Кни́га житі́й ст҃ы́хъ/Деке́мврїй/к҃з

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Деке́мврїа к҃ѕ

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а деке́мврїа въ к҃з де́нь

Деке́мврїа к҃и→

Мцⷭ҇а деке́мврїа въ к҃з де́нь,
страда́нїе ст҃а́гѡ первомч҃нка а҆рхїдїа́кона стефа́на.

Гдⷭ҇ꙋ на́шемꙋ і҆и҃сꙋ хрⷭ҇тꙋ̀ по соверше́нїи та́инствъ спасе́нїѧ на́шегѡ возне́сшꙋсѧ на нб҃о, и҆ дх҃а ст҃а́гѡ ѿ ѻ҆ц҃а̀ во ѻ҆́гненныхъ ѧ҆зы́цѣхъ низпосла́вшꙋ, и҆ цр҃кви пе́рвенствꙋющей ѹ҆множа́тисѧ наче́ншей, бы́сть ропта́нїе є҆́ллинѡмъ ко є҆вре́ѡмъ (Дѣѧ. ѕ҃ : а҃). не ѻ҆́нымъ є҆́ллинѡмъ, и҆̀же покланѧ́хꙋсѧ і҆́дѡлѡмъ, и҆̀хже ѻ҆бы́че писа́нїе ст҃о́е ꙗ҆зы́ками нарица́ти: є҆ще́ бо тѣ̑мъ въ то̀ вре́мѧ не ѹ҆̀ ѿве́рзесѧ две́рь вѣ́ры, ни проповѣ́дашесѧ и҆̀мъ є҆щѐ спасе́нїѧ сло́во, и҆́бо неско́рѡ по ѹ҆бїе́нїи стефа́новомъ ꙗ҆зы́цы къ цр҃кви вѣ́рныхъ прїе́млѧтисѧ нача́ша, ѿ ни́хже пе́рвый бѣ̀ корни́лїй со́тникъ (Дѣѧ. і҃ : а҃), є҆го́же є҆гда̀ крⷭ҇тѝ пе́тръ ст҃ы́й, негодова́хꙋ сꙋ́щїи ѿ ѡ҆брѣ́занїѧ, ꙗ҆́кѡ къ мꙋже́мъ ѡ҆брѣ́занїѧ неимꙋ́щымъ вни́де, и҆ ропта́хꙋ на петра̀, до́ндеже ѻ҆́нъ и҆звѣстѝ и҆̀мъ ѡ҆ плащани́цѣ съ нб҃сѐ ꙗ҆вле́ной, тогда̀ ѹ҆молко́ша: и҆ сла́вѧхꙋ бг҃а, гл҃юще, ѹ҆̀бо и҆ ꙗ҆зы́кѡмъ бг҃ъ покаѧ́нїе дадѐ въ живо́тъ (Дѣѧ. а҃і : є҃ и҃і). не ѿ ꙗ҆зы́къ ѹ҆̀бо сꙋ́щїи є҆́ллини во вре́мѧ бытїѧ̀ стефа́на ст҃а́гѡ ропта́хꙋ к̾ є҆вре́ѡмъ, но ѿ тѣ́хже є҆вре́ѡвъ бы́вшїи, и҆ то́йже мѡѷсе́омъ да́нный зако́нъ и҆мѣ́вшїи, разсѣ́ѧвшїисѧ же во всѣ́хъ страна́хъ, ꙗ҆́коже и҆ ст҃ы́й а҆пⷭ҇лъ і҆а́кѡвъ пи́шетъ: Ѻ҆бѣмана́десѧте колѣ́нома, и҆̀же в̾ разсѣ́ѧнїи, ра́доватисѧ. (Іак. а҃ : а҃) и҆ навы́кшїи ѧ҆зы́ка, но не вѣ́ры и҆ нра́ва є҆́ллинскагѡ, чесѡ̀ ра́ди и҆ є҆́ллинами и҆̀хъ і҆ерⷭ҇ли́млѧне нарица́хꙋ, си́це златоꙋ́стъ: є҆́ллины непщꙋ́ю нарица́ти є҆́ллински вѣща́ющихъ, сі́и бо є҆́ллински бесѣ́довахꙋ є҆вре́и сꙋ́ще. Таковы́мъ ѹ҆́бѡ є҆́ллинѡмъ и҆̀же ѿ разсѣ́ѧнїѧ, бы́сть ропта́нїе к̾ є҆вре́ѡмъ и҆̀же во і҆ерⷭ҇ли́мѣ, ꙗ҆́кѡ презира́еми быва́хꙋ въ повседне́внѣмъ слꙋже́нїи вдови̑цы и҆́хъ: ѻ҆́во