Йӧз синмысь увтор аддзӧны...
ЙӦЗ СИНМЫСЬ УВТОР АДДЗӦНЫ, АСЛАНЫС ДЗОНЬ КЕР ОЗ ТЫДАВ. ПЕТКӦДЛӦЙ СІЙӦС НАЛЫ!
Мукӧд мувывса озыр правительяс зэв дыр Сӧветса государствоӧс пыдди эз пуктыны, миянӧс йӧз туйӧ эз лыддьыны. Сэсся ньӧжйӧникӧн лои сетчавны. Сӧмын пыдди пуктыны шуигас пыр важ, сардырся, уджйӧз миянлысь корӧны. Шуӧны: уджйӧзтӧ мынтытӧмла пӧ и эгӧ пыдди пуктылӧй тіянӧс, оз позь прӧститны сымда уджйӧз.
Сідзнадтӧ эськӧ сідзи — сарыд ёна удждысьлӧма мукӧд мувывса озыр войтырлысь, да пӧръясьӧны жӧ найӧ, ылӧдчӧны. Куш уджйӧз вӧсна эз на найӧ ӧтдортны да кедзовтны Сӧвет государствотӧ. Помкаыс (причинаыс) сэні мӧд: найӧ надейтчисны Сӧвет власьттӧ зэв дженьыд нэмаӧн, виччысисны сылысь пом. Пом пыдди весиг эз омӧльтчы Сӧвет власьтыд — лунысь лунӧ ёнмис. Мукӧд мувывса озыр правительяс жугыльтчисны, юр ӧшӧдӧмӧн ыджыд дум думайтӧны: Сӧвет власьтӧс пыдди пуктӧм мустӧм, сьӧлӧмыд ӧти думсьыс майышмунӧ; мӧдарӧ кӧ, пыдди пуктытӧг он вермы овны. Мый и керны?
Ёна думайтӧм, мӧвпалӧм мысти лӧсьӧдчисны лыддьыны Сӧвет власьтӧс пыдди, збыльӧн, миянӧс пуктыны йӧз туйӧ. Сӧмын уджйӧз корӧны, оз лэччысьны сэтысь.
Уджйӧзтӧ мынтыны, тӧдӧмысь, колӧ, тӧдам сійӧ. Сӧмын, муса другъяс, вайӧ артыштамӧ — код вылысь унджык уджйӧзыс воӧ, кодлы мынтысьныс колӧ.
Войнатӧ коді паніс? — Саръяс, корольяс, озыр йӧз. Кодлы войнаысь ыджыд уроныс, рӧзӧритчӧмыс, мучитчӧмыс, коді олӧмсӧ, ловсӧ пуктіс сы вылын? — Уджалысьяс да крестьяна. Кымын уджалысь, верстьӧ мортӧс виисны, кымынлысь дзоньвидзалунсӧ нетшыштісны — китӧм, коктӧм, синтӧм морт коли, кымын грезд, кар сотісны да пузувтісны, видз-му тшыкӧдісны!
Миян Коми муӧ еджыдъясыд тӧв ныр моз, позьӧ шуны, пыралісны. Лёк кырнышъяс моз кытсюрӧ кокыштісны, дай сійӧ тӧдчымӧн лои, кодъяслыкӧ дӧбельки лои. А войнаыс кӧні муніс, сэні мый вӧчсис?
Сы вӧсна быд уджалысьлы да крестьянинлы колӧ ӧні жӧ, ньӧти нюжӧдчытӧг, висьтавны Исполкомлы, кутшӧм урон лои сылы, сійӧ кӧзяйстволы войнаысь да еджыдъяс помысь. Висьталӧмыс колӧ сы вӧсна, медым лючки артавны став рӧскодсӧ война помсьыс. Арталасны, тэчасны ставсӧ ӧтчукӧрӧ, сэсся и чуткасны уджйӧз корысьяслы: «Налӧй жӧ пӧ видлӧй, код вылысь уджйӧзыс воӧ».
Регыдджык висьталӧмыс колӧ сы понда: буретш ӧні мунӧ Англиякӧд сёрни миянӧс пыдди пуктӧм йылысь. Озыр англичана — капиталистъяс — корӧны уджйӧз. Ӧтувтчӧм Сӧвет республикаяс оз соссьыны уджйӧзысь, сӧмын кӧсйӧны орӧдчыны помӧдз — водзвыв артавны, кодсяньыс унджык уджйӧзыс колӧ, кодыслы ковмас мынтысьныс. Англияса капиталистъясыд эз омӧля отсасьны миян сарлы нуӧдны войнасӧ, миян капиталистъяслы, фабрикантъяслы, заводчикъяслы, купечьяслы, поп-дяклы пыкны революция. Код отсӧгӧн рочмувывса уджалысьясыд да крестьянаыд война бӧрад олісны би кытш пиын? Эз-ӧ англияса капиталистъяс отсасьны миян капиталистъяслы, озыр йӧзлы?
Отсалӧй жӧ быдӧн артавны уджйӧз мукӧд мувывса озыр правительстволысь, регыдджык висьталӧй, коді кутшӧм рӧскод лэптіс война вӧсна. Дыр-ӧ найӧ ышнясясны асланыс уджйӧз перйӧмӧн? Колӧ пуктыны пом, став йӧзыслы петкӧдлыны збыльсӧ.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1967 году, соответственно эта работа выйдет в России в общественное достояние в 2038 году.
The author died in 1967, so this work is also in the public domain in countries and areas (outside Russia) where the copyright term is the author's life plus 50 years or less. |