Капитан ныл (Пушкин)/9
| ← VIII люкетэз. Ӧтьымтэ куно | Капитан ныл IX люкетэз. Люкиськон Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
X люкетэз. Городэз котыртон → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 62—66. |
Люкиськон
Туж умой вал, чебер ныл,
Тонэныд тодматскыны;
Лулын люкиськем кадь ик,
Туж секыт люкиськыны.
Херасков
Вазь ӵукна монэ барабан сайкатӥз. Мон калык люкаськон интые мынӥ. Отын Пугачёвлэн калыкез ошет котыре люкасько. Толон ошылэм калык али но ошкыса уло на. Казакъёс валъёссы вылын пуко, салдатъёс пыӵалъёсынызы сыло. Знамяоссы шонасько. Кӧня ке пушкаоссы походной лафетъёссы вылэ пуктэмын, соос пӧлысь мон асьмелэсь но пушкамес тодмай. Крепостьын улӥсьёс ваньмыз татчы люкаськиллям, самозванецез витьыса уло. Комендантлэн корказь выжыяз казак туж таза, киргиз выжы, тӧдьы валэз серметэтӥз кутыса возе. Мон синъёсыным комендант кышнолэсь шӧйзэ утчасько. Солэн шӧйыз, ӧжыт палэнэгес нуыса, сяканэн шобыртэмын. Кӧня ке витем бере, корказьысь Пугачёв потӥз. Калык изьыоссэс басьтӥзы. Пугачёв корказе султӥз но вань калыкен ӟечбур кариз. Одӥгез старшина солы ыргон коньдонэн мешок сётӥз. Пугачёв со коньдонэз кырымен-кырымен калык пӧлы пазяз. Со пазям коньдонэз октыны, кесяськыса, огзэс огзы погыръяса, вань калык чӧлскиз, кудзэ-огзэ сӧсыртӥзы но. Пугачёвез солэн главной советникъёсыз котыртӥзы. Соос пӧлын ик Швабрин но сылэ. Милям соин синъёсмы ваче пумиськизы; мынам синъёсысьтым со лек тылзэс гинэ адӟиз луоз, соин ик кужмысь серектыса, сюлмаз йыркурзэ возьыса, со син азьысьтым берытскиз. Калык пӧлысь монэ адӟыса, Пугачёв йырыныз шонтыса, ас дораз ӧтиз. «Кылскы, — шуиз со мыным. — Али ик Оренбурге мын но губернаторлы но ваньмызлы генералъёслы мынам нимыным вера: арня ортчыса монэ ас доразы мед витёзы. Гажась но кылскись пиналъёс кадь монэ мед пумиталозы, сыӵе визь кенеш соослы сёт; не то ваньзы соос лек казнить каремлэсь уз мозме. Сюресэд шудо мед луоз, ваше благородие! — Собере со калык шоры вазиз но, Швабрин пала возьматыса, тазьы шуиз: — Тани тӥледлы, нылпиосы, выль командир: котьку но солэсь кылскыса улэ, нош со тӥ понна но, крепость понна но мон азям кыл сётоно луоз». Вераны луонтэм кышкаса кылӥ мон та кылъёсты: Швабрин крепостьлэн начальникез луэ; Марья Ивановна солэн власть улаз кыле! Э-э, инмаре, мар гинэ соин луоз ини! Пугачёв корказьысь васькиз. Солы вал вайизы. Казакъёс солы, вал вылаз пуксьыкуз, юрттыны малпаса сыло вал но, со юрттэмзэс витьытэк, етӥз тэтчиз энер вылэ.
Соку калык пӧлысь Савельичелэсь потэмзэ адӟи. Со Пугачёв доры мынӥз но бумага лист солы сётӥз. Та уж бордысь мар потоз — мон номре но малпаны ӧй ни быгаты. «Мар та?» — важно юаз Пугачёв. «Лыдӟы но, соку марзэ-созэ адӟод», — шуэ солы Савельич. Пугачёв бумагазэ басьтӥз но, кыӵе ке бадӟым мурт сямен, кема учкыса улӥз. «Мар тон татын туж визь тӥяськымон гожтӥськод? — шуиз со. — Милям егит синъёсмы отысь но номре уг валало. Кытын мынам обер-секретаре?»
Капральской мундирен дӥсяськем егит пи етӥз гинэ Пугачёв доры вуиз. «Шара лыдӟы», — шуиз солы самозванец, бумагаез сётыса. Мар сярысь меда мынам дядькае Пугачёвлы гожъя, сое тодэм потыса мон сылӥсько. Обер-секретарь, дугдылыса-дугдылыса, зол куараен лыдӟе:
— «Кык халат, одӥгез миткалевой, мукетыз буртчин, куать манет тыр».