ꙗ҆́кѡ хꙋ́ждшее и҆̀мъ дѣ́ло повелѣва́шесѧ, ѻ҆́во же ꙗ҆́кѡ нера́вна, но ме́ншаѧ и҆ послѣ́днѣйшаѧ ча́сть ѿ пи́щи и҆ ѻ҆де́жды и҆̀мъ подава́шесѧ. Тогда̀ ст҃і́и двана́десѧть а҆пⷭ҇ли собра́вше всю̀ в̾ то̀ вре́мѧ бы́вшꙋю цр҃ковь, рѣ́ша: не ѹ҆го́дно є҆́сть на́мъ ѡ҆ста́влшымъ сло́во бж҃їе слꙋжи́ти трапе́замъ. ѹ҆смотри́те ѹ҆́бѡ бра́тїе, мꙋ́жи ѿ ва́съ свидѣ́телствованы се́дмь, и҆спо́лнены дх҃а ст҃а и҆ премꙋ́дрости, и҆̀хже поста́вимъ над̾ слꙋ́жбою се́ю: мы́ же въ моли́твѣ и҆ слꙋже́нїи сло́ва пребꙋ́демъ. ѹ҆го́дно бы́сть сло́во сїѐ пред̾ всѣ́мъ наро́домъ: и҆ и҆збра́ша стефа́на, мꙋ́жа и҆спо́лнена вѣ́ры, и҆ дх҃а ст҃а, и҆ фїлі́ппа, и҆ про́хора, и҆ нїкано́ра, и҆ ті́мѡна, и҆ парме́на, и҆ нїкола́а прише́лца а҆нтїохі́йскаго (Дѣѧ. ѕ҃ : в҃ є҃), и҆́хже и҆мена̀ ꙗ҆влѧ́ютъ сїѐ, ꙗ҆́кѡ ро́домъ не ѿ тѣ́хъ є҆вре́й бѧ́хꙋ и҆̀же во і҆ерⷭ҇ли́мѣ, но ѿ и҆̀же въ є҆́ллинскихъ страна́хъ ѡ҆бита́вшихъ, и҆́бо не є҆вре́йскаѧ но є҆́ллинскаѧ и҆мена̀ и҆́хъ сꙋ́ть: ꙗ҆́коже стефа́нъ, и҆́же бѣ̀ сро́дникъ са́ѵлꙋ при́званомꙋ по́слѣжде к̾ вѣ́рѣ и҆ а҆пⷭ҇лствꙋ па́ѵлꙋ, а҆ па́ѵелъ бѣ̀ ѿ страны̀ кїлїкі́йскїѧ и҆з̾ гра́да та́рса. ѿ є҆́ллинъ же и҆збра́ша си́хъ се́дмь ко слꙋже́нїю, да наро́дꙋ є҆́ллинскꙋ ѡ҆ вдови́цахъ свои́хъ презира́емыхъ скорбѧ́щꙋ бꙋ́детъ ѹ҆го́дно, и҆ ѹ҆толи́тсѧ и҆́хъ ско́рбь, и҆ ропта́нїе загради́тсѧ. си́хъ ѹ҆́бѡ и҆збра́вше приведо́ша пред̾ а҆пⷭ҇лы, ѻ҆ни́ же помоли́вшесѧ возложи́ша на нѧ̀ рꙋ́ки, и҆ поста́виша ѧ҆̀ дїа́коны. Стефа́нъ же и҆спо́лнь вѣ́ры и҆ си́лы, бѣ̀ въ ни́хъ пе́рвѣйшїй, и҆ тогѡ̀ ра́ди а҆рхїдїа́конъ нарече́нъ бы́сть, и҆ творѧ́ше зна́мєнїѧ и҆ чꙋдеса̀ ве́лїѧ въ лю́дехъ (Дѣѧ. ѕ҃ : и҃), и҆̀хже а҆́ще и҆ не воспомина́етъ писа́нїе, и҆́бо и҆ ѡ҆ само́мъ хрⷭ҇тѣ̀ гдⷭ҇ѣ, а҆́ще бы во є҆ди́номꙋ пи́сана бы́ша, ни самомꙋ̀ мню̀ всемꙋ̀ мі́рꙋ вмѣсти́ти пи́шемыхъ кни́гъ. ѻ҆ба́че несꙋмнѣ́ннѡ рече́мъ, ꙗ҆́кѡ подобнѣ а҆пⷭ҇лѡмъ вы́шшымъ ст҃ы́й стефа́нъ на недꙋ́жныѧ рꙋ́цѣ возлага́ѧ здра́вы ѧ҆̀ творѧ́ше. Є҆ще́ же си́ленъ сы́й мꙋ́жъ дѣ́ломъ и҆ сло́вомъ, вѣ̑рныѧ въ вѣ́рѣ ѹ҆твержда́ше, ѡ҆блича́ше же