Капитан ныл (Пушкин)/7
| ← VI люкетэз. Пугачёвщина | Капитан ныл VII люкетэз. Крепостез басьтон Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
VIII люкетэз. Ӧтьымтэ куно → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 49—55. |
Крепостез басьтон
Йыры, тон, мынам йыры,
Служить карем йыры!
Служить карид тон, йыры,
Чылкак куамын но куинь ар.
Аслыд шумпотон но, пайда но
Службаед ӧз сёт тыныд, йыры,
Бадӟым чин но тыныд ӧвӧл,
Ӟеч кыл но тыныд ӧвӧл.
Кык ӝужытэсь юбоос
Бадяр ваменпуэн герӟамын,
Со сяна буртчин кыӵет гозы
Выслужить карид тон, йыры.
Калык кырӟан
Та уез мон ӧй но изьы, ӧй но кылиськылы. Ӵукна ӟарпотон дыръя, мон крепостьлэн ӟезьы азяз мыныны но Марья Ивановнаен берпумзэ проститься кариськыны малпасько вал. Аслэсьтым ачим мон зол воштӥськемме шӧдӥсько: сюлэм пушлэн бугырскемез мыным сокем секыт уг поты кадь. Нош, кемалась ик ӧвӧл, секыт малпаськонэн улэме мынам, секытгес кадь вал. Люкиськыса улонэлэн мӧзмытэз борды, бус пыртӥ кадь адскись ӟеч осконлыкъёс но, луоно кышкыт ужъёсты чидатэк витён но, благородной честолюбие но огинэ сураськизы. Уй шӧдытэк ортчиз. Мон коркасьтым потыны малпасько ни вал, ӵапак соку мынам ӧсэ усьтӥськиз но мон доры, донесение вайыса, капрал пыриз. Асьмелэн казакъёсмы, пе, уйин крепостьысь потӥллям но, бордазы Юлаез но кужмысь нуиллям. Нош крепость котыртӥ, пе, мар ке тодмотэм муртъёс ворттыло. Марья Ивановна кошкыны уз вуы шуыса, мон чылкак куалектӥ. Туж дыртыса, капраллы кӧня ке визь-кенеш сётӥ но, ачим соку ик комендант доры бызьыса сямен мынӥсько.
Куазь югдэ ини. Лобыса сямен ульча кузя мыныкум, мон асме ӧтись куараез кылӥ. Дугдӥ. «Кытчы тӥ? — шуиз Иван Игнатьич, монэ уйыса. — Иван Кузьмич крепостьлэн вырйылаз, со тӥледыз ӧтьыны ыстӥз. Пугач вуиз». — «Марья Ивановна кошкиз-а?» — сюлмы куалекъяса юай мон. — «Ӧз вуы, — Иван Игнатьич пумитам вера, — Оренбурге сюрес вандэмын. Крепостьмы котыртэмын. Умойтэм, Пётр Андреич!»
Ми вырйыл вылэ мынӥськом. Со вырйыл ас эрказ кылдэм ӝужыт инты, вылаз ӵем маегъёс пуктылыса юнматэмын. Отын ини крепостьын улӥсьёс ваньмыз люкаськемын вал. Гарнизонлэн салдатъёсыз пыӵалъёсын сыло. Пушкаез толон ик татчы вайизы. Комендант туж ичи кузя люкам салдатъёсыз азьын ветлэ. Кышкыт ужъёслэн матынзы пересь воинэз вераны луонтэм сэзь мылкыдо каро. Кыретӥ, крепостьысен кыдёкын ик ӧвӧл, ог кызь муртъёс валъёс вылын ворттыло. Соос казакъёс кадесь но, куспазы башкирецъёс но вань, соосты сёр куэз вурем изьыоссыя но стрела нуллон колчанъёссыя тодмано. Комендант ас войскозэ котыртӥз но тазьы вераз: «Ну, пиналъёс, матушка-государыня понна туннэ асьмеос сылом, асьмелэсь бравой калык но присягать карем калык луэммес быдэс дунне азьын возьматом!» Салдатъёс ас дась луэмзэс зол черетскыса веразы. Швабрин мон вӧзам сылэ, неприятельёс пала учке. Крепостьысь калыклэсь люкаськемзэ шӧдыса, кыретӥ ветлӥсьёс огазе кариськизы но ас куспазы кенешыны кутскизы. Комендант Иван Игнатьевичез пушкаез со люкаськем калык пала мертаны косӥз но фитильзэ ачиз ӝуатӥз. Пушкалэн ядроез жуэтыса, номре карытэк, кырын люкаськем калыклэн йыр йылтӥзы ортчиз. Борӟемен калык соку ик ворттыса кошкизы. Кыр бушаз.
