Дзебигӧн-колльӧдігӧн сьыланкыв
Бур вокъясӧй! кось вылын усинныд ті,
Мед уджалысь лӧсьыда олӧ.
Мый верминныд, йӧзыслы сетінныд ті
И кулӧмысь ті энӧ полӧ.
Эз жалитлы тіянӧс вир юысь сар,
Лёк местаын — тюрмаын видзис,
Эз жалитлы тіянӧн сарыслӧн суд,
И судитіс лёкногӧн сідзи.
И суд бӧрын, коньӧръяс, мунінныд ті.
Зэв ылӧ ті мунінныд, вокъяс.
Туй тіян оз помась и шойччӧг оз ло,
И дорӧма кияс и кокъяс.
Жар тіянӧс сотӧ, кӧть сэтчӧ жӧ кув,
И лолавны ті онӧ вермӧ.
И туй шӧрӧ, коньӧръяс, усянныд ті,
А стражаыс ёнджыка скӧрмӧ.
Жар лунъясӧ, ӧгыр моз, доналӧ кӧрт,
Ки-кокъястӧ тіянлысь йирӧ,
И ранасьыс войталӧ, визувтӧ вир,
И пыдӧджык кӧртъясыс пырӧ...
А зарни дворечьясын вир юысь сар
Пыр гажӧдчӧ, шогъяс оз тӧдлы;
Оз жалит гӧль йӧз вылӧ пуля да штык,
А мӧдторсӧ нинӧм оз сетлы...
Лёк сарыслӧн сарстволы воӧма пом.
Гӧль йӧз вӧля босьтіс ас киӧ...
Бур вокъясӧй, корсинныд, сетінныд ті
Гӧль йӧзыслы вӧлясӧ сійӧ!
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 97 years or less since publication (if applicable). |
|