Капитан ныл (Пушкин)/3
| ← II люкетэз. Сюрес возьматӥсь | Капитан ныл III люкетэз. Крепость Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
IV люкетэз. Ваче жугиськон → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 19—25. |
Крепость
Ми фортециын улӥськом,
Нянь сииськом но ву юиськом;
Нош ми доры пирог дуре
Тушмонъёс ке лыктӥзы,
Соосты ми утялтом:
Картечен пушка тупатом!
Салдат кырӟан
Недоросль
Белогорской крепость Оренбургысен ньыльдон иськемын. Сюрес Яик шурлэн меӵ ярдуртӥз мынэ. Шур та дырозь кынмымтэ на. Солэн, сьӧд узвесь кадь, тулкымъёсыз лымыен шобыртэм тӧдьы ярдуръёсаз туж мӧзмытэсь адско. Шур сьӧрын киргизской кыръёс вӧлскемын. Мынам йырам мар ке мӧзмытэсь малпанъёс бергало. Гарнизонын улонлэн мон понна нокыӵе шулдырез ӧвӧл кадь. Аслэсьтым начальник луонме, Миронов капитанэз, кыӵе меда со шуыса, ялан ас поннам чакласько. Мон сое туж лек пересен, котькыӵе чыры-пыры янгышъёс понна кӧс нянен но вуэн гинэ возён вылысь арест улэ пуктӥсь но, ас службаез сяна, номре но тодӥсьтэм адямиен кадь син азям адӟыны тыршисько. Озьы мынон куспамы куазь пеймыт но луыны кутскиз ни. Мынонзэ нош ми ӝог гинэ мынӥськом. «Крепость дорозь кыдёкын на-а?» — юай мон ямщикелэсь. «Кыдёкын ик ӧвӧл ни, — шуэ со. — Тӥни, адске ини». Мон котырак эскеръяськисько, крепостьлэсь башняоссэ, кышкытэсь бастионъёссэ но котыртӥз ӝужыт вырен ӝутэм сюез адӟо шуыса, малпасько вал, нош коръёсын котырак заборам гуртэз сяна, номре но ӧй адӟы. Гуртлэн огпал урдсаз — куинь-а, ньыль-а — ӝыныез лымыен согиськем турын зуродъёс сыло; мукет палаз кырыжам, курез лэсьтэм бурдо тӧл вуко сылэ, бурдъёсыз, азьтэм муртлэн киосыз сямен, лэзькемын. «Кытын, бен, крепость?» — абдраса юай мон. «Бен, тани со», — ямщике киыныз гурт шоры возьматэ. Со куспын ик ми крепосте но пырим. Крепостьлэн ӟезьы дорысьтыз мон вуж чугун пушкаез адӟи. Ульчаосыз сюбегесь но кырыжесь. Коркаоссы лапегесь, тросэз куроен липемын. Мон комендант доры мыныны косӥ но, ог минут куспын кибиткамы вырйылынгес, пу черк дорынгес сылӥсь, корез лэсьтэм корка доры дугдӥз.
Нокин но ӧз пумита монэ. Мон корказяз туби но, корка ӧсэз усьтӥ. Пересь инвалид, ӝӧк вылын пукыса, вож мундирлэн гырпумаз лыз кышъет кышъяса пуке. Ас лыктэме сярысь мон сое доложить карыны косӥ. «Пыр, батюшка, — инвалид шуэ, — милямъёс гуртын».
