Видз-му уджалӧм йылысь
Гӧрысь мортлы муыс муса,
Муыс вайӧ сылы нянь.
Он кӧ эновт ассьыд мутӧ,
Ставыс лоас сэки шань!
Кор ме омӧль гӧрйӧн гӧри,
Олӧм вӧлі менам дзуг.
Ӧні сюсьмышті ме этша —
Вайи карысь мича плуг!
Мусӧ гӧрӧ, зіля вӧрӧ
Комсомолеч Варук пи.
— Коркӧ, — шуӧ, — коми муӧ
Трактор судзӧдлам на ми!
Митрей кӧйдыссӧ эз весав.
Якӧ весавтӧг эз кӧдз.
Тэчис Якӧ куим сёрӧм,
Митрей ӧтиксӧ эз тэч.
«Ен кӧ сетас, няньыд лоас»! —
Шуӧ меным пӧрысь дед.
Дугды, дедӧ, он кӧ уджав,
Енмыд нинӧмтор оз сет!
Гӧрӧм-кӧдзӧм йылысь нига
Меным судзӧдіс селькор.
Видз-му уджалігад, зонъяс,
Колӧ тӧдны унатор.
Он кӧ козьнав муса нывтӧ,
Муса нылыд оз ло шань.
Он кӧ небзьӧд ассьыд мутӧ,
Он и аддзыв сэтысь нянь.
Вайӧ таво миян сиктын
Вӧчам ӧтув кӧдзанін.
Ӧтув уджалам кӧ бура,
Няньыд, майбырӧй, оз чин!
Нёльӧн вартім ӧти рыныш,
Лунтыр мырсим сы ни садь.
«Вартан машина тай колӧ!» —
Гӧгӧрвоис Павел дядь.
Страдна шӧрын Васьӧ висьӧ,
Ружтӧ, видз вылӧ оз мун.
Мый нӧ лои тэкӧд, Васьӧ?
«Ытшки гӧрбушӧн кык лун!»
Ӧтчыд аддзис ӧти немеч,
Кыдзи ытшкӧ коми морт,
Рочӧн матькыштіс дай шуис:
«Тадзи косит один чорт!»
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 96 years or less since publication (if applicable). |
|