Кни́га житі́й ст҃ы́хъ/Септе́мврїй/к҃ѕ

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Септе́мврїа к҃є

Кни́га житі́й ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а септе́мврїа въ к҃ѕ де́нь

Септе́мврїа к҃з→

Мцⷭ҇а септе́мврїа въ к҃ѕ де́нь,
житїѐ и҆ трꙋды̀ ст҃а́гѡ сла́внагѡ
и҆ всехва́лнагѡ а҆пⷭ҇ла и҆ є҆ѵⷢ҇лі́ста і҆ѡа́нна бг҃осло́ва.

Ст҃ы́й а҆́пⷭ҇лъ и҆ є҆ѵⷢ҇лі́стъ і҆ѡа́ннъ бг҃осло́въ сы́нъ бѣ̀ зеведе́евъ и҆ салѡ́мїи, ꙗ҆́же бѣ̀ дще́рь і҆ѡ́сифа ѻ҆брꙋ́чника. Се́й ѿ мре́жи ры́барскїѧ воⷥзва́нъ бы́сть на про́повѣдь є҆ѵⷢ҇лїа: є҆гда́ бо хрⷭ҇то́съ гдⷭ҇ь ходѧ̀ при мо́ри галїле́йстѣмъ, ѿ ры́барей и҆збира́ше себѣ̀ а҆пⷭ҇лы, и҆ воⷥзва̀ двꙋ́хъ бра́тїй петра̀ и҆ а҆ндре́а: Тогда̀ ви́дѣ и҆ и҆́на бра́та, і҆а́кѡва зеведе́ева, и҆ і҆ѡа́нна бра́та є҆гѡ̀, въ кораблѝ съ зеведе́омъ ѻ҆ц҃е́мъ є҆ю̀, завѧзꙋ́юща мрє́жы своѧ̀, и҆ воⷥзва̀ ѧ҆̀. ѻ҆́на же а҆́бїе ѡ҆ста́влша кора́бль и҆ ѻ҆ц҃а̀ своего̀, по не́мъ и҆до́ста. На прїѧ́тїи свое́мъ і҆ѡа́ннъ ѿ хрⷭ҇та̀ гдⷭ҇а нарече́нъ бы́сть сы́нъ гро́мовъ, ꙗ҆́кѡ то́й, є҆гѡ́же бг҃осло́вїе а҆́ки гро́мъ и҆мѣ́ѧше во все́мъ слы́шатисѧ мі́рѣ, и҆ всю̀ и҆спо́лнити зе́млю. И҆ хожда́ше по бл҃го́мъ ѹ҆чи́телѣ свое́мъ, послѣ́дꙋѧ стопа́мъ є҆гѡ̀, и҆ ѹ҆ча́сѧ ѿ ѹ҆́стъ є҆гѡ̀ и҆сходѧ́щїѧ премꙋ́дрости. и҆ бѣ̀ люби́мь ѕѣлѡ̀ хрⷭ҇тꙋ̀ гдⷭ҇ꙋ своемꙋ̀, ра́ди соверше́ннагѡ є҆гѡ̀ неѕло́бїѧ, и҆ дѣ́вственнагѡ цѣломꙋ́дрїѧ. Почте́ же є҆гѡ̀ гдⷭ҇ь междꙋ̀ двана́десѧтми а҆пⷭ҇лами ꙗ҆́кѡ и҆зрѧ́днѣйшаго, и҆ бѣ̀ є҆ди́нъ ѿ трїе́хъ тѣ́хъ ближа́йшихъ ѹ҆ч҃никѡ́въ хрⷭ҇то́выхъ, и҆̀мже мно́жае своѧ̀ бжⷭ҇твєнныѧ ѿкрыва́ше та̑йны. Є҆гда́ бо воскреси́ти хотѣ̀ дще́рь і҆аі́ровꙋ, и҆ не ѡ҆ста́ви по себѣ̀ ни є҆ди́нагѡ и҆тѝ, то́кмѡ петра̀ і҆а́кѡва и҆ і҆ѡа́нна. Є҆гда̀ на ѳавѡ́рѣ хотѣ̀ бжⷭ҇тва̀ своегѡ̀ показа́ти сла́вꙋ, поѧ́тъ петра̀, і҆а́кѡва, та́можде и҆ і҆ѡа́нна. Є҆гда̀ молѧ́шесѧ въ вертогра́дѣ, и҆ та́мѡ не без̾ і҆ѡа́нна бѧ́ше, гл҃аше бо ѹ҆ч҃никѡ́мъ: сѣди́те тꙋ̀, до́ндеже ше́дъ помолю́сѧ. и҆ поѧ́тъ петра̀, и҆ ѻ҆́ба сн҃а зеведе́ова, сі́есть: і҆а́кѡва и҆ і҆ѡа́нна. всю́дꙋ і҆ѡа́ннъ, ꙗ҆́кѡ возлю́бленный ѹ҆ч҃ни́къ хрⷭ҇тꙋ̀ неѿстꙋ́пенъ бы́сть. Ка́кѡ же люблѧ́ше є҆го̀ хрⷭ҇то́съ, зна́емо є҆́сть ѿсю́дꙋ, ꙗ҆́кѡ на пе́рсехъ є҆гѡ̀ почѝ: є҆гда́ бо на та́йнѣй ве́чери гдⷭ҇ь ѡ҆ преда́телѣ свое́мъ проречѐ, и҆ сзира́хꙋсѧ междꙋ̀ собо́ю ѹ҆ч҃ницы̀, недоꙋмѣ́ющесѧ ѡ҆ ко́мъ гл҃етъ: тогда̀ і҆ѡа́ннъ возлежѐ на пе́рсехъ люби́магѡ ѹ҆чи́телѧ, ꙗ҆́коже са́мъ повѣствꙋ́етъ въ свое́мъ бл҃говѣ́стїи: Бѣ̀ (речѐ) є҆ди́нъ ѿ ѹ҆ч҃ни́къ є҆гѡ̀, возлежа̀ на ло́нѣ і҆и҃совѣ, є҆го́же люблѧ́ше і҆и҃съ. Поманꙋ́ же семꙋ̀ сі́мѡнъ пе́тръ, вопроси́ти: кто̀ ѹ҆́бѡ є҆́сть, ѡ҆ не́мже гл҃етъ; Напа́дъ же то́й на пе́рси і҆и҃совы, гл҃а є҆мꙋ̀: гдⷭ҇и, кто̀ є҆́сть предаѧ́й тѧ̀: таковꙋ̀ и҆мѣ̀ ѹ҆ хрⷭ҇та̀ гдⷭ҇а любо́вь, ꙗ҆́кѡ ѻ҆́нъ є҆ди́нъ можа́ше невозбра́ннѡ на пе́рсехъ гдⷭ҇нихъ почи́ти, и҆ дерзнове́ннѡ ѡ҆ та́йнѣ то́й вопроси́ти. И҆мѣ́ же і҆ѡа́ннъ къ люби́телю своемꙋ̀ взаи́мъ любо́вь мно́жайшꙋю па́че и҆ны́хъ: во вре́мѧ бо во́льныѧ гдⷭ҇ни стра́сти, всѝ ѡ҆ста́влше па́стырѧ своего̀ бѣжа́ша, ѻ҆́нъ же є҆ди́нъ на всѧ̀ мꙋ́ки хрⷭ҇то́вы неѿстꙋ́пнѡ смотрѧ́ше, серде́чнѣ є҆мꙋ̀ состра́ждꙋщи, пла́чꙋщи же и҆ рыда́ющи съ пречⷭ҇тою и҆ пренепоро́чною дв҃ою мр҃і́ею мт҃рїю гдⷭ҇нею, и҆ да́же до крⷭ҇та̀ и҆ сме́рти съ не́ю не ѿстꙋпѝ ѿ пострада́вшагѡ за на́съ сн҃а бж҃їѧ. и҆ бы́сть под̾ крⷭ҇то́мъ ѿ негѡ̀ ѹ҆сн҃овле́нъ пречⷭ҇тѣй дв҃ѣ мр҃і́и. ви́сѧ бо гдⷭ҇ь на крⷭ҇тѣ̀, ви́дѣвъ мт҃рь и҆ ѹ҆чн҃ка̀ стоѧ́ща, є҆го́же люблѧ́ше, глаго́ла мт҃ри свое́й: же́но, сѐ сы́нъ тво́й. По то́мъ же глаго́ла ѹ҆чн҃икꙋ̀: сѐ мт҃и твоѧ̀. и҆ ѿ тогѡ̀ часа̀ поѧ́тъ ю҆̀ ѹ҆чн҃и́къ во своѧ́си. и҆ и҆мѣ́ѧше ю҆̀ ѹ҆ себѐ ꙗ҆́кѡ мт҃рь свою̀ во всѧ́кой че́сти, и҆ слꙋжа́ше є҆́й да́же до честна́гѡ и҆ сла́внагѡ ѹ҆спе́нїѧ є҆ѧ̀. во ѹ҆спе́нїи же несе́нꙋ бы́вшꙋ честно́мꙋ и҆ ст҃о́мꙋ бж҃їѧ мт҃ре тѣ́лꙋ ко гро́бꙋ, ст҃ы́й і҆ѡа́ннъ пред̾ ѻ҆дро́мъ є҆ѧ̀ понесѐ вра́вїе ꙗ҆́кѡ свѣ́тъ блиста́ющеесѧ, є҆́же а҆рха́гг҃лъ гаврїи́лъ пречи́стѣй дв҃ѣ принесѐ, возвѣща́ѧ є҆́й ѡ҆ преше́ствїи є҆ѧ̀ ѿ землѝ на нб҃о.

По ѹ҆спе́нїи же прест҃ы́ѧ бцⷣы ѿи́де со ѹ҆ч҃нико́мъ свои́мъ про́хѡромъ во а҆сі́ю, на ню́же падѐ є҆мꙋ̀ жре́бїй, да та́мѡ проповѣ́дꙋетъ сло́во бж҃їе. и҆ грѧды́й скорбѧ́ше, прови́дѣ бо ꙗ҆̀же по мо́рю напа̑сти, и҆̀хже и҆ проречѐ ѹ҆ч҃никꙋ̀ своемꙋ̀ про́хѡрꙋ. И҆ бы́сть, є҆гда̀ во і҆ѡппі́и сѣдо́ша въ кора́бль, и҆ нача́ша плы́ти, воста̀ бꙋ́рѧ вели́ка во є҆динонадесѧ́тый ча́съ днѐ, и҆ разби́сѧ кора́бль въ нощѝ: и҆ всѝ бы́вшїи въ кораблѝ, пла́вахꙋ въ волна́хъ морски́хъ: чесогѡ́ бо кто̀ ꙗ҆́тсѧ, сегѡ̀ и҆ держа́шесѧ пла́влѧ. въ ча́съ же шесты́й днѐ и҆зве́рже мо́ре живы́хъ всѣ́хъ съ про́хѡромъ въ пѧтѝ по́прищахъ ѿ селеѵкі́и, є҆ди́нъ то́чїю і҆ѡа́ннъ ѡ҆ста́сѧ въ мо́ри, ѡ҆ не́мже про́хѡръ мно́гѡ пла́кавъ, и҆́де во а҆сі́ю. Ше́дши же четы́редесѧть дне́й, прїи́де къ нѣ́коей ве́си при мо́ри сꙋ́щей, и҆ почѝ ѿ трꙋда̀. глѧдѧ́ше же на мо́ре, и҆ тꙋжа́ше ѡ҆ і҆ѡа́ннѣ, и҆ сѐ ѿ мо́рѧ воспѣ́нившисѧ волна̀, ве́ржесѧ на бре́гъ съ шꙋ́момъ ве́лїимъ, и҆ и҆зве́рже і҆ѡа́нна жи́ва. течѐ ѹ҆̀бо про́хѡръ ви́дѣти, ко́его чл҃вѣ́ка и҆зме́тнꙋ мо́ре, и҆ ѡ҆брѣ́те і҆ѡа́нна, и҆ воздви́же є҆го̀ ѿ землѝ, и҆ ѡ҆б̾е́мшесѧ пла́каша, и҆ благодари́ша бг҃а ѡ҆ все́мъ. Та́кѡ ст҃ы́й і҆ѡа́ннъ четы́редесѧть дне́й и҆ но́щей пребы́сть въ мо́ри пла́ваѧ, и҆ блгⷣтїю бж҃їею жи́въ ѡ҆ста́сѧ. и҆ внидо́ша въ ве́сь, и҆ и҆спроси́вше хлѣ́бъ и҆ во́дꙋ ѹ҆крѣпи́шасѧ, и҆ и҆до́ша во є҆фе́съ.

