Колхознӧй асыв

by Лебедев Михаил Николаевич

Видзӧд, кыдзи петӧ шонді,
Кыдзи ворсӧ дзирдыс сылӧн,
Кыдзи сійӧ кайны пондіс
Зарни шор моз вӧр пу йылӧд.

Пемыд вӧрлӧн югдіс баныс,
Нюмъялӧны кыдзьяс, козъяс.
Жаворонок сьылӧм паніс,
Оз нин лӧня пукав позъяс.

Сиктыс садьмис. Йӧзыс жуӧ,
Дыр оз узьны гожся кадӧ!
Мӧс видзысь со вӧтлӧ, нуӧ
Лудланьӧ колхознӧй стада.

Мӧсъяс мӧда-мӧдсьыс бурӧсь,
Шыльыд мышкуаӧсь, пӧтӧсь.
Дерт, оз видзны кыдзисюрӧ
Ӧтув картаясын скӧтӧс.

Со звено колхознӧй мӧдіс
Тэрыб шагӧн муяс вылӧ.
Мича вежӧдӧ том кӧдза,
Тӧвру улын кышакылӧ.

«Колӧ весавны став ёгсӧ! —
Тадзи сёрнитӧны аньяс. —
Могмӧдам кӧ тайӧ могсӧ,
Бура кыпӧдчасны няньяс!»

Со конюшня дорын зіля
Доддялӧны сизим вӧлӧс.
Жӧдзӧ сэні конюх Пиля,
Кылӧ сылӧн лэчыд гӧлӧс.

Вӧла войтырлы мый керны,
Рытсянь индӧма нин стӧча.
Зэв на колӧ збоя вӧрны,
Кӧть и помалӧма кӧдза.

Со и кузнеча нин воссис,
Лӧзов тшын нин сэтысь кайӧ.
Кузнеч Митрей дорны босьтчис,
Муса сылы уджыс тайӧ.

Сьӧкыд мӧлӧт камгӧ гора,
Грымган шынас быттьӧ шуӧ:
«Пыр ме дора, ӧдйӧ дора,
Уджным мунӧ гажа шумӧн!»

Со нёль плӧтник вына киӧн
Тшупӧны вель ыджыд школа.
Арся кадыс воас мыйӧн,
Сэні велӧдны нин колӧ!

Эштас школа, восьтас ӧдзӧс,
Шуас: «Дона челядь, пырӧй! —
Аддзад, кутшӧма ме вӧччи!»
Школа сэки гажӧн тырас...

А со слесарь ывла вылын
Кык косилка дзоньтӧ-керӧ,
Страдна кадыс абу ылын,
Оз кӧ вештышт сійӧс зэрӧм..

Тошка дядьӧ вӧчӧ куран,
Лӧсьӧдалӧ чӧвтан вила.
Быдӧн олӧ югыд юрӧн,
Тӧдӧ ассьыс ыджыд сила.

Шонді ӧзйӧ зарни биӧн.
Гӧгӧр радлӧ ловзьӧм муыс.
Асывводзсянь гажа шыӧн
Быд колхозын пуӧ уджыс.

1949 во.