Соку вырйыл вылэ Василиса Егоровна но соин ӵош ик мемиез бордысь кыльымтэ Маша вуиз. «Мар ни? — шуиз комендантша. — Кыӵе баталья мынэ? Нош кытын неприятель?» — «Неприятель кыдёкын ӧвӧл, — Иван Кузьмич вера солы. — Инмар ке ӧз сёты, ваньмыз умой луоз. Кыӵе, Маша кышкыт-а тыныд?» — «Ӧвӧл, папенька, — шуиз Марья Ивановна, — коркан оген улыны кышкытгес». Соку со мон шоры учкиз но кужмысь кадь серектӥз. Шпагаелэсь кикутонзэ туж зол кырмыса возисько, сое толон гинэ Марья Ивановна киысь басьтэмме тодам вайисько, та шпагае мыным гажано нылме возьманы сётэмын кадь. Сюлмы мынам ӝуа. Мон асме солэн рыцареныз лыдъясько. Солэсь мон вылам оскыса улонзэ ужен возьматэме потэ, соин решительной минуталэсь вуэмзэ витисько.
Крепость дорысен ог ӝыны иськемын луись вырйыл сьӧрысь нош борӟемен лыктӥсь калыкъёс адскизы но степь ӝоген ӵоксаськиз копьёосын но сайдакъёсын вооружиться карем калыкен. Соос пӧлысь одӥгез тӧдьы вал вылын лыктэ, вылаз горд кафтан дӥсямын, пуртэсысьтыз поттэм саблязэ кияз возе: со ачиз Пугачёв вал. Со дугдӥз; сое калыкез котыртӥз но собере, солэн косэмезъя, вылды, пӧлысьтызы ньыль муртъёс люкиськизы но, вань кужмысь валъёссэс улляса, крепость доры ик, ворттӥзы. Соос пӧлысь ми асьмелэсь изменникъёсмес тодмамы. Одӥгез, пӧлысьтызы, изьы азяз бумага лисэз возе, мукетызлэн кузь ши йылаз Юлайлэн йырыз бышкалтэмын, сое со крепостьлэн забор вылтӥз, ми пала лэзиз. Куанер калмыклэн йырыз комендантлэн пыд азяз ик усиз. Изменникъёс кесясько: «Эн ыбылӥське, татчы государьлэн азяз потэ. Государь татын!»
«Тани мон тӥледыз! — кеськиз Иван Кузьмич. — Ребята! ыбылэ!» Салдатъёсмы милям залп сётӥзы. Гожтэт возись казак шоналскиз но вал вылысьтыз усиз; кылемъёсыз берлань ворттӥзы. Мон Марья Ивановна шоры учки. Юлайлэсь виресь йырзэ адӟеменыз паймыса но залп сётэмен пельёсыз ӵоксаськемен, со визьтэммыса кадь сылэ. Комендант капралэз ӧтиз но вием казаклэн киысьтыз бумагазэ басьтыны косӥз. Капрал бусые потӥз но вием казаклэсь валзэ серметтӥз валтыса берытскиз. Гожтэтсэ со комендантлы сётӥз. Иван Кузьмич со гожтэтэз, ас куспаз гинэ лыдӟыса, юдэсэн-юдэсэн кесяса куштӥз. Со куспын мятежникъёс но ожмаськыны дасясько. Ӝоген пуляос милям пельёсмы котыртӥ шуланы кутскизы. Крепостьлэн пуэз лэсьтэм забор бордаз но музъем вылэ кӧня ке пукыӵен лэзем стрелаос но бышкалскизы. «Василиса Егоровна! — шуиз комендант. — Татын нылкышно уж ӧвӧл, Машаез ну, адӟиськод: нылмы шӧй кадь луэмын».
