Колхозонь эряф/1936/01/Ашесть сяськя/1
| Ашесть сяськя |
| АНДРЕЙ ЧЕКАШКИН |
Печатнай “Т“ буква лаца ащесь лапотьфста Югста Северти Серана велесь. Север ширьденза няевсть машина ки станьцянь поселкаста кудтне, РИК-ть и Райком-ть зданиясна, вирень пилендама и винань нолдама завоттнень сери трубасна. Поселкать види ширесонза няевсь сери пиче вирь. Аф ичкозе машина кить эзда ащесть сад потмоса совхозть кирьпицень акша кудонза. Мани пинкста шиньберьф ашезь машне пакся трвава пиксокс таргаф паровозань уля качамсь.
Псиста пидесь шись, мольсь 1932 кизонь май ковсь.
Топодьсь-ни недяля, кода Серана велень „Энгельс“ колхозсь лиссь видема. Фкявок од ломань кудса аф няят, аньцек Иван-атя мархта Петя-атя колхозонь пирьфть ваксса латалняса анокласть крандаст, конат пяк эрявихть колхозти сьорань урядама кампанияти.
Велеса аш кодамовок иля шум, аньцек ичкози марявсь плотник атятьнень узерьса лаксемасна.
Атятьнень малас нежедсь колхозонь председательсь Зойнов ялгась. Сонь „Энгельс“ колхозонь марстонь пуромкссь аназе МТС-ть ширьде кода цебярь работниконь.
— Шумбраста работакшнетяда? — шумбраксць Зойновсь плотник атятьнень мархта весяласта.
— Шумбраста, — отвечась Иван-атя, — вете шиста кемень ташта крандаст петемя, а тяни вага няйсак ушедоме одонь тиемя.
Зойновсь валхтозе прястонза серай кепканц и нарнесь мархтонза бритваса нараф ливозю прянц. Пря киськоц сонь ульсь акша тюжя шаманц коряс, мес кяшфель сон шить эзда картузонц алу. Панар пунянза ащесть юксфста и няевсь ниньге шамадонзонга шинь пидеф мяштец и сялдазоц, кона корхтась сянь колга, што Зойнов ялгась кржа ваймоси эше вастоняса, а эряй фалу паксяса. Шамац веселаль, ниньге сяда пяк весялгафнезь корхтамста мзылды трванза. Сон ванонць атятьнень петьф крандазснон и сяка йоткова корхтась:
— Работада, работада-атят! Лацкас аноклататама сьоронь урядамати-урядасаннек сьоронеконь вейхкса-кемень шиста. Видемати аноктолеме — ниле шида меле аделасаськ видеманеськень, ульхтяма васеньце вастса сембе районца. И тяниеньге ни районнай газетаса шнайхть минь эсонок. Ульхтяма сьора мархтот, няфттяма кепедькс илядыкс башка эряйхненьди, синьге сувайхть колхозу.
Атятьне пезфтазь узерьснон и пара мяльса кульхцендсть од председательть корхтаманц. Тусть сонь сембе валонза атятьнень мяльс и Иван-атя корхталексоль сонь каршезонза кати месть, но лоткафтозе мяленц киге йотай алясь.
— Вона Виргусь, пижя прахсь сявольхце, танга сай, маряк нолдазь, — няфнесь Иван-атя сурса кигя йотай цьорать ланкс. — Куду няйсак моли. Ваймосесь аф ламос веленеське, тяни танга эздонза тошна ули.
Молись ульсь комсь колмува кизоса цьора. Средняй сереса. Прястонза [ 82 ]ташта кепканц ала няевсть содкс ащи равжа шяяренза. Эчке ронгоц кяшфоль тюжя котфонь панарса. Сон лоткась фкя вастс, путозень модать ланкс кядьстонза каннеф пинжаконц и рдазу кяскавнянц, сотозе батинкастонза карьскять и тусь веле кувалмова. Молемстонза шарфнесь цюгуншка прянц эса кафцьке шири.
— А мес кальдявста ланганза корхтат, Иван-ате? — кизефтьсь Зойновсь, — Кодама ломань сон?
— А вага кодама ломань сон. Кульхть мон теть азонца, — корхтась Иван-атя. — Сяка пинкть аф ламда вайматама. Озада вага тя веляф орванять ланкс аф ламос.
Иван-атя судерясь туста седой сакалонзон эса. Крьвястезе трупканц и ушедсь азондома.
— „Тя ломаньць вор и, мярьгомс можна, ломань шави. Салама тевти сон тонадсь ниньге ёлманястакиге. Шабакс пингонц сон йотафтозе кирьдифтеме-кардайфтеме: аляц работакшнесь баяронь ширеса, сямельде кулось. Тядяц курок сокоргодсь. Оржаль йолманясткиге, минь ульцясонок эряйхть, лац содаса. Куяронь саламась сонь васеньце тевоцоль. Мзяроксть сонь сянкса алятьне пере эшинятьненьди нолнезь, пиди палаксса, крхтапань телат пицезь и сякокс ашезь карнев. Аньцяк нолдасазь, комоти плетеньтть вельф, шукасы клоконц пиксти, кода оцю аля, тядянь лемса ашкодозь: „йотат ингольганок, мон тонь кевса пряцень лазса“.
