Капитан ныл (Пушкин)/11
| ← X люкетэз. Городэз котыртон | Капитан ныл XI люкетэз. Мятежной слобода Автор: Александр Сергеевич Пушкин Удмурт кылэ берыктэмез: Пётр Михайлович Усковлэн |
XII люкетэз. Сирота → |
| Поттэмын: 1836. Источник: Пушкин А. С. Капитан ныл: Повесть. — Ижевск: Удмуртгосиздат, 1937. — С. 73—83. |
Мятежной слобода
Коть вордскем дырысеныз лев туж лек ке но,
Соку дыръя солэн кӧтыз тыр вал.
«Мынам улон интыям малы лыктоно луид?» —
Мусояськыса со юаз.
А. Сумароков
Генерал дорысь потыса, мон аслам кунокуаям бертыны дыртӥ. Савельич монэ ас дышем сяменыз ялан алыны турттыса пумитаз. «Мар мылыд потэ тынад, сударь, со юись разбойникъёсын мерскыны! Бояръёслэн-а со ужзы? Малпамтэ шорысь, йырдэ гинэ токма быдтод. Турокъёс вылэ-а, либо швед вылэ-а ветлысал ке, оло эшшо но тупасалгес, а то веть кин вылэ ветлэмдэ вераны но возьыт».
Кӧня мынам ваньмыз-ӧвӧлэз коньдонэ шуыса юаменым, мон солэсь вераськонзэ уретӥ. «Тыныд тырмымон вань на, — шумпотон тусъем кариськыса, вераз со. — Мошенникъёс туж зол ке но утчаськизы, мон всётаки ватыны быгатӥ». Озьы верам бераз со кисыысьтыз азвесь коньдонэн тырмытэм кузь пуйызэ поттӥз. «Ну, Савельич, — шуи мон солы, — та коньдон пӧлысь ӝынызэ али мыным сёт; кылемзэ аслыд басьты. Мон Белогорской крепосте мынӥсько».
— Батюшка Пётр Андреич! — дырекъясь куараеныз вазиз лякыт дядькае. — Коть инмарлэсь ке но кышка; со разбойникъёсын сэрен нокытчы но мыныны-ветлыны луымтэ дыръя, кызьы тон сюрес вылэ потод! Астэ ачид уд ке жаляськы, коть аслэсьтыд бубы-мумыдэ жаля вал. Кытчы тон мынод? Малы? Ӧжыт мога на: войска лыктыса, мошенникъёсты кутылыса быдтӥзы ке, соку коть дуннелэн ньыль палаз мын.
Мынам малпаме воштонтэм вылысь зол кутэмын вал.
— Вераськыны табере бер ини, — шуи мон пересьлы. — Мынытэк мыным нокызьы но уг лу, мон мыноно луисько. Эн сюлмаськы, Савельич: инмар утиз ке, асьмеос нош адском! Смотри, эн возьдаськы, коньдондэ эн жаля. Мар ке тыныд кулэ ке, дунзэ куинь полэс тырыса но басьты. Та уксёез мон тыныд кузьмасько. Куинь нунал ортчыса мон ӧй ке берытскы…
— Мар тон озьы, сударь? — веранме ӝыныё кариз Савельич. — Мон-а тонэ огнадэ лэзё! Уйвӧтын но тон озьы эн малпа. Одно ик мыныны ӝутскид бере, мон коть пыдын ке но, сьӧрад ик мыно, тонэ огнадэ уг кушты. Мар-о мон тонтэк та из борддоръёс сьӧрын пуком-а! Ма мон визьтэмми-а мар-а? Аслад воляед, сударь, нош мон тон сьӧрысь уг кыльы.
Савельичлэсь сямзэ мон тодӥсько ини, соин тэргаськыса пайдаез уз луы. Соин ик мон сое сюрес вылэ дасяськыны косӥ. Ӝыны час ортчем бере, мон аслам таза валэ вылэ пукси, нош Савельич восьтэт но чутӥсь вал вылэ пуксиз. Со валэз солы городын улӥсь мурт сюдонэз ӧвӧл сэрен дунтэк сётӥз. Озьы ми городлэн ӟезьы дораз вуим. Татын сылӥсь караул милемыз ӟезьы сьӧры потыны лэзиз но, ми Оренбургысь потӥм.
