Ву шоры учкыса
Яр йылын сылӥсько;
Сюлэме шудэмен
Шып гинэ кырӟасько.
Ву вылтӥ пыж мынэ,
Со пыжын ныл пуке,
Ву кузя уяса
Со кырӟа но кырӟа.
Туж веськыт мугорыз,
Туж чебер бамъёсыз.
Учкеме но потэ,
Кырӟаме но потэ,
Со кырӟа-серекъя,
Гырлы кадь куараез
Ву вылтӥ кыдёке
Жангыртса янгыра.
Мынам но сюлэмы
Со сьӧры серекъя.
Куарае шып гинэ
Гумырам вырӟытэк
Со гурез ик кырӟа.
Ву шоры учкысал
Весь одӥг кырӟанме
Жадьытэк кырӟасал.
Только — весь кырӟаса
Улыны уг луы:
Шулдырез ке луэ,
Бӧрдонэз но луэ.
Ваёбыж папа кадь
Мон вӧзтӥ пыж ортчиз.
Тулкымъёсыз гинэ
Пыд дорам шуккиськиз.
Нуналъёс ортчозы,
Шулдыръёс вуозы.
Марлы бен пинал дыр
Быронтэм уг луы!