Вше́дшымъ же и҆̀мъ кꙋ́пнѡ во гра́дъ, ѡ҆брѣ́те и҆̀хъ жена̀ и҆́менемъ рѡма́на, знамени́та, и҆ сла́вна да́же до ри́ма ѕло́бою дѣ́лъ свои́хъ. держа́ше же ба́ню ѻ҆́бщꙋю во гра́дѣ то́мъ: та̀ ѹ҆́бѡ нае́мши и҆̀хъ, приста́ви въ ба́нѣ рабо́тати, и҆ ѕлѣ̀ и҆̀хъ мꙋ́чаше. хи́тростїю же свое́ю ѻ҆бои́хъ въ рабо́тꙋ себѣ̀ привлечѐ, і҆ѡа́нна ѹ҆́бѡ возгнѣща́ти ѻ҆́гнь, а҆ про́хѡра лїѧ́телемъ воды̀ во всю̀ жи́знь и҆́хъ поста́ви, и҆ пребыва́хꙋ въ таково́й бѣдѣ̀ вре́мѧ нема́лѡ. Бѣ́ же въ ба́нѣ то́й де́мѡнъ, и҆́же по всѧ̀ лѣ́та ѹ҆давлѧ́ше є҆ди́наго ѿ мы́ющихсѧ въ не́й, и҆лѝ ю҆́ношꙋ и҆лѝ ѻ҆трокови́цꙋ. Внегда́ бо созида́шесѧ ба́нѧ, и҆ ко́панꙋ бы́вшꙋ ѡ҆снова́нїю, ю҆́ношꙋ и҆ ѻ҆трокови́цꙋ та́мѡ бѣсо́вскимъ совѣ́томъ живы́хъ вкопа́ша, и҆ ѿто́лѣ таково́е ѹ҆бі́йство нача̀ быва́ти. Слꙋчи́сѧ же въ то̀ вре́мѧ вни́ти въ ба́ню нѣ́коемꙋ ѻ҆́трокꙋ и҆́менемъ до́мнꙋ, и҆́же бѣ̀ сы́нъ дїоскорі́да старѣ́йшины гра́дскагѡ. мы́ющꙋсѧ ѹ҆́бѡ до́мнꙋ въ ба́нѣ, нападѐ на него̀ бѣ́съ, и҆ ѹ҆давѝ є҆го̀. и҆ пла́чь бы́сть мно́гъ ѡ҆ не́мъ: и҆ слы́шано бы́сть сїѐ во все́мъ гра́дѣ є҆фе́сстѣмъ, є҆́же и҆ са́мъ дїоскорі́дъ ѹ҆вѣ́давъ, въ вели́цѣй бы́сть печа́ли, ꙗ҆́кѡ и҆ ѹ҆мре́ти є҆мꙋ̀ ѿ ско́рби. Рѡма́на же мно́гѡ молѧ́шесѧ а҆ртемі́дѣ, да воскреси́тъ до́мна, и҆ пло́ть свою̀, молѧ́щисѧ, терза́ше, но ничто́же ѹ҆спѣ̀. І҆ѡа́ннꙋ же вопроси́вшꙋ про́хѡра, что̀ є҆́сть бы́вшее; ви́дѣ рѡма́на си́хъ бесѣ́дꙋющихъ, ꙗ҆́тъ і҆ѡа́нна, и҆ нача̀ би́ти крѣ́пкѡ, досажда́ющи и҆ ѹ҆корѧ́ющи, и҆ возлага́ющи винꙋ̀ сме́рти до́мновой на і҆ѡа́нна, є҆мꙋ́же и҆ коне́чное речѐ: а҆́ще до́мна не воскреси́ши, дꙋ́шꙋ твою̀ ѿ тѣ́ла твоегѡ̀ ѿлꙋчꙋ̀. І҆ѡа́ннъ же помоли́всѧ, воскресѝ ѻ҆́трока, и҆ ѹ҆жасе́сѧ дꙋ́хъ рѡма́нинъ, и҆лѝ бг҃а, и҆лѝ сн҃а бж҃їѧ бы́ти того̀ глаго́ла: но і҆ѡа́ннъ хрⷭ҇то́вꙋ проповѣ́даше си́лꙋ, и҆ ѹ҆ча́ше вѣ́ровати въ него̀. та́же воскресѝ и҆ дїоскорі́да: и҆ вѣ́роваша во хрⷭ҇та̀ дїоскорі́дъ, и҆ до́мнъ, и҆ рѡма́на, и҆ крести́шасѧ. стра́хъ же нападѐ на всѣ́хъ люде́й, и҆ чꙋдѧ́хꙋсѧ бы́вшемꙋ, и҆ глаго́лахꙋ нѣ́цыи ѡ҆ і҆ѡа́ннѣ и҆ ѡ҆ про́хѡрѣ, ꙗ҆́кѡ волхвы̀ сꙋ́ть. глаго́лахꙋ же дрꙋзі́и, ꙗ҆́кѡ волхвы̀ ме́ртвыхъ не воскреша́ютъ. Ѿгна́ же і҆ѡа́ннъ и҆ дꙋ́ха лꙋка́ваго ѿ ба́ни, и҆ пребыва́хꙋ ѻ҆́ба въ домꙋ̀ дїоскорі́довомъ, ѹ҆твержда́юще въ вѣ́рѣ новопросвѣще́нныхъ, и҆ житїю̀ добродѣ́телномꙋ и҆̀хъ ѹ҆ча́ще.

Бы́сть же въ є҆ди́ное вре́мѧ пра́здникъ а҆ртемі́дѣ въ є҆фе́сѣ, и҆ пра́здновахꙋ всѝ лю́дїе во ѻ҆де́ждахъ бѣ́лыхъ, торжествꙋ́юще и҆ ликꙋ́юще при хра́мѣ а҆ртемі́диномъ: прѧ́мѡ же хра́ма бѣ̀ і҆́дѡлъ тоѧ̀ боги́ни. Вше́дъ ѹ҆́бѡ і҆ѡа́ннъ на мѣ́сто высо́ко, ста̀ близ̾ і҆́дѡла, и҆ велегла́снѡ слѣпотꙋ̀ и҆́хъ ѡ҆блича́ше, ꙗ҆́кѡ не вѣ́дѧтъ, комꙋ̀ покланѧ́ютсѧ, и҆ вмѣ́стѡ бг҃а бѣ́са почита́ютъ. Наро́ди же и҆спо́лнишасѧ ꙗ҆́рости ѡ҆ се́мъ, и҆ ка́менїемъ на і҆ѡа́нна мета́хꙋ, и҆ ни є҆ди́нъ ка́мень того̀ ѹ҆да́ри, но возвраща́ющесѧ бїѧ́хꙋ мета́ющыѧ и҆̀хъ. І҆ѡа́ннъ же просте́ръ рꙋ́цѣ горѣ̀, нача̀ моли́тисѧ, и҆ а҆́бїе бы́сть горѧ́честь и҆ зно́й ве́лїй на землѝ, и҆ падо́ша ѿ мно́жества мꙋже́й до двꙋ́хъ сѡ́тъ, и҆ и҆зомро́ша. про́чїи же ѿ ѡ҆бдержа́щагѡ и҆̀хъ стра́ха є҆два̀ въ себѐ прїидо́ша, и҆ молѧ́хꙋсѧ і҆ѡа́ннꙋ, да полꙋча́тъ млⷭ҇ть, тре́петъ бо и҆ стра́хъ на́йде на ни́хъ. Є҆гда́ же помоли́сѧ і҆ѡа́ннъ к̾ Бг҃ꙋ, всѝ ѹ҆ме́ршїи воскресо́ша, и҆ всѝ припадо́ша ко і҆ѡа́ннꙋ, и҆ вѣ́ровавше во хрⷭ҇та̀ крⷭ҇ти́шасѧ. на нѣ́коемъ же та́мѡ мѣ́стѣ, нарица́емомъ тѵ́хи, и҆сцѣлѝ і҆ѡа́ннъ разсла́бленнаго двана́десѧть лѣ́тъ лежа́ща, и҆́же воста́въ просла́ви бг҃а.

Мно́гимъ же дрꙋги́мъ зна́менїѧмъ сбыва́ющымсѧ ѿ і҆ѡа́нна, и҆ слꙋ́хꙋ чꙋде́съ повсю́дꙋ проте́кшꙋ, ви́дѣвъ бѣ́съ пребыва́ѧй въ ка́пищи а҆ртемі́динѣ, и҆ поразꙋмѣ́въ, ꙗ҆́кѡ ѿ негѡ̀ и҆́мать низложе́нъ бы́ти, ѻ҆́бразъ во́инскїй на сѧ̀ воспрїѧ̀, и҆ го́рькѡ пла́чꙋщи на нѣ́коемъ мѣ́стѣ сѣдѧ́ше. мимоидꙋ́щїи же є҆го̀ вопроша́хꙋ, ѿкꙋ́дꙋ є҆́сть, и҆ чесѡ̀ ра́ди та́кѡ ѕѣлѡ̀ пла́четсѧ; ѻ҆́нъ же гл҃аше: а҆́зъ є҆́смь ѿ кесарі́и палесті́нскїѧ, старѣ́йшина над̾ темни́цами, и҆ пре́дано мѝ бы́сть стрещѝ двои́хъ волхвѡ́въ ѿ і҆ерⷭ҇ли́ма прише́дшихъ, і҆ѡа́нна и҆ про́хѡра, и҆̀хже сꙋди́ша на сме́рть мно́жества ра́ди ѕлы́хъ дѣ́лъ и҆́хъ, и҆ во ѹ҆́трїе и҆мѣ́ѧхꙋ бы́ти лю́тѣ погꙋ́блени. ѻ҆ни́ же волхвова́нїемъ свои́мъ ѿ ѹ҆́зъ и҆ темни́цы но́щїю и҆збѣго́ша, и҆ впадо́хъ въ бѣдꙋ̀ а҆́зъ и҆́хъ ра́ди: и҆́бо за ни́хъ менѐ кнѧ́зь погꙋби́ти хо́щетъ. а҆́зъ же моли́хсѧ кнѧ́зю, да пꙋ́ститъ мѧ гна́ти во слѣ́дъ и҆́хъ, здѣ̀ ѹ҆́бѡ слы́шꙋ, ꙗ҆́кѡ ті́и волхвы̀ ѡ҆брѣта́ютсѧ, и҆ не и҆мѣ́ю помо́щника себѣ̀, да кто̀ и҆ме́тъ и҆̀хъ. Сїѧ̑ глаго́лющи бѣ́съ, пока́зоваше гра́матꙋ ѡ҆ то́мъ свидѣ́телствꙋющꙋю, пока́зоваше же и҆ ѹ҆́золъ вели́къ зла́та, ѡ҆бѣща́ѧ да́ти є҆го̀ тѣ̑мъ, и҆̀же а҆́ще таковы́ѧ волхвы̀ погꙋбѧ́тъ. Сїѐ слы́шавше нѣ́цыи во́ини, сожалѣ́ша ѡ҆ не́мъ, и҆ подвиго́ша наро́дъ на і҆ѡа́нна и҆ про́хѡра, и҆ ше́дше къ до́мꙋ дїоскорі́довꙋ, гл҃ахꙋ: и҆лѝ пода́ждь на́мъ волхвы̀, и҆лѝ хра́минꙋ твою̀ зажже́мъ. Дїоскорі́дъ же и҆зволѧ́ше па́че, да до́мъ є҆гѡ̀ сгори́тъ, не́жели тѣ̑мъ а҆пⷭ҇ла преда́ти со ѹ҆ченико́мъ про́хѡромъ. Ѹ҆вѣ́дѣвъ же і҆ѡа́ннъ дх҃омъ, ꙗ҆́кѡ мѧте́жъ людскі́й въ бл҃го́е произы́ти и҆́мать, предадѐ собо́рꙋ себѐ и҆ про́хѡра. Ведо́ми ѹ҆́бѡ ѿ наро́да, доидо́ша къ хра́мꙋ а҆ртемі́динꙋ, и҆ помоли́сѧ і҆ѡа́ннъ бг҃ꙋ, и҆ падѐ внеза́пꙋ хра́мъ і҆́дѡлскїй, и҆ ни є҆ди́нагоже повредѝ чл҃вѣ́ка. и҆ речѐ а҆пⷭ҇лъ къ сѣдѧ́щемꙋ та́мѡ бѣ́сꙋ: тебѣ̀ глаго́лю нечи́стый бѣ́се, рцы̀, коли́кѡ лѣ́тъ и҆́маши, здѣ̀ живꙋ́щи; и҆ ты́ ли наро́дъ се́й подви́глъ є҆сѝ на ны̀; бѣ́съ же речѐ: а҆́зъ и҆́мамъ двѣ́сти четы́редесѧтъ и҆ де́вѧть лѣ́тъ, здѣ̀ пребыва́ѧ, и҆ а҆́зъ подвиго́хъ наро́дъ се́й на вы̀. Рече́ же є҆мꙋ̀ і҆ѡа́ннъ, тебѣ̀ завѣщава́ю, во и҆́мѧ і҆и҃са назѡрѧни́на, да не пребыва́еши на мѣ́стѣ се́мъ: и҆ а҆́бїе и҆зы́де бѣ́съ. ѹ҆́жасъ же прїѧ̀ всѣ́хъ люде́й, и҆ вѣ́роваша во хрⷭ҇та̀. Бы́ша же и҆ бѡ́лшаѧ зна́мєнїѧ ѿ і҆ѡа́нна, и҆ мно́гое мно́жество наро́да ѡ҆брати́сѧ ко гдⷭ҇ꙋ.

Въ то̀ вре́мѧ домитїа́нъ ке́сарь ри́мскїй гоне́нїе ве́лїе воздви́же на хрⷭ҇тїаны, и҆ ѡ҆клевета́нъ бы́сть къ немꙋ̀ і҆ѡа́ннъ: є҆го́же є҆́мши є҆па́рхъ а҆ссі́йскїй, посла̀ свѧ́зана въ ри́мъ къ ке́сарю, и҆дѣ́же хрⷭ҇то́ва ра́ди и҆сповѣ́данїѧ пе́рвѣе бїе́нъ бы́сть, та́же ча́шꙋ ѻ҆тра́вы смертоно́снагѡ ꙗ҆́да и҆спо́лненыѧ и҆спѝ. є҆гда́ же не вреди́сѧ ѿ неѧ̀, по словесѝ хрⷭ҇то́вꙋ: А҆́ще и҆ что̀ сме́ртно и҆спїю́тъ, не вреди́тъ и҆̀хъ: тогда̀ въ коно́бъ є҆ле́а ѕѣлѡ̀ кипѧ́ща вве́рженъ бы́сть, но и҆ ѿтꙋ́дꙋ не врежде́нъ и҆зы́де. и҆ вопїѧ́хꙋ наро́ды: Вели́къ бг҃ъ хрⷭ҇тїа́нскїй. Ке́сарь же не дерза́ѧ бо́лѣе і҆ѡа́нна мꙋ́чити, мнѧ́ше бо є҆го̀ безсме́ртна бы́ти, на и҆згна́нїе въ па́тмосъ ѻ҆́стровъ ѡ҆сꙋдѝ, ꙗ҆́коже и҆ во снѣ̀ гдⷭ҇ь і҆ѡа́ннꙋ речѐ: ꙗ҆́кѡ подоба́етъ тѝ мно́гѡ пострада́ти, и҆ и҆згна́нъ бꙋ́деши во ѻ҆́стровъ нѣ́кїй, и҆́же велмѝ тебѐ тре́бꙋетъ.

