Ворсігтырйи сьылана сьыланкыв
Муса нывъяс, ӧдйӧнджык!
Шонді важӧн петӧма,
Уджӧ зіля кутчысьлӧй,
Абу кадыс кольӧма.
Кыдз нӧ сідзи, тэ он куж
Шӧрасьны ни песласьны?
Ме кӧть мый шӧрала,
Платтьӧ, дӧрӧм вурышта.
Зіль аньлӧн быдлаті бур.
Удж сылӧн пыр эштӧма,
Сӧмын гӧгӧр видзӧдлас,
Мыйкӧ абу-ӧ эндӧма.
Кыдз нӧ сідзи, тэ он куж
Весиг сёян лӧсьӧдны?
Ме кӧть нянь пӧжала,
Кужа и чӧскыд рок пуны.
Узьысь аньлӧн керкаыс
Ёгнас, буснас тырӧма,
Пӧрӧма да киссьӧма,
Быдлаті няйтнас пурмӧма.
Челядь кӧмтӧм-пасьтӧмӧсь,
Оз аддзывны долыд кад,
Тайӧ олӧм — абу олӧм,
Веськыд мырсьӧм, веськыд мат.
Коді уджалӧмӧн олӧ,
Позьӧ сылы-й шойччыштны,
Гуляйтыштны, гажӧдчыштны,
Сэсся-й нига лыддьыштны.
Кыдз нӧ сідзи, тэ он куж
Гижны ни лыддьысьны,
— Ме со лыддя нигаяс,
Тӧда уна, унатор.
Вайӧ ӧтув кутчысьламӧ
Мӧда-мӧдлы отсасьны,
Колӧ быдла велӧдчыны,
Колӧ быдтор тӧдмавны.
Йӧз вылас кӧ видзӧдла,
Гӧгӧрбок кӧ думышта, —
Ачым кыт ог гӧгӧрво,
Сійӧ нигаысь корсьла.
|
This work is in the public domain in the United States but it may not be in other jurisdictions. See Copyright.
|