— Мар со сыӵе? — синъёссэ кисыр карыса, Пугачёв юа.
— Кылемзэ лыдӟыны кос на, — басыл гинэ вера Савельич.
Обер-секретарь лыдӟонзэ азьланьтэ:
— «Вож но векчи сукноез вурем мундир, сизьым манет сылэ.
Пустолэз вурем тӧдьы штани, вить манет тыр.
Голландской полотноез вурем дас кык дэрем манжетъёсын, дас манет тыр.
Чай юон посудаен погребец, кык манет но полтинник тыр…»
— Мар эрекчаськон та? — висъяз Пугачёв. — Погребецъёс но манжетэн штаниос сярысь мынам мар уже?
Савельич кызйиз но валэктыны кутскиз.
— Со, батюшко, злодейёсын лушкам барской ваньбурлы реестр.
— Кыӵе злодейёсын? — лек юаз Пугачёв.
— Виноват: мыдлань вераны шедьтӥ, — Савельич пумитаз вера. — Оло злодейёс, оло ӧвӧл но, тынад пиналъёсыд котырез бугыртӥзы но нуизы. Йырдэ кур эн кары: валлэн ньыль ке но пыдыз и то ӵемтылэ. Пумозяз ик лыдӟыны кос.
— Лыдӟы, — шуиз Пугачёв. Секретарь лыдӟе:
— «Басмаез вурем шобырет, мукетыз тафтяной хлопчатой бумагаез вуремын, ньыль манет тыр.
Ӟичы куэз вурем, льӧль пустолэн кыскем шуба, ньыльдон манет.
Эшшо постоялой дворын тынад милостедлы сётэм кечку тулуп, дас вить манет».
— Таиз мар эшшо сыӵе? — ӝуась синъёсыныз учкыса, кеськиз Пугачёв.
Шонерзэ вераса, куанер дядькае понна, мон туж зол кышкай. Со нош ик валэктыны турттэ вал но, Пугачёв солы эрик ӧз сёты: «Кызьы тон дӥсьтӥд таӵе пустякъёсын мон доры лыктыны? — секретарь киысь бумагазэ басьтыса, сое Савельичлэн ымныраз сальыса кеськиз Пугачёв. — Визьтэм пересь! Соосыз таркаллям: кыӵе беда! Аслад баринэныд ӵош тон татын, та мыным пумит луисьёсын артэ ошемлэсь мозмемды понна, тыныд, пересь хрыч, кулытозяд мон понна но мынам пиналъёсы понна инмарлы вӧсяськыса улоно вал… Кечку тулуп! Сёто мон тыныд кечку тулуп! Нош тодӥськод-а тон сое — мон тынэсьтыд луло дыръяд ик кудэ тулуплы ниыны косо?»
— Котьма кар, — пумитаз вазе Савельич, — мон ас эрикеным улӥсь адями ӧвӧл, баринлэн ваньбурез понна кыл сётоно луисько.
Пугачёвлэн соку мылкыдыз умой вал, лэся. Со, пал кыл но вератэк, валзэ берыктӥз но палдурскиз. Швабрин но старшинаос со бӧрсьы ик мынӥзы. Крепостьысь шайка умой, радызъя потӥз. Калык Пугачёвез келяны мынӥз. Мон площаде Савельичен кыли. Дядькае мынам кияз ас реестрзэ возе но, маке мур ӝоже усем мурт сямен, сое эскере.
Куспамы милям Пугачёвен умой гинэ мынэ шуыса, мынам Савельиче со бордысь пайда поттыны малпа вал но, солэн визьмо малпамез бордысь номре но ӧз пӧрмы. Мултэс сюлмаськемез понна, мон сое куаретыны кутскем вал но серемме возьыны ӧй быгаты. «Серекъя, сударь, — шуэ мыным Савельич, — серекъя; нош быдэс хозяйствомес выльысь заводить кароно луимы ке, соку адӟом, серем-а луоз».
