Ванине (2011)/12
[242]
| XII |
Эрьмезьвелестэ Кузвелев кись аволь кувака, аволь нурькинеяк. Те кона ёндо варштат. Ниленьгеменьшка-ведьгеменьшка иеде икеле те ютконть ютнесть ялго. Седеяк, тельня, ды, паро, бути лишмесэ. Лиядо эзь арсевеяк. Ваясть сеть кизэтне-телетне шкань отьмантень. Ды уш зярдояк а мурдыть. Ней кись — валаня асфальт, цитни, теке сулика. Яки автобус. Чизэнзэ мик кавксть: валске марто ды чопоньпелев. А кенерят совамо, сави валгомс. Ялатеке кой-зярдо савкшны онкстнемс ламоксть онкстнезь ниле вайгельпетнень аволь ардозь, молезь. Молят — а мелявтат, седеяк, зярдо канстот модас а увтиця. Ниле-вете минутань таркас эскелят час. Теяк паро, куш ютат, рунгот аламнеде ливчакавтсак, веренть седе эрязасто яксевтьсак. Те — куш вишкине, ды менькс неень шкань ве таркасо аштемань ормадонть.
Нату нежеди Эрьмезьвелень аволь покшке учреждениясо бухгалтерэкс. Кемень иеть курок топодить. Зняро, теке басом, прок каямо, мекев-васов ардтни-эскели асфальтонь ниле вайгельпетнень. Пароль, эсеть велесэ муемс таркине. Ды косто? Неень саламонь-манчемань шкатнестэ ледстнемскак теде а мезть. Кузвелесэ, кода весе велетнесэ, ульнесь колхоз. Ульнесть фермат, тингелангт, тракторонь-машинань пурнавома таркат, ульнесь эйдень кужо... Эрицятнень ульнесь, берянь-вадря — те кортамось лия — тевест. Мейле... Теке давол ютась ламо иень перть теезенть ланга. Мезеяк эзь кадово аволь ве иень перть таштазь сюпавчитнеде. Кецни Нату — [243] понгокшнось эсь шкастонзо те «должностентень». Мезе ней теевель? Сюкпря Эрьмезвелентень, икелень райцентрантень, сон шабракс сави Кузвелентень. Кой-кить течис сакшныть тей важодеме.
Икеле те киванть якамсто пелема арасель. Машинат-мезть, седеяк тельня ды сёксень-тундонь рудаз шкава, мерть, а ардтнильть. Молемстэ эзь эрявкшно «чаравтомс» прянть, варштнемс тей-тов. Эскеляк ды эскеляк. Кись — тонь. Тон лангсонзо азор. Ней... Икелень модань, чаротнесэ чувнозь кись вельтязь асфальтсо. Машинатне ливтязь ливтить. Варманень а сасавить. Озавттадызь? Учок... Полавтовсть шкатне. Тиринь аваст целковойтеме а озавтсызь. Кадык. Те сынст тевесь. Молемс сави тей-тов ванозь! Вана мейсэ апарось. Икеле те киванть молемась оймсемакс ульнесь. Ней вана...
Течи Нату «бусонтень» эзь кенере. Савсь сыргамс ялго.
Сёксь икельксэнь ков. Кецневти лембесэнзэ. Чись стакалгадсь, кевери валгомапелев. Мадемадо икеле ванькскавтызе менеленть, пансинзе пельтнень. Эзь кадо вейкеяк. Сэняжась эль марямга зыйни, моры сэнь, седеень витий моронзо. Кодамо мазый, паро ёжонь раштыцякс менельксэсь илязо уле, мезесэ-бути ледстневти сыця ожо сюмора шкатнеде.
Колхозонь шкатнестэ кинть кавто ёнга сырнекс цитнекшнесть кенериця розтне-товсюротне. Ледстнесть нуема шкадонть, тердсть кочкодыктне. Некшневсть урнозь-сеерезь важодиця, нуиця-пивсыця комбайнат. Чинь-ветень ютазь ардтнесть паксятнева олгонь усксиця-капаниця машинат. Сынст полавтылизь лов алов сокиця-видиця тракторт. Ней? А! Аволить ванояк! Теевкшнесть васня барлак умат, паксятне вельтявкшность минень-сюнонь идем тикшесэ, ней — вирь. Ков а варштат, пшти пря пичинеть, ёлганя рунго килейнеть. Пангонь кочкицятне потстост чаво кептере марто а лиснить.
... Нупальсэнть Натумезть конёвсост сокарить, сёрмадыть-ловить колмонест. Совсицятне тенст ламо. Чинь-чоп, валскестэ чокшнес ломань ютксо. Сизят. Цифратнедеяк прясь ушоды пукштяеме. Секс ней авась эскелясь келей кинть керш чирева ды оймсесь мелявкстнэде. Та-кода Симилейстэ чуваронь усксиця пурьгинекс зэрниця-урныця кудошка машинатнеяк эзть редяво. «Кадык ардыть, монь кодамо тев, эрьванть эсензэ мелявксонзо...» — ютась зярыяксть пряванзо. Виде теяк: ськамонзо, эсензэ марто аволь ансяк ней, кинть чирева эскелямсто. Кудосонзояк ськамочиденть верьга-ланга. Сат, чокшнестэ валскес, конторас [244] пачкодема шказот, вал а марят. Куш цирькун максовлизе вайгелензэ. Чаво кудо. Ськамочи. Мирдезэ, Миша, умок уш уды чопода сэтьме масторсо. Цёранзо тонавтнесть ошсо. Прядызь, тусть. Ней эрить васоло ошсо. Кукордт чаво кудосонть лепиямозот. Сюконяма телевизоронтень. Эстеть а кинень ёвтнемс мелявкстот-кеняркстот, сень кис сон теть чинек-венек, оймсемань апак сода, ёвтни.
Истя апак эрязкале, мездеяк апак мелявто, эсензэ марто кортнезь, пачкодсь велентень совамсто, киденть вить ёно, пилораманть видьс. Ульнесь сон колхозонь, ней — содык азё! Келя, ули та-кие азорозо. ООО эли ОАО лемезэ. Кие илязо уле, пилявольгак — неяволь, кирмалав ды пиципалакс потс аволь вая. Ёнонзо пурдыця эль редявикс кинть видьс апак пачкоде, кие-бути, неизе Нату, эскели покш кинть пелев. «Инешки, кие тува, мештева идем тикшенть потмова злыдарди? «Рамась», неяви, а «лексияк». Мезть тува вешни?» — арсезевсь авась. Седе малав пачкодезь, содызе: «Вай, ды те Дораень Ванине, сон, сон, васень вечкемам». «Ёколк!» — мерсь седеезэ. Ледсь мелезэнзэ панжиковонь умарьксэкс ашолдыця ванькс од шкаст, конань зярдояк, мерть куломазот, седейстэть а рикстедьсак. Истямось мештьсэть а олы, а руми, эйстэнзэ а ёртови.
Келей, асфальтсо вельтязь ды эйзэнзэ лисиця, тикше потс ваязь китне вастовсть. Вастовсть эзгаст кавто молицятнеяк. Мекев а мурдат.
Натунь превс истямо мельгак сакшнось: келейгавтомс эскелькстнэнь ды икельдямс, ютамс вакска. Теевемс а содавиксэкс. Полавтызе сонзэ лия: «Мезень пежетесь — вастовиндерян мартонзо? Вастован, мейле мезе?» Истя тейськак. Вастовсть, меревксэнь коряс, конядо коняс.
— Ш-шумбра-ат, Нату, — васенцекс пшкадсь Ванине, — со-содавинь?
Цёранть лангсо солдатонь пиже-ожо тюс, ёзазь-ваднезь ташто понкст, сынст кондямо куртка. Улевельтькак апак нара сакалонзо ды черензэ раужот, меревлить вастовить та-косто сазь «боевик» марто. Арась, сэнь сельмензэ, валдо тюс чамазо ловомс истямокс эзть мере.
— Шумбрат, Ванине! — ёмболк варштась цёранть лангс ды гайгиця жой вайгельсэ арсесь текень авась. — Тон мезть лытат лишмень сэрьсэ кирмалавтнень потмова?
— Ды-ды ва-вана вейке ломаннень пилявкст эрявить. [245] Сакшнынь варштамо, — аламнеде талнозь топавтызе кевкстницянь мелензэ.
— Мезе, варштыть? — пильгензэ алов ванозь, кевкстсь Нату.
— Бе-берянть, муевить вадряткак, — мерсь пилявксонь вешницясь.
— Кода эрят-аштят? — кевкстизе Нату «ёзазь» кевкстемасо ды мельганзо, теке басом, чинь налнэкс ютась пряванзо. — «Ульнесь мазый... Вай, ды сон нейгак мазый. Пурназь-сэрнязь, паро цёракс велявтоволь...»
— Ва-вадрясто. Чим юты винавтомо — вадря, понги — кавксть вадря, — раказевсь Ванине, — вана ис-истя эрян. — Набойстэ, мик прянь шназь, ёвтынзе валтнэнь авантень, умонь ялганзо вакссо эскелицясь.
— Мон тонь апак пеедькшне кевкстнян, тон — згилят, — пеняцязевсь Нату, юдманзо ве кедьстэ омбоцес саемстэ.
— Апак пе-пеедькшне теть мерян: авань калминек — содат, эрян ськамон — тедеяк со-содат. Тон, чей, аволь шабра велень...
— Марсинь... — эль марямга, нусманясто, лиядо арсезь, таргизе валонть авась. «Тердиндеряса, сы-арась? Паряк, кодаяк превс путови? Мезть а эрсить эрямосонть», — сувнень кувтынекс ютась пряванзо апак учонь мель. Мик сонськак тандадсь эйстэнзэ.
— Теяк па-паро...
— Марсинь тедеяк, тонадояк, кой-мезде лиядояк, — арсезевезь, вейте-вейте путнесь валтнэнь Нату, сынст вельде бажась совамс вакссонзо молицянть седейс.