Пуляос улын зӥбытомем Василиса Егоровна кыре учкиз но (отын калыклэн бугыръяськемез адске) собере, кузпалэз пала берытскыса, тазьы шуиз: «Иван Кузьмич, улон но кулон но инмар киын: Машаез благословить кар. Маша, бубыед доры лык».
Ӟаректэм но куалекъясь Маша Иван Кузьмич доры лыктӥз, пыдес вылаз кариськиз но солэн пыд вылаз йыбыртӥз. Пересь комендант сое куинь пол кирос кариз, собере ӝутыса чупаз но вошкем куараен вераз: «Ну, Маша, шудо лу. Инмарлы вӧсяськы: со тонэ уз кушты. Нош ӟеч сюлмо адями ке вадсаськиз, огдэс огды гажан но куспады тупаса улонэз инмар тӥледлы мед сётоз. Кызьы ми Василиса Егоровнаен улӥм, тӥ но озьы ик улэ. Ну, ӟеч лу, Маша. Василиса Егоровна, ӝоггес ну ини сое татысь». (Маша бубыезлэн чыртыяз ӟыгырскыса зар-зар бӧрдэ.) «Асьмеос но чупаськом, — бӧрдыса вазиз комендантша. — Ӟеч лу, мынам Иван Кузьмиче. Мар ке мыдланьёсы ке тон азьын вал, простить карыны курисько!» — «Ӟеч лу, ӟеч лу, матушка! — пересь кышнозэ ӟыгыртӥз комендант. — Ну, тырмоз ини. Мынэ, мынэ гуртэ. Дыр ке луиз, Маша вылэ сарафан дӥся». Комендантша нылыныз кошкизы. Мон Марья Ивановналэн бӧрсяз учкыса сылӥсько, со берытскыса учкиз но, мыным йырыныз шонтӥз. Соку Иван Кузьмич ми пала берытскиз, солэн вань саклыкез неприятель пала усиз. Мятежникъёс асьсэлэн кивалтӥсьсы котыре люкасько но валъёссы вылысь васько. «Табере зол сылэ, — шуиз комендант, — приступ луоз…» Та минутскын ик туж зол кесяськем куараос кылӥськизы. Мятежникъёс бызьыса крепость доры лыкто. Милям пушкамы картечен зарадамын вал. Комендант соосты матэгес вуыны лэзиз но, соку гинэ пушкаен ыбизы. Картечмы соослэн шоразы ик йӧтӥз. Мятежникъёс олань-талань пазьгиськизы но берлань чигназы. Соослэн кивалтӥсьсы огназ азьпалазы кылиз… Со сабляеныз шонаськыса ӟырдыт мылкыдэн калыксэ сьӧраз ӧте кадь… Ог эсэплы чусомем куараос нош выльысь кесяськыны кутскизы. «Ну, ребята, — шуиз комендант, — табере ӟезьыез усьтыса, барабанэз жуге. Ребята! Азьлань, мон сьӧры!»
Комендант, Иван Игнатьич но мон, соку ик крепость сьӧры потӥм. Нош кышкам гарнизонмы ас интыысьтыз ӧз но вырӟы. «Мар тӥ, нылпиосы, сылӥськоды? — кеськиз Иван Кузьмич. — Кулоно ке, кулоно: служба уж!» Со куспын ик мятежникъёс ми выламы вуизы но крепосте пыризы. Барабан чалмиз, салдатъёс пыӵалъёссэс куштылӥзы. Монэ пыдйылысьтым погыртэмзы вал но мон, султыса, мятежникъёсын ӵош ик крепосте пыри. Йыраз ранить карем комендант, злодейёсын котыртэмын, солэсь усьтонъёссэ куро. Мон солы юрттыны дораз мынӥсько вал но, кӧня ке золэсь казакъёс монэ кутӥзы но: «Йӧтоз али тӥледлы, государьлэсь кылскымтэослы!» — шуыса, кускерттонъёсыныз думылӥзы. Милемыз ульча кузя нуизы. Улӥсьёс нянен но сылалэн коркасьтызы потыло. Черк гырлыез жуго. Государь, пе, площадь вылын калыклэсь присяга басьтэ но отчы ик пленэ басьтэмъёссэ но вите шуыса, кесяськыны кутскизы. Калык площадь вылэ люкаське, милемыз но отчы ик нуо.