Пое́мше же во́ини і҆ѡа́нна съ про́хѡромъ, ведо́ша въ кора́бль, и҆ нача́ша плы́ти. Во є҆ди́нъ же ѿ дне́й пла́вающымъ и҆̀мъ, сѣдо́ша царе́вы мꙋ́жи на ѻ҆бѣ́дъ, и҆ мно́жество ꙗ҆́ди и҆ питїѧ̀ и҆мꙋ́ще, весели́шасѧ. нѣ́кїй же ѿ ни́хъ ю҆́ноша и҆гра́ѧ, спадѐ съ кораблѧ̀ въ мо́ре, и҆ ѹ҆топѐ: тогда̀ въ пла́чь ѡ҆брати́сѧ и҆́хъ весе́лїе, и҆ ра́дость въ сѣ́тованїе: не мого́ша бо помощѝ па́дшемꙋ въ глꙋбинꙋ̀ морскꙋ́ю. наипа́че же ѻ҆те́цъ ѻ҆́трока тогѡ̀, та́можде въ кораблѝ сы́й, велмѝ рыда́ше, и҆ хотѣ̀ воврещи́сѧ въ мо́ре, а҆́ще не бы̀ ѹ҆держа́нъ бы́лъ ѿ и҆ны́хъ. Вѣ́дꙋще же і҆ѡа́нна си́лна въ зна́менїѧхъ, прелѣ́жнѡ є҆го̀ всѝ молѧ́хꙋ, да помо́жетъ и҆̀мъ. ѻ҆́нъ же вопросѝ коего́ждо и҆́хъ, кото́раго кто̀ чте́тъ бо́га; и҆ рѣ́ша: ѻ҆́въ а҆поллѡ́на, ѻ҆́въ ді́а, ѻ҆́въ и҆раклі́а, и҆ні́и же а҆скли́пїа, дрꙋзі́и же а҆ртемі́дꙋ є҆фе́сскꙋю. И҆ речѐ къ ни́мъ і҆ѡа́ннъ: толи́кѡ богѡ́въ и҆́мате, и҆ не мо́гꙋтъ спастѝ є҆ди́наго чл҃вѣ́ка ѿ потопле́нїѧ: и҆ ѡ҆ста́ви и҆̀хъ въ печа́ли бы́ти до ѹ҆́тра. Воꙋ́трїе же въ тре́тїй ча́съ днѐ сожалѣ̀ і҆ѡа́ннъ ѡ҆ поги́бели ю҆́ноши, и҆ помоли́сѧ къ бг҃ꙋ со слеза́ми дово́лнѡ. а҆́бїе же бы́сть въ мо́ри врѣ́нїе, и҆ возне́сшисѧ на кора́бль є҆ди́на волна̀, ве́рже ю҆́ношꙋ жи́ва пред̾ но́ги і҆ѡа́нновы: є҆́же всѝ ви́дѣвше ѹ҆жасо́шасѧ, и҆ ра́довахꙋсѧ ѡ҆ возвраще́нномъ ѿ потопле́нїѧ ю҆́ноши. І҆ѡа́нна же велмѝ почита́ти нача́ша, и҆ желѣ̑за съ негѡ̀, и҆́миже бѣ̀ ѡ҆ко́ванъ, снѧ́ша.

Є҆ди́ною же въ нощѝ въ пѧ́тый ча́съ бы́сть бꙋ́рѧ вели́ка въ мо́ри, и҆ всѝ ѿча́ѧвше живота̀ своегѡ̀, крича́хꙋ: ѹ҆же́ бо кора́бль сокрꙋши́тисѧ хотѧ́ше. возопи́ша же ко і҆ѡа́ннꙋ, просѧ́ще, да помо́жетъ и҆̀мъ, и҆ ѹ҆мо́литъ бг҃а соего̀, ꙗ҆́кѡ да спасе́тъ и҆̀хъ ѿ поги́бели тоѧ̀. ѻ҆́нъ же молча́ти и҆̀мъ повелѣ́въ, нача̀ моли́тисѧ, и҆ а҆́бїе преста̀ бꙋ́рѧ, и҆ бы́сть тишина̀ ве́лїѧ. Є҆ди́нъ ѿ вѡ́инъ чре́вною ꙗ҆́звою ѡ҆держи́мъ бѣ̀, и҆ хотѧ́ше ѹ҆мре́ти, того̀ а҆пⷭ҇лъ сотворѝ здра́ва. Ѡ҆скꙋдѣ́ же вода̀ въ кораблѝ, и҆ мно́зи ѿ жа́жды и҆знемо́гше, близ̾ сме́рти бы́ша. І҆ѡа́ннъ же речѐ про́хѡрꙋ: напо́лни сосꙋ́ды ѿ мо́рѧ. и҆ є҆гда̀ бѧ́хꙋ напо́лнени сосꙋ́ды, речѐ: во и҆́мѧ і҆и҃са хрⷭ҇та̀ почерпи́те и҆ пі́йте: и҆ поче́рпше ѡ҆брѣто́ша во́дꙋ сла́дкꙋ, и҆ пи́вше ѿдохнꙋ́ша, и҆ тогѡ̀ ра́ди всѝ крⷭ҇ти́шасѧ, и҆ хотѧ́хꙋ ѿпꙋсти́ти і҆ѡа́нна свобо́дна, да и҆́детъ, а҆́може хо́щетъ. но ѻ҆́нъ ѹ҆вѣщава́ше и҆̀хъ, да на повелѣ́нное мѣ́сто ведꙋ́тъ є҆го̀. и҆ доше́дше во ѻ҆́стровъ па́тмосъ, вда́ша посла́нїе и҆ге́мѡнꙋ: мѵ́рѡнъ же те́сть и҆ге́мѡновъ поѧ́тъ і҆ѡа́нна и҆ про́хѡра въ до́мъ сво́й.

Бы́сть же ѹ҆ мѵ́рѡна сы́нъ старѣ́йшїй и҆́менемъ а҆поллѡні́дъ, се́й и҆мѣ̀ въ себѣ̀ бѣ́са пытли́ва, и҆́же бꙋ̑дꙋщаѧ ска́зоваше: и҆ и҆мѣ́ѧхꙋ всѝ а҆поллѡні́да ꙗ҆́кѡ прⷪ҇ро́ка. Входѧ́щꙋ же і҆ѡа́ннꙋ въ до́мъ мѵ́рѡновъ, а҆́бїе а҆поллѡні́дъ без̾ вѣ́сти бы́сть: бѣжа́ бо во и҆ны́й гра́дъ, боѧ́сѧ, да не бꙋ́детъ ѿ негѡ̀ і҆ѡа́нномъ и҆згна́нъ пытли́вый дꙋ́хъ. Бы́вшей же ско́рби въ домꙋ̀ мѵ́рѡновомъ ѡ҆ сы́нѣ а҆поллѡні́дѣ, ꙗ҆́кѡ бы́сть безвѣ́стенъ, прїи́де посла́нїе ѿ негѡ̀ къ мѵ́рѡнꙋ, возвѣща́ющее, ꙗ҆́кѡ і҆ѡа́ннъ во́лхвъ чарова́нїемъ свои́мъ и҆з̾ до́мꙋ и҆згна̀ є҆го̀, и҆ не мо́жетъ возврати́тисѧ, доне́лѣже і҆ѡа́ннъ не бꙋ́детъ погꙋбле́нъ. Мѵ́рѡнъ же проче́тъ писа́нїе, течѐ ко и҆ге́мѡнꙋ зѧ́тю своемꙋ̀, возвѣща́ѧ бы́вшее: и҆ге́мѡнъ же є҆́мши і҆ѡа́нна, хотѧ́ше ѕвѣрє́мъ въ снѣ́дь є҆го̀ да́ти. І҆ѡа́ннъ же молѝ и҆ге́мѡна, да потерпи́тъ ма́лѡ, и҆ повели́тъ є҆мꙋ̀ ѹ҆ченика̀ своего̀ посла́ти ко а҆поллѡні́дꙋ, ѡ҆бѣща́ѧсѧ є҆го̀ въ до́мъ возврати́ти: и҆ге́мѡнъ же по́сланнꙋ бы́ти ѹ҆ченикꙋ̀ не возбранѝ, а҆ і҆ѡа́нна двѣма̀ вери́гами свѧза́въ всадѝ въ темни́цꙋ. и҆ по́йде про́хѡръ къ а҆поллѡні́дꙋ со і҆ѡа́нновымъ посла́нїемъ, въ не́мже напи́сано бѣ̀ си́це: І҆ѡа́ннъ а҆пⷭ҇лъ і҆и҃са хрⷭ҇та̀ сн҃а бж҃їѧ, пытли́вомꙋ дꙋ́хꙋ живꙋ́щемꙋ во а҆поллѡні́дѣ повелѣва́ю: ѡ҆ и҆́мени ѻ҆ц҃а и҆ сн҃а и҆ ст҃а́гѡ дх҃а и҆зы́ди ѿ созда́нїѧ бж҃їѧ, и҆ не входѝ въ него̀ никогда́же, но внѣ̀ ѻ҆́строва сегѡ̀ є҆ди́нъ бꙋ́ди въ мѣ́стѣхъ безво́дныхъ, а҆ не въ человѣ́цѣхъ. съ таковы́мъ посла́нїемъ є҆гда̀ дойде про́хѡръ до а҆поллѡні́да, а҆́бїе и҆зы́де и҆з̾ негѡ̀ бѣ́съ. А҆поллѡні́дъ же прїи́де во ѹ҆́мъ сво́й, и҆ а҆́ки ѿ сна̀ воспрѧнꙋ́въ, и҆́де съ про́хѡромъ, возвраща́ѧсѧ въ гра́дъ сво́й. Не а҆́бїе же и҆́де въ до́мъ, но пе́рвѣе ѹ҆стреми́сѧ въ темни́цꙋ ко і҆ѡа́ннꙋ, и҆ припа́дающи къ нога́мъ є҆гѡ̀, воздава́ше є҆мꙋ̀ бл҃годаре́нїе, ꙗ҆́кѡ свободѝ є҆го̀ ѿ нечи́стагѡ дꙋ́ха. Ѹ҆вѣ́давше же роди́тели, и҆ бра́тїѧ, и҆ срѡ́дницы ѡ҆ возвраще́нїи а҆поллѡні́довѣ, стеко́шасѧ всѝ, и҆ ра́довахꙋсѧ, и҆ свобожде́нъ бы́сть і҆ѡа́ннъ ѿ ѹ҆́зъ. И҆сповѣ́да бо а҆поллѡні́дъ ѡ҆ себѣ̀, глаго́лѧ си́це: ѹ҆жѐ мно́гѡ лѣ́тъ семꙋ̀ пре́йде, є҆гда̀ почива́хъ на ѻ҆дрѣ̀ мое́мъ, сна̀ глꙋбо́костїю ѡ҆держи́мь, и҆ нѣ́кїй чл҃вѣ́къ ѡ҆шꙋ́юю ѻ҆дра̀ ста́вши, потрѧсѐ мно́ю, и҆ возбꙋди́ мѧ. є҆го́же ѹ҆зрѣ́хъ че́рна па́че пнѧ̀ ѡ҆жже́нна и҆ гни́ла, є҆мꙋ́же ѻ҆́чи а҆́ки свѣщѝ горѧ́хꙋ, и҆ вострепета́хъ ѿ стра́ха. Ѻ҆́нъ же речѐ ко мнѣ̀: ѿве́рзи ѹ҆ста̀ твоѧ̀: и҆ ѿверзо́хъ, и҆ влѣ́зе во ѹ҆ста̀ моѧ̀, и҆ и҆спо́лни моѐ чре́во, и҆ ѿ тогѡ̀ часа̀ зна́емо сотворѝ мнѣ̀ и҆ ѡ҆ добрѣ̀ и҆ ѡ҆ ѕлѣ̀, и҆ ѡ҆ все́мъ в̾ домꙋ̀ быва́емомъ. Є҆гда́ же вни́де а҆пⷭ҇лъ хрⷭ҇то́въ въ до́мъ на́шъ, тогда̀ рече́ ми сѣдѧ́й во мнѣ̀: бѣжѝ ѿсю́дꙋ а҆поллѡні́де, да не ѕлѣ̀ ѹ҆́мреши, се́ бо чл҃вѣ́къ во́лхвъ є҆́сть, и҆ хо́щетъ тебѐ ѹ҆мертви́ти: и҆ а҆́бїе и҆зыдо́хъ, и҆ бѣжа́хъ во и҆ны́й гра́дъ. є҆гда́ же хотѣ́хъ возврати́тисѧ, не даѧ́ше мѝ, глаго́лѧ: а҆́ще і҆ѡа́ннъ не ѹ҆́мретъ, ты̀ не мо́жеши въ домꙋ̀ свое́мъ жи́ти. Прише́дшꙋ же про́хѡрꙋ во гра́дъ, въ не́мже бѣ́хъ, є҆гда̀ ѹ҆зрѣ́хъ є҆го̀: а҆́бїе нечи́стый дꙋ́хъ и҆зы́де и҆з̾ менѐ тѣ́мже ѻ҆́бразомъ, и҆́мже пе́рвѣе вни́де въ моѐ чре́во: и҆ ѿ мно́гїѧ тѧготы̀ ѡ҆блегча́хъ, и҆ ѹ҆́мъ мо́й до́брѣ ѹ҆стро́исѧ, и҆ бла́гѡ мнѣ̀ бы́сть. сїѐ слы́шавше всѝ припадо́ша ко і҆ѡа́ннꙋ. Ѻ҆́нъ же ѿве́рзъ ѹ҆ста̀ своѧ̀, ѹ҆ча́ше и҆̀хъ вѣ́рѣ въ гдⷭ҇а на́шегѡ і҆и҃са хрⷭ҇та̀. и҆ вѣ́рова мѵ́рѡнъ съ жено́ю и҆ ча́ды свои́ми, и҆ крⷭ҇ти́шасѧ, и҆ бы́сть ра́дость ве́лїѧ въ домꙋ̀ мѵ́рѡновомъ. Послѣди́ же и҆ жена̀ и҆ге́мѡнова хрѷсі́ппїсъ, дще́рь же мѵ́рѡнова, прїѧ̀ ст҃о́е кр҃ще́нїе съ сы́номъ свои́мъ, и҆ со всѣ́ми рабы̑ свои́ми, а҆ по не́й лаѵре́нтїй мꙋ́жъ є҆ѧ̀, и҆ге́мѡнъ же ѻ҆́строва тогѡ̀, крⷭ҇ти́сѧ, и҆ вла́сть свою̀ ѿложѝ, да свобо́днѣе рабо́таетъ бг҃ꙋ. И҆ пребыва́ше і҆ѡа́ннъ съ про́хѡромъ въ домꙋ̀ мѵ́рѡновомъ трѝ лѣ́та, проповѣ́дꙋѧ бж҃їе сло́во. и҆ мнѡ́га та́мѡ зна́мєнїѧ и҆ чꙋдеса̀ си́лою і҆и҃са хрⷭ҇та̀ сотворѝ: болѧ́щыѧ и҆сцѣлѝ, и҆ бѣ́сы прогна̀, хра́мъ а҆пѡллі́новъ со всѣ́ми є҆гѡ̀ і҆́дѡлами ѡ҆прове́рже сло́вомъ на зе́млю, и҆ мно́гихъ ѹ҆вѣ́ривши крⷭ҇тѝ.