— Э-эно ме-мезть кевкстнят?
— Истяк, — лепштинзе турванзо ды чатьмонезевсь Нату.
Аванть превс совась апак учонь мелесь ды карась тосо текеде: тердемс-арась Ванинень инжекс? «Мезень берянесь — ледстнемс пиже од шкадонок, виздезь-кекшнезь вастневемадонок, мезде-бути пелезь палсемадонок?» Марямга пшкадсь:
— Ванине, содат мезе?
— Ме-мезе?
— Мелеть вастовомс арась?
— Ки-кинь марто?
Теевсь општ. Каятотсь велентень совамсто васень кудонть кардазсто атякшонь моро.
— ... Монь. Кортневлинек умонь иетнеде, лиядо-мезде. Тон ськамот, монгак ськамон. Налкставсь тень чаво кудосонть. А куш а каш валске, текесь чокшне. Лиясто тошначиденть а содан ков [246] прям каямс. Икеле цёран пештилизь вайгельсэст кудопотмонть. Ней...
Ванине арсезевсь. Меремс — «бутылка путат»? — илыкезэ эзь сато, визькс та-кода. Меремс а сан, таго а те. «Ды мекс, видеяк, а самс, тердиндеряйть эйсэть? Валмеревксэсь, койсэнь, текеде корты: «Чавить — чийть, максыть — сайть».
— Сан, — теке ледсь аламос чатьмонемадо мейле Натунь умонь-умонь алужозо.
— Паро. Учан. Ансяк чапик конязот: эсь превсэ, апак симе. Марсить, кеман, койдень: кенкшем симицянень пекстазь. Сельмень конявить, понгиндеряй икелень копордазь цёра... — эль эзизе прядо кортамонзо «тонь кондямо» валсо.
— Зя-зярдо?
— Ванды. Шлямочи. Важодеме а молема. Сак чопоньпелев.
— Ванды? — омбоцеде кевкстизе Ванине.
— Ванды.
Ванине чатьмонсь.
«Кода улемс? — эвтезь эвтсть алянть колгансо кавтолдоматне. — Ванды... Самай те шкастонть, кортазель, вастовомс ломаненть марто, кинень эрявить ускомс пилявкст. Те тевесь, а мезть ногот кайсемс, «коськстэ» а юты. Кода улемс? Хы, ды те валске! Се шкас ламо мезе полавтови...»
— Ён, Нату, ва-ванды сундерьгадозь, — Ванине путсь пе тей-тов кайсевематненень. Варштась икелев тердиця валаня кинть лангс. Вана уш Кузвелень васень, чирень кудотнеяк. Аламошка, ды теде-тонадо, валскень чиденть калякицятнень кист явовить: Ваниненень покш кистэнть туема керш ёнов, Натунень — витев.
— Вандыс? — пшкадсь Нату, зярдо пачкодсть ки чеканть видьс, явовома таркантень.
— Ва-вандыс, Нату! — мокнозевсь Ванине ды эскельдясь керш пелев, эсест пев.
Сеедьстэ истя эрси — тукшныть кавто ёнов. Паряк, Пеледест ламо аватнень ды цёратнень эрямонь кист а пракшныть ве кис ды куломазост эскелить башка-башка. Ламбамо эли сэпей, вечкеви а вечкеви, ды мезеяк а теят, истят моданть лангсо эрямонть сыредеяк сыре коензэ. Аволь минь сынст кодынек-каярдынек, аволь минь стынек, аволь миненек калавтомс. Топавтомат. Ковгак а молят.
...Неть безарькс пря ялгатнеяк! Ансяк ашолгадсь, зэрть-бух, ках-ках козкстнезь, совась ловтаня, апак нара чама Солай Мика.
[247] Кудазороськак «каи» вай-вай, ялатеке сакшныть тензэ «палыцявтомо» читькак. Пачколи кожодомас.Те вана, Солаень потомксось, чуросто пачколи коськемас. Кежей сеть читнестэ, зярдо «буль-буль» а понги кирьгапарезэнзэ! Портянзат. Икеле седе шождынель: саразке киньгак «ваткиль», кадовикс ревине, лия мезеяк кундыль. Ней те «утомось» чамсь. Кирдийтне-власттне ведьменть нардевгавтызь. Милициятне, теке покш пря коршт, ветькак неить, сеске чочатадызь. Сави, ков эно молят, зярояк ды яксемс вачо пеке, пиштемс «палыцявтомо». Эрси истяяк.
— Адя, удыгай, калс, — педясь Ванинес сыцясь, — мон уш рамицяяк муинь. Карми мезе нуртямс. Алтымаяк ули. Венчкак мутано. Адя, пурнак!
— Ковгак а молян. — Ванине аштесь озадо коникенть чиресэ, вансь удомань пачк ялганзо лангс. Прязонзо кивчк сась мель: «Кона ёндо кандызе вармась истямонть?»
— Я, те кода истя? Мезе лиссь? — эзь чарькоде, кавтолдозевсь Мика.
— Истя вана. Тон стувтык, пилявкст тень ускома? Косто саемс? Машинаяк тень муема... — кежень сазь, Ванине ушодсь «пансеме» апак учо инженть.
— Эзинь стувто мезеяк. Кунсолок: течи путсынек алтыманть, ванды таргасынек. Мезень берянесь? Вейкесь омбоценть трокс а ары.
— Саты. А-азё. Монь ме-мелем арась ведьсэ бо-ботамс! — серьгедсь Ванине чоподава яксицянть лангс. Варштась «стявтницятнень» ёнов. Рамакшнынзе, мельсэнзэ, авазо. Варштась ды одс чиремсь апак аца кенденть лангс. Ков, мезекс зяронь шкава стямось? Скал латонть ало а пары, саразткак а кекердить-а котныть. Ёмась ловсонь вечкиця псакаськак. Ков мольсь?
Сезевсь цёранть удомазо, эзь матедеве. Зяро эзь стома, сезевезесь эзь сюлмаво, петне эзть муеве. Аштесь кунст мадезь, сельмень конязь. Путынзе кедькоморонзо човонензэ алов ды совась умонь, ледстнемакс кадовозь умонь иезэнзэ... Совасть превзэнзэ армиясо урендямонь читне-мелявкстнэ, Нату марто, тов саемадонзо икеле, вастневематне.
Шкатне ды сынст иласт-кирдаст, коест лиятальть. Одтнэ ней а виздить невтнемс вечкемаст, палсить-кутморить — неевлизь весе. «Бусонь» лотксема таркасо, веле куншкасо, клубсо, школасо... Теке весенень те эряви, весе содаст сынст потмоёжонь паломадост! Сестэ, Ванинень ды Натунь вечкемань пургондамо [248] шкастост, визькс ульнесь ютамс вечкевиксэть марто кедте-кедьс кундазь велепенть кувалт. А уш паламс ломань ютксо!.. Визькстэнть мода потс ваят. Вант, кортавттадызь, берянь куля велеванть илязо туе, сялдтадызь... Секскак од ломантне, ТУ-ть самодо икеле, вастневсть, вечксть, палсесть кекшнезь. Улевельгак се шкась, пувозтнэ-семиятне лодорсо авольть калале. Мезеяк а теят, эрьва шканть коензэ-ладонзо эсензэ.
* * *
Кеменце классо тонавтниль Нату, зярдо сонзэ ды Ванинень ютксо сырсмекшнссь васенце вечкемань сяткинесь. Валдо, ванькс, палыця. Ие малава кассь-кенерсь. Сеедьстэ вейсэ якасть клубов ды Ванине ильтнесь седейпелькскензэ, вечкевикс тейтерензэ, клубто мейле кудов. Сестэ Алькань эрясть Дорайде авасоло. Ве киява савкшнось якамс. Пачкодить Натумезень кудост видьс, озыть, зярдо ушосонть лембе, кузтемпесэ эземнентень ды цянавкс чоледить тонавтнемань тевдест, икелень шкадост, ояксчиде, вечкемадо... Ды истя ульнесь школань прядовомадо мейле сёксес. Пелеведе мейлес, лиясто, нурька ветнестэ, мик зорянть лазовомазопзо вспсэльть. Шкась ютыль, а марявильгак. Вечксь Ванинс яксемс, кедте-кедьс кундазь, вирень кияванть. Седеяк, кизэнь омбоце пельксстэнть. Сеськтне те шкантень седе оймить. Теде икеле, ансяк соват чувттнэнь алов, верень потийтне каявить лангозот вачо верьгизэкс. А кенерят пансемест лопав тарадсот.
Ледсь Ванинень мельс армияв саемадо икеле вирень кияванть пелеведе мейлес кедте-кедьс кундазь яксемаст.
...Кавто ёнга сэрей чопода пичеть, алгаст — куракшт. А куш а каш. Мештьсэть маряви седеень китнэма, салава марявикс пелемань ды теке марто кенярксонь лембе ёжо. Чить пичетнень юткова-алга овтумартне, верьгизэнь ленгтне, тия-тува вастневиця тумотне копачазь пижесэ, ней, веть, лопаст неявить раужокс, письмаршка нармунекс. Вере-вере типельдить, валтомо кортнить салава, эсь ютковаст, сэняжа, якстере, пижела тештть, сияжды-ваны тарадтнэнь пачк, яла арси, арси мезе-бути муемс, вешни киненьгак лездамс келей чама пешксе ковось.
— ...Мон ту-туян, тон киненьгак ли-лисят мирденень, — прянь нолдазь, теке эстензэ, аволь Натунень, алтынзе Ванинс валтнэнь.
— Косто тень тон саик? — апак эрязкале, валтнэнь кочказь, [249] апак тално кевкстизе Нату вакссонзо эскелицянть.