невѣ́рныѧ і҆ꙋде́и, сказꙋ́ѧ и҆̀мъ ѿ зако́на и҆ прⷪ҇ро́кѡвъ, ꙗ҆́кѡ непра́веднѡ по за́висти ѹ҆би́ша сн҃а бж҃їѧ мессі́ю ѿ вѣкѡ́въ ѡ҆жида́емаго. Нѣ́когда бо совзыска́нїю бы́вшꙋ междꙋ̀ і҆ꙋде́и, и҆ фарїсе́и, и҆ саддꙋке́и, и҆ є҆ллинскими є҆вре́и ѡ҆ гдⷭ҇ѣ на́шемъ і҆и҃сѣ хрⷭ҇тѣ̀: и҆ и҆ны́мъ глаго́лющымъ, ꙗ҆́кѡ прⷪ҇ро́къ є҆́сть: и҆ны́мъ же ꙗ҆́кѡ лсте́цъ: и҆ дрꙋги́мъ, ꙗ҆́кѡ сн҃ъ бж҃їй є҆́сть. Стефа́нъ ст҃ы́й ста́въ на высо́комъ мѣ́стѣ, бл҃говѣствова̀ всѣ̑мъ хрⷭ҇та̀ гдⷭ҇а, глаго́лѧ: Мꙋ́жїе бра́тїе, вскꙋ́ю ѹ҆мно́жишасѧ въ ва́съ ѕло́бы, и҆ размѣси́сѧ ве́сь і҆ерⷭ҇ли́мъ; Бл҃же́нъ человѣ́къ, и҆́же вѣ́рова въ гдⷭ҇а на́шего і҆и҃са хрⷭ҇та̀: то́й бо є҆́сть приклони́вый нб҃са̀, и҆ соше́дый грѣ́хъ ра́ди на́шихъ, и҆ роди́сѧ ѿ дв҃ы ст҃ы́ѧ и҆ пречⷭ҇тыѧ и҆збра́нныѧ пре́жде сложе́нїѧ мі́ра. то́й не́мощи на́шѧ взѧ́тъ, и҆ недꙋ́ги понесѐ, слѣпы́ѧ бо сотвори́лъ прозира́ти, прокаже́нныѧ ѡ҆чи́сти, и҆ бѣ́сы прогна̀. ѻ҆ни́ же слы́шавше сїѧ̑, препира́хꙋсѧ съ ни́мъ, сопроти́въ гл҃юще и҆ хꙋ́лѧще проповѣ́дꙋемаго гдⷭ҇а, ꙗ҆́коже пи́шетсѧ въ дѣѧ́нїихъ а҆пⷭ҇лскихъ: Воста́ша, речѐ, нѣ́цыи ѿ со́нма глаго́лемагѡ лїверті́нска, и҆ кѷрине́йска, и҆ а҆леѯа́ндрска, и҆ и҆̀же ѿ кїлїкі́и и҆ а҆сі́и, стѧза́ющесѧ со стефа́номъ. и҆́бо є҆вре́и въ разли́чныхъ далеча́йшихъ страна́хъ междꙋ̀ є҆́ллинами живꙋ́щїи, и҆мѣ́ѧхꙋ ѻ҆со́бнаѧ своѧ̀ сѡ́нмища во і҆ерⷭ҇ли́мѣ. и҆ бѣ̀ кромѣ̀ нача́лнѣйшїѧ а҆рхїсѷнаго́ги жидо́вскїѧ мно́жество сѷнагѡ́гъ и҆́ныхъ ꙗ҆зы́кѡвъ и҆лѝ є҆вре́й во и҆́ныхъ ꙗ҆зы́цѣхъ живꙋ́щихъ, ѿ коеѧ́ждо бо своѧ̀ во і҆ерⷭ҇ли́мъ бж҃їю ѹ҆чи́тисѧ зако́нꙋ. но и҆ са́ми въ го́дъ на поклоне́нїе приходѧ́ще къ цр҃кви соломѡ́новой, въ свои́хъ со́нмищахъ вита́хꙋ, собира́хꙋсѧ, и҆ поꙋча́хꙋсѧ, є҆́же ꙗ҆́вѣ є҆́сть ѿ напи́саннагѡ въ главѣ̀ второ́й дѣѧ́нїй: Бѧ́хꙋ, речѐ, во і҆ерⷭ҇ли́мѣ живꙋ́щїи і҆ꙋде́и мꙋ́жїе бл҃гоговѣ́йнїи ѿ всегѡ̀ ꙗ҆зы́ка и҆́же под̾ нб҃се́мъ. и҆ па́ки: Па́рѳѧне, мі́дѧне, и҆ є҆ламі́те, и҆ про́чїи, си́рѣчь: є҆вре́и живꙋ́щїи въ па́рѳѣ, въ ми́дѣхъ, въ є҆ламі́тѣ, и҆ въ про́чїихъ та́мѡ пи́шемыхъ страна́хъ, на