Йәйҙәр ҡайҙа китә һуң? Гүзәл Ситдиҡова.
Йәйҙәр ҡайҙа китә һуң?
[edit]Йәй артынан китер инем,
Йәйҙәр ҡайҙа китә һуң?
Зөмрәт йәшел ҡырға ниңә
Үрттәр һалып китә һуң?
Яна тауҙар, яна урман,
Үрттәр ләүкей баҫыуҙа,
Ҡурҡыуҙарым-өркөүҙәрем
Шул ялҡынға баҫыуҙан...
Тик ялҡыны һалҡын икән -
Ипкендәре өшөттө,
Өшөттө лә, сәстәремә
Иртә ҡырау төшөрттө.
Ирей торған ҡырау түгел -
Аҡланманы көткәнем.
...Китер инем бергә, белһәм
Йәйҙәр ҡайҙа киткәнен.