— Учомс кувать. Кавто иеть. Ла-ламо мезе полавтови. Арась ме-мелем кемемс те-тенень, ялатеке, маряви, лисят лиянень. Мон пек вечктян. Тон-тонгак аволь мельде-валдо як-яксят мартон. Ды мезть а эрсить...
— Карман учомо, учомо, Ванине! Вансак ва. Кодак усктадызь тарказонк, васняяк, каяк сёрмине. Ды истя поладсынек вечкеманок. Тон сёрма, мон — каршо. Тон сёрма... Сат, сестэ уш...
— Паро, карминдеряй истя, — кавтолдозь, вайгелень матразь, мерсь Ванине.
— Истя, Ванине, истя, вансак ва! — марясь цёрась каршо.
Менелень кирдий сэрей виде рунго пичетне кунсолыть кавтотнень тошказь — илизь маря сынь, идинзе маря весь — кортамост. Сиземань апак сода яла ваны лангозост сияжа валдо, ве таркасо сэншть мериця, покш-келей чама ковось.
Эскелькс, омбоце, колмоце... Эзь марявояк, кода кись пачтинзе кинть кувалма празь эчке пиченть видьс, вечкевикс тарказост.
— Озатано? — пшкадсь Ванине Натунень. Лоткась ды ахолдась кедьсэнзэ чочконть ёнов.
— Ага, — тейтересь саизе кедензэ Ванинень коморсто ды ютасть «эзементь» ваксс, таргизе ды сравтызе пацинензэ чочконть ланга. Озамдо икеле Ванине педявтынзе турванзо сонзэ летьке, марявсь, инзей ламбамо турвас.
— Вай, визькстэме, вай, — сеедьстэ лексезь, тошказь мерсь Нату турваст явовомсто, зярдо прядовсь ламбамо шкань нурькине юткось.
Ванине озась тейтеренть ваксс ды вить кедензэ каизе сявдиксэнзэ ланга, псистэ кутмордызе ды дёлязь лепштизе эсензэ ёжос.
— Ве-вечктян, Нату, ку-куломазон а стувттан, — кемевтсь кутморицясь. Теке басом, седеяк виевстэ лепштизе тейтеренть ёжозонзо. Лекшкадсь эйзэнзэ.
— Нолдамак, овто! Тон истя весе ловажан яжасыть. Ну и овто!..
— Ёвтык, На-нату, зяро тештть велькссэнек? — Ванине апак пеедькшне полавтызе кортамонзо, саизе кедензэ тейтеренть лавтовсто.
— Ы-ы! А содан. Кияк, маряви, а соды. Мезть-бути ёвтнекшнесть тень кувалма уроксо, стувтыя. Каня, алкукскак, [250] ловновить? Седеяк вирьсэ... — пейдезевсь, колызе горниповкс чольдердиця вайгельсэнзэ вень сэтьме чоподанть ды каштонть.
— Мо-моненьгак истя маряви, — ве мельс сась Нату марто. Кутмордызе одс, керш кедензэ венстизе ды путызе тейтеренть кумажа лангс, аламос аштезь, аламнеде кепедизе платиянь чирензэ, — пе-певтеме келей-келей тештень па-паксят, кие, со-содамс, сынст ви-видицяст?
— Ы-ы! Мезеяк а ёвтан, — видькстась Нату.
Ванине новолезь новольсь чочконть лангсто, арась кумажа лангс Натунь каршо ды вить кедьсэнзэ кармась вадяшамо кумажадо верьга штапо валаня киське пильгензэ. «Кодамо чевте», — ютась превганзо. Кедезэ аламонь-аламонь, вадяшазь, эцесь седе верев, амеревикс таркантень. «Чевте, кодамо чевте ды валаня...». Тейтеренть кургсто лиссь киртята, потсто лисиця «вай!», соракадсь ды вырк стясь чочконть лангсто... Эрязкалезь саизе пацинензэ ды, валгак эзь ёвта, эскельдясь кинть куншкас.
— Те тон истя мезе, ормазкадыть? — талнозь-кеждязь мерсь Нату, зярдо вакссозонзо ютась альгачокс тейниця цёрась. Сорныця вайгельсэнзэ марявсть калгодо, кшнинь гайтть.
— Мезеяк. Истяк. Кутмордыксэлитинь, — чумонь марязь, саизе коморозонзо Натунь чевте коморонзо.
— Истя, Ванине, а кутморить... — «путызе тарказонзо» алужонзо Нату, чопода вирень кияванть кедте кедьс кундазь эскелямсто. Сыргасть кудо ёнов. Састо молезь, поладызь кортамост.
— Ку-кутморить, — аламнеде лиякс ёвтызе икеле ёвтазенть, видькстась Ванине. — Истямо кутмордамодо мейле меревлинь: тон — монь, мон — тонь, ды эйстэнь ковгак а туевлить. Ней вана...
— Мезе «ней вана?»
— Ме-мезеяк арась... А кемеви — кармат учомон.
...Умок те ульнесь. Иеть, ламо иеть ютасть се вастовомадонть мейле. Шаштомс вана, лутамс удемстэнть пиче вирьсэ се тештев венть — вийть а муевить. Ды вешнемскак а мезть. Кадык эри...
Велесь чамсь. Ансяк шлямочистэ ды таргочистэ пурнавкшныть клубс ошсто сазь од ломанть. Сынь уш, ловт, аволь Кузвелень. Кортыть рузкс. Маряви, велеськак уш рузонь. Кода илязо уле, чуросто кить, ялатеке яксить вирень се, кавто ёндо тарадсо копачазь, кияванть, кува зярдо бути яксесть кавто вечкиця седейть — Ванине ды Нату. Сынст лувсо, секекс, палсематнень юткова снартнить ловомс чувто прява понгавтнезь, тенст кончниця тешттнень. Яксить, кортнить-чатьмонить, ды ансяк аволь [251] Ванине марто Нату. Лият. Истя поладови эрямонть кизэ. Исяк макснесть вал вечкемс куломазост веенст, течи — лият. Сынст мельга сыть одт. Ды истя эрямонь мейсэяк а мадстевиця те коесь эскели иестэ иес, пингестэ пингес, свал, шкань апак лово.
* * *
Ванине чинь-чоп яксевтсь пилявксонь тевензэ. Пачколесь Эрьмезьвелевгак. Пилыть, мерема, чавсь а стяко. Пилявкстнэнь муинзе вейке ОАО-сто. Косто саемс машина, кона шкане сави? Теньгак теизе, те мелявксонтькак ёртызе прястонзо.
Чикуншкадо мейле уш, зярдо чипаесь наянгалесь сэнь паксясонзо сэрей чувтонь сэрьсэ, Ванине пачкодсь, эзь кемевеяк, Кузвелес, «дачник» кудонь азоронтень. Косто сон сась, те парь пекесь, велентень, ансяк сонсь соды. Корты рузкс. Кие чачома келень кувалма? Содык азё! Ней весе рузт. Африкасто сыцятнеяк. Сюпав. Кудозо кавто этажсо. Истят Кузвелесэ эзть некшнеяк. Алонзо гараж, утомт-кавт. Этажтнеде башка — баня. «Рузонть» кардазозо пирязь кевень ды верьга эчке кшнинь пирявкссо. Аволь ор — чеерь а совави. Варштась Ванине омбоце этажонь вальматнень ёнов, ды арсезевсь: «Мекс ломанесь а пештявиця? Ков ламо, тов седеяк ламо бажи амзордамс! Эрить, содан, кавонест, кавто сыре ломанть, мезекс тенст неть сядо вальматне? Арсить тоначив мартост саемс? Зяро эрявить пенгть, газ истямо хороманть эждемс? Эхе-хе-э-э, ломань!»
Теке басом, ледсть мелезэнзэ эсь кудозо, уличинзэ-паронзо.
...Визделгадсь.
Вастызе сонсь азорось. Шержей, кокша, цитниця пря кодгеменде ламо иесэ эчке пеке атя. Тердизе кудос. Ванине а совиксэль. Ко-о-дат... Совак ды весе. Савсь. Икелев, виде, эзизе терде. Эзь мере озамскак. Савсь а кувать учомс тарчк вакссо аштезь. Кухнясто ливтсь кой-мезе сускомс ды цяркинесэ палыведь. Сеске ледсть Натунь валонзо: «Иредьстэ иля са!» «А-а, сядотнеде уш а иредян!» — прась мельс ды гылкадизе кандозенть. Поризе ярсамонть ды, ёвтнизе «од рузонтень», кода аштить тевтне.
«Ну ме-мезе, ков ажиятнень? А-алькань Натунень? А? Шказо. Юткоськак тесэ аволь васоло. Па-паряк, кудов варштамс, нарамс-теемс? А-а, туи, аволь бояран...» — арсезевсь кевень пирявксонть кшнинь кенкшканзо лисемстэ.
Алькань Натунь кудозо аволь покш-келей. «Паро, — [252] редизе сыцясь, — фундаментэзэ, кевень юр лангсо, пинге мезеяк а мусы». Чапозо пичень. Кудось апокшке, ялатеке кавто пельксстэ, икельцть-удалцть. «Ков, мезекс седе покшось ськамонзо эрицянтень?» — сась мельс Ванине.
Кузтемпенть неезь, Ванине эль эзь аймельгадо, натой потазевсь. Икельганзо ацазь лазтнэ — ал тюжат! Кувтолдыть, мерят суликань. Пелят чалгамоткак, иляст лазново-порксневе. «Мезе, цёра? Пельть-иля, сыть — ютак». Ванине Юкснинзе котанзо ды ваньксчисэ а цивтордыця, тантей чинесэ а качадыця цюлкасонзо састыне, ёжонь марязь кузсь-совась кудыкелев.
Панжизе кудо кенкшенть.