пра́здникъ же во і҆ерⷭ҇ли́мъ прише́дшїи. таковы́мъ подо́бїемъ и҆ кїлїкі́йскїй, а҆леѯандрі́йскїй же и҆ кѷрїне́йскїй со́нмъ бѣ̀ та́може, а҆ ѡ҆ лїверті́нскомъ со́нмѣ повѣствꙋ́етсѧ, ꙗ҆́кѡ ѻ҆со́бный въ є҆вре́ехъ бѣ̀ ро́дъ, ведꙋ́щь пле́мѧ ѿ ѻ҆́ныхъ є҆вре́ѡвъ, и҆̀же и҆ногда̀ ѿ помпе́а ри́мскагѡ бы́ша плѣне́ни, по то́мъ же свобо́дою дарова́ни, и҆ нарица́хꙋсѧ лі́вери, и҆лѝ лі́бери, є҆́же сказꙋ́етсѧ свобо́дни, си́це и҆ златоꙋ́стъ ст҃ы́й глаго́летъ: Лїверті́ни, и҆́же ѿ ри́млѧнъ дарова́ни бы́вше свобо́дою, си́це нарица́ютсѧ: ꙗ҆́коже бо живѧ́хꙋ та́мѡ мно́зи стра́нницы, си́це и҆ со́нмы и҆мѣ́ѧхꙋ, и҆дѣ́же подоба́ше и҆ зако́нꙋ прочи́товатисѧ, и҆ моли́твамъ быва́ти: до здѣ̀ златоꙋ́стъ. ті́и ѹ҆́бѡ со́нмы: лїверті́нскїй, кѷрине́йскїй, и҆ и҆́ныѧ, со ст҃ы́мъ стефа́номъ стѧза́ющесѧ, не можа́хꙋ проти́вꙋ ста́ти премꙋ́дрости и҆ дꙋ́хꙋ, и҆́мже то́й глаго́лаше. и҆ препрѣ̀ сло́вомъ и҆́стины въ то̀ вре́мѧ ст҃ы́й стефа́нъ трѝ ча́сти вселе́нныѧ: є҆ѵро́пꙋ, а҆́зїю, и҆ а҆́фрїкꙋ. препрѣ̀ є҆ѵро́пꙋ въ лїверті́нѣхъ прише́дшихъ ѿ ри́ма, лежа́щагѡ въ є҆ѵропе́йскихъ страна́хъ. Препрѣ̀ а҆зі́ю въ кїлїкі́анѣхъ ѿ а҆зі́и бы́вшихъ. Препрѣ̀ а҆́фрїкꙋ въ кѷринеа́нѣхъ а҆леѯандрїа́нѣхъ, и҆̀же бѧ́хꙋ а҆фрїкі́йскїѧ страны̀ рожде́нїе. ѻ҆ни́ же проти́вꙋ и҆́стины па́че сл҃нца свѣтлѣ́йшїѧ не могꙋ́ще что̀ глаго́лати, гнѣ́вомъ распали́шасѧ, и҆ за́вистїю ѡ҆б̾ѧ́ти бы́вше, наꙋсти́ша нѣ́кїихъ мꙋже́й лжꙋ̀ гл҃ати лю́бѧщихъ, да возвѣстѧ́тъ вели́цѣй а҆рхїсѷнаго́ги жидо́встѣй, а҆́ки бы слы́шали стефа́на гл҃юща глаго́лы хꙋ́лныѧ на мѡѷсе́а и҆ на бг҃а. и҆ таковы́мъ лꙋка́вствомъ сподви́гше наро́дъ и҆ ста́рцы и҆ кни́жники, и҆ напа́дше восхи́тиша ст҃а́го стефа́на, и҆ на со́нмище приведо́ша пред̾ а҆рхїере́и и҆ всѐ мно́жество законоꙋчи́телей: поста́виша же и҆ свидѣ́тели ло́жны глаго́лющыѧ, ꙗ҆́кѡ человѣ́къ се́й не преста́етъ глаго́лы хꙋ́лныѧ глаго́лѧ на мѣ́сто ст҃о́е сїѐ и҆ зако́нъ: слы́шахомъ бо є҆го̀ гл҃юща, ꙗ҆́кѡ і҆и҃съ назѡре́й, се́й разори́тъ мѣ́сто сїѐ, и҆ и҆змѣни́тъ ѻ҆бы́чаи, ꙗ҆̀же предадѐ на́мъ мѡѷсе́й.