Мон, вашкала сямен утялтэм, чылкыт висъетэ пыри. Сэрегын посудаен шкап сылэ. Борд бордын, стекло рама пушкын, офицерской диплом ошемын, со котыртӥ, турецкой ож дыръя Кистрин но Очаков крепостьёсты басьтэмез возьматӥсь дунтэмесь картинаос ошылэмын. Со сяна, выль кышно быръён но коӵышез ватон картинкаос. Укно дорын шуныт ватной кофтаен дӥсяськем пересь кышномурт пуке. Йыраз солэн кышет керттэмын. Со сӥньысэз бугор вылэ бине; сӥньыс ӝоктэмез палсинмо, офицерской мундирен дӥсяськем пересь адями киосаз золтыса возе. «Мар тӥледлы кулэ, батюшка?» — ас ужзэ ужаса, пересь кышномурт юаз. Мон татчы службае лыктэмын но, службалэн порядокезъя, господин капитан доры явиськисько — шуыса, палсинмо пересь муртэз комендант кожаса, азьло ик дасям кылъёсме солы вераны кутскем вал, нош вераса ӧй быдты, хозяйка монэ ӝыныё дугдытӥз. «Иван Кузьмич гуртаз ӧвӧл али, — шуиз со, — отец Герасим доры куное мынӥз; ма, всё ровно, батюшка, мон солэн кышноез луисько. Яратыны но гажаны курисько. Пуксьы, батюшка». Со нылмуртэз дораз чортӥз но, урядникез ӧтьыны косӥз. Пересь мурт ас палсинмыныз, мае ке тодэмез потэм кадь, ялан мон шорам учкылэ. «Юаны ке яра, — шуиз со, — тӥ кыӵе полкын служить кариды?» Солэн тодэмез потыса юамезлы мон мар ке кулэ, верай. «Нош юаны ке яра, — ватсаса юа со, — малы гвардиын службадэс гарнизонэ воштӥды?» Начальстволэн мылпотонэз сыӵе вал — шуыса, мон солы верасько. «Гварди офицеръёслы мар ке тупамтэ янгыш ужъёс лэсьтӥды, дыр?» — шуыса, со нош юалляськемысь уг дугды. «Тырмоз кулэтэмзэ супыльтыны, — капитанлэн кышноез шуэ, — адӟиськод, адями сюрес вылысен жадьыса вуэмын, тонэныд йырин ик ӧвӧл солы… (киостэ шонергес возь али…). Нош тон, батюшка, — мыным шуэ со, — тонэ милям пеймыт сэрегъёсамы келязы шуыса ӝоже эн усьы. Нырысез но, берпумез но тон ӧвӧл. Улыса-вылыса дышод но улондэ яратод. Алексей Иванович Швабрин но адями виемез понна тӥни витетӥ арзэ татын улэ ни. Кызьы сьӧлык улэ пӧяськыны шедиз, инмар ачиз мед тодоз. Со одӥг поручикен город сьӧры мынӥллям но, бордазы ик шпагаоссэс но басьтӥллям, собере отын огзэс огзы шпагаосынызы бышкалляны кутскиллям. Тӥни озьы Алексей Иванович, шпагаен бышкалтыса, поручикез вием, отын ик кык кузя адӟисьёсыз но вылӥллям! Мар карод? Сьӧлыканы мастер кулэ ӧвӧл!»
Со куспын егит но веськрес мугоро казак, урядник пыриз. «Максимыч! — шуиз солы капитанша. — Господин офицерлы кунока шедьты, чылкытсэгес». — «Слушаюсь, Василиса Егоровна, — шуэ урядник. — Полежаев Иван доры его благородиез, кунокае пыртыны умой уз-а лу?» — «Пӧяськод, Максимыч, — шуиз капитанша, — Полежаевлэн корказ сотэк но люкыт ини. Собере со мынам куме ук, собере солы ми начальник луэмез но уг вунэты со. Келя господин офицерез… кызьы, батюшка, аслад но бубыедлэн нимыз? Пётр Андреич?.. Келя Пётр Андреичез Кузов Семён доры. Со, мошенник, аслэсьтыз валзэ мынам бакчаям лэзем. Ну, кыӵе мар ужъёс, Максимыч, номыр умойтэмъёс ӧвӧл-а?»
— Инмарлы тау, котырак умой, чалмыт гинэ, — шуэ казак, — только капрал Прохоров но Негулина Устинья одӥг шайка пӧсь ву понна мунчоын жугиськиллям.
— Иван Игнатьич! — шуиз капитанша палсин пересь муртлы. — Со Прохоровлэсь но Устиньялэсь ужзэс сэртты-пертчы но тод — кин шонер, кин виноват. Собере кыкназэс ик наказать кар. Ну, Максимыч, мын. Пётр Андреич, Максимыч тонэ ас квартираяд келялоз.
Мон йыбыртӥ. Монэ урядник крепостьлэн пумаз ик, шурлэн ӝужыт ярдураз сылӥсь корка вайиз. Коркалэн ӝыныяз Семён Кузовлэн семьяез улэ, мукет палзэ, ӝынызэ, мыным сётӥзы. Со коркалэн ӝыныез одӥг висъет гинэ луыса, пулъёсын шори висъямын. Пушкыз чылкыт гинэ. Савельич отын кузёяськыны, котыръёсты интыяны кутскиз. Мон сюбег гинэ укноетӥ учкыса улӥсько. Син азям мӧзмыт кыр вӧлскемын. Кеӵевылгес кӧня ке коркаос сыло, ульча кузя кӧня ке курегъёс ветло. Корказьын кияз тусь кутыса, пересь кышно парсьёссэ ӧте; солэн пумитаз парсьёс огкылысь черекъяло. Тӥни, музъемлэн кыӵе палъёсаз ас егит дыръёсме мыным ортчытон кылдэмын вылэм. Мӧзмон мынам котырам кутскиз. Укно дорысь палэнски но, сиськытэк маратэк, изьыны выдӥ. Савельичлэн сюлворемез шоры но ӧй учкы. Нош со, монэ жаляса, ялан супыльтэ: «Осто инмаре! номре сиён борды но ӧз кутскылы… Нош барыня мар шуоз, пиез висьыны ке кутскиз?»