Нату котьмась стуворонть перька. Пурнась-анокстась ярсамс. Лангсонзо балягань ашо цицькинесэ пупсезь чопода-якстере тюс шожда халат. Кувака. Эйсэнзэ неяви седе сэрейкс, седе кекшевсть рунгонь торозевкс, цёрань сельмс кайсевиця мазычинзэ. Прязо штадо. Розь олгонь тюс черензэ оскакс судрязь-пурназь човоньсэнзэ.
— Шумбрачи! — арсесь совицясь мельганзо кенкшенть пекстамсто. Марявсь, цёрась эчке вайгельсэнзэ тандавтызе те кудосонть умок эриця каштмолеманть.
— Сюкпря Верепазнэнь, а пеняцян, — пшкадсь Нату мизолдозь, совицянть лангс варштазь, сонсь поладызе модамарень ватксеманзо. — Сыть?
— Кода неят.
— Кайсек. Кудосонть пси.
Ванине каизе солдатонь сёрмав тюс куртканзо, понгавтызе кенкшенть ваксс чавозь тулонтень.
«А уш чинесь, чинесь эйстэнзэ качады... вайгельпень ютко марясак, — тешкстызе эськанзо Нату. — Куш судоварят потомдыть. Сави баня уштомс».
— Озак. Ага, тезэнь. Каршон. Ну кода, пилявксот ускить? — исковась Нату, эзизе стувто исень кортамост, сонсь тейсь тевензэ. Покш ваканонтень, козонь путнесь ватксезь модамартнень, каясь ведь, шлинзе ды ушодсь пачалгос керсемест.
— Валске усксынек. Тевесь кортазь-яксевтезь.
— Мекс копордазят? Мон исяк теть мезе меринь? — чевте вайгельсэ, ялатеке «сокардазь», мерсь икелензэ озадо аштицянтень. Бах путызе пеелензэ. Сайсь каштор-каштор конёв панкс, айгинзе лангозонзо ватксевкстнэнь ды болдорк каинзе ведрас. — Мекс, кевкстнян, чатьмонят?
— Пенчке... кандовольгак кече? Сонензэ те мезе, чинев ведесь. Содак, цёра, симемкась — симема, саламкась — саламо. Зяро-мезе илязо уле, лемест теке, — валонзо прядозь, чикорк совась икеле кудос, ливтсь фотонь эчке альбом. — Озак вана диванс ды ваннык эрямом. Мон курокке.
Шкань ютазь стуворось стакалгадсь ярсамо-симемапельтнеде: кши, рестазь модамарть, чурька марто керсезь ды чиньжарамойсэ тантейгавтозь якстере помидорт, човинестэ керсезь колбаса, лавкасто рамазь ведь... Арасель ансяк се, мезтементь Ванине стуворонть эзь лово истямокс.
— Пекстык альбомонть. Озак. Вана тезэнь, — нерьгстась сурсонзо, кармавтсь азоравась.
Ванине стясь — пукшторк мерсь сыре диванось — ды лоцьк озась невтезь таркантень.
— Ярсак, — стуворонть вакссо стядо аштезь, кармавтозь мерсь Нату.
— А то-он? — полашт кепедизе вановтонзо Ванине каршонзо аштицянть лангс.
— Монгак а кадован. Ярсак. Ломанькс ярсак. Содан, кода ярснить ськамост эрицятне, седеяк, цёратне. Монськак, видькстан, лиясто нузялдан анокстамс. Симан чайне-мезе ды саты...
Нату озась Ванинеде ушкс. Пильгензэ путызе омбоценть лангс, штавтовсь халат полась, ды панжовсь эчке, валаня цитниця кумажазо.
Верендясть пекест пештямо.
— Вана мезе, дугай, — ансяк стясть мельга-мельцек стуворонть экшстэ, пшкадсь азоравась, — кандтнема баняс ведь. Баня ушттано.
— Кодат банят вензэ лангс, — трокс, каршо вал ёвтась Ванине.
— Тон ков капшат, вензэ лангс важодеме? Адя невтьсынь косот ведратне, косо лисьмась. Невтьса козонь кайсема веденть. Пенгинетькак совавтома, — кортазь-ёвтнезь, Нату лиссь, эзь карма урядамо стуворонтькак, кудыкелев. Мельганзо Ванинеяк. Тосто ютасть баняв. Нату мурдась кудов, Ванине кундась мерезь тевтнень топавтомо. Кандтнесь ведь, совавтсь пенгть. Сась Нату, уштызе банянть. Часонь ютазь явась. Васенцекс шлясь ведень кандтницясь, мельганзо сонсь уштыцясь.
[254] ... Банядо мейле Нату чевте пондакш нардамосо нардтнизе парямодо мейле аволь сэрей-келей якстере киське рунгонзо, судринзе-пурнынзе олгонь тюс черензэ, каясь ланганзо од, вестькак апак муське халат ды лиссь удало кудов. Электрочайниксэ лакавтсь ведь. Тейсь кофе. Таргась кельменькайстэ кой-мезе пей алов. Бальцянонь вакашкес каясь сахар марто мерьказь-човорязь чукшторовт. Ванине дивансо озадо аштезь, апак капша велявтнесь альбомонь лопатнень, ваннось фотографиятнень — эйсэст невтезь Натунь эрямонзо: эйкакшонзо, Миша мирдензэ, конань марто...
— Содан, содан мезть превсэть эвтить: «Пароль, эх, пароль банядо мейле глянкадемс цяркине!» Петя, видькстак? Эзинь маняво? А? Кадык альбомонть. Озак адя! — пейдезь «скирдызе» цёранть ярсамо-симеме озамсто Нату, пештизе валаня, мештестэ лисиця эчке вайгельсэнзэ удалце нупальненть потмонзо.
— Ве-ведьс ваныть! Па-паряк, алкукскак, нуртят зярыя петнявкскеть? А? — озамсто тетькевсть Ванинень турванзо мерезденть.
— Мон теть нуртян!.. Тень несак? — Нату путызе кофе чашканзо ды раказь венстизе мокшнанзо «петнявкскеде» ледстницянть судо алов. — Хи-хи-хи... кирьга ланга кода гамодтян, сеске стувтсак те валонть!
— На, га-гамодемак. Ансяк кандт, — эзь талакадо, цяхазевсь инжесь каршо.
— Кандан... Саик оно сянгиненть. «Тевс» кундак!
— Кунсолан!
— Вельть ламо, пек ламо ютасть ланган оймень костиця апаротнеде. Кие чумось? Кренчень ведесь. Секс теть мерян: эли мон, неят зярс аван, весе мартон, эли сон, те самай гуенсесь. Вейсэ, ялгакай, сынь а эрявить. Кочкак... — Нату нилизе сусковксонзо, путызе сянгинензэ ды поладызе кортамонзо: — Пелян, теть а эряван. Вана мейсэ тевесь. Эрявовлиньгак, Мишань куломадо мейле муевлимик, савлить. Арась, тонеть эрявсь ды эряви лия — стопка, мельганзо — прянь витема. Таго стопка. Тон авань мазычинть, ёжонть, танстенть полавтык сонзэ лангс. Паряк, кодаяк кадови эрямонь наксавтыця те ормась? А? Ледстика од шканок, ледстить цёковонь моротнеде гайгиця чокшнетнень! Пиче виренть...
Одт, допрок «пижелиник». Эрямонь весе китне сравтозельть икеленек. Эскеляк, мольть, чийть! Кие сестэ арсесь-пачкодтяно истямо эрямос? Эзик стувто, кода ковдонть валдо вирьсэ, армияв [255] туемадот икеле, теиксэлимик авакс? Вай, кодамо альгачолить! Умок те ульнесь. Мазый он пелькскекс кадовсь. Мекс, ёвтык, теть... а самс монень? Тон ськамот, монгак ськамон. Мезень парось башка-башка эрямосонть? Мекс а вейсэндявомс? Мезень мазысь, иля покордаво, чийнемс веленть келес ды вешнемс азарсь веденть?..
Кортась авась, превс путсь чевте, апак капша ёвтазь, вайгелень апак кепсе валсонзо. Бажась а покордамс икелензэ прянь нолдазь аштиця кунсолыцянть. Кирдсь оймесэнзэ типелькске кемема: пачкодить валонзо нолажа кива эскелицянть седейс, туи седе коське, калгодо кива.
Ванине каршо валгак эзь ёмавто. Теке келензэ нилизе. Кепсевсть кежень оргатнеяк. Мик истят мельтькак кивчкаесть: бырк стямс, сельгемс ды — ушов. Ялатеке оля тенст эзь максо. Ацирьгалек-иля, ломанесь видестэ корты. Педе-пес, Корты истя, кода ули. Стака марямс ды кирдемс тень весе. Ды мезе теят?
Совасть икеле кудос. Ванине карксамга штапо. Нату чинев-сэксэв нуланзо-валанзо ёртынзе кудыкелев, муськемс. Озасть, стултнэсэ калдордозь, кудо куншкас аравтозь аволь покш-келей стуворонть экшс.
— Эрь, оршак! — Нату стясь, таргась шифоньерстэ ванькс майка, панар ды венстинзе икелензэ пельсштапо аштицянтень. Озась тарказонзо. Вансь кода оршни. Теке марто кепедизе керш кедензэ сельмензэ икелев ды варштась частнэс. — Вай, шказо уш пелеведе мейлень! Эзь марявояк. Шказо... Мон тонеть ацынь удалце кудос, диванс. Вант, мелесь тонь. Удалце кудос эли...
Истя кевкстнезь-мелявтозь, Нату стясь, састыне ютась коникензэ ваксс ды апак капша каизе лангстонзо халатонть, сравтызе стулонть трокс. Кадовсь мейсэ чачтызе авазо. Виздсь потедензэ. Покшт. Эрьвась эйстэст тоцкаи-лымби. Оршнемстэ яла бажи кодаяк кекшемест, иляст неяво покшокс, иляст педявтне цёратне лангозост злыдарь вановтост. Ков кекшсыть? Те мезе, апак «онкстя». Кершиндерясыть, седеяк тулдаскадыть. Апак эрязкале, шкань таргсезь, штавтызе вельксэнть, кавшакавтызе пряпес путозь тодовонть ды чиремсь, цирьк мерсть коникень пружинатне.
Ванине сельмень сявадозь вансь, зярс эзь маде, прясто пильгс штапо аванть лангс. Вант, теке якстере покш умарьсэ ёролдозь чувто! Сёксь малавань умарькс! Эскельдяк ды сезть эйстэнзэ, кодамо мелезэть туи. Сускик. Варчасак, кодамо потьмежа, кодамо сон ламбамо! Солы кургсот ды марясак: рунговат туи верень [256] эждиця-сыремтиця вий.
— Ванине, мадстик толонть! — серьгедсь таркастонзо кунст мадезь аштиця, шожда велькссэ копачазь Нату.
Цёрась стясь, лепштизе валдонь кирвазстиця-мадстниця повненть. Ютась чоподаванть пильгесур лангсо «эстензэ», удалце кудов. Мельганзо састыне, ёжонь марязь пекстызе кенкшенть. Вельмевтсь тол. Истят ашо, ванькс, вадяшазь ацамот эзь некшнеяк! Авазояк муськенесь сельмень сявадомга, неть — седеяк ашот, мик цивтордыть. Пелезеват. Куш иля мадтяк.
Те лангс апак вано, каинзе, теке эсензэ кудосо, понксонзо, мадстизе валдонть ды венемсь лов ашо ацавкстнэнь потс. Матедевсь сеске.
...Ашолгадсь.
— Кода удовсь? — совась, эзь марявгак, тона кудосто, стявтызе Нату. — Онт неить кодаткак?
— Ко-кодат онт! Ансяк чиреминь, прок лембе ведьс чо-чопавтинь. Сеске матедевинь, — велявтсь мадезь аштемстэ сыргозстицянзо ёнов Ванине, ды яволявтсь тензэ: — Те тон тонськак а содат ков эрязкалят... Ансяк ашолгадсь.
Нату тейсь амарицякс. Лангсонзо вишка ашо цицькинесэ пургсезь-мазылгавтозь чопода-якстере тюс теке халатось. Верце повонзо апак чочтне. Мештезэ панжадо. Секень вант, «гульканзо» ушов либорк лисить. Пилысэнзэ тапкат. Ошонь ава... Кода лиякс мерят?
«Ульнесь тейтерекс мазый, истямокс кадовськак», — сась мадезь аштицянть превс Натунь неезь, лангозонзо ванозь.
— Вана мезе, зярс мон мезеяк кургс каямс анокстан, листя, зарядкань таркас пенгть бахаека! Кардаз куншкасот цюркатне, неить, — кудазоравась стуворонть велькссэ кедьгень путнема полкастонть сайсь, калдордозь, бальцянонь зярыя цяплат. Вакссонзо конёвонь кескавнестэнть сайсь зяро-бути коморот почт, кармась синтетикань келькш лангс сувтнемест.
Валскень ливезев «зарядкадонть» ды ярсамодо мейле Ванине сыргась ушодозь тевензэ топавтомо — ускомс пилявкст кие марто кортазь. «Путома пе кортазентень», — аволь весть мерсь эстензэ молемстэ.
Нату кадовсь кудос. Течи таргочи. Чиемс эли ардомс Эрьмезьвелев а эряви. Васня кундась муськеме, мейле вачкинзе костерс лазнозь пенгтнень, мейле... Те «мейленть» пензэ велесэ вешнезьгак а мусак. Паряк, муеви, сиземадонть пильгень ускозь, [257] удома таркас пачкодемстэть. Ансяк. Тевть кудосо, кудыкеле, тевть кардазсо, кардсо, пиресэ, паксясо... Тевть чоподасто чоподас. Виде теяк: топавтыцяст аволь вейкеть. Кой-кить, мерема, мукшныть шка човсемс келесткак, пелеведе мейлес лужалемс «сэнь сельменть» икеле. Алькань Натунь истятнэнь юткс а совавтсак. «Чарыця», дошуз авась. «Валскес» валонть а содасы.
Ванине апак учо сась чикуншка малава. Сась, теке, мерят, одирьвань чиявтомо. Сакалонзо наразь бритвасо. Чамаумарензэ, улозо — цивтордыть. Прячерензэ киртязь, судрязь удалов.
«Апак симе! — тешкстызе васняяк, токизе кенярксонь ёжо Натунь седеензэ. — Мень а цёра? Мекс тензэ а эрямс ломанькс, эсь превсэ?»
— Вай, авакай! Ды тон а содаваткак! Прок аволь тонгак. Те кие истя нарынзить? Теке парикмахерскоев якить, — шнызе сон, видеяк, пурназь-сэрнязь Ванинень кузтемпесэ вастомсто.
— Ме-мезе, тон арсить, Кузвелесэ арасть ис-истят «сырнень кедть»? Улить, улить. Аволь весе прянь-полдань синдезь ношкстасть Московонь ке-кепедеме. Тонсь неят, — Натунь кургсто марязь валтнэде сыцянть турванзо тетькевсть мельспародонть.
Аванть, алкукскак, абунгавтызе ды кецневтизе цёранть истямокс самозо: шлязь-наразь ды допрок «коськстэ». Мезе-мезе, Нату судонзо лангс а пеняцякшны. Кода эзь никсне, — ве ёндо, маласто — «алкаш» чине эзь маря, эзизе редя сельмсэнзэ идемевсекс тёкаиця сяткинетькак. «Паряк, алкукскак, сти виде ки лангс?» — кивчк-кивчк ютась пряудемганзо кемемань валдо мелесь.
— Кода теветь? Лиссь-эзь? — кевкстизе алянть.
— Кода арсезель исяк, — панжовсь мизолкстонть кургозо.
— Эзидизь каваняяк?
— Э-э, стувор пурнакшность... — яволявтсь теке ёжосонть Ванине.
— Мекс эно тон...
— То-тонь кунсолозь, чи-чипайнем! Секс. Ха-ха-ха... — раказевсь мельспародонть.
Нату марязденть эль кирдевсь пильге лангсо. Истя, мик чипайне. Кияк, зярдояк тензэ истя эзь мерне.
— Соватано адя. Мезть аштетяно кузтемпесэ. Ярсат...
— Ко-кодат ярсамот, мон ансяк стинь.
— Ну совак, совак... Оймсек аламошкас, ды пенгтнес кундатано, — кеняркстонть цёкордсь Нату ды сонсь васенцекс тук-тук [258] кузсь кузтемаванть. Ванине мельганзо.
...Пенгтнень марто савсь псилгалемс чинзэ валгомс. Коське пичень, морговт. Эрьва цюркантень савсь арнэ путомс. Ды аволь аламо. Весть вачкодьсак, омбоцеде, колмоцеде, кодаяк а лазови. Ливезденть, марявсь, майкась кутьмерьстэнзэ а лутави. «Сельмтне пелить — кедтне теить», — яла мерить. Кодат «мерат» иляст уле, пильсезетне лазновсть. Нату Ванине мельга совавтнесь лазнозь пенгтнень лато алов. Те тевенть изнязь, савсь молемс баняв. Шлясть. Кудов састь уш чоподава. Кудазоравась, теде-тонадо кортнезь, таргась кой-мезе ярсамс. Пекесь соды эсензэ, ледстясы эсь шканзо.
Ярсамонь кирдась прядовсь.
— Тон течияк тезэнь мадят? — пшкадсь Нату ды юхадсь, невтсь прясонзо диванонть пелев. Сонсь урядась-нардтнесь пенчтнень-вакантнэнь. Лавтовонзо трокс нардамо. Кургсонзо мизолкс.
— Эно козонь?
— Улить лия таркаткак. Седе чевтеть, — цильнезь-пейдезь, цельця тейтерекс гайгезевсь Натунь вайгелезэ.
— Алкукс?
— Теке уш а чарькодят!
— Ча-чарько-кодян, ды... — сюморасто, вельть кокнозь ды ве таркас ванозь, ёвтызе валонть.
— Адя икелев.
— А-адя...
Нату панжизе кавтов панжтневиця ашосо артозь кенкшенть, ды мельцек-мельцек совасть «горницяс». Ванине эскельдякшнось нолдамс телевизоронть. Эзь кенере, Нату кардызе.
— Тон васня вельмевтика толонть. Ды, теня, телевизоронть таркас седе паро кортнемс эсь юткованок, — истя мерезь, лиссь ды удалце кудосто кандсь ваканнэсэ чиньжарамо видьметь, путынзе стуворонть куншкас, озась ды ушодсь чулгсеме. — Кода, мелезэть тукшны «од эрямось»? Эзить тошнакадо? Монь койсэ, арась. Мезень эрямо тонь ульнесь? Иля покордаво, — пинень. Течи пельсвачо, ванды — вачо, седе тов понги-арась — а содат. А банят-нарамот. Те кодамо эрямо? Лемезэ ансяк!.. Вай, мекс-бути пси кудосонть...
Нату видемтизе рунгонзо, ютась ды стясь киртыжс, вальма юткс понгавтозь чавачамонть каршо. Калавтынзе, судринзе тусто, валдо тюс черензэ ды вить кедьсэнзэ юхадинзе удалов. Судринзе омбоцеде. Комавтызе прянзо тей-тов, кончтась, прок [259] од тейтерь, наянгалезь эстензэ. Каизе халатонзо ды вырновтызе коник лангс. Кадовсь човине коцтонь, кумажадо верьга валдо-пиже тюс алга панарсо. Пачканзо, теке сувонь пачка, неявсть авань мазычинзэ. Ютась тарказонзо, озась ды одс педясь чинь-жарамозонзо. Потензэ «озасть» стувор чирентень.
— Мекс чатьмонят? Келеть эзик ёмавто? Мон кортнян-ёвтнян, кевкстнян, а тон... Тукшны, мерян, мелезэть тесэ? — музгордезевсь, лепштясь чулгсицясь каршонзо озадо аштицянть лангс.
