Выльногса олӧм йылысь
Шонді кайӧ, йӧзлы вайӧ
Югыдлун да югыд гаж.
Овны выль ногӧн ми кутам,
Ӧні кадыс абу важ.
Муса батьӧ, муса мамӧ,
Ог ме пемыд мортӧн ов:
Муна велӧдчыны карӧ,
Сэтчӧ лэбзьӧ менам лов.
Матрен тьӧтка важӧн шуліс:
Мем пӧ грамота оз ков!
Таво шыпасъяс нин тӧдӧ,
Вермӧ гижны ассьыс ов.
Шоныд гожӧм бӧрын арын
Усьӧ муяс вылӧ пуж.
Менам сьӧлӧм шогӧн тырӧ,
Мыйла лыддьысьны ог куж.
Кодлӧн татшӧм мича керка?
Тайӧ миян выль нардом.
Регыд сійӧ, муса вокъяс,
Вӧчас пемыдыслы пом!
Менӧ мамӧ ёна видӧ,
Мыйла вичкоӧ ог мун,
Мыйла клубйӧ, комсомолӧ
Ветла-котрала быд лун.
Степан Васьӧ со мый шуӧ:
«Эм пӧ бабаыдлы ньӧр!»
Менам гӧтыр — делегатка,
Сыкӧд нинӧмтор он кер!
Энӧ корӧ менӧ, нывъяс,
Ог ме ворсанінӧ мун:
Делегаткаяслӧн талун
Клубйӧ чукӧртчылан лун.
Кӧсйис энька моньӧс нӧйтны.
Эз тай повзьы сылӧн монь;
«Миян права ӧні ӧткодь,
Аслад рожа оз ло дзонь!»
Талун гижсим муса нывкӧд.
Гижсян уджыс абу кузь.
Сэсся спектак вылӧ мунім.
Вичко дум вылӧ эз усь.
Парта вина кӧсйи юны,
Сэсся шуи аслым: Ог!
Нига та вылӧ ме ньӧба,
Нига пальӧдыштас шог.
Войдӧр гымыштас кӧ кымӧр:
Со пӧ лӧгасьӧма ен.
Ӧні быдӧн тэныд шуас:
Электричество пӧ сэн.
Енлы юрбитӧмӧн ёна
Корсьӧ пӧчӧ аслыс рай.
Кывзы, пӧчӧ, кулӧм бӧрад
Гусьыд раяд он нин кай.
Аттӧ дивӧ, Спира Прокӧ
Кутшӧм лои ӧні сюсь:
Оз и дугдыв, мыйкӧ гижӧ,
Весиг войяссӧ оз узь.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 96 years or less since publication (if applicable). |
|