Бѧ́ше же въ то́й странѣ̀ нѣ́кїй во́лхвъ и҆́менемъ кинѡ́ѱъ, живы́й въ мѣ́стѣ пꙋстѣ́мъ, и҆ съ нечи́стыми дꙋ́хи чрез̾ лѣ́та довѡ́лна соглаша́ѧйсѧ. того̀ всѝ, и҆̀же во ѻ҆́стровѣ лю́дїе, ꙗ҆́кѡ бо́га и҆мѣ́ѧхꙋ, привидѣ́нїй ра́ди быва́емыхъ ѿ негѡ̀. жрецы́ же а҆пѡллі́новы ѡ҆скорби́вшесѧ ѕѣлѡ̀ на і҆ѡа́нна, за разоре́нїе ка́пища а҆пѡллі́нова, и҆ ꙗ҆́кѡ всѣ́хъ люде́й ѡ҆братѝ въ слѣ́дъ себѐ, ѹ҆ча́щи ѡ҆ и҆́мени і҆и҃са хрⷭ҇та̀: и҆до́ша къ кинѡ́ѱꙋ, и҆ жа́ловахꙋсѧ пред̾ ни́мъ на хрⷭ҇то́ва а҆пⷭ҇ла, молѧ́ще є҆го̀, да ѿмсти́тъ безче́стїе богѡ́въ и҆́хъ. Кинѡ́ѱъ же не восхотѣ̀ са́мъ и҆тѝ во гра́дъ, зане́же мнѡ́га лѣ́та въ мѣ́стѣ то́мъ живѧ́ше неисхо́днѣ, но па́че гра́ждане прихожда́хꙋ къ немꙋ̀. ѡ҆бѣща́сѧ же и҆̀мъ а҆́ггела лꙋка́ваго посла́ти въ до́мъ мѵ́рѡновъ, и҆ взѧ́ти дꙋ́шꙋ і҆ѡа́нновꙋ, и҆ преда́ти ю҆̀ сꙋдꙋ̀ вѣ́чномꙋ. Наꙋ́трїе же є҆ди́наго кнѧ́зѧ ѿ лꙋка́выхъ дꙋхѡ́въ посла̀ ко і҆ѡа́ннꙋ, повелѣва́ѧ дш҃ꙋ є҆гѡ̀ къ немꙋ̀ принестѝ. Бѣ́съ же ше́дъ въ до́мъ мѵ́рѡновъ, ста̀ на мѣ́стѣ, и҆дѣ́же бѣ̀ і҆ѡа́ннъ. Ѹ҆вѣ́давъ же і҆ѡа́ннъ ѡ҆ бѣ́сѣ, речѐ є҆мꙋ̀: повелѣва́ю ти и҆́менемъ хрⷭ҇то́вымъ не и҆зы́ти ѿ мѣ́ста сегѡ̀, доне́лѣже рече́ши мѝ, ко́еѧ ра́ди вины̀ прише́лъ є҆сѝ сѣ́мѡ ко мнѣ̀. и҆ ста̀ бѣ́съ свѧ́занъ сло́вомъ і҆ѡа́нновымъ, речѐ і҆ѡа́ннꙋ: жрецы̀ а҆пѡллі́новы доидо́ша до кинѡ́ѱа, и҆ помоли́шасѧ є҆мꙋ̀, да и҆́детъ во гра́дъ, и҆ наведе́тъ на тѧ̀ сме́рть, и҆ не восхотѣ̀ гл҃ѧ: мнѡ́га лѣ́та и҆́мамъ въ мѣ́стѣ се́мъ не и҆сходѧ̀, ны́нѣ ли и҆́мамъ трꙋди́ти себѐ хꙋда́гѡ ра́ди чл҃вѣ́ка и҆ ничто́же сꙋ́щагѡ. Но ѿиди́те пꙋте́мъ свои́мъ, и҆ наꙋ́трїе а҆́зъ послю̀ а҆́ггела моего̀, и҆ по́йметъ дꙋ́шꙋ є҆гѡ̀, и҆ принесе́тъ ко мнѣ̀, и҆ а҆́зъ преда́мъ ю҆̀ сꙋдꙋ̀ вѣ́чномꙋ. И҆ речѐ і҆ѡа́ннъ къ бѣ́сꙋ: посыла́лъ ли ѹ҆́бѡ тѧ̀ когда̀ поѧ́ти дꙋ́шꙋ чл҃вѣ́ческꙋ и҆ принестѝ є҆мꙋ̀; и҆ речѐ бѣ́съ: всѧ̀ си́ла сатанина̀ въ не́мъ є҆́сть, и҆ согла́сїе и҆́мать съ кнѧ́зи на́шими, и҆ мы̀ съ ни́мъ є҆смы̀. и҆ послꙋ́шаетъ на́съ кинѡ́ѱъ, и҆ мы̀ є҆го̀. Рече́ же і҆ѡа́ннъ: а҆́зъ а҆пⷭ҇лъ і҆и҃са хрⷭ҇та̀ тебѣ̀ повелѣва́ю дꙋ́ше лꙋка́вый, ктомꙋ̀ не входи́ти въ жили́ща чл҃вѣ́чєскаѧ, нижѐ къ кинѡ́ѱꙋ возврати́тисѧ, но внѣ̀ ѻ҆́строва сегѡ̀ и҆зы́ти и҆ мꙋ́читисѧ: и҆ а҆́бїе и҆зы́де бѣ́съ и҆з̾ ѻ҆́строва. Ви́дѣвъ же кинѡ́ѱъ дꙋ́ха не возврати́вшасѧ, посла̀ и҆на́го: но и҆ то́й такѡва́ѧжде пострада̀. И҆ дрꙋги́хъ ѿ кнѧзе́й те́мныхъ двꙋ́хъ посла̀, и҆ повелѣ̀ є҆ди́номꙋ ко і҆ѡа́ннꙋ вни́ти, дрꙋго́мꙋ же и҆звнѣ̀ стоѧ́ти, да принесе́тъ ѿвѣ́тъ є҆мꙋ̀. Вше́дъ же є҆ди́нъ бѣ́съ ко і҆ѡа́ннꙋ, и҆ такѡва́ѧжде пострада̀, ꙗ҆́кѡ и҆ пе́рвѣе прише́дшїи. дрꙋгі́й же бѣ́съ, и҆́же внѣ̀ стоѧ́ше, ви́дѣвъ бѣдꙋ̀ своегѡ̀ дрꙋ́га, бѣжа̀ къ кинѡ́ѱꙋ, и҆ бы́вшее повѣ́да. И҆спо́лнисѧ же ꙗ҆́рости ѡ҆ се́мъ кинѡ́ѱъ, и҆ пое́мь всѐ мно́жество бѣсо́вское, и҆́де во гра́дъ, и҆ пора́довасѧ ве́сь гра́дъ ви́дѣвши кинѡ́ѱа, и҆ всѝ приходѧ́ще кла́нѧхꙋсѧ є҆мꙋ̀. Ѡ҆брѣ́те же і҆ѡа́нна ѹ҆ча́ща лю́ди, и҆спо́лнисѧ ꙗ҆́рости мно́ги, и҆ речѐ къ лю́демъ: мꙋ́жи слѣпі́и, заблꙋ́ждшїи ѿ пꙋтѝ и҆́стиннагѡ, послꙋ́шайте менѐ: а҆́ще пра́веденъ є҆́сть і҆ѡа́ннъ, и҆ пра́вєдна ли сꙋ́ть ꙗ҆̀же ѿ негѡ̀ гл҃ємаѧ; да побесѣ́дꙋетъ со мно́ю, и҆ да сотвори́тъ чꙋдеса̀ такѡва́ѧ, какѡва́ѧ же а҆́зъ творю̀, и҆ ѹ҆́зрите, кто̀ ѿ на́съ є҆́сть бо́лїй, і҆ѡа́ннъ ли и҆лѝ а҆́зъ; А҆́ще ѻ҆́нъ бо́лїй менѐ бꙋ́детъ, вѣ́ровати и҆́мамъ и҆ а҆́зъ гл҃ємымъ и҆ содѣ́ловаємымъ ѿ негѡ̀. И҆ є҆́мь кинѡ́ѱъ ю҆́ношꙋ нѣ́коего, и҆ речѐ къ немꙋ̀: ю҆́ноше, жи́въ ли є҆́сть ѻ҆те́цъ тво́й; ѻ҆́нъ же ѿвѣща̀ є҆мꙋ̀: ѹ҆́мре. И҆ речѐ кинѡ́ѱъ: ко́ею ѹ҆́мре сме́ртїю; ѻ҆́нъ же речѐ: плове́цъ бѧ́ше, и҆ разби́вшꙋсѧ кораблю̀, ѹ҆топѐ въ мо́ри. И҆ речѐ кинѡ́ѱъ ко і҆ѡа́ннꙋ: ны́нѣ покажѝ і҆ѡа́нне си́лꙋ твою̀, да и҆́мемъ вѣ́рꙋ гл҃ѡмъ твои́мъ, предста́ви ѻ҆ц҃а̀ жи́ва сы́нꙋ є҆гѡ̀. И҆ речѐ і҆ѡа́ннъ: не посла́ мѧ хрⷭ҇то́съ мє́ртвыѧ ѿ мо́рѧ воздвиза́ти, но чл҃вѣ́ки прелще́нныѧ нака́зовати. И҆ речѐ кинѡ́ѱъ всѣ́мъ лю́демъ: понѐ ѹ҆жѐ вѣ́рꙋйте мѝ, ꙗ҆́кѡ льсте́цъ є҆́сть і҆ѡа́ннъ, и҆ прелща́етъ ва́съ, и҆ми́те є҆го̀, и҆ держи́те, доне́лѣже и҆зведꙋ̀ ѻ҆ц҃а̀ ѻ҆́трокꙋ жи́ва: и҆ ꙗ҆́ша і҆ѡа́нна. И҆ распрострѐ рꙋ́цѣ кинѡ́ѱъ, и҆ ѹ҆да́ри и҆̀хъ, и҆ плеска́нїю бы́вшꙋ въ мо́ри, и҆ всѣ́мъ ѹ҆боѧ́вшымсѧ, не ви́димь бы́сть ѿ ѻ҆че́съ и҆́хъ. И҆ воздвиго́ша гла́сы своѧ̀ всѝ, гл҃юще: ве́лїй є҆сѝ кинѡ́ѱе. И҆ внеза́пꙋ и҆зы́де кинѡ́ѱъ ѿ мо́рѧ, держа̀ ꙗ҆́коже речѐ ѻ҆ц҃а̀ ѻ҆́трокꙋ, и҆ ѹ҆диви́шасѧ всѝ. И҆ речѐ кинѡ́ѱъ: се́й ли є҆́сть ѻ҆те́цъ тво́й; и҆ речѐ ѻ҆́трокъ: є҆́й го́споди, и поклони́шасѧ всѝ кинѡ́ѱꙋ. И҆ и҆ска́хꙋ наро́ди ѹ҆би́ти і҆ѡа́нна, но возбранѝ и҆̀мъ кинѡ́ѱъ, гл҃ѧ: є҆гда̀ ѹ҆́зрите бѡ́лшаѧ си́хъ, тогда̀ да мꙋ́ченъ бꙋ́детъ. И҆ призва́въ дрꙋга́го чл҃вѣ́ка, речѐ є҆мꙋ̀: и҆мѣ́лъ ли є҆сѝ сы́на; и҆ речѐ: є҆́й го́споди и҆мѣ́хъ, но по за́висти нѣ́кто ѹ҆бѝ є҆го̀. И҆ а҆́бїе воⷥзва̀ гла́сомъ кинѡ́ѱъ, призыва́ѧ по и҆менѡ́мъ ѹ҆би́вшаго и҆ ѹ҆бїе́ннаго, и҆ ѻ҆́ба предста́ша. И҆ речѐ кинѡ́ѱъ къ чл҃вѣ́кꙋ: се́й ли є҆́сть сы́нъ тво́й; и҆ се́й ли є҆́сть ѹ҆би́вый є҆го̀; и҆ речѐ чл҃вѣ́къ: є҆́й го́споди. и҆ речѐ кинѡ́ѱъ і҆ѡа́ннꙋ: что̀ диви́шисѧ і҆ѡа́нне; и҆ речѐ і҆ѡа́ннъ: а҆́зъ ѡ҆ си́хъ не дивлю́сѧ. И҆ речѐ кинѡ́ѱъ: бѡ́льшаѧ си́хъ ѹ҆́зриши, и҆ тода̀ чꙋди́тисѧ и҆́маши, и҆ не ѹ҆́мреши, до́ндеже ѹ҆страшꙋ̀ тебѐ зна́менїѧми. и҆ речѐ і҆ѡа́ннъ къ кинѡ́ѱꙋ: зна́мєнїѧ твоѧ̀ вско́рѣ разрꙋша́тсѧ. Слы́шавше же таково́е сло́во наро́ди, ѹ҆стреми́шасѧ на і҆ѡа́нна, и҆ би́ша є҆го̀ велмѝ, до́ндеже ме́ртва є҆го̀ бы́ти мнѧ́хꙋ. И҆ речѐ кинѡ́ѱъ къ наро́дꙋ: ѡ҆ста́вите непогребе́нна, ꙗ҆́кѡ да пти́цы нбⷭ҇ныѧ снѣдѧ́тъ є҆го̀. и҆ ѿидо́ша ѿ мѣ́ста, ра́дꙋющесѧ съ кинѡ́ѱомъ. По се́мъ же слы́шавъ кинѡ́ѱъ, ꙗ҆́кѡ і҆ѡа́ннъ ѹ҆́читъ на мѣ́стѣ нарица́емомъ каменоверже́нїе: призва̀ бѣ́са, и҆́мже волхвова́нїе творѧ́ше. И҆ ше́дъ до мѣ́ста тогѡ̀, речѐ ко і҆ѡа́ннꙋ: мы́шлю тебѣ̀ мно́жайшꙋю срамотꙋ̀ и҆ стꙋ́дъ сотвори́ти, и҆ тогѡ̀ ра́ди ѡ҆ста́вихъ тѧ̀ жи́ва, но прїидѝ на морскі́й песо́къ, и҆ ѹ҆́зриши сла́вꙋ мою̀, и҆ постыди́шисѧ. Бѧ́хꙋ же трѝ бѣ́са послѣ́дꙋюще є҆мꙋ̀, и҆̀хже мнѧ́хꙋ лю́дїе, ꙗ҆́кѡ кинѡ́ѱъ ѿ ме́ртвыхъ воскресѝ. И҆ ѹ҆да́ривъ пле́скомъ рꙋ́цѣ своѝ велмѝ, погрꙋзи́сѧ, и҆ ѿ ѻ҆че́съ всѣ́хъ бы́сть неви́димь. Наро́ди же возопи́ша: ве́лїй є҆сѝ кинѡ́ѱе, и҆ нѣ́сть и҆на́гѡ бо́лша тебѐ. І҆ѡа́ннъ же заповѣ́да бѣсѡ́мъ, и҆̀же во ѻ҆́бразѣ чл҃вѣ́ческомъ стоѧ́хꙋ, да не ѿи́дꙋтъ ѿ негѡ̀. И҆ помоли́сѧ ко гдⷭ҇ꙋ, да не вмѣни́тсѧ въ живы́хъ кинѡ́ѱъ, и҆ бы́сть та́кѡ: внеза́пꙋ бо мо́ре возмꙋти́сѧ, и҆ волна́ми воскипѣ̀, и҆ ктомꙋ̀ не и҆зы́де кинѡ́ѱъ и҆з̾ мо́рѧ, но ѡ҆ста́сѧ та́мѡ въ глꙋбинѣ̀ морстѣ́й, ꙗ҆́коже дре́внїй фараѡ́нъ погрѧ́знꙋвъ ѻ҆каѧ́нный. бѣсѡ́мъ же ѻ҆́нымъ, и҆̀хже мнѧ́хꙋ лю́дїе, ꙗ҆́кѡ чл҃вѣ́цы сꙋ́ть ѿ ме́ртвыхъ воста́вїи, речѐ і҆ѡа́ннъ: во и҆́мѧ распѧ́тагѡ і҆и҃са хрⷭ҇та̀, и҆ тридне́внѡ воскрⷭ҇шагѡ, и҆зыди́те ѿ ѻ҆́строва сегѡ̀: и҆ а҆́бїе неви́дими бы́ша. Лю́дїе же присѣдѧ́хꙋ, ждꙋ́ще кинѡ́ѱа трѝ днѝ и҆ трѝ но́щи на пѣсцѣ̀, ѿ гла́да же, и҆ жа́жды, и҆ ѿ ва́ра сл҃нечнагѡ мно́жайшїи ѿ ни́хъ и҆знемого́ша, и҆ лежа́хꙋ безгла́сни, ѿ ни́хже и҆ трѝ дѣ́тища ѹ҆мро́ша. Люде́й же тѣ́хъ поми́ловавъ і҆ѡа́ннъ, и҆ помоли́всѧ ѡ҆ спасе́нїи и҆́хъ, и҆ мно́гѡ и҆̀мъ ѡ҆ вѣ́рѣ бесѣ́довавъ, воскр҃сѝ дѣ̑тища и҆́хъ, и҆сцѣлѝ недꙋ́жныѧ и҆́хъ, и҆ всѝ є҆диномы́сленнѡ пристꙋпи́вше ко гдⷭ҇ꙋ крⷭ҇ти́шасѧ, и҆ разыдо́шасѧ въ до́мы своѧ̀ сла́вѧще хрⷭ҇та̀. І҆ѡа́ннъ же и҆́де въ до́мъ мѵ́рѡновъ, и҆ ча́стѡ приходѧ́щи къ наро́дꙋ, ѹ҆ча́ше ѡ҆ и҆́мени і҆и҃са хрⷭ҇та̀.