— Ту-тукшны, — кирдезь вайгельсэ, теке ламот илизь маря, ёвтызе мелензэ Ванине Нату лангс апак вано.
— Седеяк пек туи, — авась нардынзе кедькоморсонзо эчкела турвазонзо педязь лукштнень, стясь ды юрк ютась каршонзо озадо аштиця цёранть удалов. Комась, каинзе кедензэ лавтовонзо ланга ды кутмордызе — кальдявсь кутьмерезэнзэ. — Ва-а-й, то-о-он!
Ванине превсэ-ёжосо маринзе кутморицянть човоньс пси лексеманзо ды кутьмерьс новолезь потензэ вечкевикс чевтест.
— На-нату, а-а эряви! — серьгедсь Ванине, пижакадсь теке сэредькстэ. — А эряви, шка-шказо ма-мадемань, — эрязасто валтнэнь ёвтазь, видемтизе рунгонзо ды бырсэ лиссь удало кудов, празь прась удома тарказонзо. Копачась. Кунст аштезь, сон путынзе кедензэ човонензэ алов ды арсесь, арсесь лавшочидензэ. Кувать эзь матедеве. Эвтсть, эзть максо удомо, ледстнематне иетнеде, зярдо цёраль. Окойники, велявтсь вить боканзо лангс ды малав сеске ваясь удомань отьмантень. Шказо пелеведе мейлень.
Аламо шкань ютазь, састыне-састыне, мезде-бути пелезь, вальмаванть варштась ашолгадомась.
— Саты, стяк, удыкай! — пувтызе наразь-шлязь, кавшаня черь удыцянть Натунь меште потсто лисиця гай вайгелезэ. Тонань арасель мелезэ стямс. Эзь удово. Копачизе прянзо, кирьмицявсь ды оймась. Пувтыцязо нернеме эзь карма, лиснесь ушов, саразонзо андомо, мейле кундась вакансо-кастрюлясо калдордомо, валскень ярсамонь анокстамо эстест ды кардсосетненень.
Аламос аштезь Ванине весть-кавксть сэставтсь ды нолдынзе пильгензэ масторов, озась. Варштась оршнезь-пурназь Нату лангс. Келемтинзе кувака кедензэ, марямга автсь курго, стясь.
— Мезе, орголькай, карматано течи тееме? — ушодызе пиже валскень кортамонть стуворонть велькссэ муницясь. — Мезес педятано?
— Те-те мекс истя — орголькай? — чарькодизе Ванине — тейсь ильведькс, аволь неть валтнэнь либорк нолдынзе, ды мезеяк уш [260] а теят, мекев а кундасыть.
— Я, теяк теть а чарькодеви! Тон жо нумолокс ношкстыть эйстэнь. Тандадыть — сусконеметь карман? Истя? — жойнесь Натунь лисьмапрякс лисиця вайгелезэ стенатнень ды вальмань суликатнень ютксо.
Ванине носкозевсь. Ушодсь лиядо:
— Мо-модамарень тар-таргамочи течи карми. Кевкстнемскак а эряволь. Тонсь исяк мерить, — Ванине пурнынзе алкстнэнь-велькстнэнь, шлясь, озась «эсензэ» таркас.
Ушодсть ярсамо.
— Модамарень таргамочи, — эзь кирдеве каваницясь, вельть уш тусь мельзэнзэ валось, пшкадсь: — Парсте, мик мазыйстэ ёвтык. Ванине, кунсолока, мекс теть аволь Ваня, а Ванине мерить? Теке потякай эйденень.
— А-а содан. Ма-маряви... авам истя тень мерсь. Ну и то-тонадовсь. Монень ялатеке. Тонадовсь.
— Ванине... мезе, а беряньстэ, кольневтезекс гайги, — мизолкс токинзе Натунь якстере турванзо, кивчкадсть чамаумарьсэнзэ яндавинетне ды поладызе кортамонть лиядо: — Виде, тевтненень а ушодкс, а пе: модартнеде башка, витнема кудо удалга пирявксонть, наксадсть, одс ацамот баня сэдявкстнэнь, новольсь кардаз кенкшесь, каштомоськак сыредсь, одс вачкамаль... Я, допрок стувтыя: ютака ведьс, кандта кельме ведне! Симемам сась. Теке басом, ливтик тусто ведь ведранть. Эно иля капша, прядык васня ярсамот.
Ваниненень кудонь-чинь стомамотне стака канстокс эзть маряво. Куш лиясто кой-кона тевтнеде цякскадомас пачколесь. Чачсь-кассь велесэ. Берянесь — авазо мель путсь пирямс цёранзо кой-кона стака ды лия тевтнеде. Секс кудосо, аванзо пингстэ эйстэст сетнень-нонатнень тейсь мельде-валдо. Тесэ, Натунь кедьсэ эрязь, истят кевкстематкак совсесть превзэнзэ: кинь лангс мон карязт яжан, мезень кис, мезекс тензэ эряван? Эрявтано-арась вейрэ?.. Кие монень Нату: ни, сазор? Весемеде ченгсть седейсэнзэ мельтне вень, удомадо башка, «налксематнеде». Сынь марявсть кирьгас понгавтозь стака, потмаксс ускиця кевекс.
Чоп кавонест носксть-таргасть модамарть. Эйстэсткак сисемшка соткат, мелявкстнэ — улав. Чоподас сокарясть, прок саразт, прядомс ялатеке эзть прядово.
Те ансяк валсо эрьва тевесь сельгема шкас теевкшни! Кундат эйзэнзэ — чарькодьсак. Ледстясызь «танстензэ» аволь ансяк [261] превтне, — карязтнэ, сантнэ, серькатне, кедень-пильгень тулготне.
Окойники, кандовсть мацт лангс меельце ведратне. Нату эзь цидярдо, ловинзе ташто, варяв ваканнэс чизэнзэ кайсезь модамартнень — зяро ведрат таргавсть-пурнавсть течи, зяро покшт, зяро вишкинеть, кодамо учови норовменть, кодамо лезэ максыть «сотканзо».
Коймест-ведраст марто ютасть пирестэ кудов. Ванине уш совиксэль.
— Э-эй, ялгай, тон ков истя? Рудазовсто ванькс таркас? А туи. Банясь эзь кельме. Ведь ули. Баня кудыкеле, эске понгавтозь, элекгроэждемкай. Эждть ведь. Мон нацяс сан. Шляк. Мон мельгат.
«Сизинь, ярсамскак мелем арась, мадемаль, — арсезевсь Ванине баняв молемстэ. — Ансяк... видестэ Нату корты: пондо мода лангсон! Ды истя эцемс ацамо потс? Те истя тейнинь лиясто кудосо. Сё-о-ов-ныль авам...»
Вейсэнь эрямост эскелясь весемень кувалма Натунь мелензэ коряс. Сеске ярсамодо мейле Ванине, шлязь-нардазь, чинь-чоп яжавомадонть чиремиксэль анок ацазь диванозонзо. Таго мезеяк эзь лисе.
— Шказо кемгавтовояк арась. Тон уш соксот аравтыть корномо. Адя аламос калякатано, мейле уш, — тердизе Нату «чиремицянть» икеле кудос ды сонсь колдорк совась васенцекс.
Ванине чарькодизе мезде «калякаволь», мезе эряви ды ков менди полань кондямозо. Ютась тердицянзо мельга. Пекстызе мельганзо кенкшенть ды озась свалшкань тарказонзо — кудонть куншкасо стуворонть экшс. «Пароль телевизоронть нолдамс, ансяк тердимим, маряви, аволь кинонь ваномо», — сась превзэнзэ, секскак тень тееме эзь карма, содась: Нату карми каршо.
— Тон тень а содават, — ушодсь авась кудованть стамбарнэ, псакакс яксезь, аравтнеме-путнеме, мезе а истя, — лия ульнить. Ков теик альгаччить? Вирьсэ сестэ, умок-умок, лияталить. Эзить пелекшне кутморямс кемсисемге иесэ тейтерь. Сатокшнось набойчить. Натой кедетькак терявтник а тов нолдтнемс. Ней — вант вана! Мельсэнь, мельсэнь... паряк, потамаль тень сестэ? Эрямомгак, седе виде улевель, эрямонокак, паряк, лиякс лисевель. Кона ёнов саевлимизь? А содан. Тонгак а содат. Кияк а соды. Вай, авакай-сиякай! Мезть ледстнемс? Мезе ульнесь — ульнесь. А велявтсак.
Потмонзо чамдозь, Нату эскельдясь Ванинень ваксс, стясь [262] исякокс удалонзо ды кедензэ, прок мацеень сёлмот, каинзе цёранть лавтовонзо ланга, лекшкадсь эйзэнзэ. Ушодсь улосонзо ёзамо цёранть кавшаня черь прянзо. Ванине, аволь алкине, виев цёра, ювк стясь таркастонзо, чошкадизе стулонть, велявтсь Натунь каршо ды педязь педясь эйзэнзэ, кармась псистэ палсеме турванзо, чаманзо, сельмензэ. Палсезь-кутморязь кавто кедьсэ каподизе нучк, кепедизе ды лепштизе мештезэнзэ. Авась аймельгадсь. Ванине эзь максо тензэ ёвтамс валгак. Кандызе штавтозь таркантень эль оршазь, чевте, экш-лембе рунго Натунь. Сонсь ве секундас ноцковтынзе эсь лангстонзо понксонзо-панаронзо ды, мездеяк апак арсе, празь прась кунст мадезь аштицянть ваксс. Седеезэ аноколь оргодемс мештьстэнзэ.
...Кизэнь дюм ве. Вальматне копачазь чоподасо.