Стоѧ́ше же стефа́нъ ст҃ы́й посредѣ̀ ѹ҆бі́йственнагѡ тогѡ̀ со́нмища а҆́ки а҆́гг҃лъ бж҃їй, сїѧ́ѧ бжⷭ҇твенныѧ бл҃года́ти свѣ́тлостїю ꙗ҆́коже мѡѷсе́й и҆ногда̀: просла́висѧ бо ѡ҆бли́чїе пло́ти лица̀ є҆гѡ̀, и҆ всѝ сѣдѧ́щїи въ со́нмищи воⷥзрѣ́вше на́нь, ви́дѣша лицѐ є҆гѡ̀, ꙗ҆́кѡ лицѐ а҆́гг҃ла. рече́ же а҆рхїере́й, а҆́ще и҆́стинна сꙋ́ть глаго́лемаѧ ѿ свидѣ́телей; ѿве́рзе ст҃ы́й ѹ҆ста̀ своѧ̀, и҆ нача̀ сло́во ѿ а҆враа́ма, и҆́же пе́рвѣе прїѧ̀ ѡ҆бѣтова́нїе прише́ствїѧ мессі́ина (Быт. к҃в), и҆ ска́зоваше і҆сто́рїю до мѡѷсе́а, со всѧ́кимъ бл҃гоговѣ́инствомъ и҆ че́стїю того̀ воспомина́ѧ, ꙗ҆́вѣ показꙋ́ѧ, и҆ проти́вꙋ лжесвидѣ́тєлемъ глаго́лѧ, ꙗ҆́кѡ нѣ́сть хꙋли́тель мѡѷсе́а ни зако́на бж҃їѧ мѡѷсе́ю да́ннагѡ, но па́че и҆звѣствꙋ́ѧ, ꙗ҆́кѡ ѻ҆ц҃ы̀ и҆́хъ хꙋли́тели ѻ҆́нагѡ бы́ша: не восхотѣ́ша, речѐ, послꙋ́шати є҆го̀ ѻ҆ц҃ы̀ на́ши, но ѿри́нꙋша и҆̀, и҆ ѡ҆брати́шасѧ срⷣцемъ свои́мъ во є҆гѵ́петъ. По се́мъ возража́ѧ лжесвидѣ́телство ѻ҆́ное, а҆́би бы хꙋ́лилъ на мѣ́сто ст҃о́е, речѐ: Соломѡ́нъ созда̀ є҆мꙋ̀ хра́мъ. а҆́ки бы глаго́лѧ: не невѣ́мъ мѣ́ста ст҃а́гѡ бж҃їимъ бл҃говоле́нїемъ ѿ соломѡ́на царѧ̀ премꙋ́дрѣ ѹ҆стро́еннагѡ, и҆ сла́вою гдⷭ҇нею во ѻ҆́блацѣ ꙗ҆вле́нною ѡ҆сщ҃е́ннагѡ: почита́ю хра́мъ въ сла́вꙋ бж҃їю рꙋка́ми сотворе́нный, ѻ҆ба́че и҆ сїѐ и҆сповѣ́дꙋю, ꙗ҆́кѡ лю́битъ бг҃ъ па́че въ невеще́ственныхъ, нерꙋкотворе́нныхъ хра́мѣхъ, сі́есть, въ дꙋша́хъ человѣ́ческихъ чи́стыхъ жи́телствовати. Вы́шнїй не въ рꙋкотворе́нныхъ цр҃квахъ живе́тъ, ꙗ҆́коже прⷪ҇ро́къ глаго́летъ: Нб҃о мнѣ̀ прⷭ҇то́лъ є҆́сть, землѧ́ же подно́жїе нога́ма мои́ма: кі́й хра́мъ сози́ждете мѝ, гл҃етъ гдⷭ҇ь: и҆лѝ ко́е мѣ́сто поко́ищꙋ моемꙋ̀; Не рꙋка́ ли моѧ̀ сотворѝ сїѧ̑ всѧ̑. (Дѣѧ. з҃ : м҃и н҃) та́же бжⷭ҇твенныѧ, ꙗ҆́коже и҆ногда̀ и҆лїа̀, ре́вности и҆спо́лнивсѧ ѡ҆бличи́телное наведѐ сло́во: Жестоковы́йнїи, глаго́лющи къ ни́мъ, и҆ неѡбрѣ́занїи срⷣцы̀ и҆ ѹ҆шесы̀, вы̀ при́снѡ дх҃ꙋ ст҃о́мꙋ проти́витесѧ, ꙗ҆́коже ѻ҆ц҃ы̀ ва́ши, та́кѡ и҆ вы̀ (Дѣѧ. з҃ : н҃а). Кого̀ ѿ прорѡ́къ не и҆згна́ша ѻ҆ц҃ы̀ ва́ши; и҆ ѹ҆би́ша предвозвѣсти́вшыѧ ѡ҆ прише́ствїи ѡ҆жида́емагѡ мессі́и; та̀ словеса̀ ст҃а́гѡ подвиго́ша на ненаповѣди́мꙋю ꙗ҆́рость а҆рхїере́а, и҆ кни́жники и҆ ве́сь ѕло́бный і҆ꙋде́йскїй наро́дъ слы́шаще сїѧ̀, распыха́хꙋсѧ срⷣцы̀ свои́ми, и҆ скрежета́хꙋ зꙋбы̀ на́нь. но то́й не радѧ́ше ѡ҆ гнѣ́вѣ и҆́хъ, и҆спо́лненъ бо бѣ̀ дх҃а ст҃а творѧ́ща є҆го̀ мꙋ́жестенна и҆ бг҃оглаго́лива. Воⷥзрѣ́въ же на нб҃о, ви́дѣ сла́вꙋ бж҃їю, є҆ѧ́же пе́рвѣе жела́нїемъ ви́дѣти жела́ше, и҆ въ вѣ́рѣ несꙋмнѣ́ннѡ ѻ҆́нꙋю полꙋчи́ти надѣ́ѧшесѧ, тꙋ̀ пре́жде вре́мене нача̀ зрѣ́ти, и҆ а҆́ки ѹ҆жѐ ѿ пло́ти и҆сходѧ́й нача́тки прїе́млѧше воздаѧ́нїѧ: ви́дѣ и҆ хрⷭ҇та̀ і҆и҃са влⷣкꙋ и҆ гдⷭ҇а своего̀ стоѧ́ща, а҆́ки жела́телнѣ ждꙋ́ща къ себѣ̀ прише́ствїѧ є҆гѡ̀, до́ндеже ѿ пло́ти разрѣши́всѧ скорѣ́е къ немꙋ̀ до́йдетъ, и҆ и҆дѣ́же ѻ҆́нъ гдⷭ҇ь, та́мѡ и҆ слꙋга̀ є҆гѡ̀ бꙋ́детъ. а҆ є҆́же са́мъ ви́дѣ, то̀ и҆ всѣ̑мъ возвѣстѝ велегла́снѡ возгласи́въ: Сѐ ви́жꙋ нб҃са̀ ѿве́рста, и҆ сн҃а чл҃вѣ́ча ѡ҆деснꙋ́ю стоѧ́ща бг҃а, не потаѝ ви́дѣннагѡ, ꙗ҆́коже ѻ҆бы́чай є҆́сть ст҃ы́мъ ѿкрове́нїй быва́емыхъ и҆̀мъ ѿ бг҃а не ꙗ҆влѧ́ти и҆ны́мъ смире́нїѧ ра́ди своегѡ̀: но ꙗ҆́вѣ сотворѝ стефа́нъ ст҃ы́й пресла́вное то̀ ѿкрове́нїе: се́ же тогѡ̀ ра́ди, да вѣ́рнїи въ вѣ́рѣ ѹ҆твердѧ́тсѧ, невѣ́рнїи же посрамѧ́тсѧ. є҆ще́ же да и҆ про́чїимъ по не́мъ бы́ти и҆мꙋ́щымъ мч҃нкѡмъ и҆звѣсти́тъ, ꙗ҆́кѡ ѹ҆мира́ющымъ страда́лчески за хрⷭ҇та̀ нѣ́сть на воздꙋ́сѣ ѹ҆держа́нїѧ, нѣ́сть къ возше́ствїю препѧ́тїѧ и҆ ко́егѡлибо и҆спыта́нїѧ: но про́стый пꙋ́ть, ѿве́рсто нб҃о, гото́во воздаѧ́нїе, стоѧ̀ жде́тъ подвигополо́жникъ, сама̀ гдⷭ҇нѧ сла́ва во вратѣ́хъ нбⷭ҇ныхъ мꙋ́ченика срѣта́етъ. и҆ сегѡ̀ ра́ди первомꙋ́ченикъ не премолка́ѧ и҆звѣствꙋ́етъ, є҆́же ви́дитъ, а҆́ки и҆ дрꙋги́хъ по себѣ̀ къ томꙋ́же вѣнцꙋ̀ мꙋ́ченическомꙋ зовꙋ́щи. Зави́стнїи же і҆ꙋде́и и҆збива́ти прⷪ҇ро́ки наꙋчи́вшїисѧ, и҆ на самаго̀ гдⷭ҇а и҆спо́лнителѧ зако́на и҆ прⷪ҇ро́кѡвъ дерзнꙋ́вшїи не стерпѣ́ша и҆́стинныхъ слове́съ [са́ми лжи́ви сꙋ́ще] слы́шати гл҃емыхъ ст҃ы́мъ стефа́номъ. но возопи́вше гла́сомъ ве́лїимъ затыка́хꙋ ѹ҆́ши своѝ, и҆ ѹ҆стреми́вшесѧ є҆динодꙋ́шнѡ, ѹ҆бі́йственныѧ своѧ̀ на него̀ возложи́ша рꙋ́цѣ, и҆ и҆зве́дше внѣ̀ гра́да, ꙗ҆́коже пе́рвѣе гдⷭ҇а внѣ̀ вра́тъ пострада́ти и҆зво́лившаго, ка́менїемъ побива́хꙋ бл҃га́го и҆ вѣ́рнаго раба̀ гдⷭ҇нѧ. лжесвидѣ́тели же и҆ ѹ҆бі́йцы, дабы̀ легча́е мета́ти и҆̀мъ ка́менїе на ст҃а́го, совлека́хꙋсѧ ѻ҆де́ждъ свои́хъ, и҆ полага́хꙋ ты́ѧ при нога́хъ ю҆́ноши нарица́емагѡ са́ѵла, и҆́же сро́дникъ и҆ є҆диноплеме́ненъ сы́й побива́емомꙋ мно́жае на него̀ ꙗ҆рѧ́шесѧ ревнꙋ́ѧ по зако́нѣ ве́тхомъ: Са́ѵлъ, речѐ, бѣ̀ соизволѧ́ѧ ѹ҆бі́йствꙋ є҆гѡ̀ (Дѣѧ. и҃ : а҃). но и҆ златоꙋ́стъ ст҃ы́й ѡ҆ се́мъ гл҃етъ си́це: болѧ́ше са́ѵлъ ꙗ҆́кѡ небезчи́сленныѧ и҆мѣ́ѧше рꙋ́ки, да всѣ́ми бїе́тъ стефа́на, ѻ҆ба́че же и҆ та́кѡ ѡ҆брѣ́те, ꙗ҆́кѡ да того̀ побїе́тъ мно́гими рꙋка́ми, и҆̀же бѧ́хꙋ рꙋ́ки лжесвидѣ́телей, и҆́хже ѻ҆́нъ ри̑зи стрежа́ше.

