Колхозонь эряф/1936/01/Ашесть сяськя/6
VI
Шовдавань шись ниньге алняняста мольсь виреть велькска, пичетнень пряса и паксятнень ланкса пиндолдсь ловсь.
Кода панжапт пиншендсть базарса народсь Вяри кепсефста, сидеста, кода штыкт, ащесть нурдтнень эзга ажиятне. Кувака рядса ащесть сьора мишеньдихне колхозникне. Тяса ульсь и Иван атявок. Сонь сьоронзон эзда хуть и ульсь салаф, но сякокс нинге илядсь афламня мишеньдемска.
Почф рятть кувалма якасть рамайхне шава кяскавснон мархта. —
— Шумбрат, Иван Федорыч! — нежедьсь Иван-атянь малас стама жа сядой атя. Сон аньцек ульсь сяда сери, но шамасонза няевсть маятамань кувака следт-срмот.
Иван атя сонь мархтонза равесник и арась теенза ялгакс империалистическай войнаса.
— Шумбран, Тимофеич, кода тонць? — отвечась каршезонза Иван атя.
— Шумбрамс хоть шумбран да тевне аф кодапт, шаштыхть кальдявста. Тон наряжафат кода и эряви, а монь няйсак мезе ланксон... — Няфтезе Тимофеичсь ланкстонза пинжаконц, кона сяшкава каладоль, што няевсть мянь подкладкаста вататне, и ланга материять эзда алу нюрьксть пакшт.. — Тон мишеньдят почфт, — корхтась Тимофеичсь, — а мон няйсак рамсема сань, якан шава кяскавозень мархта.
— Рамайть почфонень, — мярьксь Иван атя ризнаманц каршес.
— Мезе анцят?
— Питнесь, няйсак, базарса комсь ветие, а мон, кода ялганди, макссайне комсь кафтувода. Колма утямат тяса.
Тимофеевичть ярмакоц афламда ашезь сата но Иван-атя согласиндась сяньгя учемс аньцек мярьксь: „мзярдонга панцак“.
— Эрь ни, Федорыч, парцевок аф пандови.
— Тон монь парозень тяк панне, сувак колхозу, сямольде афи шарьхкодьсак тоньцке, кода сон пандови — указвась Иван-атя.
— Кнара нолдадязь? — ламонь содазь кизефтьсь Тимофеичсь
[ 92 ]— Д коста ни кулить? пинктонга аф лама йотась.
— Ну, минь Калиновкась штоли пяк ичкозе эздононтт. Кода аф кулеви?
Иван-атя кармась азондома, кода лиссь тевсь.
— Ащетемя-ни пякстама вастса ниленек: мон церазень мархта и танга кафта алят-цьорат, тон наверна аф содасайть синь. Нолдайнек прянекень алу и местьке ашемя кашторда. Шовдава. ранакиге сыргоземя аф ваномок сянь ланкс, што конацка эздонок веньберьф пцтай ашезь уда. Аля, сон йдь содасак мезе улель тейнек сянкса? — Тимофеевичсь кульхцендсь и аньцек дакснесь Иван-атянь каршес.
— Марясаськ замоксь каньзерды. „Местемя ранакиге сайхть?“ думандатама минць. Наверна мянь тястонга паньцамазь. Сембе кепсинек прянекень и учтама. Панжевсь кенкшсь. Сувась милиционер и корхтай: „Ялгат, тинь свабоднайхтяда, лиседа.“ А минь эсь пиленекенди аф верондатама. Ашеськ маря кенярьдемань пачк, кода пильгенеке лихтемазь кенькшть пачка. Аньцек лисемя ульцяв, ванцаськ колма милиционерхт вятихть каршезнок Вирьгинтть, Кяржинь Пракать, и Юргинтть. Тон наверна ня ломаттнень содасайть? — Иван атя кизефтезе Тимофеевичть.
— Кода аф содамс ня инекуйхнень.
— Ефси зверьхть, — тага азондсть Иван атя, — молихть алу ванозь, минь лангознок варжакстсь ширем сельмеса и ванцть танга меки алу. Мон арьсень, коза вятьсазь, а сон пльшем минь вастознок. Эстакиге шарьхкодемя, што алашань салайхне нят, аньцек ашеск сода кие лихтьсь ланкти тевть, велеса мля содаськ, што азондысь Калгань Фокась.
— А кода сон содазень? — кизефнесь Тимофеичсь.
— Ащек азонца. Фокась васеньце пинкть синь ялгасноль сяс сон и содазе сембе тевснон.
— Фокать аньцек азондоманцты верондасть? — кизефнесь Тимофеичсь.
— Ожу, ожу, азонца, тят эряскад. Ну вот, Фокать азондомадонза меле, милицияста колма милиционерхт озасть алашас и, — аньцек шарыхне лагордыхть, — тусть ардозь Серена вели, штоба куроконя синь арестовандамс. Ну, содаф ни милиционерхне аф минь лацонк работайхть. Микитань — комсомолонь ячейкать секретаренц мархта фкя милицонерсь тусь Юргинтть пяли, омбоцесь Зойновть мархта Прокать пяли, а колмоцесь вельсоветонь председательть мархта Вирьгути тусть. Пинксь шовдаваль.