Ванине, стакасто лексезь, мерят усксь улав, талнозь лиссь икеле кудосто ды састыне, прок Натудо башка кияк марясы, венемсь эсензэ диванс. Седеезэ секень вант кирнявты мештестэнзэ. Пси. Ливезесь валозь валы ланганзо. Теке ансяк эрькстэ лиссь. Мадсь апак вельтя. Аноколь ней, вень куншкат, ношкстамс визькстэнть, те ризкстэнть, эсензэ лангс кежтнеде, ков сельмензэ неить. Кода эзь палсе, эзь вадяша, эзь кутморя, эзь лепштне, эзь аравтне, кодат эльнема валт эзь ёвтне... Натунь мелензэ эзизе вите, эзизе мадсте аванть кирьви толонзо.
Удомась допрок кадызе. Оргодсь. Мурдамодо эзь арсеяк. Эзть лезда а чоподасто чоподас модамарень таргамось, а тарка лангсо стомамонь кеверькшнемась, эзь лезда удементень эциця мельтнень пансемаськак. Прок тандавтызь сонзэ, удоманть. Кодат ансяк арсемат юв-яв эзть лия, эзть юта майсевиця прянь-удемень сормсевкстнэва! Васов кадовозь школань ды икелень иетнеде, панжиковонь балягакс панжовиця од шкадонть, се шкань мотоцикла марто «номертнэде», армиясо урендямодонзо... А весть сакшность икелензэ ялганзо Палю, Рудик, Микай... Сехте пек кирдевсть, мейсэяк эзть паневе прястонть, эзть нолда удоманть арсематне цёрань виень аразьденть. «Те кода истя — а маштовомс? Ведьгеменьгак арасть — мон уш группавтомо инвалид, пичкавтозь айгор. Армиясо, армиядо мейлеяк — теке паро ульнинь, эзть пеняцякшно лангозон. Ней, вант вана...
Кие чумось?
Кие содасы? Ламот. Ютксост авамгак. Кольневтсь, келя, эйсэнь. Текеде, бульчом, ченьксэнтеньгак тонадынь. Армиясояк тень «школа» ульнесь. Ансяк сурсо лия лангс невтнемс а мезть!
[263] Васняяк монсь, монсь чуман, эсень лавшочись — коминь стопканть вельксс. Истя вана ваявтыя эйзэнзэ цёрань каштанчим. Вый! Истямо ава, истямо мазычи, иензэ коряс ёлганя, удяга чевте, валаня рунго, потензэ, потензэ кодат... Васень вечкемам, аволь кияк! ...А мелезэ тень эзь топавтово, седеезэ эзь витеве. Фу, визькс! Анокан моданть пачка туемс...» — неть, истят мельтне кшувавтнесть удемень менчевкстнэстэ лията ды лия ёндо сыцятнень.
Эзь кенере вийс совамо ашолгадомась, Ванине стясь. «Саты кеверькшнемс, ялатеке лезэ эйстэнь арась, ялатеке...» Ацызе эсензэ коряс тарканть. Эрьва кода эсь прянть мерьказекс марязь, майкасо-алга понкскесэ озась стуворонть пес. Улонзо нежедизе-путызе келемтезь кедькоморонзо лангс. Нувсесь истя талай. Икельце ёнксто каятотсь кашторкс. Чикордозевсь Натунь коникезэ. «Пайстомо ава. Вачо кадовить» — арсезевсь Ванине ды ютась икеле кудос.
— Ашолгадомо кармась, — вайгель макссь совамсто.
— Вай, кода тантейстэ удынь! Мекс сыргозстимик? — ансяк кенерсь Ванине совамо ды мельганзо кенкшень пекстамо, пеняцязь мерсь «тантейстэ удыцясь». Теке басом, велявтсь стенанть ёнов, прянзо копачизе тавадпесэнть.
— Мо-мон эзинь шалноя, сэтьместэ прям ветинь, — пря идесь Ванине тошказь. Чатьмонезь лиссь удало кудос. Кадык уды. Оршась, лиссь ушов.
Инелеенть тона чирева пандтнэ вельтязь сэрейдеяк сэрей сыре вирьсэ. Копачазь ашоласэнь тусто сувсо. Сон келей-сэрей, сиякс ашолдыця лехакс таргавсь свал капшиця леенть кувалт-велькска. Ванат ды, маряви, менелесь васодевсь, човорявсь моданть марто. Кецневтить вановт кузтемпенть каршо ды лиява-кува касыця чувттнэ. Сынь копачазь човине, прок тундонь шкань, пиже парсеень ябунцясо. Тень лангс апак вано, коштсонть маряви сёксенть, зярс лавшо, эль редявикс, прок эйкакшонь, лексемазо. Умарьковонть прядовомсто, модамарень таргамодо мейле, учомс лия-мезе а савкшны.
Ванине талай вансь ашназасэнь, келейстэ сравтовозь леенть томбальга сувонть-васодевксэнть лангс. «Вант вана, мик менелесь човорявкшны моданть марто, ве мельс пракшныть, а ломантне...» — арсезевсь нусманя арсемасо цёрась. Ютась кардаз удалов, варштызе исяк урядазь модамарень ума пельксэнть, ваннынзе, шкань ютавтомга, умарькс алкстнэнь — ламо-аволь [264] вензэ перть прасть умарть? Сайсь мель варштамс Натунь «уманзо» удалга сравтовозь паксянть пелев. Сыре, кенерезь виренть кувалт таргавозь паксянть кенерсть «саемензэ» ды совасть уш вийс кольнякай пичинеть ды килейть.
Икеле велесь пешксель ломанде. «Ошке, аволь веле!» — яла мериль Ванинень авазо Кузвеледе. Ламо эрицят — ламо ракшат. Скалонь, ревень, тувонь зярыя стадат кирдсь колхозось, зняронь туро сонсь велесь, колхозниктне. Сюракштне ды лиятне эзть максо касомо аволь ансяк сынсь лисицятненень, озавтнезь чувтынетнененьгак. Шешксть-тапасть сынст. Те ульнесь умок. Ней шешкеме а кинень. А кинень видемс ды нуемскак. Секс аволь ансяк сыре виренть перька, васоло паксятнескак пачкодсть, мусть паро эрямо тарка лагоря пичинетне, пойтне ды килейтне. Ютыть кемень, комсь иеть, ды Чирь паксянть таркас увнозеви тусто вирь. Кодат «иеть», нейгак уш неяви истямокс! Шка, шка, кодамо а онкстявиця вий эйсэть!
«А зярдо-бути, аволь пек умоккак, вармась пансесь тия кенериця сырнень тюс товсюронь лымбавкст, урность сынст урядамсто комбайнат, мекев-васов ардтнесть машинат. Ней, паро, сынст таркас, мариндерят пангонь кочкицянь вайгельть», — путсь алясь питне неезентень ды мурдась, нурькинестэ, апак капша эскелязь, кудов.
Пирева-кува лытыцянть велявтомазонзо Натунь валскень ярсамозо учось ярсыця. Озасть. Коршнесть чатьмонезь, прок лемень кундамонь кудосо. Марявсть ансяк пенчтнень шалтаемаст кедьгетнень-мезтнень эйс.
— Мекс чатьмонят? — колызе каштонть анокстыцясь-каваницясь.
— Мекс тон? — кепедизе ярсыцясь прянзо, апак кончне варштась кевкстицянть сельмс.
— Чевелимик весе, овто, секс а кортаван, — раказевсь Нату, пештизе нупальненть паро ёжонь гайтьсэ. Дондядизе Ванинень эль марямга лавтовс. Пря эзь невте — эзь симеве арво кечесь.
— А-а, оно ме-мезе, — нусманясто мерсь Ванине. Аламос чатьмонсь ды видькстась веньперть арсемадонзо: — Мон течи кудов.
— Ютак, ютак, — эзизе чарькоде сэнь сельме авась икелень вечкевиксэнзэ.
— До-допрок туян...
— Те кода истя, мекс? — абунгадсь Нату. Натой стясь таркастонзо.
— Бути седе видестэ?
— А-а мезть ма-майсевтемс тонь, моньгак... Марик, варчник кода ютась весь...
— А-а, тон оно мезде! Иля пеле. Юты, весе юты. Менстясынек кодаяк те орманть. Иля капша. Эряк таргошка хоть. Вана уш нилеце чи а симат. Каня берянь? Кадсак допрок — «сонгак» вельми. Иля капша. Кадовт.
— А-арась, Натынем, туян. Теке леентень, ко-кода кор-кортыть, одс а совсить.
— Совак лияс.
— А-арась, Нату.
Нату прянь нолдазь аштесь стуворонть вакссо стядо, каршонзо текекс — Ванине. Авась чатьмонезевсь. Эзь сода мезе меремс. Покордавома, кежень челькинеть, жалямо, сюморачи, янксемат — весе човорявсть седейсэнзэ. Омбоцеде явови васень вечкеманзо марто. Васенцесь кадовсь мазый, ванькс, оймень эждиця онокс, омбоцесь вана...
— Мезе мерян? — кортазевсь Нату. — Зяро тевть теинек, зяро теевлинек! Ансяк... Эрьванть эсензэ якамо кинзэ-янонзо. Ве велесэ эрятано. Вастовтано. Стака ули — совак.
Сон ливтсь тона кудосто целофанонь пакет, эйзэнзэ путсь тантей умарть, комсешка алт, копша, зяро-бути кши печтть, сахар марто чевелязь чукшторов банка ды венстизе Ваниненень. Сон путызе казненть диван лангс, оршизе ужос понгавтозь муськезь-вадяшазь «униформанзо» ды стясь кескавонзо марто кудо кенкш икелев.
— Сюконян лездамот кис. Пазось мартот улезэ. Ванстт шумбрачить, — ризксэнь кирдий вайгельсэ мерсь кудазоравась седейпельксэнзэ лисемстэ. «Таго, секень вант, кунды тонадозевентень. Пелян, вай, пелян!» — беряньстэ арсезевсь кудыкельга кузтемпес ильтемстэнзэ.