Нѣ́когда ѡ҆брѣ́те при пꙋтѝ лежа́ща бо́лнаго человѣ́ка, лю́тѣ ѻ҆гне́мъ содержи́маго, и҆ и҆сцѣлѝ є҆го̀ крⷭ҇тнымъ зна́менїемъ. є҆́же ви́дѣвъ нѣ́кїй жидови́нъ и҆́менемъ фїлѡ́нъ, и҆́же прѧ́шесѧ съ ни́мъ ѿ писа́нїѧ, просѝ і҆ѡа́нна въ до́мъ сво́й. бѣ́ же є҆мꙋ̀ жена̀ прокаже́нна, та̀ припадѐ къ а҆пⷭ҇лꙋ, и҆ а҆́бїе и҆сцѣлѣ̀ ѿ прока́зы, и҆ вѣ́рова во хрⷭ҇та̀: тогда̀ и҆ са́мъ жидови́нъ вѣ́рова, и҆ прїѧ̀ ст҃о́е кр҃ще́нїе съ до́момъ свои́мъ. По се́мъ и҆зы́де ст҃ы́й і҆ѡа́ннъ на то́ржище, и҆ собра́сѧ къ немꙋ̀ наро́дъ послꙋ́шати спаси́телнагѡ ѹ҆че́нїѧ ѿ ѹ҆́стъ є҆гѡ̀. прїидо́ша же и҆ жрецы̀ і҆́дѡлстїи, ѿ ни́хже нѣ́кїй и҆скꙋша́ѧ ст҃а́го, речѐ: ѹ҆ч҃телю, и҆́мамъ сы́на ѻ҆бои́ми нога́ми хро́ма, молю́ тѧ и҆сцѣлѝ є҆го̀: и҆ а҆́ще и҆сцѣли́ши, то̀ и҆ а҆́зъ вѣ́рꙋю въ бг҃а, є҆го́же ты̀ проповѣ́дꙋеши. ст҃ы́й же къ немꙋ̀ гл҃а: почто̀ та́кѡ и҆скꙋша́еши бг҃а, и҆́же ꙗ҆́вѣ пока́жетъ лꙋка́вствїе срⷣца твоегѡ̀. то̀ ре́кши, посла̀ і҆ѡа́ннъ къ сы́нꙋ є҆гѡ̀ съ тѣ́ми словесы̀: во и҆́мѧ хрⷭ҇та̀ бг҃а моегѡ̀ воста́ни и҆ прїидѝ ко мнѣ̀. ѻ҆́нъ же а҆́бїе воста́въ прїи́де здра́въ къ ст҃о́мꙋ: ѻ҆те́цъ же є҆гѡ̀ за то̀ и҆скꙋше́нїе, въ то́мже часѣ̀ ѡ҆хромѣ̀ ѻ҆бои́ми нога́ми и҆ падѐ на зе́млю ѿ лю́тыѧ болѣ́зни, крича̀, и҆ ст҃а́го молѧ́ше: поми́лꙋй мѧ̀ ст҃че бж҃їй, и҆ и҆сцѣли́ мѧ и҆́менемъ хрⷭ҇та̀ бг҃а твоегѡ̀: вѣ́рꙋю бо, ꙗ҆́кѡ нѣ́сть бг҃ъ и҆ны́й кромѣ̀ є҆гѡ̀. Ст҃ы́й же ѹ҆моле́нъ бы́въ, сотворѝ жреца̀ здра́ва, и҆ наꙋчи́въ вѣ́рѣ, крⷭ҇тѝ є҆го̀ во и҆́мѧ і҆и҃са хрⷭ҇та̀.

Воꙋ́трїе же прїи́де і҆ѡа́ннъ на мѣ́сто, и҆дѣ́же чл҃вѣ́къ и҆мы́й водны́й трꙋ́дъ, лежа́ше, и҆ не востаѧ́ше ѿ ѻ҆дра̀ своегѡ̀ седмьна́десѧть лѣ́тъ: сего̀ а҆пⷭ҇лъ и҆сцѣлѝ сло́вомъ, и҆ просвѣтѝ кр҃ще́нїемъ ст҃ы́мъ. Въ де́нь же то́й посла̀ ко і҆ѡа́ннꙋ а҆нѳѷпа́тъ, и҆́же по лаѵре́нтїи зѧ́тѣ мѵ́рѡновѣмъ наста̀, молѧ̀ ѕѣлѡ̀, да прїи́детъ въ до́мъ є҆гѡ̀: женѣ́ бо а҆нѳѷпа́товой сꙋ́щей непра́здной, прїи́де ча́съ рожде́нїѧ, и҆ лю́тѣ стражда́ше не могꙋ́щи роди́ти. Ст҃ы́й же вско́рѣ прїи́де, и҆ то́кмѡ ного́ю встꙋпѝ на пра́гъ до́мꙋ, а҆́бїе жена̀ родѝ, и҆ ѡ҆блегча̀ болѣ́знь. сїѐ ви́дѣвъ а҆нѳѷпа́тъ, вѣ́рова во хрⷭ҇та̀ съ до́момъ свои́мъ. Прежи́въ же і҆ѡа́ннъ та́мѡ трѝ лѣ́та, ѿи́де во и҆ны́й гра́дъ ѿстоѧ́щъ пѧтдесѧ́тъ ста́дїй, въ не́мже живꙋ́щїи тмо́ю і҆дѡлопоклоне́нїѧ бѧ́хꙋ помраче́ни. Вше́дшꙋ же є҆мꙋ̀ та́мѡ, ви́дѣ наро́дъ творѧ́щъ пра́здникъ бѣсѡ́мъ, и҆ ю҆́ношы нѣ́кїѧ свѧ́заны. Вопроси́ же і҆ѡа́ннъ є҆ди́наго ѿ стоѧ́щихъ та́мѡ: чесѡ̀ ра́ди свѧ́зани сꙋ́ть ю҆́ношы сі́и; ѿвѣща̀ чл҃вѣ́къ то́й: и҆́мамы вели́каго бо́га во́лка, є҆мꙋ́же ны́нѣ соверша́емъ пра́здникъ, томꙋ̀ ѹ҆́бѡ сі́и ю҆́ношы закла́ни бы́ти и҆́мꙋтъ на же́ртвꙋ. І҆ѡа́ннъ же молѝ чл҃вѣ́ка, да пока́жетъ є҆мꙋ̀ того̀ бо́га своего̀. ѻ҆́нъ же гл҃а: а҆́ще хо́щеши ви́дѣти є҆го̀, пождѝ до четве́ртагѡ часа̀ днѐ, и҆ ѹ҆́зриши жрецы̀ съ наро́домъ грѧдꙋ́щыѧ на мѣ́сто, и҆дѣ́же бо́гъ ꙗ҆влѧ́етсѧ, съ ни́ми и҆ ты̀ по́йдеши, и҆ ѹ҆́зриши бо́га во́лка. І҆ѡа́ннъ же речѐ: ви́ждꙋ тѧ̀ чл҃вѣ́ка до́бра, а҆́зъ же пришле́цъ є҆́смь, молю́ тѧ, да ты̀ са́мъ веде́ши мѧ̀ а҆́бїе на то̀ мѣ́сто: ѕѣлѡ́ бо жела́ю ви́дѣти ва́шего бо́га: и҆ а҆́ще мѝ ꙗ҆ви́ши є҆го̀, и҆́мамъ да́ти тебѣ̀ многоцѣ́нный би́серъ. ѻ҆́нъ же пое́мь і҆ѡа́нна ведѐ, и҆ показа̀ є҆мꙋ̀ мѣ́сто лꙋ́жно и҆ бла́тно и҆ во́дъ и҆спо́лнено, и҆ гл҃а: ѿсю́дꙋ бо́гъ на́шъ во́лкъ и҆схо́дитъ, и҆ наро́дꙋ ꙗ҆влѧ́етсѧ. Жда́ше же і҆ѡа́ннъ и҆зше́ствїѧ тогѡ̀ бо́га, и҆ сѐ близ̾ четве́ртагѡ часа̀ днѐ, ꙗ҆ви́сѧ бѣ́съ во ѻ҆́бразѣ во́лка превели́ка ѿ воды̀ и҆сходѧ́й, є҆го́же ст҃ы́й і҆ѡа́ннъ и҆́менемъ хрⷭ҇то́вымъ свѧза́вши, вопросѝ: коли́кѡ лѣ́тъ живе́ши здѣ̀; ѿвѣща̀ дїа́волъ: се́дмдесѧть лѣ́тъ. А҆пⷭ҇лъ же хрⷭ҇то́въ глаго́ла: повелѣва́ю тебѣ̀ и҆́менемъ ѻ҆ц҃а̀ и҆ сн҃а и҆ ст҃а́гѡ дх҃а, и҆зы́ди ѿ ѻ҆́строва сегѡ̀, и҆ никогда́же приходѝ сѣ́мѡ: и҆ а҆́бїе и҆счезѐ дїа́волъ. чл҃вѣ́къ же то́й ви́дѧ бы́вшее, ѹ҆жасе́сѧ, и҆ припадѐ къ нога́мъ ст҃а́гѡ. Ѻ҆́нъ же наꙋчѝ є҆го̀ вѣ́рѣ ст҃ѣ́й, и҆ речѐ є҆мꙋ̀: сѐ и҆́маши би́серъ ѿ менѐ, є҆го́же тебѣ̀ ѡ҆бѣща́хъ. Въ то́мъ вре́мени жрецы̀ доидо́ша до мѣ́ста тогѡ̀ со ѻ҆́троки свѧ́занными, и҆мꙋ́ще ножѝ въ рꙋка́хъ свои́хъ, и҆ наро́дъ мно́гъ съ ни́ми, и҆ жда́хꙋ и҆зше́ствїѧ во́лкова, хотѧ́ще на снѣ́дь є҆мꙋ̀ ѻ҆́троки закла́ти. Но є҆гда̀, до́лгѡ ждꙋ́ще, не можа́хꙋ дожда́тисѧ, пристꙋпѝ къ ни́мъ і҆ѡа́ннъ, и҆ молѝ, да разрѣша́тъ ѻ҆трокѡ́въ непови́нныхъ, ѹ҆же́ бо [речѐ] нѣ́сть ва́шегѡ бг҃а во́лка, и҆́же бѣ́съ бѧ́ше: си́ла бо і҆и҃са хрⷭ҇та̀ є҆го̀ побѣдѝ и҆ прогна̀. Ѻ҆ни́ же слы́шавше, ꙗ҆́кѡ поги́бе во́лкъ, пристра́шни бы́ша: и҆ мно́гѡ поиска́вше бо́га своего̀, и҆ не ѡ҆брѣ́тше, разрѣши́ша ѻ҆трокѡ́въ, и҆ ѿпꙋсти́ша здра́выхъ. Ст҃ы́й же нача̀ и҆̀мъ проповѣ́дати хрⷭ҇та̀, и҆ и҆́хъ прелще́нїе ѡ҆блича́ти, и҆ мно́зи ѿ ни́хъ вѣ́ровавше, крⷭ҇ти́шасѧ.

