Кни́га житі́й ст҃ы́хъ/Феѵрꙋа́рїй/г҃

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Деке́мврїа в҃

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а феѵрꙋа́рїа въ г҃ де́нь

Деке́мврїа д҃→

Мцⷭ҇а феѵрꙋа́рїа въ г҃ де́нь,
па́мѧть ст҃а́гѡ пра́веднагѡ
сѷмеѡ́на бг҃опрїи́мца.

Сѷмеѡ́нъ ста́рецъ, по свидѣ́телствꙋ бжⷭ҇твеннагѡ є҆ѵⷢ҇лїа, чл҃вѣ́къ бѣ̀ пра́веденъ и҆ бл҃гочести́въ, ча́ѧ ѹ҆тѣ́хи і҆и҃левы, и҆ дх҃ъ бѣ̀ ст҃ъ въ не́мъ. томꙋ̀ и҆звѣще́но бы́сть ѿ бг҃а ѡ҆ скороимѣ́вшемъ бы́ти прише́ствїи въ мі́ръ и҆́стиннагѡ мессі́и. и҆звѣще́но же бы́сть, ꙗ҆́коже въ дре́внихъ і҆сто́рицѣхъ повѣстꙋ́етсѧ си́це: Є҆гда̀ повелѣ́нїемъ птоломе́а царѧ̀ є҆гѵ́петскагѡ преводи́мый бѣ̀ зако́нъ мѡѷсе́овъ, и҆ всѧ̀ прⷪ҇ро́ческїѧ кни́ги съ є҆вре́йскагѡ ꙗ҆зы́ка на гре́ческїй, на кото́рое дѣ́ло премⷣрѣйшїи чл҃вѣ́цы и҆збра́ни бѧ́хꙋ во і҆и҃ли число́мъ се́дмьдесѧть, въ ни́хже бѣ̀ и҆ сѷмеѡ́нъ ст҃ы́й, ꙗ҆́кѡ премꙋ́дръ, и҆ въ бж҃е́ственномъ писа́нїи и҆скꙋ́сенъ: тогда̀ ѻ҆́нъ преводѧ́щи, писа́ше кни́гꙋ и҆са́їи прⷪ҇ро́ка: дости́гши же слове́съ тѣ́хъ: сѐ дв҃а во чре́вѣ зачне́тъ, и҆ роди́тъ сн҃а: ѹ҆сꙋмнѣ́сѧ, не возмо́жно бы́ти, глаго́лѧ, дабы̀ дв҃а не позна́вшаѧ мꙋ́жа роди́ти и҆мѣ́ла. и҆ прїе́мъ но́жъ, хотѣ̀ загла́дити словеса̀ та̀, и҆ сѐ а҆́гг҃лъ гдⷭ҇нь ꙗ҆́влшисѧ є҆мꙋ̀, ѹ҆держа̀ рꙋ́кꙋ є҆гѡ̀, гл҃ющи: не не вѣ́рꙋй напи̑саннымъ, и҆́хъ сбытїѐ са́мъ ѹ҆́зриши: не и҆́маши бо ви́дѣти сме́рти, пре́жде да́же не ѹ҆́зриши и҆мꙋ́щагѡ роди́тисѧ ѿ чи́стыѧ дв҃ы хрⷭ҇та̀ гдⷭ҇нѧ. ѻ҆́нъ же вѣ́ровавъ словесє́мъ а҆́гг҃лскимъ и҆ прⷪ҇ро́чєскимъ, ѡ҆жида́ше жела́телнѡ прише́ствїѧ въ мі́ръ хрⷭ҇то́ва: и҆ бѣ̀ житїе́мъ пра́веденъ и҆ непоро́ченъ, ѿгреба́ѧсѧ ѿ всѧ́кагѡ ѕла̀, присѣдѧ̀ цр҃кви, и҆ молѧ́сѧ бг҃ꙋ, да поми́лꙋетъ мі́ръ сво́й, и҆ и҆зба́витъ чл҃вѣ́ки ѿ вселꙋка́вагѡ дїа́вола. Роди́вшꙋсѧ же гдⷭ҇ꙋ на́шемꙋ і҆и҃сꙋ хрⷭ҇тꙋ̀, и҆ и҆спо́лнившымсѧ четы́редесѧтимъ днє́мъ, по ѻ҆бы́чаю зако́нномꙋ въ цр҃ковь рꙋка́ми пречⷭ҇тыѧ мт҃ре своеѧ̀ принесе́нꙋ бы́вшꙋ, тогда̀ и҆ сѷмеѡ́нъ ст҃ы́й прїи́де дх҃омъ в цр҃ковь, и҆ воⷥзрѣ́въ на предвѣ́чнаго млⷣнца, и҆ на ро́ждшꙋю є҆го̀ пренепоро́чнꙋю дв҃ꙋ, позна̀, ꙗ҆́кѡ то́й є҆́сть ѡ҆бѣща́нный мессі́а, и҆ та̀ є҆́сть дв҃а, въ не́йже и҆са́їно прⷪ҇ро́чество и҆мѣ̀ сбы́тисѧ, и҆ сбы́стсѧ: ви́дѣ бо ю҆̀ нбⷭ҇нымъ свѣ́томъ ѡ҆крꙋжа́емꙋ, и҆ бжⷭ҇твенными сїѧ́ющꙋю лꙋча́ми: со стра́хомъ ѹ҆̀бо и҆ ра́достїю пристꙋпи́въ къ не́й, прїѧ̀ на рꙋ́ки своѝ гдⷭ҇а, и҆ речѐ: Ны́нѣ ѿпꙋща́еши раба̀ твоего̀ влⷣко, по глаго́лꙋ твоемꙋ̀ съ ми́ромъ, ꙗ҆́кѡ ви́дѣстѣ ѻ҆́чи моѝ спасе́нїе твоѐ. Прⷪ҇ро́чествова же ѡ́ стрⷭ҇ти хрⷭ҇то́вѣй и҆ распѧ́тїи, и҆ ѡ҆ бцⷣѣ, ꙗ҆́кѡ и҆́мать дш҃ꙋ є҆ѧ̀ пройтѝ ѻ҆рꙋ́жїе печа́ли и҆ ско́рби, є҆гда̀ ѹ҆́зритъ сн҃а своего̀ на крⷭ҇тѣ̀ ви́сѧща: и҆ та́кѡ бл҃годари́въ бг҃а, преста́висѧ съ ми́ромъ въ ста́рости глꙋбо́цѣй. Пи́шетсѧ бо ѡ҆ не́мъ, ꙗ҆́кѡ поживѐ три́ста и҆ шестьдесѧ́тъ лѣ́тъ, бг҃ꙋ та́кѡ продолжи́вшꙋ жи́знь є҆гѡ̀, да дости́гнетъ лѣ́та ѿ всѣ́хъ вѣкѡ́въ вожделѣ́ннагѡ, въ не́же безлѣ́тный сн҃ъ ѿ дв҃ы роди́сѧ: є҆мꙋ́же сла́ва во вѣ́ки, а҆ми́нь.

І҆кѡ́на ст҃а́гѡ сѷмеѡ́на бг҃опрїи́мца.

Тропа́рь, гла́съ а҃:

Ра́дꙋйсѧ, благода́тнаѧ бцⷣе дв҃о, и҆зъ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тмѣ̀: весели́сѧ и҆ ты̀, ста́рче пра́ведный, прїе́мый во ѡ҆б̾ѧ̑тїѧ свободи́телѧ дꙋ́шъ на́шихъ, да́рꙋющаго на́мъ воскресе́нїе.

Конда́къ, гла́съ д҃:

Ста́рецъ дне́сь ѿрѣши́тисѧ ѿ ю҆́зъ молѧ́шесѧ, сегѡ̀ житїѧ̀ тлѣ́ннагѡ, хрⷭ҇та̀ воспрїѧ́тъ на рꙋ́ки, зижди́телѧ и҆ гдⷭ҇а.

---

Ѡ҆ се́мъ ст҃о́мъ сѷмеѡ́нѣ прїе́мшемъ на рꙋ́ки своѝ вноси́маго въ цр҃ковь млⷣнца і҆и҃са, и҆ бл҃гослови́вшемъ мр҃і́ю бцⷣꙋ и҆ і҆ѡ́сифа, мно́зи разꙋмѣ́ютъ, ꙗ҆́кѡ бѣ̀ сщ҃е́нникъ, ꙗ҆́коже сщ҃е́нникъ бѣ̀ и҆ заха́рїа, пре́жде прїе́мый вводи́мꙋю въ цр҃ковь млⷣнца тогда̀ са́мꙋю мр҃і́ю, и҆мѣ́вшꙋю бы́ти мт҃рь і҆и҃совꙋ. и҆ ѿ разꙋмѣ́ющихъ та́кѡ є҆́сть ст҃ы́й а҆ѳана́сїй вели́кїй въ кни́зѣ ѡ҆ ѻ҆́бщемъ є҆стествѣ̀ ѻ҆ц҃а̀ и҆ сн҃а. ст҃ы́й кѷрі́ллъ і҆ерⷭ҇ли́мскїй въ сло́вѣ ѡ҆ срѣ́тенїи гдⷭ҇немъ. ст҃ы́й є҆пїфа́нїй во ѹ҆че́нїи ѡ҆ ѻ҆ц҃ѣ́хъ ве́тхагѡ завѣ́та, и҆ про́чїи. Но поне́же сꙋ́ть и҆ні́и и҆ не согласꙋ́ющїи, ꙗ҆́кѡ не воспомина́етсѧ то̀ въ є҆ѵⷢ҇лїи, тогѡ̀ ра́ди внꙋ́трь сегѡ̀ сло́ва ѡ҆ то́мъ не писа́сѧ.

Въ то́йже де́нь па́мѧть ст҃ы́ѧ а҆́нны прⷪ҇ро́чицы въ є҆ѵⷢ҇лїи воспомина́емыѧ, ꙗ҆́же со ст҃ы́мъ сѷмеѡ́номъ бг҃опрїи́мцемъ срѣ́тши хрⷭ҇та̀ гдⷭ҇а въ цр҃кви, глаго́лаше ѡ҆ не́мъ всѣ́мъ ча́ющымъ и҆збавле́нїѧ во і҆ерⷭ҇ли́мѣ, ꙗ҆́ко то́й є҆́сть ѡ҆жида́емый мессі́а.

И҆ ст҃а́гѡ прⷪ҇ро́ка а҆за́рїи, ѡ҆ не́мже въ кни́зѣ в҃ паралипоме́нонъ, в̾ главѣ̀ є҃і пи́шетсѧ.

И҆ ст҃ы́хъ мꙋ́ченникъ а҆дрїа́на и҆ є҆ѵвꙋ́ла, въ кесарі́и ѿ фїрмїлїа́на кнѧ́зѧ за хрⷭ҇та̀ пострада́вшихъ.

И҆ ст҃ы́хъ мч҃нкъ: па́пїа, дїодѡ́ра, и҆ клаѵдїа́на, при декі́и царѣ̀ ѿ паѵлі́на кнѧ́зѧ памфїлі́йскагѡ, хрⷭ҇та̀ ра́ди мꙋ́ченыхъ.

И҆ ст҃а́гѡ вла́сїа мꙋ́ченника, ѿ кесарі́и каппадокі́йскїѧ, и҆́же бѣ̀ па́стырь скотѡ́мъ: мꙋ́ченъ же бы́въ не ѿве́ржесѧ хрⷭ҇та̀, но и҆ мнѡ́гїѧ къ немꙋ̀ приведѐ, и҆ и҆ге́мѡна ѹ҆мертвѝ: помоли́всѧ же къ бг҃ꙋ, въ рꙋ́цѣ є҆гѡ̀ дꙋ́хъ предадѐ. и҆ ви́дѣна бѣ̀ свѣтови́днаѧ голꙋби́ца над̾ тѣ́ломъ є҆гѡ̀ парѧ́щаѧ, же́злъ же є҆гѡ̀ па́стырскїй въ зе́млю водрꙋже́нъ прозѧбѐ, и҆ возрастѐ ве́лїе дре́во, и҆ покрыва́ше вѣ́твми свои́ми ѻ҆лта́рь цр҃кве над̾ моща́ми є҆гѡ̀ со́зданныѧ.