Выныштчӧй, вокъяс!
Выныштчӧй, вокъяс, эн воштӧй
Ассьыныд морт ним да мез;
Казьтыштлӧй, кутшӧмджык вӧлі
Перйӧмыс: сьӧкыд-ӧ, эз?..
Вынъясным бырласьӧ миян,
Гашкӧ, ог аддзылӧй пом...
Мед! Миян быдмӧны пиян,
Вынсялӧ выль войтыр, том.
Найӧс эн вунӧдӧй, вокъяс,
Код пуктіс мез вӧсна юр;
Шой вомӧн веськӧдлӧй кокъяс, —
Казьтыштӧм — сійӧ медбур!
Вынъясным бырласьӧ миян...
Миянлы вывті на сьӧкыд,
Киссьӧ медбур йӧзлӧн вир...
Пемыд вӧр зэв вӧлі тшӧкыд, —
Югӧрыс паськалӧ пыр!
Вынъясным бырласьӧ миян...
Коркӧ и петам ми вӧрысь,
Воссялас паськыда син...
«Аттӧ пӧ!» — шуас код пӧрысь.
«Шойччамӧй — воим тай нин».
Вынъясным бырласьӧ миян...
Вӧлисти олӧмыд воссис...
Майбырӧй, том йӧзӧй, ті;
Пемыдыс, омӧльыс бӧрын,
Югыд выль оланінті!
Вынъясным бырласьӧ миян,
Гашкӧ, ог аддзылӧй пом...
Мед! Миян быдмӧны пиян,
Вынсялӧ выль войтыр, том.
|
This work was published before January 1, 1930, and is in the public domain worldwide because the author died at least 100 years ago. |