Кага нёньӧдӧм, дӧзьӧритӧм

by Чеусов Николай Павлович

Омӧля, лёк ногӧн, кыдз сюрӧ вӧдитчӧмысь кага висьмӧ. Висьысь кага оз ыджыда ланьтлы: пыр горзӧ-бӧрдӧ. Висьысь кага дырйи некутшӧм шойччӧг мамыслы ни гортсаясыслы оз овлы. Кагалы ӧтарӧ нёнь тувъялӧны вомас, ланьтӧдӧны сійӧс бӧрдӧмысь. Мам нёньӧдас-нёньӧдас, сэсся мырдӧн сюр нёнь вомас сюясны, качайтӧны мый вынысь. Оз эськӧ ков сідз. Татшӧм видзӧмсьыс, кыз мырдӧн вердӧмсьыс нӧшта омӧль.

Дзоньвидзалун кӧ колӧ кагалы, колӧ сійӧс шочджыка нёньӧдны, сӧмын быд кык час мысти. Вывті тшӧкыда вердӧмысла кынӧмыс сылӧн висьмӧ дай горзьӧдлӧ сійӧс. Сюр нёньтӧ дзикӧдз колӧ шыбитны, сы вӧсна кагатӧ мыт босьтӧ. Кага качайтӧмыд бара жӧ абу бур. Качайтӧмысла сылӧн юрыс бергӧдчӧ, висьӧдӧ сійӧс, нёнялӧм йӧлыс бӧр быльыктӧ, петӧ.

Бӧрдысь кагаӧс оз ков вердӧмӧн бурӧдны. Морт колӧкӧ ньӧти абу тшыг, оз кынӧм сюмалӧмла бӧрд, мӧдторйысь бӧрдӧ. Бурӧдтӧдзыс войдӧр колӧ тӧдмавны, мыйысь бӧрдӧ. Гашкӧ нӧ сійӧс зэлыда тӧбӧмаӧсь, либӧ ва вылын, оз-ӧ кодкӧ курччав, оз-ӧ вись вом пытшкӧсыс, оз-ӧ мытитӧд. Вом пытшкӧс висьӧмысь, еджыд куалӧмысь быд нёньӧдӧм бӧрын колӧ чышкыны вом пытшкӧссӧ сӧстӧм пуӧм ва пышкын кӧтӧдӧм дӧра торйӧн. Мытысь видзӧм кузя оз ков ёна нёньӧдны, оз ков сетны сюр нёнь. Ар джынйӧдз кагатӧ вердны сӧмын мам йӧлӧн. Мукӧдторъясӧн: рокӧн ни, кӧлачӧн ни оз ков вердны. Сюр нёнь пыдди кагаӧс бурӧдӧм кузя позьӧ сетны сылы тыртӧм резинкӧвӧй нёнь. Сӧмын унджыкысь колӧ сійӧс мыськавлыны пуӧм ваӧн, сетны пробкаӧн тупкӧмӧн. Еджыд куалӧм вомысь, мытитӧмысь и мукӧд висьӧмъясысь колӧ лечитны доктор ордын.

Кагаӧс зэлыда оз ков тӧбны, колӧ видзны сӧстӧма. Няйт, ва рузумъяс пыр колӧ вежлавны. Мыськавны найӧс быд лун либӧ лункосмӧсӧн. Нёльзянінъяс чышкыны косӧдз, киськавны картупель пызьӧн. Пондас кӧ кучик кусыньяс гӧрдӧдны либӧ улявны, колӧ ветлыны доктор дінӧ.

Гӧг кӧртӧдсӧ кагаӧс мыськӧм бӧрын колӧ гартны сӧстӧм рузумӧн. Оз ков сэсся сійӧс вӧрӧдны, ачыс усяс. Гӧг бердӧ сӧстӧм рузум кындзи немтор оз ков пуктыны: вый ни, мазь ни. Гӧгйысь кӧ письтас вир либӧ сійӧ орсялӧ, гӧгӧрыс пондас гӧрдӧдны, регыдджык колӧ нуны кагатӧ доктор дінӧ.

Кагаяслӧн кӧ синъясыс орсялӧны, регыдджык колӧ зільны нулыны найӧс доктор дінӧ, оз ков эновтчыны. Асланым эновтчӧмла уна посни йӧз синтӧммылӧны.