Побива́емꙋ же бы́вшꙋ ст҃о́мꙋ стефа́нꙋ в̾ ѹ҆до́лѣ і҆ѡасафа́товой, ꙗ҆́же є҆́сть междꙋ̀ є҆лео́номъ и҆ і҆ерⷭ҇ли́момъ при пото́цѣ ке́дрстѣмъ мно́жество ка́менїѧ при бре́зѣ и҆мꙋ́щемъ: стоѧ́ше ѿдале́че на нѣ́коемъ ка́мени зрѧ̀ съ горы̀ пречⷭ҇таѧ дв҃а со ст҃ы́мъ і҆ѡа́нномъ бг҃осло́вомъ, и҆ молѧ́шесѧ ѡ҆ не́мъ прилѣ́жнѡ ко гдⷭ҇ꙋ и҆ сн҃ꙋ своемꙋ̀, ꙗ҆́кѡ да ѹ҆крѣпи́тъ є҆го̀ въ терпѣ́нїи, и҆ прїи́метъ дꙋ́шꙋ є҆гѡ̀ въ рꙋ́цѣ своѝ. ѽ ко́ль сла́дка, а҆́ще и҆ въ лю́томъ ка́менномъ бїе́нїи, сме́рть бѣ̀ ст҃о́мꙋ первомч҃нкꙋ, є҆гда̀ ѿ нбⷭ҇ныѧ высоты̀ сладча́йшїй і҆и҃съ, ѿ земны́ѧ же горы̀ сладча́йшаѧ мт҃рь съ возлю́бленнымъ ѹ҆ч҃нко́мъ на по́двигъ є҆гѡ̀ смотрѧ́хꙋ. Мно́гꙋ же на него̀ дождю̀ ка́менномꙋ летѧ́щꙋ, и҆ всемꙋ̀ кро́вїю ѡ҆багрѧ́ющꙋсѧ, и҆ ѹ҆же тѣ́ломъ и҆знемога́ющꙋ, и҆ ѿ сою́зѡвъ є҆сте́ственныхъ разрѣша́ющꙋсѧ, болѧ́ше срⷣцемъ ѡ҆ ѹ҆бива́ющихъ є҆го̀, и҆ прилѣ́жнѣе не́же ѡ҆ себѣ̀, ѡ҆ ѻ҆́ныхъ молѧ́шесѧ. ѡ҆ себѣ́ бо про́стѡ стоѧ̀ речѐ: Гдⷭ҇и і҆и҃се, прїимѝ дх҃ъ мо́й. а҆ ѡ҆ ѻ҆́ныхъ и҆ кѡлѣ́на прекло́нь, и҆ гла́сомъ ве́лїимъ возопи́въ, глаго́ла: Гдⷭ҇и, не поста́ви и҆̀мъ грѣха̀ сегѡ̀. и҆ сїѧ̑ ре́къ ѹ҆́спе. Та́кѡ соверши́сѧ до́брый подви́жникъ, та́кѡ ѹ҆вѧзе́сѧ а҆́ки червле́ными ро́жами, ѡ҆кровавле́нымъ ка́менїемъ пе́рвый мꙋ́ченикъ, и҆ по́йде въ ѿве́рстое, є҆́же ви́дѣ, нб҃о ко гдⷭ҇ꙋ и҆ цр҃ю̀ сла́вы, сца́рствовати є҆мꙋ̀ въ безконе́чномъ црⷭ҇твїи. а҆рхїдїа́конъ поста́вленъ бы́сть ѿ ст҃ы́хъ а҆пⷭ҇лъ ско́рѡ по пентїко́стїи, пострада̀ въ то́еже по вознесе́нїи гдⷭ҇ни лѣ́то деке́мврїа к҃з, и҆мы́й лѣ́тъ ма́лѡ болѣе три́десѧти, лице́мъ бѣ̀ ѕѣлѡ̀ красе́нъ, но дꙋше́ю краснѣ́йшїй. тѣ́ло же є҆гѡ̀ ст҃о́е пове́ржено бѣ̀ на снѣде́нїе ѕвѣрє́мъ и҆ пти́цамъ, и҆ лежа́ше де́нь и҆ но́щь непогребе́но. По се́мъ въ грѧдꙋ́щꙋю вторꙋ́ю но́щь гамалїи́лъ сла́вный ѻ҆́ный законоꙋчи́тель є҆вре́йскїй во і҆ерⷭ҇ли́мѣ, и҆́же и҆ са́мъ по́слѣжде вѣ́рова во хрⷭ҇та̀ съ сы́номъ свои́мъ а҆ве́лвїемъ, посла̀ мꙋ́жы честны́ѧ и҆ вѣ́рныѧ, и҆ взе́мши та́й ст҃а́гѡ мо́щи, ѿнесѐ въ ве́сь свою̀ за два́десѧтъ ста́дїй ѿ і҆ерⷭ҇ли́ма ѿстоѧ́щꙋю, гл҃емꙋю кафаргама́ла, и҆ та́мѡ погребѐ че́стнѡ, сотво́рши над̾ ни́мъ пла́чь ве́лїй. Кто бо не пла́калъ бы зрѧ̀ кро́ткое ѻ҆́ное а҆гнѧ̀, ка́менїемъ побїе́но бы́вшее, и҆ лежа́щее ме́ртво; По мно́гихъ же лѣ́тѣхъ бл҃гочести́ваѧ цари́ца є҆ѵдокі́а сꙋпрꙋ́жница ѳеодо́сїа ю҆нѣ́йшагѡ прише́дши во і҆ерⷭ҇ли́мъ, на мѣ́стѣ то́мъ, и҆дѣ́же ст҃ы́й первомч҃нкъ стефа́нъ побїе́нъ бы́сть, и҆ ѡ҆багри́сѧ землѧ̀ честно́ю є҆гѡ кро́вїю, созда̀ цр҃ковь прекра́снꙋ во и҆́мѧ є҆гѡ̀, въ че́сть же хрⷭ҇тꙋ̀ бг҃ꙋ, є҆мꙋ́же сла́ва во вѣ́ки, а҆ми́нь.