Ӵуказеяз ӵукна мон дӥсяськыны кутскыса гинэ вуи на вал, мынам висъетам пырон ӧс усьтӥськиз но мон доры егит офицер пыриз. Мугорын со ӝужыт ик ӧвӧл, сьӧдалэс шӧтэм ымныро ке но, ачиз туж чупырес. «Извинить каре монэ, — француз кылын вазиз со мон шоры, — тӥледын тодматскеме потыса, юатэк-вератэк гинэ дорады пырисько. Татчы вуэмды сярысь толон гинэ тодӥ. Ӟеч йӧскадь адями ымнырез адӟем потэмелы чидамтэен, дорады лыктоно луи. Кӧня ке татын улӥды ке, мынэсьтым та верамъёсме асьтэос но валалоды». Та офицер, мукет офицерен жугиськемез понна, гвардиысь поттэмын шуыса, мон шӧдски. Соку ик ми куспамы тодматским. Швабрин визьмо ик вылэм. Вераськыны кылыз етӥз, кылскымон вераське. Туж капчи мылкыдэн со мыным комендантлэн семьяез сярысь но, солэн тупаса улон калыкъёсыз сярысь но, мыным татын улыны кылдэм палъёс сярысь но мадиз. Вераськемзэ кылскыса сюлмысь серекъякум, дорам инвалид пыриз. Сое мон нырысь ик комендантлэн кунокаяз мундир кышъяса пукон дыръяз адӟи. Табере со, Василиса Егоровналэн нимыныз, монэ комендант доры нуназезэ сиськыны ӧте. Швабрин но монэным ӵош мыныны мылкыд кариз.
Комендантлэн улон коркаез доры вуон азьын площадка вылын ог кызь мурт, кузь пунэм йырсиосын но куинь сэрего шляпаосын сылӥсь инвалидъёсты адӟим. Соос во фрунт султытэмын. Азьпалазы комендант сылэ, со етӥз маке, ӝужыт мугоро пересь, йырыз колпакен, вылаз китайчатой халат дӥсямын. Милемыз адӟыса, со дорамы лыктӥз но, мыным кӧня ке муспотымон кылъёс вераз но, нош командовать карыны кутскиз. Ми но солэсь дышетэмзэ учкыны шуыса, дугдэммы вал но, со милемыз Василиса Егоровна доры мыныны косӥз, ми бӧрсьы ик ачиз но лыкто шуиз. «Нош татын, — ватсаз на со, — тӥледлы номре учкыны ик».
Василиса Егоровна милемыз чик йӧнъяськытэк, шумпотыса пумитаз, монэн со пырак тодмо луыса улэм муртэн кадь вераське. Инвалид но Палашка ӝӧк вылэ сиён-юон дасяло. «Мар сыӵе мынам Иван Кузьмиче туннэ туж кема дышетэ! — шуиз комендантлэн кышноез. — Палашка, мын али баринэз сиськыны ӧть. Нош Маша кытын?» Со куспын ог дас тямыс аресъем ныл пыриз. Со котырес ымныро, ӵыж-ӵыж бамъем тӧдьыпыр ӵыжмыт йырсиосыз пель сьӧраз лач-лач сынамын, пельёсыз сутсконо кадь ӟырдамын. Нырысь со мыным сокем синмаськымон ик ӧз поты. Солэн шораз мон азьпала дасяса возем малпамъёсыным учки: Швабрин мыным капитанлэн нылыз Маша шузилэсь но шузи ныл шуыса, верам вал. Марья Ивановна, сэреге пуксьыса, вуриськонэз борды кутскиз. Со куспын ик ӝӧк вылэ шыд но вайизы. Кузпалыз вуымтэен, Василиса Егоровна нош Палашкаез кыктэтӥзэ сое ӧтьыны ыстӥз. «Вера баринлы: куноос, шу, витё, шыд но сӥя; инмарлы тау, дышетон нокытчы но уз пегӟы, кесяськыны дыр луоз на». Ӝоген капитан но вуиз, бӧрсяз палсинмо пересь мурт но лыктӥз. «Мар-о тон, батюшка? — шуиз солы кышноез. — Сиён кемалась ӝӧк вылын ини, нош тон ӧтьыса но уд вуиськы». — «Кылскы али тон, Василиса Егоровна, — пумитаз Иван Кузьмич вазьке, — ӧй ваньмы, службаын вал: салдатъёсме дышетӥ». — «Мазэ токма вераськиськод! — шуиз капитанша. — Салдатъёсыдлы но служба уг сётскы, ачид но службаез трос ик уд валаськы. Инмарлы вӧсяськыса коркад ке пукысалыз, умойгес луысал. Гажано куноосы, ӝӧк сьӧры пукселэ».