Мон, Марья Ивановнаен адскыны понна, поплэн корказ мыныны дыртӥсько. Попадья монэ ӝоже усёно кадь иворъёсын пумитаз. Марья Ивановна уйин, тыл кадь ӟырдаса, висьыны кутскем. Со ӟырдаса, уйбыртыса кылле. Попадья монэ солэн кыллён висъетаз пыртӥз. Мон туж каллен солэн кровать дораз мынӥ. Солэн ымныр тусыз вошкемлы мон чылкак пайми. Висись монэ ӧз тодма. Мон, отец Герасимлэсь но солэн ӟеч сюлмо кышноезлэсь, монэ буйгатон сярысь вераськемзэс кылскытэк, туж кема со азьын сылӥ. Сьӧд малпанъёс мынэсьтым сюлэмме бугырто. Куанер ныллэн мятежникъёс пӧлы огназ кылемез но солы юрттыны быгатымтэе кышкатэ монэ. Швабрин, котькинлэсь но юн Швабрин мыным кышкыт. Солы табере самозванец власть сётӥз, быдэс крепостьлы со начальник луэ. Тӥни таӵе крепосте шудтэм ныллы огназ кылёнэ усён дыръя со ас йыркуреныз котьмар карыны быгатоз. Мар мыным кароно вал? Кызьы мон та ныллы юрттыны быгато? Кызьы сое злодейлэн ки улысьтыз мозмытоно? Одӥг гинэ амал кыле на: соку ик Оренбурге кошкыса, Белогорской крепостез мозмытыны дыртоно. Попен но Акулина Памфиловнаен проститься кариськи. Аслэсьтым луоно кышноме соослэн сюлмаськон улазы кельтӥсько шуи. Куанер ныллэсь кизэ кутӥ но, синвуосыным коттыса, сое чупай. «Ӟеч луэ, — монэ келякуз, попадья мыным шуэ, — ӟеч луэ, Пётр Андреич. Оло умойгес дыръёс вуыса, адскыны но кылдоз на. Эн вунэтэ милемыз, ӵемгес гожъялэ. Куанер Марья Ивановналэн тӥ сяна табере аслыз буйгатсконэз но дурбасьтӥсез но ӧвӧл ни».
Площаде потыса, мон ог минут эсэплы дугдӥ, ошет шоры учки, солы йыбыртӥ но, крепостьысь потыса, Оренбургской сюрес кузя мынӥсько. Мон бордысьтым люкиськылӥсьтэм Савельич но монэным ӵош мынэ.
Ас малпанъёсме малпаса мынон сьӧркытӥм, берласянь валэн лыктӥсьлэн пыдкуараез кылӥськиз. Берме учки но крепостьысь вал вылын казак лыктэ, бордаз ик сермет йылын буш башкир валэз но вань, ачиз кыдёкысен мыным дугдыны косыса сэзъя. Мон дугдӥ но ӝоген асьмелэсь урядникмес тодмай. Дорам вуэм бере со вал вылысьтыз тэтчиз но, ваем валэзлэсь сермет ӟезьзэ мыным сётыса, тазьы шуиз: «Ваше благородие! Милям бубымы та валэз но ас пельпум вылысьтыз шубазэ тыныд жаловать каре (энер бордаз ыжку тулуп керттэмын вал). Со сяна, — ӵемтылӥсь кылыныз урядник вераны турттэ, — со тыныд жаловать каре… полтинник уксё но… мон сое сюрес вылын ыштӥ, простить каре». Савельич со шоры кырыж учкиз но нукыртӥз: «Сюрес вылын ыштӥ! Нош пияд мар со тынад чальккетэ? Возьыттэм!» — «Мынам пиям мар чальккетэ шуиськод? — чик возьдаськытэк, юаз урядник. — Инмар тонэныд, пересь! Со серметэ озьы чальккетэ, полтинник ӧвӧл». — «Яралоз, — шуи мон, споръяськонэз висъяса. — Кин тонэ ыстӥз, солы мынам нимыным тау кар; нош ыштэм уксёдэ бертыкуд шедьтыны туртты но вина юыны аслыд басьты». — «Туж тау, ваше благородие, — шуиз со, ас валзэ берыктон вискытӥ, — улытозям тон понна инмарлы вӧсясько». Та кылъёссэ верам бере, со, одӥг кизэ пияз поныса, туж ӝог ворттыса кошкиз но минут куспын син азьысь ышиз.
Мон, тулупез вылам дӥсяса, вал вылэ пукси но берпалам Савельичез но пуктӥ. «Тӥни, адӟиськод-а, сударь, — шуиз пересь, — куриськон бумага сётъяме пайдатэм ӧз лу, ворлы возьыт, лэся, луиз. Та восьтэт башкир валэз но ыжку тулупез солэн, асьмелэсь мошенникъёсын лушкам ваньбурмы сярысь но тынад аслад солы сётэмед сярысь, ӝынызэ но уг сыло ке но, лек пунылэсь коть ишкалтэм гонзэ ке но шуэм сямен, всётаки яралоз».