Бы́сть въ то́мъ гра́дѣ ба́нѧ, въ не́й же є҆гда̀ мы́ѧшесѧ сы́нъ жреца̀ ді́ева, ѹ҆да́вленъ бѣ̀ ѿ дїа́вола та́мѡ живꙋ́щагѡ. сїѐ слы́шавъ ѻ҆те́цъ є҆гѡ̀, съ ве́лїимъ пла́чемъ притечѐ къ ст҃о́мꙋ, молѧ̀, да воскреси́тъ сы́на є҆гѡ̀, ѡ҆бѣща́ѧсѧ и҆ са́мъ вѣ́ровати во хрⷭ҇та̀. Ст҃ы́й же и҆́де съ ни́мъ, и҆ ѹ҆ме́ршаго воскресѝ и҆́менемъ хрⷭ҇то́вымъ. вопроси́ же ю҆́ношꙋ, ка́ѧ вина̀ бы́сть сме́рти є҆гѡ̀; ѻ҆́нъ же речѐ: мы́ющꙋсѧ мнѣ̀, и҆зы́де нѣ́кто че́рнъ ѿ воды̀, и҆ ꙗ҆́тъ мѧ̀, и҆ ѹ҆давѝ. Ст҃ы́й же разꙋмѣ́въ, ꙗ҆́кѡ бѣ́съ живе́тъ въ ба́ни то́й, заклѧ̀ є҆го̀ и҆ вопросѝ: кто̀ є҆сѝ ты̀; и҆ почто̀ здѣ̀ живе́ши; ѿвѣща̀ бѣ́съ: а҆́зъ є҆́смь то́й, є҆го́же ты̀ въ є҆фе́сѣ и҆згна́лъ ѿ ба́ни, и҆ здѣ̀ живꙋ̀ шесто́е ѹ҆жѐ лѣ́то, па́костѧ лю́демъ. ст҃ы́й же и҆згна̀ є҆го̀ и҆ ѿ тогѡ̀ предѣ́ла. Сїѐ ви́дѣвъ жре́цъ, вѣ́рова во хрⷭ҇та̀, и҆ крⷭ҇ти́сѧ съ сы́номъ и҆ со всѣ́мъ до́момъ свои́мъ.

По се́мъ и҆зы́де і҆ѡа́ннъ на то́ржище, и҆дѣ́же собра́сѧ вма́лѣ не ве́сь гра́дъ къ немꙋ̀, да слы́шатъ сло́во бж҃їе. И҆ сѐ нѣ́каѧ жена̀ падѐ на но́зѣ є҆гѡ̀ съ пла́чемъ молѧ́щи, да бы̀ и҆сцѣли́лъ бѣснꙋ́емаго сы́на є҆ѧ̀, за него́же врачє́мъ є҆два̀ не всѐ и҆мѣ́нїе своѐ и҆стощѝ. Ст҃ы́й же повелѣ̀ да приведꙋ́тъ є҆го̀ къ немꙋ̀. и҆ ꙗ҆́кѡ по́сланнїи бѣсно́мꙋ сказа́ша, зове́тъ тѧ̀ і҆ѡа́ннъ: а҆́бїе бѣ́съ и҆зы́де ѿ негѡ̀, и҆ прише́дъ ко ст҃о́мꙋ здра́въ, вѣ́рова во хрⷭ҇та̀, и҆ съ ма́терїю свое́ю крести́сѧ. Въ то́мже гра́дѣ бы́сть наро́читый хра́мъ і҆́дѡла дїѡнѵ́сїа, є҆го́же і҆дѡлопоклѡ́нницы нарица́хꙋ свобо́днымъ ѻ҆тце́мъ. въ є҆гѡ́же пра́здникъ собира́ющесѧ та́мѡ мꙋ́жи и҆ жены̑ съ бра́шномъ и҆ питїе́мъ, ликова́хꙋ: и҆ ѹ҆пи́вшесѧ, беⷥзако́нїе ве́лїе творѧ́хꙋ въ че́сть скве́рномꙋ бо́гꙋ своемꙋ̀. Та́мѡ і҆ѡа́ннъ во вре́мѧ пра́здника и҆́хъ прише́дъ, ѡ҆блича́ше ѡ҆ таково́мъ скве́рномъ и҆́хъ пра́зднованїи: жрецы́ же, и҆́хже та́мѡ мно́жество бѣ̀, є҆́мше є҆го̀ би́ша, и҆ и҆звле́кше внѣ̀, поверго́ша свѧ́зана, са́ми же па́ки къ скве́рномꙋ дѣ́лꙋ ѡ҆брати́шасѧ. Ст҃ы́й же і҆ѡа́ннъ помоли́сѧ бг҃ꙋ, да не потерпи́тъ и҆̀мъ такова́гѡ беⷥзако́нїѧ: и҆ а҆́бїе ка́пище ѿ ѡ҆снова́нїѧ паде́сѧ, и҆ всѧ̀ жрецы̀ побѝ, про́чїи же лю́дїе тре́петни, разрѣ́шше ст҃а́го, моли́ша є҆го̀, да не и҆ ѻ҆́ныхъ погꙋби́тъ съ про́чїими. Въ то́мже гра́дѣ бы́сть во́лхвъ наро́читъ и҆́менемъ нꙋкїа́нъ, се́й ѹ҆вѣ́давъ паде́нїе хра́ма и҆ па́гꙋбꙋ жрецѡ́въ, ѕѣлѡ̀ ѡ҆скорби́сѧ, и҆ прише́дъ къ ст҃о́мꙋ і҆ѡа́ннꙋ, речѐ: не до́брѣ сотвори́лъ є҆сѝ ты̀, ꙗ҆́кѡ разрꙋши́лъ є҆сѝ хра́мъ дїѡнѵ́сїевъ, и҆ погꙋ́билъ є҆сѝ жрецѡ́въ є҆гѡ̀: вси́ бо лю́дїе на тѧ̀ гнѣ́ваютсѧ ѡ҆ се́мъ ѕѣлѡ̀. молю́ же тѧ̀, да па́ки и҆̀хъ воскреси́ши, ꙗ҆́коже воскреси́лъ є҆сѝ жре́ческагѡ сы́на въ ба́ни, и҆ а҆́зъ и҆́мамъ вѣ́ровати въ бг҃а твоего̀. ѿвѣща̀ ст҃ы́й: вина̀ и҆̀мъ па́гꙋбы бы́сть беⷥзако́нїе и҆́хъ, тогѡ̀ ра́ди не сꙋ́ть досто́йни, да живꙋ́тъ здѣ̀, но да мꙋ́чатсѧ въ гее́ннѣ. ѿвѣща̀ нꙋкїа́нъ: а҆́ще ты̀ и҆̀хъ не мо́жеши воскреси́ти: сѐ а҆́зъ и҆́менемъ богѡ́въ мои́хъ сотворю̀, воскрешꙋ̀ жрецы̀, и҆ ка́пище соста́влю цѣ́ло, но ты̀ сме́рти не ѹ҆бѣжи́ши: то̀ ре́кши, разыдо́шасѧ. І҆ѡа́ннъ и҆́де ѹ҆чи́ти наро́ды, нꙋкїа́нъ же ѿи́де на мѣ́сто па́дшагѡ хра́ма, и҆ ѡ҆бше́дъ є҆го̀ волхвꙋ́ющи, сотворѝ сїѐ: ꙗ҆́кѡ ста́ша двана́десѧть бѣсѡ́въ во ѻ҆́бразѣ жрецѡ́въ побїе́нныхъ, и҆̀мже повелѣ̀, да и҆́дꙋтъ по не́мъ, и҆ ѹ҆бїю́тъ і҆ѡа́нна. Глаго́лаша же бѣ́си: невозмо́жнѡ на́мъ не то́кмѡ є҆го̀ ѹ҆би́ти, но нижѐ ꙗ҆ви́тисѧ на мѣ́стѣ, и҆дѣ́же ѻ҆́нъ є҆́сть. а҆́ще же хо́щеши, да ѹ҆́мретъ і҆ѡа́ннъ, и҆дѝ и҆ приведѝ сѣ́мѡ наро́дъ, ꙗ҆́кѡ да ви́дѣвше на́съ, воз̾ѧрѧ́тсѧ на і҆ѡа́нна, и҆ погꙋбѧ́тъ є҆го̀. ѿше́дъ же нꙋкїа́нъ, ѡ҆брѣ́те мно́гъ наро́дъ послꙋ́шающъ ѹ҆че́нїѧ ѿ ст҃а́гѡ і҆ѡа́нна, на ни́хже нꙋкїа́нъ ве́лїимъ возопѝ гла́сомъ: ѽ несмы́сленнїи, почто̀ да́сте себѐ семꙋ̀ стра́нномꙋ прельсти́ти, и҆́же ка́пище ва́ше съ жреца́ми погꙋбѝ, и҆ ва́съ, є҆гда̀ є҆мꙋ̀ бꙋ́дете внима́ти, погꙋби́тъ. но ше́дше со мно́ю, ѹ҆́зрите жрецѡ́въ ва́шихъ, и҆̀хже а҆́зъ воскреси́хъ: ксемꙋ́же и҆ ка́пище ва́ше разсы́панное при ѻ҆чесѣ́хъ ва́шихъ возста́влю, чесогѡ̀ і҆ѡа́ннъ не возмо́жетъ сотвори́ти. Лю́дїе же а҆́ки без̾ ѹ҆ма̀ сꙋ́ще, ѡ҆ста́влше і҆ѡа́нна, всѝ по не́мъ и҆до́ша: но ст҃ы́й и҆ны́мъ пꙋте́мъ съ про́хѡромъ ѹ҆предѝ и҆̀хъ та́мѡ, и҆дѣ́же бѣ́си ѻ҆́нїи во ѻ҆́бразѣ жрецѡ́въ воскре́сшихъ бы́ша. ви́дѣвше же бѣ́си і҆ѡа́нна, а҆́бїе и҆счезо́ша. и҆ сѐ нꙋкїа́нъ съ наро́домъ прїи́де: и҆ є҆гда̀ бѣсѡ́въ не ѡ҆брѣ́те, тогда̀ ѕѣлѡ̀ ѡ҆скорби́сѧ, и҆ па́ки ѡ҆бходи́ти нача̀ и҆спрове́рженное ка́пище, волхвꙋ́ющи и҆ призыва́ющи и҆̀хъ, но ничто́же ѹ҆спѣ̀. Ве́черꙋ же бы́вшꙋ, воз̾ѧри́вшесѧ лю́дїе хотѧ́хꙋ ѹ҆би́ти нꙋкїа́на, ꙗ҆́кѡ прелстѝ и҆̀хъ, и҆ ѿведѐ ѿ ст҃а́гѡ. дрꙋзі́и же рѣ́ша: є҆́мше веде́мъ є҆го̀ ко і҆ѡа́ннꙋ, и҆ что̀ на́мъ рече́тъ, то̀ сотвори́мъ. ст҃ы́й же сїѐ слы́шавъ, тѣ́мже пꙋте́мъ ѹ҆предѝ и҆̀хъ, и҆ на пе́рвомъ ста̀ мѣ́стѣ. Лю́дїе же приве́дше нꙋкїа́на пред̾ ст҃а́гѡ, рѣ́ша: се́й льсте́цъ и҆ вра́гъ тво́й, ѹ҆мы́сли да тѧ̀ погꙋби́тъ, но что̀ гл҃еши, да є҆мꙋ̀ сотвори́мъ; ст҃ы́й же речѐ: пꙋсти́те є҆го̀, да пока́етсѧ.

Воꙋ́трїе же па́ки і҆ѡа́ннъ ѹ҆ча́ше наро́ды, да вѣ́рꙋютъ во хрⷭ҇та̀, и҆ мно́гѡ ѿ ни́хъ вѣ́ровавше, молѧ́хꙋ, да крⷭ҇тѧ́тсѧ ѿ і҆ѡа́нна: и҆̀хже є҆гда̀ і҆ѡа́ннъ къ рѣцѣ̀ приведѐ, нꙋкїа́нъ волхвова́нїемъ свои́мъ во́дꙋ въ кро́вь претворѝ. ст҃ы́й же мл҃твою нꙋкїа́на ѡ҆слѣпѝ, и҆ во́дꙋ па́ки чи́стꙋ сотвори́въ, крⷭ҇тѝ въ не́й всѣ́хъ вѣ́ровавшихъ. Си́мъ побѣжде́нъ нꙋкїа́нъ, прїи́де въ чꙋ́вство, и҆ пои́стиннѣ ка́ющисѧ, молѝ а҆пⷭ҇ла, да млⷭ҇тивъ є҆мꙋ̀ бꙋ́детъ. ст҃ы́й же ви́дѣвъ є҆гѡ̀ покаѧ́нїе, дово́лнѡ поꙋчи́въ, крⷭ҇тѝ є҆го̀, и҆ а҆́бїе прозрѣ̀, и҆ введѐ і҆ѡа́нна въ до́мъ сво́й: въ него́же є҆гда̀ вни́де і҆ѡа́ннъ, внеза́пꙋ всѝ і҆́дѡли падо́ша, и҆̀же бѧ́хꙋ въ домꙋ̀ нꙋкїа́новомъ, и҆ въ пра́хъ сокрꙋши́шасѧ. Сїѐ чꙋ́до ви́дѣвше дома́шнїи є҆гѡ̀, ѹ҆страши́шасѧ, и҆ вѣ́ровавше, крести́шасѧ.