Ся ульцяста пирьфнень эзга сембе алхнень салсесь. Ялгатка мархтонза тонафнесь. Весть кизонда вирьса прьметазе, Ефим атя перенястонза лиссь вири ленгаксонкса, карьхть котцель латалнясонза эздост. Сон латалняста атять медь ведарканц фатязя и — вири. Сась атясь, сюцекшнесь — тись и йотась сяконь мархта. Сямольде ялганзон мархта колма шишка якась вири кши кочамснон мархта. Илять сайхть тоста кода прабан пект, шамасновок ваденьтьфть медьса“.
— И киньдиге ашезь кардав стак колендемде? — кизефтезе Зойновсь Иван атянь.
— „А киньди кардама. Пеняндама пялост якальхть. Тядяц пиксольхце, но пялес сокорста мезе пиксы... А ласькомста оцю ломаненьди афоль сатнев. Тяни няйсак шабатьнень школав усксихть эсост, а эста вдь кивок ашезь каньзечня инксот.
Кда кассь кеветиешка кизос — иля тев кярьмодсь: удома вастста сараснень кунжедсь. Весть удан кудынгольнясон; маряса пирьфса сарасне ктрдыхть. „Мес синь?“ — эсь пачкан думандан. Лисень пирьфи, ктрдфсь лоткась. Ожка, мярьгень, ванца удома васцнон. Молень, ды лата прять пачк няят. Эсткиге шарьхкодень — тя сон. Лисень валомня пирьфста, мярьгень инголдаса. Маряса бух комотьсь лата пряста и аньцек вжняйхть модамарьнетьксне, ласькозь тусь каньфнень кувалмова. Мон ласьконь, пешкодан мельганза кравул. Коста, тьряй сатови тейне. Шумозон стясть цьоране, суседне, эрь, сонь-ви арт вешентьк:.. Шовдага стямда меле бабась лувозень сарснень — атекшсь и фкя сарас ашет. Сяда лама, марясак, ашезь кенерь.
Од цьоракс пинкстонза шура цера мархта ашезь тюренкшне, хуть эстиензонга повондоль, а лама пикссь. Весть Шумкин атянь цьоранц пиксозе ульцяса, а содасак-ни тон тоньцьке, од цьоракс улеть — фкя-фкяньди таза кяжь панттама. Ну вот. Весть фкя покровонь празникть пинкста, Шумкинонь цьорась сась ширеста работама вастста, Московста. Эста сон ярмакта лама работакшнесь. Цьорась тожи ай-ай врдоколь. Ну, ялганзон мархта копордасть. Сонь и прась прязонза ся пиксомась и корхтай ялганзонды: „Арьда цьорат, Вирьгуть ляпофцаськ, кода эряви. Мяляфцасть, йотай кизоть монь пиксомань“. Ялганза согласиндасть „Арядовать! Минь кудстонзонга тьнярнек лихцаськ“.
Тусть. А покров пинкть няить, ульцяса пяшксе ломаньда, перьф пяльга зойф, — морахть. Вирьгуськя ащесь озада кудбоксонза, тожи афламода копордафоль. Эста-ни теенза аф вор Макарка мярьгельхть, а Вирьгу. Ну, нят, марясак цьоратьне иредстонь прять мархта видеста сонь лангозонза ивадезь кармасть молема: „А! шафтядязь, окяннай!!“ Вирьгусь сяда курок куду кяшсь. Нят цьоратьне куд малати йофси нежедсть, ивадезь: „Кудстотка лихтядязь!“ а синьць сюцихть. Аф ламос ащезь га-а-ай марявсь ружияса ляцема вайгяль. [ 83 ]Шумигин атянь атянь цьорац кундазе кафцькя кядьса пеконц, прась модати ивадезь, „Ой, шавомань!“ Кевярьсь модать ланкса, а вярхне тжназь лиссть сур йоткованза.
Цьорать сявозь кандозь ялганза. Сявоньдезь больницявга, омбоце шиня мля тозк и кулось. Кода аля аф кулы, сон вдь ветешка картеч нолдась цьорать потмозонза. И кадозе Шумгин атянь тяфта цьорафтома сиредень пяльхть кафонест сире крамой бабанц мархта. Вага вдь кодама сон ломаньць, Вирьгусь. Пине, аф ломань. Сяка шинякиге мля велень совець прважазе милицияв, ломанень шавить судсь судендазе вете кизот тюрьмав. Тяни вага няйсак сроконц ётафтозе, нолдазь куду“.
Атясь аделазе азондоманц, путозе карманозонза трубканц и стясь шочконять ланкста.
— Вона кодама ломаньць — пшкядьсь Зойновсь. — Тяни карман содамонза монга.
— Ниньге кой-мезе азондолень квалмованза, ды саты, катк мзярда-мзярда, — корхтась Иван атя кядезонза узеренц сявомста — Тоньге, Зойнов ялгась, кирьнедязь.
— Ну тя аш мезевок, — отвечась Зойнов и путозе прязонза картузонц. — Пади ваймамска эряви. Работакшнеда лацкас, атят, мон молян танга паксяв видихненьди.
Шись видеста ванць колхозонь пирьфть ланкс и кармась молемя-ни илядьть шири.
Атятьне прдазь инструментснон и тусть обедама. Ингельгаст ульцять кувалма йотась Вирьгуть сестрац кооперацияста; кядьсонза кандсь кафта литрат вина. Вакссонза серьцек мольсь Кяржань Пракась. Сон ульсь оцю, копоц кода кели седяф. Шамац равжа, пильгенза — бта гумонь кичкор пеньгат.
— Вона, няйсак, пуромихть ни вор ялганза пялонза, — кортасть атятьне и ширем сельмет ванць кига молихнень ланкс.