Куазь ӝомытаны кутскиз. Мынон сюресэ мынам Пугачёвлэн сылон интыетӥз, Бердской слобода дортӥ, мынэ. Шонер ветлон сюрес лымыен пельтэмын. Нош кыретӥ котькытын но валэн ветлэм пытьыос вань, со пытьыос нуналлы быдэ выльдӥсько но выльдӥсько. Мон ӝог гонӟыртыса мынӥсько. Савельиче мынам, кыдёке бере кыльыса, ялан мыным черекъя: «Калленгес, сударь, инмар понна калленгес. Мынам проклятой сӧсыр валэ тынад кузь куко шайтанэд бӧрсьы уг вуы. Кытчы дыртӥськод? Куное ке мынысал, соку оло дыртыса но ӟеч луысал, нош тон тӥр тыш улэ мынӥськод ук, учкыса гинэ ул… Пётр Андреич… батюшка Пётр Андреич!.. Господи владыко, быроз баринлэн пиез!»
Ӝоген Бердской слободалэн тылъёсыз но адскыны кутскизы. Ми нюк-гопъёс доры, слободалэн естественной укреплениосыз доры вуим. Савельич, бӧрдоно кадь сюлворыса, мынэсьтым кыльытэк мынэ. Мон слободаез номыр со-та луытэк ортчыны малпасько вал; малпамтэ шорысь, азьвылысьтым ог вить мурт, киосазы зыръёсын мужикъёсты адӟи: со Пугачёвлэн дугдэм интыезлэн азьвыл (передовой) караулэз вылэм. Милемлы вазизы. Соослэсь парользэс (лушкем кылзэс) тодымтэен, мон номре куаретытэк ортчыны малпасько вал но, соос монэ соку ик котыртӥзы, одӥгез мынэсьтым валме серметэтӥз кутӥз. Мон сабляме поттӥ но, со адямиез сабляеным йыраз шукки; изьыез сое сайултӥз, озьы ке но, со шонскиз, серметэз киысьтыз лэзиз. Кылемъёсыз оло кышказы, оломар но, мон дорысь палэнскизы. Таӵе луэмез адӟыса, мон валме шпоръёсыным сётӥ но ворттӥ.
Пеймыт уй монэ котькыӵе кышкытэсь ужъёслэсь мозмытысал, нош берме учки но Савельиче ӧвӧл. Куанер пересь аслаз чутӥсь валэныз, разбойникъёслэсь пегӟыны быгатымтэ. Мар кароно вал? Кӧня ке минут ӵоже мон сое витьыса сылӥ но, сое кутӥзы луоз шуыса, валме берыктӥ но сое мозмытыны мынӥ.
Нюк доры вуыкум, кесяськем куараос но Савельичлэсь куаразэ кылӥ. Мон ӝоггес ворттӥ но ӝоген талэсь кӧня ке минут азьло монэ дугдытъясь караульнойёс доры вуи. Савельиче соосын котыртэмын. Соос пересез валэз вылысь кыскыса, гозыосын биньыны дасясько ни. Мынам вуэмелы соос шумпотӥзы, черекъяса мон доры лыктӥзы но, монэ вал вылысьтым кыскизы. Соос пӧлысь огез, главнойзы, вылды, милемыз али ик государьзы доры нуом шуыса ялӥз. «Нош милям батюшкамы, — ватсаса вераз на со, — ачиз тодэ ини: али ик-а тӥледыз ошоно луоз, либо инмарлэсь югыт куазьзэ-а витёно луоз». Мон ӧй пумитъяськы; Савельич но, мон сямен ик, ассэ ачиз возе. Караульнойёс милемыз шумпотыса нуо.