Бѣ̀ нѣ́каѧ жена̀ вдова̀ во гра́дѣ то́мъ бога́та и҆ красна̀, є҆́йже и҆́мѧ проклїані́а: сїѧ̀ и҆мꙋ́щи сы́на доброзра́чна, и҆́менемъ сѡсїпа́тра, бѣсо́вскимъ дѣ́йсвомъ ѹ҆ѧзви́сѧ на него̀, и҆ всѧ́кѡ тща́шесѧ привлещѝ є҆го̀ къ своемꙋ̀ беⷥзако́нїю. но сы́нъ є҆ѧ̀ смы́сленъ сы́й, возненави́дѣвъ ю҆̀ за безꙋ́мїе сїѐ, и҆ и҆збѣжа́въ ѿ неѧ̀, прїи́де на мѣ́сто, и҆дѣ́же ст҃ы́й і҆ѡа́ннъ тогда̀ ѹ҆ча́ше, и҆ въ сла́дость послꙋ́шаше слове́съ а҆пⷭ҇лскихъ. І҆ѡа́ннъ же дх҃омъ ст҃ы́мъ всѧ̑ ѡ҆ не́мъ прозрѣ́въ, поѧ́тъ є҆го ѻ҆со́бь, и҆ нака́зоваше, да почита́етъ ма́терь, то́кмѡ да не слꙋ́шаетъ є҆ѧ̀ въ беⷥзако́нномъ дѣ́лѣ, нижѐ да повѣ́даетъ комꙋ̀ ѡ҆ се́мъ, но да покрыва́етъ грѣ́хъ ма́тере своеѧ̀. Сѡсїпа́тръ же не хотѣ̀ возврати́тисѧ къ ма́тери въ до́мъ сво́й, є҆го́же въ четве́ртый де́нь ѡ҆брѣ́тши проклїані́а, ꙗ҆́тъ за ѻ҆де́ждꙋ и҆ влеча́ше нꙋ́ждею въ до́мъ. На се́й кли́чь приспѣ̀ а҆нѳѷпа́тъ, и҆́же не да́внѡ во гра́дъ то́й прїи́де, и҆ вопросѝ ѡ҆ винѣ̀, почто̀ та́кѡ жена̀ влече́тъ ю҆́ношꙋ; ма́терь же скры́вши беⷥзако́ннꙋю мы́сль свою̀, возложѝ клеветꙋ̀ на сы́на, а҆́ки бы хотѣ́лъ є҆́й наси́лїе сотвори́ти, и҆ терза́ше власы̀ своѧ̀ съ пла́чемъ крича́щи. Сїѧ̑ слы́шавъ а҆нѳѷпа́тъ, ꙗ҆́тъ вѣ́рꙋ лжѣ̀, и҆ ѡ҆сꙋдѝ непови́ннаго сѡсїпа́тра въ мѣ́хъ ко́жаный съ лю́тыми га́ды заши́ти, и҆ въ мо́ре воврещѝ. Ѡ҆ се́мъ ѹ҆вѣ́давъ і҆ѡа́ннъ, ста̀ пред̾ а҆нѳѷпа́томъ, ѡ҆блича́ѧ є҆го̀ ѡ҆ непра́ведномъ сꙋдѣ̀, ꙗ҆́кѡ не до́брѣ и҆спыта́въ рѣ́чь, ѡ҆сꙋдѝ на сме́рть непови́ннаго ю҆́ношꙋ. Проклїані́а же гл҃а и҆ на ст҃а́го, ꙗ҆́кѡ се́й льсте́цъ сы́на моего̀ на сїѐ ѕло̀ поꙋчѝ. Сїѐ слы́шавъ а҆нѳѷпа́тъ, повелѣ̀ въ то́йже мѣ́хъ и҆ а҆пⷭ҇ла ст҃а́го заши́вши съ сѡсїпа́тромъ, и҆ съ разли́чными га́дами, ѹ҆топи́ти. Ст҃ы́й же помоли́сѧ, и҆ внеза́пꙋ потрѧсе́сѧ землѧ̀: а҆нѳѷпа́тꙋ же рꙋка̀ ѹ҆́сше та̀, є҆́юже покива̀ на ст҃а́го: проклїані́и же ѻ҆́бѣ ѹ҆схо́ша рꙋ́цѣ, и҆ ѻ҆́чи и҆зврати́шасѧ. Сїѧ̑ ви́дѣвъ сꙋдїѧ̀, ѹ҆жасе́сѧ ѕѣлѡ̀: и҆ всѝ бы́вшїи та́мѡ падо́ша ѿ стра́ха. и҆ молѝ сꙋдїѧ̀ і҆ѡа́нна, да поми́лꙋетъ є҆го̀, и҆ и҆сцѣли́тъ и҆ссо́хшꙋю рꙋ́кꙋ: ѻ҆́нъ же мно́гѡ поꙋчи́въ є҆го̀, ѡ҆ пра́ведномъ сꙋдѣ̀, и҆ ѡ҆ вѣ́рѣ во хрⷭ҇та̀, и҆сцѣлѝ є҆го̀, и҆ крⷭ҇тѝ во и҆́мѧ ѻ҆ц҃а̀, и҆ сн҃а̀, и҆ ст҃а́гѡ дх҃а. и҆ та́кѡ свобожде́нъ бы́сть ѿ напа́сти и҆ сме́рти непови́нный сѡсїпа́тръ: и҆ сꙋдїѧ̀ позна̀ и҆́стиннаго бг҃а. Проклїані́а же ѿ стра́ха тогѡ̀ бѣжа̀ въ до́мъ сво́й, и҆мѣ́ющи на себѣ̀ ка́знь бж҃їю: а҆пⷭ҇лъ же пое́мь сосїпа́тра, и҆́де въ до́мъ є҆ѧ̀. Не хотѣ́ же сѡсїпа́тръ и҆тѝ къ ма́тери свое́й, но і҆ѡа́ннъ ѹ҆ча́ше є҆го̀ неѕло́бїю, и҆звѣщава́ѧ є҆мꙋ̀, ꙗ҆́кѡ ѹ҆жѐ не ѹ҆слы́шитъ ѿ мт҃ре своеѧ̀ ничто́же беззако́нно, ѹ҆цѣломꙋ́дрисѧ бо, є҆́же и҆ бы́сть: є҆гда́ бо вни́де въ до́мъ є҆ѧ̀ а҆пⷭ҇лъ съ сосїпа́тромъ, а҆́бїе проклїані́а падѐ на но́зѣ а҆пⷭ҇лꙋ, съ пла́чемъ и҆сповѣ́даѧсѧ и҆ ка́ѧсѧ ѡ҆ грѣсѣ́хъ свои́хъ: ю҆́же и҆сцѣли́въ а҆пⷭ҇лъ ѿ болѣ́зни, и҆ наꙋчи́въ вѣ́рѣ и҆ цѣломꙋ́дрїю, крⷭ҇тѝ ю҆̀ со всѣ́мъ до́момъ є҆ѧ̀. и҆ та́кѡ проклїані́а ѹ҆цѣломꙋ́дрившисѧ, провожда́ше днѝ своѧ̀ въ вели́комъ покаѧ́нїи.

Въ то́же вре́мѧ ѹ҆бїе́нъ бы́сть ца́рь домитїа́нъ, а҆ по не́мъ прїѧ̀ прⷭ҇то́лъ ри́мскїй не́рѵа, до́бръ ѕѣлѡ̀, се́й всѣ́хъ въ заточе́нїи бы́вшихъ свобо́дныхъ сотворѝ. тогда̀ і҆ѡа́ннъ ѿ заточе́нїѧ свобожде́нъ, ѹ҆мы́сли возврати́тисѧ во є҆фе́съ. є҆два́ бо не всѧ̀ сꙋ́щыѧ въ па́тмѣ лю́ди ѹ҆жѐ ко хрⷭ҇тꙋ̀ ѡ҆братѝ. ѹ҆вѣ́давше же хрⷭ҇тїа́не ѡ҆ таково́мъ є҆гѡ̀ намѣ́ренїи, моли́ша, да не ѡ҆ставлѧ́етъ и҆̀хъ до конца̀. Ст҃ы́й же є҆гда̀ не хотѣ̀ бы́ти съ ни́ми, но во є҆фе́съ возврати́тисѧ жела́ше: тогда̀ моли́ша є҆го̀, да понѐ є҆ѵⷢ҇лїе ѡ҆ста́витъ и҆̀мъ въ па́мѧть ѹ҆че́нїѧ своегѡ̀, є҆́же ѻ҆́нъ та́мѡ написа̀. Є҆ди́ною бо заповѣ́давъ по́стъ всѣ̑мъ, поѧ́тъ съ собо́ю ѹ҆ч҃ника̀ своего̀ про́хѡра, и҆ и҆зы́де ѿ гра́да ꙗ҆́кѡ за пѧ́ть по́прищъ, и҆ взы́де на го́рꙋ нѣ́кꙋю высо́кꙋ, и҆дѣ́же трѝ днѝ пребы́сть на мл҃твѣ. По тре́тїемъ же днѝ бы́сть гро́мъ вели́къ и҆ блиста̑нїѧ, и҆ потрѧсе́сѧ гора̀: про́хѡръ же падѐ на зе́млю ѿ стра́ха. і҆ѡа́ннъ же ѡ҆бра́щсѧ къ немꙋ̀, воздви́же є҆го̀, и҆ посадѝ ѡ҆деснꙋ́ю себѐ, и҆ речѐ: пишѝ, ꙗ҆̀же ѹ҆слы́шиши ѿ ѹ҆́стъ мои́хъ. и҆ па́ки возве́дши ѻ҆́чи къ нб҃сѝ, молѧ́шесѧ. по мл҃твѣ же нача̀ гл҃ати: въ нача́лѣ бѣ̀ сло́во: и҆ прѡ́чаѧ. Ѹ҆ч҃ни́къ же со внима́нїемъ всѧ̑ писа́ше, ꙗ҆̀же ѿ ѹ҆́стъ є҆гѡ̀ слы́ша: и҆ напи́сано бы́сть ст҃о́е є҆ѵⷢ҇лїе, є҆́же па́ки преписа́ти, сше́дши съ горы̀, про́хѡрꙋ повелѣ̀. и҆ и҆зво́ли препи́санное ѡ҆ста́вити въ па́тмѣ хрⷭ҇тїа́нѡмъ по моле́нїю и҆́хъ, а҆ пе́рвое ѹ҆ себѐ ѹ҆держа̀. въ то́мъ же ѻ҆́стровѣ и҆ а҆пока́лѷѱїсъ свое́ю рꙋко́ю написа̀ і҆ѡа́ннъ ст҃ы́й: постѧ́сѧ бо в̾ горѣ̀ дни̑ нѣ́кїѧ, ви́дѣ неизречє́ннаѧ ѿкровє́нїѧ бж҃їѧ, и҆ писа́нїемъ та̑ предадѐ вѣ̑рнымъ. Пре́жде же ѿше́ствїѧ своегѡ̀ ѿ ѻ҆́строва тогѡ̀ ѡ҆бы́де ѻ҆́крестныѧ гра́ды и҆ вє́си, ѹ҆твержда́ѧ въ вѣ́рѣ бра́тїю: и҆ прилꙋчи́сѧ є҆мꙋ̀ бы́ти въ ве́си нѣ́коей, въ не́йже жре́цъ ді́евъ, и҆́менемъ є҆ѵхарі́съ, и҆мѣ̀ сы́на слѣпа́го, то́й ѿда́вна жела́ше ви́дѣти і҆ѡа́нна: слы́шавъ же ѡ҆ і҆ѡа́ннѣ, ꙗ҆́кѡ въ ве́сь и҆́хъ прїи́де, притечѐ к̾ немꙋ̀, молѧ̀ є҆го̀, да прише́дъ в̾ до́мъ є҆гѡ̀, и҆сцѣли́тъ сы́на. І҆ѡа́ннъ же ви́дѧ, ꙗ҆́кѡ приѡбрѣстѝ и҆́мать дꙋ́шы чл҃вѣ́ческїѧ, и҆́де въ до́мъ жрецо́въ, и҆ речѐ сы́нꙋ є҆гѡ̀ слѣпо́мꙋ: во и҆́мѧ гдⷭ҇а моегѡ̀ і҆и҃са хрⷭ҇та̀ прозрѝ: и҆ а҆́бїе прозрѣ̀. сїѐ ви́дѣвъ є҆ѵхарі́съ, вѣ́рова во хрⷭ҇та̀, и҆ крⷭ҇ти́сѧ съ сы́номъ свои́мъ. Во всѣ́хъ же градѣ́хъ ѻ҆́строва тогѡ̀ і҆ѡа́ннъ ст҃ы́й ѹ҆стро́и до́брѣ цр҃кви ст҃ы́ѧ, поста́вивъ и҆̀мъ є҆пⷭ҇кпы и҆ пресвѵ́теры, и҆ поꙋчи́въ и҆̀хъ дово́лнѡ, цѣлова̀ всѣ́хъ, и҆ возвраща́шесѧ ко є҆фе́сꙋ. провожда́хꙋ же є҆го̀ вѣ́рнїи съ пла́чемъ и҆ рыда́нїемъ мно́гимъ, не хотѧ́ще лиши́тисѧ такова́гѡ сл҃нца, ѹ҆че́нїемъ свои́мъ странꙋ̀ и҆́хъ просвѣти́вшагѡ: ѻ҆́нъ же въ кора́бль всѣ́дши, и҆ ми́ръ всѣ̑мъ да́вши, ѿплы̀ въ пꙋ́ть сво́й. Доше́дшꙋ же є҆мꙋ̀ є҆фе́са, ѹ҆срѣто́ша є҆го̀ вѣ́рнїи съ неизрече́нною ра́достїю, вопїю́ще и҆ гл҃юще: блгⷭ҇ве́нъ грѧды́й во и҆́мѧ гдⷭ҇не, и҆ прїѧ́тъ бы́сть че́стнѡ: и҆дѣ́же пребыва́ѧ, не преста̀ ѿ трꙋда̀, всегда̀ ѹ҆ча́щи лю́ди, и҆ наставлѧ́ющи на пꙋ́ть сп҃се́нїѧ.

