтыков-Щедринонь творчестванц идейнай направленностец кемокставсь педа-пес. Сон арась сотрудникокс „Современникти“ — ся пингонь передовой журналти, конанди руководителькс ульсть Чернышевский и Некрасов, сон арась вернай боецокс революционно-демократическяй лагерьти. Революционнай демократокс сон лядондсь мянь куломозонза.
Эсь талантонц сембе вийнц Щедрин шарфтозе угнетательхнень каршес тюремати, трудящайхнень праваснон и достоинстваснон араламанцты. Щедринонь сембода цебярь художественнай произведениянза — „Губернские очерки“, „Пошехонская старина“, „Господа Головлевы“, „История одного города“, „Помпадуры и помпадурши“, „Сказки“.
„Господа Головлевы“ произведениясонза Щедрин пяк правдивайста и яркайста няфтезе дворянскяй семьять срадоманц-каладоманц, сонцень дворянствать юмаманц-араманц. Иудушка Головлевсь — тя крепостной стройть тряфоц-кастфтфоц, сонь типичнай представителец. Щедринскяй Иудушкать образонц Ленин лемдезе сянди, штоба заклеймить обербандитть, предательть, мерзавецть Троцкяйнь.
Салтыков-Щедрин злойста рахсезень-пеетькшнезень и разоблачандакшнезень либералхнень, конат мольфтсть лицемернай политика: валса ащесть бта народть инкса, а тевса лездсть оцязорти, министрхненди и ащесть ся беззакониятнень инкса, конатнень тиендезень оцязорсь эсь министронзон мархта. „Щедрин, — сьормадсь Ленин, — пощадафтома издевался либералхнень лангса и навсегда заклеймил синь формуласа: „подлостти применительна“ (XVI томсь, 33 стр.).
Великай сатириксь Щедрин пощадафтома мольсь оппортунисттнень, [ 6 ]приспособленецнень каршес, справедлива сон няйсь синь эздост стама ломатть, конат шорсихть народти эсь цебярь будущайнц инкса тюремасонза.
Народникне отрицандакшнезь Россияса капитализмать шачендоманц, но Салтыков-Щедрин правильна корхнесь, што капитализма ули, вийякшни и сявондсы эсь влияниянцты ошть и велеть экономическяй развитияснон.
Ленин сидеста пользовандакшнесь щедринскяй сатирать мархта партиять врагонзон каршес тюремать инкса. Сталин ялгась стане жа аф весть нолнезень тевс Щедринонь образонзон. Советонь Всесоюзнай Чрезвычайнай VIII Съездса докладонц эса Сталин ялгась фашистскяй критикнень, конат критиковандазь СССР-нь од Конституциять, ладязень ряц Щедринонь ся тупой и ограниченнай самодур-бюрократонц мархта, конац йоразе „сьолгомс Америкать“.
Писательсь, конац педа-пес максозе эсь прянц народти служама, верондась, што аньцек народсь — масторть лангса козяшитнень творецсна, што народсь — великай вий. Но тя вийти аф макссихть ки, простор, сонь кирдсазь, сонь эздонза пелихть. Кие нолдасы свободас Россиять, русскяй народть, кие йордасы самодержавиять и капитализмать?
Пяле век йотась великай писательть куломдонза меле. Но сонь сатирац тячимска ашезе юмафта эсь оржашинц и вийнц. Сон кондяснень и кондясти сембе предательхнень, лицемерхнень, Иудушкатнень, человеконенавистникнень пикссемс, — сембонь сятнень пикссемс, кит предают и мишеньдсазь народть интересонзон.
(примечание редактора вики-библиотеки) Ссылки на произведения, перечисленные в этой статье:
- Противоречия, Запутанное дело, повести, 1847—1848
- Губернские очерки, книга очерков, 1856—1857
- Помпадуры и помпадурши, книга очерков, 1863—1874
- История одного города, роман, 1869—1870
- Сказки, 1869—1886
- Господа Головлёвы, роман, 1875—1880
- Пошехонская старина, роман, 1887—1889: