Калгись (Кедра Митрей)
| Калгись Автор: Кедра Митрей |
| Кылдытон дыр: 1924, поттэмын: 1924. Источник: Кедра Митрей (Корепанов Д. И.) Калгись // Удмурт литература: хрестоматия средней школалы / М. А. Лямин. — Ижевск: УДГИЗ, 1935. — 23-30-тӥ бамъёс. |
Миня — 18 аресо.
Тася — 16 аресо.
Копей — 60 аресо.
Калгись — 22 аресо.
Миня. (Каллен кырӟа). Уроме, уроме, кытчы ветлӥд… Уроме, уроме, кытчы ветлӥд, кытчы вет…
Тася. (Бер ласянь лушкемен васькыса, тыбыраз чапке, синъёссэ Минялэсь ӵокса. Миня берга, киоссэ кыскыны турттэ. Габылда шорысь тэтчыса султэ но Тасяез адӟе). Ай, адӟиз ук!.. (Пегӟыны медэ).
Миня. (Сэрыт китӥз кутэ). Уд кошкы ни табере, шедид.
Тася. Мае кырӟаськод?
Миня. Ачим но уг тодӥськы. Гуртам улэмме тодам ваи. Пуксьы ай бордам, Тася, вераськом.
Тася. Я ӧжыт вера. Василь Ваныч бултыреныз кошкиз. Волошкае лэся мынӥзы. Кышноез нош кыӵе йыркуро кылиз. Монэ пуныез сямен пуриз. Корка пушкытӥ висъетысь висъетэ вамышъяз, вамышъяз но, чебергем дӥсяськыса куатаськемзэ вормымтэен, музьыез доры оло мынӥз. Озьы мон буш кыли.
Миня. Э, мусо сяськае, ин кадь чагыр синъёсы. Вера мыным шуид но ачид вераменыд согид ук.
Тася. Я, уг ни куареты. Лач-лач вӧзад пуксьыса кылӟисько. Вань малпамъёстэ вера.
Миня. Кызьы асьмеос татчы одӥг нёже шедим али? Куать ар мон та кузё дорын улӥсько ини. Куанерезлы ёрмыса аи Иж заводэ ваиз монэ. Куштыса сямен кельтӥз. Ӟуч кылэз но ляб мон йӧндыри. Василь Ваныч сюдо-вордо пидэ шуса аилы вераз. Соиз нош шунды пиштэмлы сямен шумпотыса гуртаз бертӥз. Мултэс нянь сиись вал мон гуртам…
Тася. Ой, сюлмы… Мон но озь ик…
Миня. Кухнялэн сэрегаз мыным инты сётӥзы. Кучапи сямен сякан вылын кыстаськыса улӥ. Прикащикъёс пыдул дэриез кадь интэм карылӥзы. Мӧзмыт. Уйбыт, уйбыт уйёсын бӧрдыса кылльылӥ. Сюлэм уг чида вал. Пегӟыны ӧдъялляй. Юн возьмазы. Та син адӟонтэм азбарысь потаны ӧз лэзьылэ.
Тася. Я, вунэтом сое. Та виысь ӵош асьмеос. Ачим но мон татчы шедемме шудтэме усемен лыдъяй. Али малпасько ке, оло шуд но татын шедьтӥ шуисько. Тынысьтыд люкиськеме мынам уг поты.
Миня. Одӥг липет улын ке но улӥськом, огместы огмы шер адӟылӥськом.
Тася. Бен угось. Василь Ваныч оло монэ вожа лэся. Ялам монэ син азяз гинэ возьыны турттэ. Мон солэсь туж кышкаса, дэймыса улӥсько. Урод уж медаз поты вал.
Миня. Номырлэсь но уг кышка: мон ыбо сое…
Копей. (Ӟезьы палась вуыса. Сьӧраз Калгись вамышъя, кияз боды, мышказ пуйы). Миня, дорад мон куно пыртӥ. (Тася кошке).
Миня. Ма, бен, уг тодмаськы ук мон ваем кунодэ.
Калгись. Уд но тодма, гажан выны. Мон дуннеетӥ калгыса ветлӥсько. Шуге шедем вынъёслэсь улэмзэс эскерисько. Тыныд матысь адями мон, одӥг ӵыжы-выжыысь потӥсько.
Миня. Тон оло, Вужгурт пи лэся. Тодмай табере.
Копей. Каллен вераське. Нокин медаз адӟы. Мон ӟезьы дорам нош мыно. (Кошке).
Калгись. (Пуксе). Ваньзэ вужгуртъёсты, вуж сямъёсты выльдоно луоз. Али ӟарыт на шундылэн ӝужамез, асьмелы ӝоген сое ӟырдатоно луоз. Лек ӟырдам шунды асьмелы шунытсэ гинэ сётоз, тонэ ултӥяса возись кузёосыд кадьёс сутскыса бырозы.
Миня. Ма шукырес кылъёстэ поттылӥськод.
Калгись. Вуоз сыӵе дыр, дась ул… Кыдёкын ӧвӧл ни со… Тани та бадӟым Иж заводын дасо-дасо сюрсэн лыдъяськись ужасьёс но вырӟытско. Пеляд пон куаразэс. Кужымзы соослэн вормонтэм. Ӝутскизы ке, номырин уд пык. Гуртъёсын но бугыръяськон потылэ. Валатске ин калыкед.
Миня. Ӧй вала кадь верамдэ.
Калгись. Ог пол верамен ваньзэ уд вала. Пыр-поч валэкто музонъят… Миня, мон туж юн жади, туннэ 70 иськем пыдъёсыным вамышъяй. Уй вуэ. Кӧлыны инты сёт.
Миня. Кытчы мон тонэ пыртом?
Тася. (Бызьыса тубат кузя ваське). Миня! кузё бертӥз. Тонэ ӧте. Ӝог. (Кошке).
Миня. Вить ӧжытак, ӧс сьӧры ватскы. (Кошке).
Калгись. (Каллен шуласа кырӟа). Кичи-вачи, кичи-вачи кабачи. Кузонэ ветлӥ, Ваткае ветлӥ. (Кырӟамысь дугдэ). Э, быдэс дуннеез ик ньылысал вал. Сокем кӧт сюма. Кусъёсы но жадизы ини, бен. Кызьы гинэ вамышъялод на. Тӥни отын кенос сиге турын куямын лэся. Отчы тубыны ӧй-а медам луысал.
Миня. (Лыктэ). Василь Ваныч татын кӧлыны уг лэзьы. Мынам азбаре постоялой двор ӧвӧл шуэ.
Калгись. Я, озь ке, озь ик медло. Нош одӥг пӧртэм юанэ-куронэ вань на. Адӟиськод-а кусъёсме? Учкы, кыӵе мон еме зол кекатӥ. Токма шорысь-а со? Сюлъёсы мынам тырттэм. Ӧжыт коньдондэ сёт, туннэлы кӧтме пӧямон сиськыны мед быгато.
Миня. Э, туж ик юрттысал вылэм но, мынам киям коньдон ноку но уг шедьылы. Кузёмы ужам дунме но уг тыры. Коньдондэ люкасько шуэ. Бадӟымгес будэм берад, пе, сёто… Э, али тодам лыктӥз ук, ӟезьы азьысь туннэ петак ӝутӥ. Кузёлы сётыны медӥсько вал но, вунэтӥськем. Ме, басьты.
Калгись. Таизлы но туж тау… Шымырскем сюлъёсме тырыто. Я, ӟеч ул. Вамышъяло, завод сьӧрын, нюлэс вӧзын турын зуродэз адӟи. Отчы кӧлыны мыно. (Кошке).
1. Калгись.
2. Копей.
3. Миня.
Калгись. Тодыты, бен, монэ ӧжыт, кыӵе мар улӥськоды. Учкисько ке котырак, ушъямон ӧвӧл лэся.
Копей. Ма таӵе улэмез ушъялод. Дуннеез гинэ саптаськом. Кураськисе шеди ини, черк азьын арня нуналъёсын сылӥсько. Кужмы чапчара быриз, ужаме номыр но уг луы ни. Кытчы мон ярасько на. Шоканы ик шуг, кулэмме гинэ витисько.
Калгись. Кузёед дорысь кемалась-а кошкид? Ужаса мӧйымем бере малы ӧз вордэ ни тонэ?
Копей. Вордозы со шайёс… Пичи дырысеным ялам одӥг кузёлы ужай. Пуны сямен 40 арлэсь ятыр гидкуазэ возьмаса улӥ. Аизлэсь котырзэ возьмась вал, берат пиезлы пыриськыса улыны турттӥ.
Калгись. Озьы-а, бен, тыныд тау кырыса юртто? Шонер ужамед понна гуэ кушто.
Копей. Эк-эк-эк! мазэ витёд соослэсь. Синъёсы ляб адӟо ини. Ортчиз арлыды. Тани татчы бускель пие доры улыны лыктӥ. Люкыт ке но, огазьын улӥськом. Ачиз но со куанер адями, заводын ужа. Монэ гинэ ӧвӧл, тӥни Миняез но дораз улыны лэзиз. Э, гыдыке, одӥг инмарлы осконэ кылиз на.
Калгись. Кин, бен — инмар-а, бускель пиед-а тыныд тросгем юрттэ?
Копей. Озьы эн вераськы, шузие: инмар вожзэ ваёз.
Миня. (Пыре). Я, мон но вуи, пересь Копей. (Калгись шоры паймыса учке). Вужгурт пиез лэся адӟисько.
Калгись. Выль гурт пи мон, яратон выны. Чырткем-а!
Миня. Кызьы шуыны ик уг валаськы. (Пуксе). Жади туннэ калгыса. Салдатэ монэ басьто, войнае келялом шуо. Та дырозь саптам муртэз салдатэ но уг лу вал басьтыны. Табере мон ярасько ини.
Калгись. Э, кузёос понна йырдэ донгыны кызьы уд яра. Тон кадь адямиос тросгес ке луизы, кузё пиос ачизэс нокуно войнае уз пыралэ. Татын гинэ тордыса улозы.
Копей. Зэмзэ ик верад ук.
Калгись. Мон ужась калыкез пӧяса уг ветлӥськы.
Копей. Тани Василь Ваныч но войнае мынон вадес, офицер дӥсь дӥсяса, татчы ик кылиз. Нюлэскан пыӵал заводаз табере винтовка лэсьтэ. Мынам син азям узырме.
Миня. Гм… со кион кесян люкет! (Султэ но корка шортӥ берга).
Копей. Ужасьёсыз солэн кӧня тырмизы. Ялам ужась ватса, ялам ужез йылэ. Уксёез нош аслэсьтыз но ӝужыт дыр солэн.
Калгись (Минялы). Нош, юлтоше, малы тон кузёед дорысь кошкид?
Миня. (Шузимем кадь корка шоры дугдэ). Эн поттылы сое. Сюлмы висе. Вунэтыны тыршисько, уг вуны. Дуннеын улэме ӟырдам корт вылын кадь сылэме. (Сэрегысь сэреге кузь вамышъяса ветлэ).
Копей. Со кузёез сэрен тюрьмаын пукиз ук та Миня.
Калгись. Туж оскисько.
Копей. Василь Ваныч Минялэсь яратон нылзэ сереме вуттӥз.
Миня. Эн вераськы, Копей… Сюлэм шугез лякыт уд кар. Секытэз тодэ эн вай…
Калгись. Вӧсь каремзэс уд вунэты. Эн но вунэты, выны. Юн тодад возь. Дырыз вуоз, ачид кырмод, вирзэс пызьыртод.
Миня. Туж ик пызьыртысал вал. Вань улэмме сӧризы.
Копей. Ичи улӥд на. Улонлэн сюресэз кузь.
Миня. Чагыр дыдыкъёс кадь Тасяен огместы огмы яратыса улӥмы, вож чебер возь вылын италмасъёс сямен артэ будӥмы. Дыдыкме кучыран сииз, италмасме сьӧсь ишкалтӥз, пыд улаз лёгаз… Кӧтыз будыны ӧдъямысь Тасяме пери кузёмы кыдёке музон каре келяз. Огнам мон кыли. Кинлы куректонме вералом. Кузёлэн прикащикъёсыз монэ ик исало, серекъяло, гоё. Кытчы тыныд, пурись шыр, сыӵе таза ныл кельшоз шуо. Табере, пе, тыныд, удмуртлы, кузёлэн мылемез но тупалоз, соиз понна но тау карод.
Калгись. Кемалась кулэ тау карыны, йырзэ позыртыны.
Миня. Пичи вылэм сюлмы мынам. Чидатэк улыса, йыры курен Волошкае мынӥ, кузёлэн дача улаз тыл понӥ. Лып гинэ горд атас улӟиз, нюлӥз. Шумпотыса мон эктӥ отын… Отысен ик кутӥзы но тюрьмае пытсазы… Быдэсак кык ар пуки. Али войнае ыстыны понна поттӥзы. Оло отчы мыныса эксэйлы ярало, улэме токма уз быр.
Калгись. Мозмыны луонтэм бере, мын, мын отчы, гажан выны. Мыныса адӟод — кыӵе отын ужась но крестьян калыклэсь мугорзэ кесяло. Музъем гырись-усыясь муртлэн вирыныз музъемез кыедало. Кортэз-анданэз адями йыр виымен сураса, нюр муӵ пӧлтӥ пазяло. Кузёосыд татчы кылё, оскон эксэед но музьыосыз, дусымъёсыз пӧлын юмшаса улэ. Таӵе пеймыт, нӧд гуын уг улы со. Салдатъёслэн войнаын ӝуштэмзы, курадӟемзы солэн пеляз уг пыр. Кудӟыса, небыт пукон вылэ выдыса, крезьчиен шудэмез со кылӟиське. Мын, эше, мын! ас синмыныд тае адӟы. Гуртъёсы бубытэк кылем пиналъёслэсь бӧрдэмзэс эн вунэты.
Копей. Ок, бен, трос бӧрдӥсь. Кышноос гыро ни, юртсы куашка, йыло пыдйылчиос…
Калгись. Тод, Миня, мукет кунысь братъёсыд вылэ тонэ ысто. Соос но ёрмем лулъёс, пӧям муртъёс. Кутэм пыӵалдэ кузёос пумитэ берыкты. Сьӧрад ӧть эшъёстэ, вичаксэ салдатъёсты. Сисьты эксэйлэсь армизэ пуш ласянь, гижни сись музэн мертчиськы. Огнад отын уд лу, юрттӥсь шедёз. Эшласькы немец, турок салдатъёсын. Кужмо луоды.
| 1. Калгись. | 4. Василь Ваныч. |
| 2. Тася. | 5. Копей. |
| 3. Миня. | 6. Трос калык. |
Калгись. Вуим, эше, куанерез саптасьлэн юртэз доры. Тӥни отчы тачак калык пыремын, ӵаш куарето.
Тася. Учкысал вал мон со кион шоры. Быгатысал ке, йыръёссэ пыргытысал. Кӧня монэ нылысен ик сьӧсь курадӟытӥз. Возьытэным йырме быдтыны медыса улӥ, ошкыны но кулон эмъюм но юны кутскылӥ. Пересь муми ялам возьмаса улӥз, асме быдтыны ӧз сёты.
Копей. (Лыктэ). Ӟеч-а, пиналъёсы! Кырныжез мӧйы синмыным учкыны мон но лыктӥ. Тани ук солэн карез. (Тубат кузя корка пыре).
Калгись. Мусо сузэре! Тонэ дэрие наштась муртлэн улэм нуналыз пумаз вуэ. Пӧсь шунды ас лексэ возьматэ. Ужась калык сайказ. Мон кадь калгисьёслэн ужамзы пайда сётӥз. Солы мон шумпотӥсько. Тросэз ужась калыкез валэктӥсьёс быризы. Кылемез дунне берытскемез адӟиськом. Ужасьёс сьӧры крестьянъёс но лӧпто. Асьме удмуртъёсмы но синзэс усьто.
Тася. Гуртъёстӥ ортчыкум удмуртъёслэсь революция потэмез валамтэзэс мон шӧдӥ.
Калгись. Туннэ нуналысен уката юн ужмы асьмелэн йылоз. Калыклы ас кияз эриксэ сётэм бере, со эриксэ шонер сюрес вылэ пуктыны понна валэктоно луоз. Асьмеос али ке аналскимы, соос ваньзы вӧтаме кылёзы. Табере асьмелэн ужъёсмы удмурт крестьянлэн сюлмаз пыроз. Гурт пушкын но нюръяськон тыл пуштытоно. Тудӟыса кошкоз революция котькытӥ. Соку кужыммы будоз…
Тася. Потто, потто ин, васькыто ин… Тышкало уг, бен, сое пумен.
Василь Ваныч. (Сое кыскыса потто). Эн жуге! Мон тӥледыз ӧй жугылы… Ой, ой, уй!
Тася. Уг-а яра… Кылдэ юаса тонэ тышкано. Вае сое мыным, вае сое мыным… Я, чебер-а тон вылэм? Кемалась-а нылъёсты сереме поттылэмысь дугдӥд?…
Василь Ваныч. Мон ужасьёсме ӟеч сюдыса вордӥ, нянен сюдӥ, сӥлен сюдӥ…
Тася. Тодӥськом маин сюдӥд… Вань синъёстэ ӵабъяло. (Василь Ванычлэсь ымнырзэ корма).
Василь Ваныч. (Кесяське). Эн сётэ жугыны, эн сётэ жугыны…
Тася. А, кин тыныд татын юрттоз на! Калыкез зӥбон дырыд ортчиз табере…
Миня. (Гордармеецъёсын ӝог лыктэ). Дугдэ ин, дугдэ, тырмоз. Уз пегӟы ни со. Совето властьлэн судэз сое шымыртоз. (Тасяез саналтэ).
Василь Ваныч. Э, инмаре куазе! Вуэмедлы, Миня, шумпотӥсько. Мозмыты монэ.
Миня. Тодмад-а ма? Асьмелэн вераськонмы быриз табере. Маке ужад, ваньзэ лыдъялом, кӧтад йӧтымон кузьмалом. Ме, си нырысьсэ ик мынэсьтым кузьымме. (Чырты бераз мыжгыса донге). Нуэ, эшъёсы!… (Гордармеецъёс Василь Ванычез кыскыса, донгаса нуо. Калык сьӧразы кошке).
Копей. Кошкиз ук, кошкиз ук. 40 ар ужаме понна кин монэ мӧйы аръёсам вордоз на?
Калгись. Эн сюлмаськы, пересь. Та дырозь кузёед тонэ тодаз ӧз вайылы. Тырттэм пуйыен солэн корка вадсытӥз губырскыса ветлӥд. Солэн шулдыр улэмез тыныд бӧрдон сётӥз. Туннэ нунал тыныд шумпотон сётэ. Ужась калык ужась муртэз уз вунэты, уз кушты. Та кузёлэн карез асьме кужымен лэсьтэмын. Кылӟиське ваньды, эшъёсы! Ачиз-а кузё та караз кирпичъёссэ тубытъяз?
Трос куараос. Ми тае лэсьтӥм. Кузё кизэ ӧз йӧттылы.
Миня. Кузёлэн тӧдьы киоссэ мышказ поныса ветлонэз сяна ужез ӧй вал. Мон азям ик кудзэ сюлоен шуккылӥз.
Калгись. Эшъёсы! Одӥгзэ кузёез мекалтыса гинэ асьмелэн ужмы уг быры на. Трос со сьӧсьёс дуннеын. Асьме улоскын но тырмыт. Музон кунысь но эшъёссы юрттыны лыктозы. Нош крестьян но ужась калык солэсь сюрс-сюрсэн трос, валче пуктыса, асьме кужым — гондыр кужым, соослэн нош — лудкеч кужым. Мукет кунъёсын ужась калыкез возьыны быгатэменызы гинэ кужмо уло на. Эрикмес киямы каньылэн гинэ басьтыны уз лэзе. Ожмаськон асьмелэн азьпалан. Зол кияды пыӵалъёстэс кутыса возелэ. Туж сэзь но сак улэ.
Трос куараос. Эрикмес ум сётэ!.. Уз талалэ! Пыӵал ке ӧз тырмы, пиньын йыръёмы!..
1. Миня.
2. Копей.
3. Калгись.
Миня. (Ӝӧк сьӧрын пуке, кияз бумага возе). Гм… Курсы усьты шуса куро. Удмурт кыллы дышетскеммы потэ, пе. Кылем дауре таос удмурт кылэз туж исамес каро вал. Монэ, кузё дорын лавкаоссэ ӵужыса улыкум, кӧня пол бӧрдонэ вуттылӥзы. Табере со кузёлэн прикащикъёсыз ваньзы учреждениосын ужало. Одӥгтэм нимъёссы тодмо. Куд огзэ сузяно луоз.
Копей. (Туж пересьмемын, бодыен губырскыса пыре). Дорад лыктэм вал, Миня, вераськыны, шумпотонме верало. (Каллен кызэ). Ваньмиськод-а?
Миня. Уже ке но вань, вераськом.
Копей. (Пукон вылэ пуксе). Ляб синъёсыным но югыт дуннеез адӟисько. Мар кадь улэм луиз, — паймисько. Та коркан ик улын кухняын улыкум, татчы пушказ пыраны, вылэ тубаны ӧй дӥсьтылы. Али нош оло ачим батыр кадь кӧбертэм лыктӥсько.
Миня. Со понна коммунист партия ужа. Асьмелэсь улэммес капчиятӥз. Войнае шедьыса, мон но большевик луи.
Копей. Туж тау большевикъёслы. Мон кадь дэриын будэм муртэз но та удмурт областез усьтэмзылы 3 ар тырмем нуналаз куное ӧтчазы ук. Ку малпалод вал, сыӵе бадӟым коркан удмуртъёс ужалозы шуса. Туж абдратӥзы. Кыӵе отын сюлме пырись кылъёс веразы. Пырак вирсэре кузям бызиз.
Миня. Шоретӥ удмурт клубын праздник ортчытэмез-а мадиськод?
Копей. Бен, сое, сое. Гуртъёсысь удмуртъёс но, эке, кӧня люкаськиллям вылэм. Пересьёсын артэ пуксьыса, умой-умой вераськи. Калгисьлэсь валэктэмзэ но пелям понӥ.
Миня. Асьме улоскысь калгись эшмы кошке ини.
Копей. Нош малы?
Миня. Со ӝоген туннэ татчы вуоз. Ачиз вералоз дыр… Кошконэз сэрен солэн ужъёсыз тодам вуизы. Тӧдьыослэсь татчы вуылэмзэс тодӥськод дыр?
Копей. Ма, малы сое уд тоды.
Миня. Со вадескын Калгись Кам шур дурын улӥз. Удмурт школаосыз усьтыны солы казнаысь совето власть уно уксё сётэм вал. Тӧдьыос лыктэмен Калгисьлы пегӟоно луиз. Уксёзэ со горд армилы сётӥз. Ачиз мырдэм ӧз быры. Солэн котыраз уно уксёез вань шуса, кудӥз со бордын улӥсь эшъёсыз сьӧраз уйиськыса мынӥллям. Калгись сое чик тодымтэ. Со тушмонъёс, Калгисез виыса, уксёзэ талалом но узырмом шуса, куспазы кенешиллям вылэм. Тӥни озьы Калгись эшлы кык ласянь йыр бырон вадсаськылӥз.
Копей. Э, шайтанъёс!.. Кызьы, бен, мозмиз на?
Миня. Тушмонъёсыз йыромиллям… Ачиз Калгись эшмы вуиз уга.
Калгись. Чырккем-а улӥськод, пересь! Пыдъёсыд нулло на-а?
Копей. Нулло каллен, гыдыке. Тон нош татысь кошкиськод лэся шуо.
Калгись. Кошкисько. Одӥг интыын кема улыны мон дышымтэ… Зэмзэ ке верано, Якутие та виысь зол ужасьёс кулэ. Парти ЦК монэ отчы ыстэ. Кыӵе, мар, бен, улӥськод?
Копей. Улэмез курлан быриз. Улытозям мыным тырмоз. Кураськон сямме куштӥ. Черк азьын сылыса, кулэмлэсь мырдэм кыли. Совето власть уськем бере улэм вошкиз. Кыстаськыса улэме пумен вунэ.
Калгись. Инмаред ик-а юрттэ?
Копей. Мӧйы муртэз эн серекъя, гыдыке. Мынам тодэме со быдӟа вал. Пичиысен йырам уногем визь ке пырысал, ӧвӧлтэм макелы осконэ ӧй лусал. Валасьтэм калыкез пеймытын воземзэс валаны ӧдъяй. Инмарен мон кадьёсты кышкатыса гинэ возё вылэм.
Миня. Озьы шӧдӥськом ук улонлэсь зэмзэ. Инмарлэсь кышкаса, эксэйлы оскыса улыны дышымтэ ке лусал, мон но та юрт котырын возькыкум кунян кадь ӧй учкысал… Ортчиз ини сыӵе дыр. Шуныт шундымы пиштэ. Гуртъёсысь удмурт юлтошъёсмес валэктон ужмы азьпалан.
Калгись. Аслэсьтым сюлэмме туж юнматыса татысь табере мон кошко. Куать сю сюрс лыдъем удмурт калык вырӟиз: гуртъёсысь удмурт кулакъёсын нюръяськон зол улӟе. Тыршись удмурт калыклэн нуналысь нуналэ кужмыз будэ, огзы сьӧры огзэс вылэ ӝуто. Выль етӥз ужасе сюрс удмурт егитъёс дасясько. Бадӟым каръёсын пӧртэм-пӧртэм ВУЗъёсын пазяськыса визь люкало.
Копей. Таза кылъёсыд сюлэмме буйгато.
Миня. Таӵе кылъёс кужымез будэто. Тынад ужедлы синмаськыса, мусо эше, мылкыдъёс ӝуало.
Калгись. Кыдёке но кошкыса тӥ бордысь уг люкиськы. Котьку куарадэс кыло. Нош тӥ золгем юнматске. Удмурт автономио областьын монтэк но уж шонер мыноз. Иж заводын ужасьёс трос. Тыршыса ужась удмуртъёслы соос кивалтӥсь луозы. Ас даурам дуннеетӥ калгыса ветлыкум, данак векчи, ёрмыса, пеймытын улӥсь калыкез адӟылӥ. Бадӟым нюлэсъёс шорын, гужемъёсын но чильдась лымы вылын пумтэм куанеръёс уло. Соос шуг улын улэмысь потэмлы уг оско. Отчы юрттӥсь кулэ. Сыӵе калыкез пролетар дунне борды герӟано. Отчы монэ мынам сюресэ нуэ.