Сувасть пялонза — Вирьгусь кудса — самай завтракай Тон арестовандафат! — мярьксь милиционерсь Вирьгути. „Мезенкса?“ кизефтезе сон. „Сямольде содасак“, отвечась каршезонза милиционерсь. Вирьгусь лоткась ярхцамда, путозе куцювонц шрать ланкс, яфодезень боку равжа шяярензон и равжа сельмензон ванфтозень мастору. Вельсоветонь председательсь лиссь ушу, ванондозе сембе пирьфть, сувсесь кардуга, куценць карда прявга, кудботмаруга, но киньге и мезевок ашезь му. Сон вешендсь Розгин лишенецть, кона Фокать валонзон коряс и шитеньге салава эрясь Вирьгуть пялонза.
— Ся Розгинць, куленьдеви, и минь велесоноконга эряй.
— Сон везде кяшеньди. Кульхть ина. Мзярда мярьгсь милиционерсь Вирьгути срхкамда мархтонза — сембе семейкац аварьгадсь оцю вайгяльса. Урьвац, кати месть, вднать, корхталексоль, аньцек кенерьсь азомда „Мярьгеньдень, мярьгеньдень тят...“, а Внрьгинць кодак топстацы пильгонц, мяк шерьхкозевьсь кудсь. „Лоткак,“, цяткофць лангозонза. „Кши давай мархтон.“ Вельсоветонь председательсь ся пинкть вешеньдьсь кудса и галанкать алда мусь кагодса ашкотф кемень наганонь пулят. „Лихтьк наганцень! Кодиить?“, кяжиста пшкядсь милиционерсь. Но Вирьгуть шамац ащесь станяк ордатфста: Милиционерть корхтаманц бта афи кулезе и апак варжакстт лангозонза, отвечась „Монь аш наганозе. Ся патроттнень мушендыня“. Милиционерсь мярьксь лисемда кудста. Пятна-ланкса сокор тидяц ушедсь явсемя. Аварьдсь и сестрацка, аньцек брадоц, конаньди ульсь кемголмушка киза, ашезь аварьде и карнесь сестранц эсонга. Тон Тимофеич пади дивандат мес ашезь аварьде ся шабась? Д сянь Вирьгуть эсь лацонза афи аварьфцак курок. Яхянь Вирьгусь, эсь лацанза тонафнесы... [ 93 ]равжа сельме, тюжя шама. Вирьгусь палазя брадонц и мярьксь: „Тят эводь, Мишка. Ефси тят пель. Мон тячикиге саян“ и лиссь кудста. Семейкац станяк уркодсь, а брадоц лиссь кенкшкя ланкс и ванць мельганза.
Етамбачк сувсесть мазанказонза тоса — тонга наганонц ашезь му. Сявозь мля вельсоветонь канцелярияв. Аф ламос ащезь Юргинтть мархта Кяржань Пракатьке вятезь, а тоста алашаса милиционерхне сявозь коза эрявихть.
Юкстакшнине азондомс: Кяржань Пракать седялдонза мусть обрез заряжафста, а Юргинтть урьванц арьзястонза вете сятт цалковай ярмак. Кизефтезь, коста сон сявозень ня ярмакнень — „Мо-моньцень“ эводезь отвечась милиционерти. Милицияса, мля, вденьцяфтозь, што ня ярмакнень теенза максозень Розгин лишенецсь, штоба сон васькафнель честнай колхозникнень ланкс и новляль кальдяв кулят колхозть колга. Пякстамдост меле, эсткиге колхозонь правлениясь пуроптсь марстонь пуромкс, коса Зойнов ялгась азондозе сембе тевть, кода ащесь. Корхтась и Фокаське. Сон тожа азондозень сембень, мезе содась, путозе прянц виноватокс, мес якась монь утомозень грабама и кармась эняльдема, штоба пуромкссь сонь простиндальхце и прьмальхце колхозу. Макссь пуромксти вал, што сон пяк цебярьста кармай работама и кармай вятема кемя тюрема Розгинттнень и Варьгуфнень каршес.
Тяда меле сявсь вал Микитась и кармась корхтама. „Монь мяльсон, ялгат, Фокась аф виноват, сон эряви примамс колхозу. Вирьгинтть Кяржань Пракать и Юргинтть колга эняльдемс пролетарскай судтти, штоба куроконя судендальхцень и максоль стама наказания, кодама синь работасть синць“. Микитать корхтама йоткованза трьнязевсь телефонць. Зойновсь сявозе трубкать и ушедсь кульхцендома. Ванцаськ кульхцендынеське нолдазень трванзон, шамац кяжиясь Повфтазе трубкать меки вастозонза и корхтай: „Беда ялгат! Вирьгинць мяньць“. Ашесть кенярьдя тя куляти, но и ашесть эводь Сембе надьясть, што Вирьгинць пови курок меки.
Иван атя аделазе корхтаманц, шукадезень трубкастонза кулуфнень.
Атятьненьди, вднать, сяда лама ашель мезе корхтамс, — нарьдьста лупштасть кятьт, Тимофеичсь почфонзон сявазень копозонза и тусь нурдтнень ёткова Пинксь шашнесь обедти. Базарса вяри стяфнеф ажиятьне ниньге сяда пяк сидекстомсть. Ширеса ащезь ашесть шарьхкодев кодама валхтка, аньцек марявсь марстонь корхтамань жалф и увф, конань ёткса марявсь гармоньянь морама вайгяль.
Иван атя ларекста рамась церанзонды калошат, урьвянянцты панароньди акша котф. Сяда меле кильдезе каряйть, лиссь базарста и молема ёткова таргась мокшень мор. Кода нюрямняса шоряфтозе тялонь таза варманясь Иван атянь моронц, конац кулевсь ичкози-ичкози.