І҆кѡ́на ст҃а́гѡ а҆рхїдїа́кона стефа́на.

Тропа́рь, гла́съ д҃:

По́двигомъ до́брымъ подвиза́лсѧ є҆сѝ, первомꙋ́чениче хрⷭ҇то́въ и҆ а҆пⷭ҇ле, и҆ мꙋчи́телей ѡ҆бличи́лъ є҆сѝ нече́стїе: ка́менїемъ бо побїе́нъ ѿ рꙋ́къ беззако́нныхъ, вѣне́цъ ѿ ꙗ҆́же свы́ше десни́цы прїѧ́лъ є҆сѝ, и҆ къ бг҃ꙋ взыва́лъ є҆сѝ, вопїѧ̀: гдⷭ҇и, не поста́ви и҆̀мъ грѣха̀ сегѡ̀.

Конда́къ, гла́съ г҃:

Влⷣка вчера̀ на́мъ пло́тїю прихожда́ше, и҆ ра́бъ дне́сь ѿ пло́ти и҆схожда́ше. вчера̀ црⷭ҇твꙋѧй пло́тїю роди́сѧ, дне́сь ра́бъ ка́менїемъ побива́етсѧ: тогѡ̀ ра́ди и҆ скончава́етсѧ первомꙋ́ченикъ и҆ бжⷭ҇твенный стефа́нъ.

Въ то́йже де́нь
житїѐ и҆ страда́нїе ст҃а́гѡ прпⷣбномч҃нка и҆ и҆сповѣ́дника ѳео́дѡра, и҆ бра́та є҆гѡ̀ прпⷣбнагѡ ѳеофа́на, начерта́нныхъ.

[…] […] […]

---

Въ то́йже де́нь па́мѧть и҆́же во ст҃ы́хъ ѻ҆ц҃а̀ на́шегѡ ѳео́дѡра а҆рхїепⷭ҇кпа кѡнстанті́нѧ гра́да.