Ми сиськыны пуксим. Василиса Егоровна, одӥг но дугдылытэк, мынэсьтым юалляське: кинъёс луо мынам бубы-мумие, уло на-а соос, кытын соос уло, узыресь-а? Бубылэн куинь сю лул крестьянъёсыз вань шуыса верамме кылыса, «э быри-и-и! — шуиз со, — вань веть дунне вылын узыресь калыкъёс! Нош милям, батюшка, ваньзэ вераса одӥг Палашка ныл гинэ вань: инмарлы тау, соин но каллен улӥськом. Одӥг гинэ сюлмаськонмы вань: нылмы, Машамы, бызьыны вуэмын ини, нош мар ваньбурез солэн вань? йырзэ сынан ӵем сын, веник но алтын коньдонэз, мунчое ветлыны гинэ соос ярало. Ӟеч адями ке шедьысал, соиз туж умой луысал; шӧдтэк сыӵе мурт ӧз ке шедьы, пырак бызёно ныл луыса улод». Мон Марья Ивановна шоры учки: со ӵыжектӥз, синвуосыз но тэркияз шапыкен-шапыкен усизы. Мыным со жаль потӥз, вераськонмес мукет сяменгес нуыны ньӧм утчасько. «Тӥляд крепость вылады башкиръёс лыктыны дасясько шуыса, мон кылэм вал», — номырлы лэсянтэм кылпум поттӥ. «Кинлэсь, бен, тон, батюшка, сыӵе иворъёсты кылӥд?» — Иван Кузьмич юаз. «Оренбургын мыным озьы веразы», — шуисько. «Токма кылъёс! — шуиз комендант. — Милям кемалась ини номре но уг кылӥськы. Башкиръёс кышкатэм калык, озьы ик киргизъёс но дышетэмын. Небось асьме доры соос уз вутскылэ. Нош мерскизы ке, мон соосты туж ӟеч кышкатыны быгато, ог дасо аръёс ӵожелы зӥбыт каро». — «Таӵе кышкыт ужъёс улэ ӝимем крепостьын улыны тӥ уд-а кышкаське?» — шуыса, комендантшалэсь юаса, мон вераськонмес азьланьтӥсько. — «Дышемын ини, батюшка, дышемын, — шуэ со мыным. — Ог кызь вить аръёс талэсь азьвыл милемыз полкысь татчы воштэмзы бере, та христостэм калыклэсь мон туж кышкаса улӥ, сыӵезэ азьланяз инмар медаз возьматы. Сёр куэз вурем изьыосын адямиосты адӟисько ке вал, соос паласен кир-куар кесяськем куараосты кылӥсько ке вал — коть оскы, коть эн — сюлмы путак пилиськоно кадь луэ вал! Табере дышемын ни. Тушмонъёс крепость доры вуиллям ни шуыса, кин ке вераз ке но, интыысьтым но уг вырӟы, сокем дышемын ни».
— Василиса Егоровна нокинлэсь кышкасьтэм кышномурт, — шуыса, Швабрин йӧнъяськыса кадь кыл куспамы пыриз. — Со сярысь верам кылъёсме Иван Кузьмич но юнматыны быгатоз.
— Кылскы али тон, — шуиз Иван Кузьмич, — мынам та кышное кышкасьёслэн дасоязы уг пыры.
— Нош Марья Ивановна? — юасько мон, — тӥ кадь ик-а со но кышкасьтэм?
— Маша-а? — солэн нэнэез вера. — Ӧвӧл, Машамы кышкась. Та дырозь пыӵалэн ыбем куараез кылэмез уг лу на: дыр-р-р куалекъяны кутске. Одӥг пол, ог кык аръёс талэсь азьвыл, мынэсьтым именинник нуналме шулдыргес ортчытон понна, Иван Кузьмич пушкаен ыбылӥськыны визьнод шедьтэм. Тӥни соку, мынам та гыдые, кышкаменыз ӧжыт гинэ сояз дуннее ӧз вуы. Со дырысен та юриськем пушкаен ум ни ыбылӥське.
Ми ӝӧк сьӧрысь султӥм. Капитан но капитанша изьыны кошкизы. Мон нош, Швабрин доры мыныса, быдэс ӝытэз соин ӵош ортчытӥ.