Пугачёв комендантлэн корка азяз небыт пукон вылын пуке. Вылаз солэн галунъёсын вурем горд казацкой кафтан дӥсямын. Зарни тугъёсын чебермам соболь куэз вурем ӝужыт изьыез чилясь синъёсыз вылэ ик изьыямын. Ымнырыз солэн мыным тодмо кадь потӥз. Со казакъёслэн старшинаосынызы котыртэмын. Отец Герасим, ӟаректыса но куалекъяса, кияз кирос возьыса, корка азьын сылэ, азьпала луоно жертваос понна куаразэ поттытэк вӧсяське кадь. Площадь вылэ калыкез ошылыны ошон лэсьтыны дырто. Ми матэ вуэм бере, башкирецъёс калыкез пазязы но милемыз Пугачёв азе вуттӥзы. Гырлы куара дугдӥз, котырак мур чус луиз. «Кудӥз комендант?» — юаз самозванец. Милям урядникмы калык пӧлысь потӥз но Иван Кузьмич шоры возьматӥз. Пугачёв пересь шоры учкиз но тазьы шуиз солы: «Кызьы тон мыным, ас государедлы, пумитъяськыны дӥсьтӥд?» Ранаез вӧсь луэмлы чидасьтэм комендант, берпум кужымъёссэ люкаса, чурыт куараеныз солэн пумитаз вераз: «Тон мыным государь уд луиськы, тон вор но самозванец, кылӥськод-а тон!» Пугачёв синъёссэ кыньыртӥз но тӧдьы кышетэныз шоналтӥз. Кӧня ке казакъёс пересь капитанэз кутӥзы но ошон доры нуизы. Ошонлэн ваменпуэз вылын толон гинэ допросить карем, тодмет пусъёсын башкирец пуке. Со кияз гозы возе. Ог минут ортчыса, мон куанер Иван Кузьмичез гозы йылын шонаськемен адӟи. Собере Пугачёв доры Иван Игнатьичез вайизы. «Государьлы, Пётр Фёдоровичлы, — шуэ солы Пугачёв, — присяга сёт!» — «Тон милемлы государь уд луиськы, — ас капитанэзлэсь верам кылъёссэ солэн пумитаз Иван Игнатьич вера. — Тон, дядюшка, вор но самозванец!» Пугачёв нош тӧдьы кышетэныз шоналтӥз но лякыт сямо поручик ас капитанэз вӧзы ик ошкиз.
Черод мон вылэ вуиз. Мон, сэзь-сэзь кариськыса, Пугачёв шоры учкисько, аслам эшъёсылэсь верам кылъёссэс вераны дасяськисько. Соку, вераны луонтэм паймонэз адӟи: мятежникъёслэн старшинаоссы пӧлын Швабрин. Йырсиез солэн котыр вандыса ӵышкемын, вылаз казацкой кафтан. Со Пугачёв доры кариськиз но пеляз лушкемен кӧня ке кыл вераз. «Ошелэ сое!» — мон шорам учкытэк, шуиз Пугачёв. Мынам чыртыям кыӵет понӥзы. Ас куспам лушкемен гинэ мон молитваос лыдӟисько, аслэсьтым сьӧлыкъёсме инмарлы верасько, мынам сюлэмелы матэ луись калыкъёсме возьманы курисько. Монэ ошон улэ вайизы. «Эн кышка, эн кышка», — шуо мыным губительёс, оло зэмзэ но монэ буйгатон понна. Малпамтэ шорысь, мон черекъям куара кылӥ: «Сылэ, окаяннойёс! дугдэ!..» Палачъёс дугдӥзы. Учкисько но: мынам Савельиче Пугачёвлэн пыд азяз кылле. «Вордэм бубые! — шуэ мынам куанер дядькае. — Мар пайдаез тыныд баринлэсь пиналзэ быдтыны? Лэзь тон сое; со понна тыныд кузьым сётозы. Нош пример возьматон понна но калыкез