Искакова - Поро кас
Роза Искакова йоҥгалтара
Мут: Семён Николаев
Сем: Иван Молотов
Умыр кас чаклана,
Канде шулдыран.
Ер воктен кайык-влак
Мурым шуйдарат.
Мыланем тиде йӱк
Тыгела шоктас:
- Мландылан, калыклан
Лийже поро кас!
Кас кава чеверга
Ялтак ӱдыр гай,
Пиалан оръеҥла
Шӱдыржӧ йолга,
Пуйто пӱтынь кава
Каласал колтас:
-Мландылан, калыклан
Лийже поро кас!
Нур ӱмбачын волат,
Нойымым мондат.
Клуб воктен рвезе-влак
Угыч погынат.
Тымык южым лыжган
Шергылтале вальс:
- Мландылан, калыклан
Лийже поро кас!
Пашанам пагален,
Кумылнам пален,
Тольо ныжылге кас –
Рвезылык пайрем.
Лӱмынак пӱртӱсна
Тудым пӧлеклас:
Йырым-йыр тымык кас,
Ямле поро кас…
Лӱмынак пӱртӱсна
Тудым пӧлеклас:
Йырым-йыр тымык кас,
Ямле поро кас…