Вӧлі долыдін
Вӧлі долыдін, вӧлі гажаин,
Вӧлі сьӧлӧмлы шойччанін.
Гырысь туйясӧ ветлігӧн,
Паськыд местаын олігӧн
Сійӧ дум вылӧ усьлывлі,
Сійӧс унаысь казьтывлі.
Вӧлі долыдін, вӧлі гажаин,
Вӧлі сьӧлӧмлы шойччанін.
Ылі муясын олігӧн
Уна сы йылысь мӧвпавлі,
«Эм на гажаин», — шулывлі, —
Сідзи сьӧлӧмӧс гажӧдлі.
Вӧлі долыдін, вӧлі гажаин,
Вӧлі сьӧлӧмлы шойччанін.
Пемыд вӧр шӧрын, ю дорын
Вӧлі неыджыд керкатор.
Сійӧ ичӧтик ӧшиньӧд
Вӧрлань видзӧдіг шулывлі:
«Тані долыдін, тані гажаин,
Тані сьӧлӧмлы шойччанін».
Сійӧ керкаас овлывліс
Небыд сьӧлӧма пӧрысь ань.
Сійӧ паныд мем петлывліс,
Сійӧ бур кыв мем шулывліс:
«Пырав шойччыштныд, пырав бур мортӧй,
Дыр нин эн волыв ме ордӧ!»
Сэтчӧ ичӧтсянь волывлі,
Аньлысь мойдӧмсӧ кывзывлі,
Юлысь шуньгӧмсӧ видзӧдлі,
Вӧр пу шувгӧмлы шензьывлі.
Вӧлі гажа сэн, вӧлі нимкодь сэн,
Вӧлі сьӧлӧмлы долыд сэн.
Менам салдатӧ ветліг кост
Сійӧ пӧрысь ань кулӧма,
Ӧні сьӧд розьяс кольӧма-сь
Сійӧ ӧшиньяс пыддиыс.
Вӧлі гажаин, вӧлі долыдін,
Вӧлі сьӧлӧмлы шойччанін.
Ветліг-мунігӧн видзӧдлі:
Полан — гажтӧм зэв керкаыс,
Вӧрыс муралӧ, омлялӧ,
Юыс гудыр зэв, пемыд зэв...
Кӧн нӧ, гажӧй, тэ, кӧн нӧ долыдін,
Кӧн нӧ олӧмлӧн шойччанін?
Ӧні мудз дырйи некытчӧ
Менсьым сьӧлӧмӧс оз кыскы.
Сэки важсӧ ме казьтыштла,
Сьӧлӧм вуж дінсянь шулывла:
«Вӧлі долыдін, вӧлі гажаин,
Вӧлі сьӧлӧмлы шойччанін».
 
|
This work is in the public domain in the United States because it was first published outside the United States prior to January 1, 1930. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1954 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1930 works copyrighted at home. Данная работа, впервые изданная до 1930 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1981 году, соответственно эта работа выйдет в России в общественное достояние в 2052 году.
The author died in 1981, so this work is also in the public domain in countries and areas (outside Russia) where the copyright term is the author's life plus 30 years or less. |