кышкатон понна, коть монэ, шуом, пересь муртэз, ошыны кос!» Пугачёв тодмет сётӥз но монэ соку ик керттэтъёсме пертчылыса мозмытӥзы. «Батюшкамы милям тонэ помиловать каре», — шуо соос мыным. Соку мон ошемзылэсь мозмемелы шумпотӥ ке шуоно, сокем шум но ӧй поты кадь; нош малы ӧз оше меда ке шуоно, созэ но уг жаляськы кадь. Мынам мылкыдъёсы соку валантэмесь вал. Монэ нош ик самозванец доры вайизы но со азе пыдес вылам султытӥзы. Пугачёв мыным аслэсьтыз сыныро кизэ мычиз. «Чупа кизэ, чупа кизэ!» — котырам верасько. Асме ачим сыӵе ултӥян улэ уськытытозь, мон котькыӵе лек казнить каремлы чидасал. «Батюшка Пётр Андреич! — монэ мырылыса, бӧрсям сылӥсь Савельич лушкем шыпыртэ. — Эн ваменъяськы! мар тыныд луоз? сялӟы но чупа со злод… (тьфу!), чупа солэсь кизэ». Мон уг вырӟылӥськы. Пугачёв кизэ лэзиз но серекъяса вераз: «Его благородие шумпотэменыз шузимем, лэся. Ӝутэ сое!» Монэ ӝутӥзы но ас эркам кельтӥзы. Та кышкыт комедиялэсь ортчемзэ эскерыса сылӥсько.
Крепостьын улӥсьёс присяга сётыны кутскизы. Огзы бӧрсьы огзы лыктыса, соос нырысь ик распятиез чупало, собере самозванецлы йыбырто. Гарнизонной салдатъёс но отын ик сыло. Ротаысь вуриськись кияз ныж качыен сылэ, со салдатъёслэсь йырси пунэтъёссэс вандылэ. Соос сэзъяськыса Пугачёвлэн ки дораз лыкто но, Пугачёв соосты простить карисько шуыса ялэм бераз, ас шайкаяз кутэ. Ваньмыз та ужъёс ог куинь час ӵоже кыстӥськизы. Собере Пугачёв ас пукон интыысьтыз султӥз но старшинаосыныз ӵош корказьысь васькиз. Солы чебер но дуно сбруяен чебермам тӧдьы валзэ вайизы. Кык казакъёс сое ки ултӥз кутӥзы но энер вылаз пуктӥзы. Отец Герасимлы, со доры сиськыны лыкто шуыса, ялӥз Пугачёв. Ӵапак соку зол черетскем кышномурт куара кылӥськиз. Кӧня ке кузя разбойникъёс Василиса Егоровнаез гольык карыса, йырсиоссэ тугаса, корказе поттӥзы. Солэсь шуныт кофтазэ одӥгез ас вылаз дӥсяны вуэм ни. Мукетъёсыз мамык валесъёссэ, шыкысъёссэ, чай юон посудаосты, дӥськутэз но мукет пӧртэм котыръёсты поттыло. «Батюшки мои! — черекъя куанер пересь кышномурт. — Коть лулме ке но на покаяние лэзе вал. Вордэм бубыосы, нуэ монэ Иван Кузьмиче доры». Вдруг со ошон шоры учкиз но Иван Кузьмичсэ тодмаз. «Злодейёс! — черетскиз со вань кужмысьтыз. — Мар кариды тӥ сое? Югыт дуннее тон, мынам Иван Кузьмиче, етӥз салдатэ! Ӧз йӧтэ тонэ прусакъёслэн но штыкъёссы, турокъёслэн но пуляоссы, ӧз кылды тыныд улондэ честной ожын быдтыны, беглой каторжниклэн ки улаз бырид!» — «Буйгатэ со пересь ведьмаез!» — шуиз Пугачёв. Соку егитгес казак солэн йыраз сабляеныз ӵогиз но, Василиса Егоровна корказь тубатъёс вылэ усиз. Пугачёв кошкиз, калык но со бӧрсьы ик палэнскиз.