Зіль семъя

by Д. Исакова

Иванӧс да Маръяӧс сиктад быдсӧн тӧдӧны: наысь бура олысьыс сэні некод абу. Налӧн эм куим челядь: Матрена — дас вит арӧса ныв, Серапим — дас арӧса пи, да Сандрик — вит арӧса пи. Налӧн эм пӧч да пӧль. Ставныс зільысь-зіль йӧз. Весь олӧм налысь он аддзыв. Гожӧмын сійӧ, дерт, быдӧн удж вылын, прӧстджык кӧ, вӧрын вотчӧны либӧ чери кыйӧны. Вотӧс налӧн во гӧгӧр тырмӧ, вузавны на вичмӧ и. Тшакыд косьтӧма, солалӧма. Пуктасыд быдсяма пӧлӧс. Ставыс ас зільлун помысь. Пыралӧй жӧ на ордӧ асьныд да видзӧдлӧй. Аддзад: мамыс печкӧ, кыӧ. (Дӧра пӧ быд во вузавны вичмӧ.) Нылыс отсасьӧ мамыслы скӧт гӧгӧр идрасьны, керка пытшкӧс пелькӧдны да. Рытнас лыддьысьӧ, корсюрӧ спектакъяс вылын ворсӧ. Матрена нёль во школаын велӧдчӧма. Серапим велӧдчӧ коймӧд во. Батьыс каитчӧ Матренаӧс водзӧ велӧдтӧмысь, «пиянӧс пӧ карын нин велӧда».

Ас зільлун кузяыс найӧ зэв бура олӧны, гӧгӧр тыр-бур. Паськӧмыд быдпӧлӧс, вӧччан кӧлуйыд мичаысь-мича. Иван вӧралӧ да, кӧч кутӧ, руч ку — ур кутӧ вузалӧ. Карад ветлас да тшайтӧ, сакартӧ, майтӧгтӧ, черитӧ, ситечтӧ... быдсяматорсӧ ваяс. Мукӧдлы ветлысь-мунысьтӧ дыш колльыныд. Иван, бара, оз бӧрыньтчы — колляс. Ичӧт Сандрик гырысь кодь жӧ зіль быдмӧ. Мыйкӧ век вӧласьӧ, вӧчасьӧ, либӧ увлань юрӧн и нига босьтӧма да лыддьысьӧ. Рыт воас — пӧчсӧ тшӧктас мойдны, нӧдны. Пӧрысь пӧль омӧля нин аддзӧ эськӧ да, весь оз на ов. Кор тыв кыӧ, кор кӧмкот дӧмӧ. Быдсӧн кӧ ӧд зільӧсь, сэсся бура жӧ и олӧны.