Карсовайысь ужтэм корка (Усков)
| Карсовайысь ужтэм корка Автор: Пётр Михайлович Усков |
| Источник: 5-тӥ номеро «Ленин Сюрес» газет (21-тӥ январе 1931-тӥ аре), 4-тӥ бам |
Туж ке но куазь кезьыт, гуртам пукыны мӧзмыт. Куӵо кобламе кытскыса, гуртысь-гуртэ калгисько дыртыса. Озьы куӵо коблае, вуттӥз монэ Карсовае. Лыдӟон корка вадсы вуыса, кельтӥз монэ киргатыса. Сыӵе ведь визьмо тупатэ, кытсы ке кулэ, отсы киргатэ!
Лыдӟон коркае пырисько, избачлэсь но библиотекаршалэсь кизэс кутылӥсько.
— Ӟеч-а, бур-а Степанов эш! Кыӵе мар улӥськод тон но, Морилова эш!
— Ай номре ӧвӧл, пересь, ужъёс — чебересь. Пуксьы но шунтскы, ӟеч иворъёсыныд миленым люкиськы. Инмар.., Тьфу-ты — культотдел чида милемлы, ужтэк пукеммылы.
Озьы туж умой монэ пумитазы, та «ужасьёсмы» кыкназы. Ну, тӥ сямме тодӥськоды, дырттэмме но шӧдӥськоды. Кынмем пыдъёсме шунтыса, лыдӟон коркаетӥ ветлӥсько бызьылыса. Пересьмиллям видно мынам синъёсы, уг адско син азям лозунгъёссы. Лыдӟон корказы чеберъямтэ, борд газетсы но гожъямтэ. Таба пасьта очкиёсме веръяса, ветлӥсько боддоръёссэ эскеръяса. Озьы но уг адӟиськы ужъёссэс, бырйиськон кампани ортчытэмзэс, «рошво» праздникен нюръяськемзэс.
Йыркур луиз таӵе ужасьёслы, лыдӟон коркан мусояськыса гинэ пукисьёслы. Кутски шоразы лекъяськыны, зӧк куараеным кесяськыны.
— Мар малпаса тӥ ужтэк пукиськоды, озьы-а хозяйствомес ӝутыны юрттӥськоды? Малы уг ужало кружокъёс, малы уд лэсьтылӥське калыклы докладъёс? Быгатоно вал герӟаны татсы егитъёсты, дышетоно вал ветлыны татсы кышноосты. Ӝытъёсты ортчытъяно вал дышетскыса, книга-газетъёсты лыдӟыса, спектакль но мар пуктылыса. Чебер лозунгъёс дасяса, возёно коркадэс чеберъяса, тӥ нош уждэс вунэтӥллямды, ужтэк пукыны синмаськиллямды, культотделды но тӥляд ызе, уг йӧттылы лыдӟон коркаяды пыдзэ. Тулысозь ке тазьы улӥды, ужтэк пукыса шуӟимоды…
Ӝожомизы эшъёсы лекъяськемелы, соослэсь ужзэс адӟымтэмелы. Кыкназы монэ киултӥзы, «замечательной» ужзы доре вуттӥзы. — Ачид ке синтэм, малы милемыз кариськод интэм? Тӥни боддорын, вӧлдэт бордын, тетрадьмы ошемын, юан-веран отсы гожтэмын.
Ӝӧкез боддоры карыса, со вылэ пуконэз пуктыса, басьтӥзы тетрадьзэс, возьмато отын гожтэмзэс. 26 юан отсы гожтэмын, 15-езлы гинэ валэктон сётэмын. Валэктонъёссэс мон лыдӟисько, пумен лыдӟемея гордэктӥсько. Гожтэмзэс гожтӥсез гинэ валалоз, крестьянлэсь визьзэ гинэ суралоз. — Малы, пе, ӧвӧл мануфактура? — Служащойёслы гинэ, пе, сётъяськомы — «фактура»! — Кыӵе, пе, асьме СССР-ын вань классъёс? — Пожалуйста эн гожъялэ, пе, таӵе серемес юанъёс… Тӥни сыӵе «авторитетной» валэктонъёс сётъямын, партилэн но правительстволэн ужез кырыжатэмын.
Трос гожъясал мон таослэсь ужзэс. Тау, пукиллям коть учкыса ваче синзэс. А то эрекчасалзы калыкез коробтыр, СССР-лы Англия луэ шуысалзы бултыр. Нош культотдел? Кытын со, мар каре? — Пыртыны дасяське Степановез агитаторе. Соку пельёсмес паськыт карыса, пукомы пӧялляськемзэ кылзӥськыса. Со дырозь ӟеч улэ эшъёсы, ужтэм коркан мусояськыса дырдэс ортчытӥсьёсы!