Зыбкадорса сьыланкыв

←

Зыбкадорса сьыланкыв (1934)
by Лебедев Михаил Николаевич

→

Гижан кад: 1934, Йӧзӧдан во: 1934. Ӧшмӧс: М. Н. Лебедев. Бӧрйӧм гижӧдъяс. Сыктывкар, 1934. Лб. 198-199.

336476Зыбкадорса сьыланкыв1934Лебедев Михаил Николаевич

Ӧввӧ, ӧввӧ, ичӧт пиӧй,
Сьӧлӧмшӧрӧй, узь!
Пемыд войысь нинӧм повны,
Войыс абу кузь.
Асъя кыа бӧрын лоас
Бара гажа лун.
Зыбка дорысь тэнад мамыд
Некытчӧ оз мун.
Ог ме дона пиӧс эновт,
Некодлы ог сет.
Менам зарни, мича кага
Бура узяс мед!
Эзысь лэптысьӧма тӧлысь,
Быттьӧ еджыд юсь...
Ӧввӧ, ӧввӧ, муса пиӧй,
Сьӧлӧмшӧрӧй, узь!
Понда висьтавны ме тэныд
Уна-унатор:
Мыйла, кыдзи тэнад батьыд
Томӧн лоис дзор;
Мыйла уджалігас сійӧ
Шойччӧгсӧ оз тӧд;
Кыдзи усьтӧдз сійӧ тільсис,
Сӧмын эз вӧв пӧт.
Сэки уджалысьыс вӧлі
Медся ичӧт морт.
Сэки уджалысьлӧн вӧлі
Кӧрталӧма борд.
Ӧні олӧм миян вежсис,
Батьыд лои сюсь...
Ӧввӧ, ӧввӧ, дона пиӧй,
Сьӧлӧмшӧрӧй, узь!
Коркӧ быдман, пондан тӧдны
Ӧнъя оласног.
Ӧтув сиктсаяскӧд овны
Лоас тэнад мог.
Тӧлысь кисьтӧ эзысь югӧр,
Пышйӧ пемыд вой.
Ӧні тэнӧ, ичӧт кага,
Бубуля оз сёй.
Нинӧм повны, кӧть и буксӧ
Вой шӧр войын сюзь!
Ӧввӧ, ӧввӧ, зарни пиӧй,
Сьӧлӧмшӧрӧй, узь!

This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:

its creator didn't fight or work for Soviet Union victory during the Great Patriotic War — so the 70-year protection term is applied;
and the creator died before January 1, 1954 (more than 70 years ago), and has been not posthumously rehabilitated since that date;
and this work was first published before January 1, 1954 (more than 70 years ago).

The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 89 years or less since publication (if applicable).