Не досто́итъ же и҆ сегѡ̀ ѹ҆молча́ти, є҆́же ѡ҆ не́мъ кли́ментъ а҆леѯандрі́йскїй свидѣ́телствꙋетъ: є҆гда̀ во а҆сі́и прохожда́ше а҆пⷭ҇лъ гра́ды, ви́дѣ в̾ нѣ́коемъ ю҆́ношꙋ ѹ҆до́бнаго ко бл҃го́мꙋ дѣ́лꙋ, є҆го́же прїе́мши, поꙋчѝ и҆ ѡ҆крⷭ҇тѝ. Хотѧ́ же ѿитѝ ѿтꙋ́дꙋ на про́повѣдь є҆ѵⷢ҇лїа, врꙋчѝ ю҆́ношꙋ ѻ҆́наго пред̾ всѣ́ми є҆пⷭ҇кпꙋ тогѡ̀ гра́да, да наꙋ́читъ є҆го̀ всемꙋ̀ до́бромꙋ дѣ́лꙋ. Є҆пⷭ҇кпъ же взе́мъ ю҆́ношꙋ, наꙋчѝ є҆го̀ писа́нїю: но не та́кѡ ѡ҆ не́мъ радѧ́ше, ꙗ҆́коже до́лжно бѣ̀, ни даѧ́ше такова́гѡ наказа́нїѧ, каково́е ю҆́нымъ подоба́етъ: пꙋсти́ бо є҆го̀ по во́ли свое́й, и҆ по ма́лѣ нача̀ ѻ҆́трокъ ѕлѣ̀ жи́ти, ѹ҆пива́тисѧ же и҆ кра́сти. та́же прїѧ̀ дрꙋ́жбꙋ съ разбо́йники, и҆̀же пое́мше є҆го̀ ведо́ша въ пꙋсты́ню и҆ въ го́ры, и҆ старѣ́йшинꙋ є҆го̀ себѣ̀ сотвори́ша, и҆ творѧ́хꙋ разбо́й на пꙋте́хъ. По нѣ́коемъ же вре́мени возвра́щсѧ і҆ѡа́ннъ, прїи́де в̾ то́й гра́дъ, и҆ слы́шавъ ѡ҆ то́мъ ѻ҆́троцѣ, ꙗ҆́кѡ разврати́сѧ и҆ бы́сть разбо́йникъ, речѐ къ є҆пⷭ҇кпꙋ: возврати́ ми сокро́вище, є҆́же тѝ преда́хъ въ соблюде́нїе, ꙗ҆́кѡ въ вѣ́рныѧ рꙋ́цѣ: возврати́ ми ю҆́ношꙋ, є҆го́же тѝ врꙋчи́хъ пред̾ всѣ́ми, да наꙋчи́ши є҆го̀ стра́хꙋ бж҃їю. Є҆пⷭ҇кпъ же с̾ пла́чемъ речѐ: поги́бе ю҆́ноша, ѹ҆́мре дꙋше́ю, тѣ́ломъ же разбо́й по пꙋте́мъ твори́тъ. І҆ѡа́ннъ же речѐ къ є҆пⷭ҇кпꙋ: та́кѡ ли подоба́ше блюстѝ тебѣ̀ дꙋ́шꙋ бра́та твоегѡ̀; но да́ждь мѝ конѧ̀ и҆ проводника̀, да и҆дꙋ̀ и҆ проищꙋ̀ того̀, є҆го́же погꙋби́лъ є҆сѝ. Бы́сть же є҆гда̀ к̾ разбо́йникѡмъ і҆ѡа́ннъ прїи́де, молѝ и҆̀хъ, да ведꙋ́тъ є҆го̀ къ старѣ́йшинѣ своемꙋ̀, и҆ ведо́ша. ви́дѣвъ же ю҆́ноша ст҃а́го і҆ѡа́нна, ѹ҆стыдѣ́сѧ, и҆ воста́вши бѣжа̀ въ пꙋсты́ню. І҆ѡа́ннъ же забы́въ ста́рость свою̀, гонѧ́ше за ни́мъ, вопїѧ̀: ѡ҆брати́сѧ сы́не мо́й ко ѻ҆ц҃ꙋ̀ твоемꙋ̀, и҆ не ѿча́йсѧ в̾ грѣсѣ̀ твое́мъ, а҆́зъ грѣхѝ твоѧ̀ на мѧ̀ прїимꙋ̀: ста́ни ѹ҆̀бо, и҆ пожди́ мѧ, ꙗ҆́кѡ гдⷭ҇ь посла́ мѧ къ тебѣ̀. Ѡ҆бра́щсѧ же ю҆́ноша, съ тре́петомъ и҆ стꙋдо́мъ вели́кимъ припадѐ к̾ нога́мъ ст҃а́гѡ, не смѣ́ѧ на лицѐ є҆гѡ̀ воⷥзрѣ́ти. І҆ѡа́ннъ же ѻ҆ч҃ескꙋю ꙗ҆влѧ́ѧ є҆мꙋ̀ любо́вь, ѡ҆б̾е́мь є҆го̀ лобыза́ше. и҆ пое́мши ведѐ є҆го̀ с̾ ра́достїю во гра́дъ, ꙗ҆́кѡ ѡ҆брѣ́те поги́бшꙋю ѻ҆́вцꙋ. Поꙋчи́ же є҆го̀ мно́гѡ, наставлѧ́ѧ къ покаѧ́нїю, въ не́мже до́брѣ трꙋжда́ѧсѧ ю҆́ноша, ѹ҆годѝ бг҃ꙋ, и҆ полꙋчи́въ грѣхѡ́въ проще́нїе, съ ми́ромъ преста́висѧ.

Въ то́же вре́мѧ бы́сть нѣ́кїй хрⷭ҇тїа́нинъ, и҆́же прїи́де въ толи́кꙋ нищетꙋ̀, ꙗ҆́кѡ не и҆мꙋ́щи чи́мъ возда́ти долгѡ́въ свои́хъ заимода́вцємъ, ѿ ѕѣ́лной ско́рби ѹ҆мы́сли са́мъ себѐ ѹ҆би́ти: и҆ молѝ нѣ́коего волхва̀ жидови́на, да да́стъ и҆спи́ти є҆мꙋ̀ ꙗ҆́дъ сме́ртный. Се́й, ꙗ҆́кѡ вра́гъ хрⷭ҇тїа́нѡмъ, дрꙋ́гъ же бѣсѡ́мъ, сотворѝ то̀, дадѐ є҆мꙋ смертоно́сное питїѐ. взе́мъ же хрⷭ҇тїа́нинъ ѿ негѡ̀ ѡ҆тра́вꙋ сме́ртнꙋю, и҆́де въ до́мъ сво́й, размышлѧ́ше же и҆ боѧ́шесѧ, не вѣ́дый что̀ сотвори́ти: и҆ послѣдѝ зна́менавъ крⷭ҇то́мъ ча́шꙋ, и҆спѝ ю҆̀, и҆ ни ма́лѡ вреди́сѧ ѿ неѧ̀, и҆́бо зна́менїе крⷭ҇тное ве́сь ꙗ҆́дъ ѿ ча́ши ѿѧ̀. мно́гѡ же дивлѧ́шесѧ в̾ себѣ̀, ꙗ҆́кѡ здра́въ є҆́сть, и҆ не слы́шитъ вре́да ни ма́ла. И҆ па́ки не терпѧ̀ ско́рби ѿ заимода́вцѡвъ, и҆́де къ жидови́нꙋ, да да́стъ є҆мꙋ̀ лютѣ́йшїй ꙗ҆́дъ. жидови́нъ же ѹ҆диви́сѧ, ꙗ҆́кѡ жи́въ є҆́сть чл҃вѣ́къ то́й, и҆ дадѐ є҆мꙋ̀ лютѣ́йшꙋю ѡ҆тра́вꙋ, ю҆́же прїе́мъ чл҃вѣ́къ, и҆́де въ до́мъ сво́й. И҆ мно́гѡ мы́слѧщи, є҆гда̀ хотѣ̀ и҆спи́ти, та́кожде сотворѝ зна́менїе крⷭ҇та̀ ст҃а́гѡ на ча́ши то́й, и҆ и҆спѝ ю҆̀, но ничто́же пострада̀. и҆ па́ки течѐ къ жидови́нꙋ, и҆ показа́сѧ є҆мꙋ̀ здра́въ. Рꙋга́шесѧ же жидови́нꙋ, ꙗ҆́кѡ неискꙋ́сенъ є҆́сть въ свое́й хи́трости. жидови́нъ же тре́петенъ бы́въ, вопросѝ є҆го̀, что̀ творѧ́ше пїю́щи; ѻ҆́нъ же речѐ: ничто́же и҆́но то́чїю крⷭ҇то́мъ ст҃ы́мъ зна́менахъ ча́шꙋ. Жидови́нъ же позна̀, ꙗ҆́кѡ си́ла крⷭ҇та̀ ст҃а́гѡ прогонѧ́етъ сме́рть, и҆ хотѧ̀ и҆́стинꙋ ѹ҆вѣ́дати, дадѐ ѿ тогѡ̀ ꙗ҆́да псꙋ̀, и҆ а҆́бїе пе́съ вкꙋси́въ пред̾ ни́мъ и҆́здше. Сїе́ же ви́дѣвъ жидови́нъ, течѐ ко а҆пⷭ҇лꙋ со ѻ҆́нымъ хрⷭ҇тїа́ниномъ, и҆звѣща́ющи, є҆́же и҆̀мъ слꙋчи́сѧ. ст҃ы́й же наꙋчѝ жидови́на вѣ́ровати во хрⷭ҇та̀, и҆ крⷭ҇тѝ є҆го̀. Хрⷭ҇тїа́нинꙋ же ѻ҆́номꙋ ѹ҆бо́гомꙋ повелѣ̀, да принесе́тъ бре́мѧ сѣ́на: є҆́же а҆пⷭ҇лъ зна́менїемъ крⷭ҇тнымъ и҆ мл҃твою в̾ зла́то претворѝ, и҆ повелѣ̀ є҆мꙋ̀, да тѣ́мъ зла́томъ ѿда́стъ до́лги своѧ̀ заимода́вцємъ, ѡ҆ста́нкомъ же да препита́етъ до́мъ сво́й. До́йде же па́ки во є҆фе́съ, и҆ пребыва́ше въ домꙋ̀ до́мновомъ, и҆ мно́гое мно́жество ко хрⷭ҇тꙋ̀ приведѐ, и҆ чꙋдеса̀ неисчє́тнаѧ содѣ́ла.

И҆спо́лнившымсѧ же всѣ́мъ лѣ́тѡмъ є҆гѡ̀ стꙋ̀ и҆ вѧ́щше, и҆зы́де и҆з̾ до́мꙋ до́мнова съ седмїю̀ ѹ҆ч҃ни̑къ свои́хъ, и҆ доше́дъ нѣ́коегѡ мѣ́ста, та́мѡ ѻ҆́нымъ сѣ́сти повелѣ̀. бѧ́ше же ко ѹ҆́трꙋ, и҆ то́й ѿше́дъ ꙗ҆́кѡ на верже́нїе ка́мене, помоли́сѧ. Пото́мъ же и҆скопа́вшымъ ѹ҆ч҃нкѡ́мъ гро́бъ крⷭ҇тоѻбра́знѡ въ долготꙋ̀ во́зраста є҆гѡ̀, ꙗ҆́коже и҆̀мъ повелѣ̀, заповѣ́да про́хѡрꙋ, да и҆́детъ во і҆ерⷭ҇ли́мъ, и҆ та́мѡ да пребыва́етъ до кончи́ны своеѧ̀. И҆ наказа́въ ѹ҆ч҃нкѝ, и҆ цѣлова́въ, речѐ: привле́кше зе́млю мт҃рь мою̀ покры́йте мѧ̀. и҆ цѣлова́ша є҆го̀ ѹ҆ч҃нцы̀, и҆ покры́ша є҆го̀ да́же до колѣ́нъ. и҆ па́ки цѣлова́вшꙋ и҆̀хъ, покры́ша є҆го̀ да́же до вы́и, и҆ положи́ша на лицѐ є҆го̀ понѧ́вꙋ, и҆ та́кѡ цѣлова́вше, пла́чꙋще ѕѣлѡ̀, покры́ша є҆го̀ весма̀. Слы́шавше же сїѐ, и҆̀же во гра́дѣ бра́тїѧ, прїидо́ша, и҆ ѿкопа́вше гро́бъ, не ѡ҆брѣто́ша ничто́же. и҆ мно́гѡ ѕѣлѡ̀ пла́каша, и҆ помоли́вшесѧ, возврати́шасѧ во гра́дъ. На всѧ́кїй же го́дъ и҆з̾ гро́ба є҆гѡ̀ пра́хъ то́нкїй во ѻ҆смы́й де́нь мцⷭ҇а ма́їа ꙗ҆влѧ́шесѧ, и҆ и҆сцѣлє́нїѧ болѧ́щымъ мл҃твами ст҃а́гѡ а҆пⷭ҇ла і҆ѡа́нна подава́ше, в̾ че́сть бг҃ꙋ въ трⷪ҇цѣ хвали́момꙋ во вѣ́ки вѣкѡ́въ, а҆ми́нь.

І҆кѡ́на ст҃а́гѡ а҆пⷭ҇ла и҆ є҆ѵⷢ҇лі́ста і҆ѡа́нна бг҃осло́ва.

Тропа́рь, гла́съ в҃:

А҆пⷭ҇ле хрⷭ҇тꙋ̀ бг҃ꙋ возлю́бленне, ѹ҆скорѝ и҆зба́вити лю́ди без̾ѿвѣ́тны: прїе́млетъ тѧ̀ припа́дающа, и҆́же па́дша на пе́рси прїе́мый. є҆го́же молѝ, бг҃осло́ве, и҆ належа́щꙋю мглꙋ̀ ꙗ҆зы́кѡвъ разгна́ти, просѧ̀ на́мъ ми́ра и҆ ве́лїѧ ми́лости.

Конда́къ, гла́съ в҃:

Вели́чїѧ твоѧ̑, дѣ́вственниче, кто̀ повѣ́сть; то́чиши бо чꙋдеса̀, и҆ и҆злива́еши и҆сцѣлє́нїѧ, и҆ мо́лишисѧ ѡ҆ дꙋша́хъ на́шихъ, ꙗ҆́кѡ бг҃осло́въ и҆ дрꙋ́гъ хрⷭ҇то́въ.

---

Ѡ҆ лѣ́тѣхъ сегѡ̀ а҆пⷭ҇ла ст҃а́гѡ і҆ѡа́нна нѣ́сть достовѣ́рнагѡ и҆звѣ́стїѧ: нѣ́цыи пи́шꙋтъ, ꙗ҆́кѡ поживѐ р҃к лѣ́тъ: дрꙋзі́и же р҃є, и҆ мцⷭ҇ей се́дмь, глаго́лютъ. Ѻ҆ба́че сїѐ и҆звѣ́стно, ꙗ҆́кѡ бо́лѣе ста̀ лѣ́тъ поживѐ ст҃ы́й.