Нюк вамен выжыса, ми слободае пырим. Коркаосын ваньмаз тылъёс ӝуало. Котькытын кесяськем, шауэтэм куараос кылӥсько. Ульчаысь мон трос калыкез пумитай; нош куазь пеймытэн милемыз нокин но ӧз тодма, озьы ик мынэсьтым Оренбургской крепостьысь офицер луэмме но ӧз тодмалэ. Милемыз ульчаослэн кечат луоназы сэрегын сылӥсь корка доры вайизы. Ӟезьы азьын кӧня ке вина бекчеос но кык пушка сыло. «Тани дворецмы, — шуиз одӥгез мужик, — тӥ сярысь али ик ивортом». Со корка пыриз. Мон Савельич шоры учки; пересь, ас понназ молитваос лыдӟыса, вӧсяське. Мон кема витьыса улӥ. Собере пырем адями берен потӥз но мыным тазьы шуиз: «Мын, милям батюшкамы офицерез дораз лэзьыны косӥз».
Мон корка, либо мужикъёслэн нимамзыя — двореце пыри. Кык кӧй тылъёсын югдытэмын, борддоръёсыз зарниям бумагаен лякылэмын. Нош ӟусъёс, ӝӧк, гозы йылэ ошем кимиськон, кортӵоге ошем ӵушкон, сэрегысь ухват но пӧртэм горшокъёсын тырмытэм паськыт гуразь, — ваньмыз огшоры коркан кадь ик. Пугачёв мудоръёс улэ пуксьыса пуке. Солэн вылаз горд кафтан, йыраз ӝужыт изьы, киосыныз важно кӧт урдсаз пыкиськем. Котыраз солэн кӧня ке мурт начальник луись эшъёсыз люкаськемын. Оренбургысь вуэм офицер сярысь ивор бунтовщикъёсты туж тунсыко карем шӧдске, монэ соос торжественной пумитаны дасяськиллям. Пугачёв монэ соку ик тодмаз. Важной тусыз но соку ик быриз. «А, ваше благородие! — туж етӥз вазиз со мыным. — Кыӵе улӥськод? Мар муген тонэ инмар вуттӥз?» Ас ужъёсыным мынӥсько вал но, солэн калыкъёсыз монэ дугдытӥзы шуыса, мон солы верасько. «Нош мар ужен?» — юаз со мынэсьтым. Мар вераны мон пайми. Калык азьын вераськыны мылкыды ӧвӧл кожаса, Пугачёв эшъёссэ потыны косӥз. Косэмзэ ваньзы санэ понӥзы, кыкез гинэ ас интыосысьтызы вырӟылытэк кылизы. «Кышкатэк таос азьын вераськы, — шуиз мыным Пугачёв, — соослэсь мон номре но уг ватӥськы». Мон самозванецлэн эшъёсыз шоры син ултӥм учки. Соос пӧлысь одӥгез почи, пурысь тушо, губырес, кӧсэг пересь. Солэн пурысь армяк вылтӥ пельпум вамен понэм чагыр лемтаез сяна нокыӵе пӧртэмлыкез ӧвӧл. Нош солэсь юлтошсэ кулытозям уг вунэты. Таиз ӝужыт мугоро, таза, пельпумъёсыз паськытэсь. Со мыным ог ньыльдон вить аресъёс потӥз. Горд нап тушез, пурысь чилясь синъёсыз, нырпысытэм нырыз, кымысаз но бамъёсаз горд пужыосыз, — солэн паськыт шадраё ымнырызлы вераны луонтэм тусбуй сётэ. Со горд дэремен, киргизской халатэн но казацкой шароварен. Нырысез пегӟем капрал Белобородов вылэм (сое мон берлогес тодӥ), кыктэтӥез Афанасий Соколов (сое Хлопуша шуса нималлям), ссылкае келям преступник, сибыр рудникъёсысь куинь пол пегӟем маке. Мынам мылкыды соку дыръя туж урод ке но вал, малпамтэ шорысь таӵе калыкъёс пӧлы шедеме, монэ тунсыкъяськытэ. Монэ Пугачёв ас юанэныз сэзёмытӥз: «Вера: мар ужен тон Оренбургысь потӥд?»
Кышкыт малпан мынам йырам пыриз: адӟонэ монэ кыктэтӥзэ Пугачёв доры вуттэм бере, ас малпамъёсме быдэстыны луоно кадь потӥз. Мон озьы ик карыны малпаськи. Ас малпаськемъёсме умой-умой радъяны вуытэк, Пугачёвлэн юамезлы верасько:
— Мон Белогорской крепосте мынӥсько вал. Отын сирота муртэз обидьыса возё, сое мозмытыны малпасько вал.
Пугачёвлэн синъёсыз ӝуаны кутскизы. «Мынам калыке пӧлысь кин сиротаез обидьыны дӥсьтэ? — кеськиз со. — Коть солэн сизьым кикур пасьта кымысыз мед луоз, нош мынам судэлэсь мозмытскыны уз быгаты. Вера: кин со ужлы виноват луэ?»
— Швабрин виноват, — шуи мон. — Со нылмуртэз эриктэмаса возе. Тон ачид со нылмуртэз висьыкуз попадья дорысь адӟид. Табере Швабрин со нылэн кужмысь кышнояськыны малпа.
— Мон Швабринэз дышето! — лек вераз Пугачёв. — Калыкез обидьыны, ас малпамезъя ужаны, кыӵе мар, соку со мынам тодоз. Мон сое ошо.
— Кыл вераны эрик курисько, — сипыртӥсь куараен вазиз Хлопуша. — Тон Швабринэз крепостьлы комендантэ пуктыны дыртӥдгес, нош табере сое ошыны дыртӥськод. Дворян муртэз казакъёслы начальнике пуктэменыд, тон соосты интэмад ини; табере нырысь урттылӥськемъя ик дворянъёсты ошылэменыд, соосты эн кышкаты.
— Соосты жалянэз но жаловать каронэз но ӧвӧл! — шуиз чагыр лемтаё пересь. — Швабринэз казнить ке но карид, беда уз лу. Нош господин офицерез но умойгес ке юалляськысал, соиз но умой луысал: малы со татчы лыктэм. Тонэ со государен признать уг кары бере, марзэ тынэсьтыд суд но управа утчаса ветлэ. Нош признавать ке каре, малы со туннэ нуналозь тынад супостатъёсыныд Оренбургын улӥз? Приказной коркае нуыса, тыл поныны уд-а косы: мынам малпамея, его милость асьме доры оренбургской командиръёсын ыстэмын.
Пересь злодейлэн верамез мыным оскымон потӥз. Кинъёслэн ки улазы луэме тодам лыктыса, быдэс мугорме кезьыт басьтӥз. Мынэсьтым сыӵе луэмме Пугачёв но шӧдӥз. «Кылӥськод-а, ваше благородие? — синъёссэ кырмектыса, шуиз со мыным. — Мынам фельдмаршалэ шонер вера кадь. Кызьы тон малпаськод?»
Пугачёвлэн серем пыр верамез кышкантэм мылкыдме берыктӥз. Чик кышкатэк, мон тынад власть улад, мар ке монэным каремед потэ, озьы карыны быгатӥськод, аслад воляед, солы мон шуисько.
— Ярам, — шуиз Пугачёв. — Табере вера, кыӵе ужъёс тӥляд городады.
— Инмарлы тау, — верасько мон солы, — ужъёс умой.
— Умой? — кылме пӧлэстӥз Пугачёв. — Нош калыкты сютэм кулэ?
Самозванец зэмзэ вераз. Нош мон, присяга косэмъя, Оренбургын котькыӵе запасъёс тырмымон, озьы вераськемъёс токма кыл нуллэм гинэ луо шуыса, Пугачёвлы верасько.
— Адӟиськод-а тон, — пересь итӥськиз, — тонэ со син азяд ик пӧя. Оренбургын сютэм уло; калык кулыса быре, отын кулэм шӧез но сиыны шедьто ке шумпото шуыса, отысь пегӟем калык ваньмыз одӥг кылысь кадь верало. Нош его милость котьмар трос шуыса оскытыны турттэ. Коли тон Швабринэз ке ошыны малпаськод, та молодецез но соин одӥг ошетэ ош, соизлы но таизлы но вожъяськоно медаз лу.
Проклятой пересьлэн кылъёсыз Пугачёвлэсь мылкыдзэ мыдлань берыктӥзы кадь. Нош мынам шудэ: Хлопуша аслаз эшезлы пумит вераськыны кутскиз.
— Дугды ини, Наумыч, — шуиз со пересьлы. — Тыныд ялан кекатъяны но вандылыны гинэ мед луоз. Мар тон сыӵе богатырь? Учконо ке, кытынад гинэ лулыд возиське на. Ачид шайгуэ учкиськод, нош мукетъёссэ быдтӥськод. Улытозяд ичи шат вир кисьтӥд ини?
— Нош тон мар сыӵе угодник? — пумитаз солы Белобородов вазе. — Кытысь тынад сыӵе жалянэд потӥз?
— Конешно, — шуэ Хлопуша, — мынам но сьӧлыке вань, тани та ки но (со аслэсьтыз паськыт лыо кырымзэ кырмиз но, саесъёссэ пужалтыса, гоно кизэ возьматӥз), та ки но христианской вирез кисьтэмен виноват луэ. Нош мон супостатъёсты быдтылӥ, куноосты ӧй, паськыт сюрес вылын но пеймыт нюлэскын йыртэмай, гуртын гур сьӧрын пукыса ӧй йыртэма; тӥр тышен но кистенен ужай, нылкышно кылъёсын ӧй ужа.
Пересь урдсӥн кариськиз но ас понназ: «Кесям ныр!» — шуиз.
— Мар тон отын шыпыртӥськод, пересь хрыч? — кеськиз Хлопуша. — Сёто мон тыныд кесям ныр; дугды али, тыныд но дыр вуоз; инмар ке сётӥз, тон но кисъёсты зынъялод… Со дырозь ӧжыт зӥбытгес ул, а то мон тынэсьтыд тушъёстэ медам ишкалты!
— Господа енералъёс! — важно вазиз соослы Пугачёв. — Дугдэ ни даллашемысь. Оренбургысь ваньмыз пуныос одӥг ошет улын пыдъёссэс сэзъяса улысалзы ке но беда ӧй луысал. Нош асьмелэн айы пуныосмы огзэс огзы йырйизы ке, соиз беда луэ. Я, уръяське!
Хлопуша но Белобородов но пал кыл но ӧз вералэ, огзы шоры огзы лек учкыса сыло. Таӵе вераськонъёс монэ ӟече уз вуттэ шуыса, вераськонэз воштон вылысь, мон капчи мылкыдо тусын Пугачёвлы вази: «Ок! валэд понна но тулупед понна тонэ тау карыны мон вунэтскем вылэм. Тон ке ӧй юрттысал, мон городэ ӧй вуысал, сюрес вылэ ик кынмысал».
Мынам та ньӧм шедьтэме пайдаё луиз. Пугачёв капчи тусо кариськиз. «Тыронлэн чеберез берыктон бордын, — шуиз со, синъёссэ кырмекъяса но кыньыр карыса. — Я табере тон вера али мыным, Швабринэн обидь карем ныл сярысь малы тон сокем сюлмаськиськод? Егит сюлэмлэн гажанэз ӧвӧл-а со? а?»
— Мынам со невестае, — куазьлэсь туссэ умойлы вошкемез адӟыса но зэм ужез ватыса возьыны мултэсэн лыдъяса, верай мон Пугачёвлы.
— Тынад невестаед? — кеськиз Пугачёв. — Малы тон азьло со сярысь ӧд вера? Ма, ми тонэ кышноялом но тынад сюанад сиём-юом! — Собере Белобородов шоры вазиз: — Кылскы али, фельдмаршал! Его благородиен ми кемалась дырысен тодмо муртъёс; пуксём но ӝыт сиён каром; ӝытлэсь ӵукна визьнодогес. Мар соин карыны ӵуказе адӟом.
Сыӵе дан каремезлэсь мон пыкиськыны дась вал но, нош номре карыны вал. Корка кузёлэн нылъёсыз, кык кузя егитэсь казачкаос, ӝӧккышет вализы, собере нянь, чорыг лым но кӧня ке штоф вина но сур вайизы. Озьы мон кыктэтӥзэ Пугачёвен одӥг ӝӧк сьӧрын, солэн кышкытэсь эшъёсыныз ӵош сиёно-юоно луи.
Малпамтэ шорысь мыным адӟыны кылдэм шимес юонзы бер уёзь кыскиськиз. Бервылаз люкаськем калыкез вина вормыны кутскиз. Пугачёв ас пукон интыяз ик нырулӥз. Солэн эшъёсыз султӥзы но, мыным кошконо шуыса, тодытон сётӥзы. Соосын ӵош ик мон но потӥ. Хлопушалэн косэмезъя монэ караульнойёс приказной коркае келязы. Отын ик мон Савельичез но шедьтӥ. Милемыз татчы кыкнамес пыдсаса кельтӥзы. Вань та ужъёслы паймеменыз, дядькае мынэсьтым номре но ӧз юалляськы. Со пеймыт сэреге выдӥз но туж кема ӝуштыса но пыдлось лулӟылыса кыллиз. Бервылаз со соргетыны кутскиз, нош мон мур малпаськонэ уси, соин уйбыт ӵоже ог эсэплы но умме усьыны ӧй быгаты.
Ӵукна монэ Пугачёвлэн нимыныз ӧтьыны лыктӥзы. Мон со доры мынӥ. Солэн ӟезьы азяз куинь бигер валъёсын кыткем кибитка сылэ. Ульчае калык люкаськемын. Корказьын мон Пугачёвен пумиськи, сюрес вылэ дасяськыса, со шубаен но киргизской изьыен дӥсяськемын. Толло эшъёсыз солэн котыраз люкаськемын; ваньзы соос асьсэзыз йӧно возьыны туртто, нош толло ужъёссэс малпаськод ке, сыӵе выремзы чик уг тупа. Пугачёв монэ капчи мылкыдэныз ӟечбур кариз но, асэныз ӵош кибиткае пуксьыны косӥз.
Ми пуксим. «Белогорской крепосте!» — шуиз Пугачёв пыдйылаз сылыса тройкаен ямщикась паськыт пельпумо бигерлы. Мынам сюлэмы туж зол жугиськыны кутскиз. Валъёс интыысьтызы вырӟизы, гырлы жингыртэ, кибиткамы лобыса кадь, азьлань кошкиз…
«Сылэ! сылэ!» — мыным туж тодмо кесяськем куара кылӥськиз. Учки но, пумитамы бызьыса лыктӥсь Савельичез адӟи. Пугачёв дугдыны косӥз. «Батюшка, Пётр Андреич! — черекъя дядькае. — Монэ, пересь арлыдъёсам вуэм муртэз, куштыса эн кельты та мошен…» — «А-а, пересь хрыч! — шуиз солы Пугачёв. — Нош инмар асьмелы адскыны кылдытӥз. Ну, пуксьы ямщикен артэ».
— Тау, государь, тау, вордскем бубые! — пуксён сяменыз Савельич солы шуэ. — Монэ пересь муртэз куштымтэед понна, буйгатэмед понна, сю арлэсь но кема улыны инмар тыныд тазалык мед сётоз. Улытозям тон понна вӧсясько, нош кечку тулуп сярысь табере палкыл но уг ни поттылы.
Та кечку тулуп бервылаз Пугачёвлэсь йырзэ но кур кароно кадь ини. Шуд вылэм шуод-а мар-а, та кылъёссэ Савельичлэсь самозванец оло ӧз кылы, оло юри кылымтэ улэ аналтӥз, пумитаз номре но ӧз вера. Валъёс вортто; ульчаын пумитамы шедись калыкъёс дугдо но кусъёссэс куасаса йыбыръяло. Пугачёв олань но талань йырыныз мыкыръя. Ог минутъёс ортчыса, ми слободаысь потӥм но, вольыт сюрес кузя туж зол ворттӥськом.
Кыӵе мынам мылкыдъёсы вал та минутын, сое валаны шуг ик ӧвӧл. Кӧня ке час ортчыса, мон ас поннам ышемен лыдъяськись нылын адско. Мон соин пумиськон минутмес син азям адӟисько… Кинлэн ки улаз али мынам улон-вылонэ луэ, со адями сярысь но мон озьы ик малпасько; оломар паймоно кадь муген со адями монэным шӧдонтэм кужымен герӟаськемын. Озьы ик, мынэсьтым яратоно нылме мозмытон ужез ас вылаз басьтэм адямилэн лек, жалянэз валантэм ужъёссэ но вир кисьтыны яратон сямъёссэ тодам вайисько. Мынам яратон нылы Миронов капитанлэн луэ шуыса, Пугачёв уг тоды на; йыркур луэм Швабрин солы ваньзэ шараяны быгатоз; собере Пугачёв ачиз но кызьы ке озьы тодыны быгатоз но монэ… Соку мар луоз Марья Ивановнаен? Мынам мугортӥм юзыр-кезьыт ортчылэ, йырсиосы пештырскыло…
Малпамтэ шорысь, мынэсьтым озьы малпаськонме Пугачёв ӝыныё кариз, со мыным таӵе юан сётӥз:
— Мар сярысь, ваше благородие, малпаськон улэ усид?
— Кызьы уд малпаськы, — мон солы шуисько. — Мон офицер, дворянин, толон гинэ тыныд пумит жугиськи, нош туннэ тонэныд ӵош одӥг кибиткаын мынӥсько но мынам быдэс улонэлэн шудэз тынад кияд.
— Бен мар? — Пугачёв юаз. — Кышкыт-а тыныд?
Одӥг пол монэ помиловать карем бере, табере мон жалямедлы гинэ ӧвӧл — юрттэмедлы но оскисько шуыса, верасько мон солы.
— 3эмзэ вераськод, инмар понна, зэмзэ! — шуиз самозванец. — Ачид адӟид, мынам калыкъёсы тон шоры кырыж учко; нош пересь туннэ но тонэ шпион шуыса, монэ оскытыны турттӥз на, сое, пе, курадӟытон улэ пачкатыса, золгес юано но собере ошоно. Нош мон соглаш ӧй лу, — Савельич но ямщикась бигер медаз кылэ шуыса, куаразэ лушкемгес карыса, тазьы ватсаз на, — тынэсьтыд стопка винадэ но кечку тулуптэ уг вунэтӥськы. Табере ачид адӟиськод, мон сокем вир юись ӧвӧл, кызьы монэ тӥляд братьяосты нимало.
Белогорской крепостез басьтэмзы мынам тодам лыктӥз; нош Пугачёвлы пумит вераны кулэ ӧй кар, одӥг кыл но пумитаз ӧй вера.
— Оренбургын мон сярысь мар верасько? — юаз Пугачёв, кӧня ке улыса.
— Тонэ вормыны секытгес луоз — шуыса, верасько; ма веранэз: тон астэ зол гинэ шӧдытӥд.
Самозванецлэн ымнырыз шумпотэм мылкыдзэ возьматӥз.
— Да! — шуиз со шулдыр мылкыдо тусэн. — Мон зол воевать карисько. Юзеевка дорын воевать кареммы сярысь тӥляд Оренбургын кылӥзы-а ни? Ньыльдон енералъёс виемын, ньылез армизы пленэ басьтэмын. Кызьы тон малпаськод: прусской король быгатысал-а монэным кужымзэ эскерыны?
Разбойниклэн ушъяськемез тумошо потӥз мыным.
— Ачид кызьы малпаськод? — шуи мон солы, — вормысалыд-а тон Фридерикез?
— Фёдор Фёдоровичез-а? Неужто ӧй вормысал? Тӥлесьтыд енералъёстэс веть мон вормисько; нош тӥляд енералъёсты сое вормылӥзы. Та дырозь кивалтосэлы мынам шуд вал. Ӧжыт мога али, Москва вылэ ке мынӥ, со гинэ-а луоз.
— Тон Москва вылэ мыныны малпаськод-а?
Самозванец ӧжыт малпаськиз но лушкеменгес вераз:
— Инмар мед тодоз. Ульчае мынам сюбег, люкыт; эрик мыным ичи. Пиналъёсы мынам трос тодэмъясько. Соос — воръёс. Мыным пельёсме сак возёно луэ; нырысь вормымтэ дыръя ик, соос ас чыртыоссэс мынам йырыным воштозы.
— То-то! — шуи мон Пугачёвлы. — Сыӵе дыре вуэмлэсь азьло тыныд аслыд, соос дорысь палэнскыса, государынялэсь небыт сюлмыныз жалямзэ курыны умойгес ӧй-а луысал?
Пугачёв курыт серектӥз.
— Ӧвӧл, — шуиз со, — бер ини мыным сьӧлыкъёсме вераны. Мыным помилование уз ни лу. Кызьы ке кутски, азьпалзэ но озьы ик нуо. Кызьы тодод? Оло пӧрмоз! Гришка Отрепьев Москваен царствовать кариз ук.
— Нош тодӥськод-а тон, кызьы со улонзэ быдтӥз? Сое укноетӥ куштӥзы, вандӥзы, сутӥзы, солэн пененыз пушкаез зарадаса ыбизы!
— Кылскы али, — кыӵе ке кыӵ мылкыдэн шуиз Пугачёв. — Мон тыныд выжыкыл мадё; сое мыным пичи дыръям одӥг пересь калмычка мадьылӥз. Одӥг пол ӧрӟи кырныжлэсь юа: «Кырныж-тылобурдо, вера мыным, малы тон югыт дуннеын куинь сю ар ӵоже улӥськод, нош мон, ваньзэ вераса, куамын но куинь ар гинэ?» — Соин, батюшка, кырныж солы вера, тон луло вирез юыса улӥськод, нош мон шӧйёсты гинэ сиисько. Ӧрӟи малпа: вай али, мон но со кадь сиыса улыны оскалто. Ярам. Лобӟизы ӧрӟиен кырныж. Вал шӧез адӟизы; лэзькизы но пуксизы. Кырныж шӧез кокча но ушъя гинэ. Ӧрӟи огпол кокчалтӥз, кыктэтӥзэ кокчалтӥз, собере бурдъёсыныз шоналтӥз но кырныжлы тазьы шуиз: ӧвӧл, кырныж бечей; куинь сю ар ӵоже шӧйёсты сиыса улытозь, одӥг пол луло вирез юод но, отӥяз инмар мар сётоз! — Кыӵе калмыкъёслэн выжыкылзы?
— Тумошо, — шуисько мон солы. — Нош калыкез виылыса но разбойничать карыса улон, мон сямен, со шӧез кокчаса улэм луэ.
Пугачёв мон шоры паймыса учкиз но номре но ӧз вера. Кыкнамы ик ми вераськемысь дугдӥм, котькудмы ас поннамы малпанъёсамы выйим. Бигер мӧзмыт гурен кырӟаны кутскиз; Савельич, нырулыса, шонаськыса пуке. Вольыт тол сюрес кузя кибиткамы лобыса кадь кошке… Яик шурлэн меӵ ярдурысьтыз мон частоколэн котыртэм гуртэз но солэсь гырлы жугонзэ адӟи. Ог дас вить минут ортчем бере ми Белогорской крепосте пырим.