Кин тон (Усков)

Кин тон Автор: Пётр Михайлович Усков

Источник: Пересь Шамардан Кин тон // Кенеш. — 2008. — № 11-12. — 95—96-тӥ бамъёс.

Вань на вылэм асьмелэн унтеръёсмы, Чеховлэн верам Пришибеев кадь геройёсмы. Калык пӧлын соос зӧкъясько, ымзылэсь но паськыт кесясько. Озьы власть понна ӟеч ужаськомы кожало, асьсэос властьлэсь ужзэ гинэ пожало.

Святогорья ёросын Тяпык гурт вань. Отчы мон вуи ӝытлань. Нюлэс дасян бордын ужась, ассэ эксэй но инмар кожась Поляков Фёдор Никитович шуон адями кемдӥз милям кенеш азямы. Бригадир луса, пе, ужасько, гуртысь гуртэ поръясько. Ну, бригадирлэсь ужзэ ми тодӥськом, советской властьлы юрттӥсь со луэ шуиськом. Гуртэ вуыса, калыкез кенеше люкаса, умой-умой со валэктоз, кужымез тырмемъя дышетоз.

Нош таиз бригадирмы, сӥё-дано Поляковмы, уг яраты вераськыны калыкен калык радъя лякытэн. Дыбыртэ пыдъёсыныз, ӟукыртэ пиньёсыныз. Мыжыкъёсыныз сэзъяське, немыч атас сямен кесяське. Кучыран сямен синъёссэ берыкъя, тӧл вуко сямен пол шорын берга. Шораз учкыны ик шукырес, кӧшкемыт выре со, шайпыдэс. Соин ик кенешын калык дэймемын, зор улэ шедем курегъёс сямен зӥбтэмын.

Баженов Ст. О. сельсоветлэн членэз луэ. Поляковлэсь документсэ со куре. Ну бен пурӟиз ук бригадирмы, Баженов шоры кеськиз ук Поляковмы:

— Кин тон луиськод, малы документме куриськод! Мон ведь лыктэмын ужаны, быгато вылад акт но гожъяны. Эн мерскы, документме юаса эн вераськы монэным, «товарищ» нимаса. Товарищед тынад нюлэскысь кион, служащий луисько ведь мон.

Отчы ик Глазысь дышетскись студент кемдэм. Со но вераськон куспазы мерскем.

— Лякытэн вераськы, юлтош, советской властьлы уд ке луиськы пыртос. Документтэ кулэ луоз возьматыны, кин луэмдэ оскытыны. Туж шукырес вераськиськод, крестьянлы эш уг луиськы шуиськод. Лыктэмын ке ужаны, кулэ эш но луыны.

Нош пурӟиз Поляковмы, эрик сётэ йыркуръяськон сямызлы:

— Тон пинал на монэным вераськыны, кулэ луоз вылад акт гожъяны. Кароно тонэ арестовать, милица мед сётоз тыныд кровать. Бандит шат монэ кожаськоды, вредитель лыдэ-а монэ пыртӥськоды? Кошкы татысь, палэнскы!..

Тӥни сыӵе бригадир вуэм Тяпык гуртэ. Эскероно луоз та муртэз: оло, зэм но Поляков пушкын вредитель каръяськемын, крестьян пӧлын государственной ужез саптаны кутскемын. Уг ушъяськы мон таӵе ужасьёсты, уг жаляськы Пришибеев-Поляков кадь унтеръёсты. Кылзэс таослэсь кортнано, крестьянъёс пӧлын ужаны валэктоно. Медаз куашкатэ крестьянлэсь мылкыдзэ, медам быдтэ бригадирлэсь тусбуйзэ.

Перое мынам андан, ачим Пересь Шамардан.