...Ванине лиссь Эрьмезьвелев капшиця асфальтонь кинтень. Эряволь тензэ ютамс троксканзо ды молемс кудов, Алопев ветиця, тагояк асфальтсо вельтязь, киванть. Мезе, кодамо вий кармавтызе саемс керш ёнов, кармавтсь варштамо калмазырев? Эзь сода. Эскелясь пакетэнзэ марто апак кавтолдо тов, ков тердсь аёвтавикс виесь. Вана сон, певтеме удомасо удыцятнень масторост. Копачазь эчке, иетнеде коськиця, ды од чувтсо. Ве ёндо ванозь — вирьпуло. Велявтсь вить ёнов ды валгсь келей, сэрейстэ [266] кепедезь кистэнть эль шешкезь яннэванть кшнинь келей ортатнень видьс. Совась эзгаст. Латозо калмазыренть лопань. Ожо тюсось зярс эзь пачкоде. Варма цинсть арась. Секс «латось»как чатьмони. Коштось летьке.
«Сэтьме удома тенк!» — Ванине тошкстась, эль турванзо лыказевсть, те масторсонть шкань, сыргоземань а содыця эрицятненень. Умок арасель. Аванзо калмамодо мейле эзь пачколе. Ие малава уш. Парсте ванстовсь мельсэнзэ калмонь чувомась. Теле, лов, модась кельмезь. Чувицятне — Палю, Солаень Мика... теке тев вешсть «вецана уштомапель». Эзь стувтово, ванстовсь, кадовсь ледстнемакс ченькссэ вецакавтозь удемсэнзэ калмамось. Аволь пек якшамоль. Ловось, чувтонь эчке ды човине тарадтнэва, пондакш лекшесь сияждсть чипаенть кельме вановттонзо. Сэнь менелесь неявсь-марявсь сэньстэ гайгиця баягакс...
Калмонь лепштявозь, матравозь марнэтнень юткова, тикше потмова, тей-тов менчевиця, эль неявиця янганть састыне эскелязь, лиссь содавикс таркантень. Вана Дораень Кулянь «оймсема тарказояк». Вана тумонь, зярс эзь чополгадо, ожо крестось. Куншка трокскензэ ланга сёрмадозь: «Раба божья Вачаева У.С. (1927-2004)». Куломадонзо мейле калмонзо ваксс, варштамонзо цёразо сась васенцеде. Сакшность, бульчом, сазоронзо. Секс калмолангось урядазь, кочкозь. Ве барлак тикше а неяви. Ансяк вана лиятнень кондямо пирявкске перьканзо арась.
Ледсть мелезэнзэ, крестонть лангс ванозь, аванзо ацирьгалеманзо, плестяеманзо таргамо тонавтнеманзо кисэ. Зярольть тензэ? Школав уш чийниль. Вант вана, стяко эзть юта уроконзо. Ведьгементнень малав пачкодезь, кадызе качамонь нильнеманть. Изнизе эсь лавшочинзэ. Уро-о-ок! «Вай, авакай-тирякай, мекс эзимик карда, эзинь кардаво теть «палыця ведтенть»? Виеть эзть сато, преветь? Савтыть? Кольневтить эйсэнь? Паряк, аволь тон, монсь пачкодинь рудазов, превень наксавтыця очконть чирес?» — сялдсь эсь пачканзо аволь истя аванзо, кода эсензэ. Тагояк алдо верев варштась эчке тумонь, апак арто крестонть лангс, таргась пакетстэнзэ, путсь трокскезэнзэ кши печть, вансь зярс-бути мезеяк апак нее, велявтсь ды, прянь нолдазь, луньк-луньк эскелязь, лиссь содавикс яннэванть калмазырьстэнть.
Пичепева асфальтонь кинь аразь шкасто ды зярдо фермань кардотне пешксельть ракшадо, Пичепень эрицятне ялго, лишмесэ, машинасо видьстэ-видьстэ лиснесть Эрьмезьвелев кинтень тия, пире удалга киванть. Ульнесь эйпаро ки. Кодамо [267] ней, ламо иень ютазь? Умок Ваниненень эзь савкшно эскелямс эзганзо. Бастыль тикшенть юткова эль редявсть кавто лехинеть — ледстнемат икелень келей киденть, крандаз чаронь кикстнэде, умонь эрямодонть. Зяроце ие а соксеви те паксясь? Паряк, чинть каршо салмукскесэст кувтолдыця пичинетне содыть? Сынь, эрьвась соды, ие юты — чапо путыть. Ловт! Савсь ютамс нурькалгавтыця вайгельпенть аволь кода икеле, паксява, а аволь умок «озавтнезь» од вирьга.
«Вана истя эсенек, ломантнень, ютксояк, ве таркасо мезеяк а ашти, весе полавтови...» — сась мельс эскелицясь. Сонсь кавто кедьсэ явнось эсензэ сэрьсэ казямо нетькс-кодоркс тикшенть.
Окойники, пачкодсь эрямо пизэзэнзэ. Мезеяк ниле чинь перть эзь полавтово. Таркасост, кузтемпенть икеле, ташто, рудаз потсо Колошатне. Эзизе полавто, эзь юта лия таркас пирявксс понгавтозь, ней уш киненьгак аэрявикс, чувтонь пей ангорькаеськак. Котань апак кайсе совась видьстэ-видьстэ кудос. Совась ды мекс-бути седеяк каладсь кайксэзэ — куродызе седеень раздиця, сювориця ёжо. Сэвезь сэвсь сонзэ. «Мезекс, мезекс теть те эрямось, а ни, а эйкакшт, а вечкема, а авань тансть, арась важодема таркаткак, мезень кис, ёвтык, иеть ютавтыть ды ютавтат?» — сёксень мейсэяк а паневиця безарькс карвокс эцесть неть кевкстематне, мелесь эсь аэрявиксчиденть Ванинень превс. «Пароль нардевстэ, кежень сазь «навтамс» стопкашка-омбоце ды мадемс. А ули берянесь, матедевиндерян а сыргозевикс удомасояк» — путсь пе налкставикс, сиземань апак сода эциця чопода мельтненень.
Мольсь Бозанень, шабранстэнь. Паро, Люба-Любине кудосоль. Ванине «скалонь ярмаконзо» максокшнынзе ванстомс сонензэ. Сон — ванстыцяст, сон «банказо». Ансяк кода сынст ванстсыть те «банкасонть», бути «путыцяст» соды ве моро: «эрь» ды «эрь». Неть «эртнеде» мейле мезе кадови? Вана течияк сась тензэ текень марто. Савсь «банкань прявтонтень» «нолдамс» кавто суликас. Ков молят, кода а максат? Ярмактне сонзэ, сон лангсост азорось.
Ломантне велесэнть аламолгадсть. Кузвелесь чамсь. Сень кис эрьва кемень эрицяс — лавка. Сайть, рамак мезе мелеть, ярсак топодемазот, симть прамозот. Весемеде маласо Пичепенсетненень Чакур Митёконь «Меркуриезэ». Мезе тесэ ансяк а микшнить! А уш винатне, винатне... кодат ансяк арасть! Тозонь Ванине чопавтськак.
[268] «Мезе, те кодамо эрямо Натунь кедьсэ: тень теик, седе курокке прядык омбоцень; тов иля моле, сень марто иля корта; тезэнь иля чалга, тов иля юта. Ков иля эскельдя — сёлт. Те кодамо эрямо? Те — тюрьма. Вай, ды те, монень маряви, тюрьмадо берянь, Арась, арась, Нату' дугинем, тонь эскелямот-аволь монь. Истя а туи... Паряк, видькстан, кадововлиньгак, эрьгелгалевельгак... Ней мезе, кодамо лезэсь...» — чарасть-велясть удемень сормсевкстнэва лавкасто кудов эскелицянть прясо.
Зярс якась лавкав, сась тензэ Рыжой Рудик. Сон кукордязь аштесь кузтемпесэ. Учось. Васоньпеельсэ киртязь сакалонзо, нурькалгавтозь черензэ, марявсь Ваниненень, седеяк якстерьгадсть. Сельмензэ теиньгадсть, кадовсть лазкскеть. Марявсь, тошнаявсь ялганзо кис.
— Маринь, содан, истя улезэ, ков ёмсить. Ну кода? — вастызе хи-хи-хи пейдезь, пупиця кевкстемасо озадо аштицясь Ванинень. — Содамокс, келя, совить... Ну кода?
— Кода, кода... — кедень апак максо, машнетезь мерсь каршо. — Стяк эно, нолдамак, мезе теке мукорь аштят чалгавксонть лангсо, совак адя!
Совасть чожк-чожк кудос. Котаст-карсемаст апак кая ютасть икелев. Кудазорось зепстэнзэ таргинзе ды цяр путынзе «ашо» прятнень стувор лангс. Натунь пакетстэ таргась алт, керсесь кши, умарть, кой-мезе лия. Тевень содазь, кавтотнестэ панжизе вейкенть. Буль-буль-буль нуртясь таркастост а тукшныця стопкатнес зяро-бути Рудикнень, седе ламонть — эстензэ.
— На, ки-кирдть! Саты теть сорномс. Ва-вана кши кочом. Симик ды куш-куш тестэ, — Ванине сонськак эзь сода, мекс истя казямосто, корсяня вайгельсэ корты, прок ялгазо кодамояк чумо тейсь.
Рудик истя тейськак. «Навтызе» кандозенть, сэвизе кши кочомонть, цётор-цётор поризе мокшнашка «антоновканть» ды эль марямга, чеернекс лиссь кудостонть. Вал эзь правто туемстэнзэ.
Ванине кадовсь ськамонзо.
Чамдызе васень бутылканть. Натунь путовкстнэстэ верекстэ нильсь кавто алт. Саизе керш кедезэнзэ омбоценть ды талай истя, мезде-бути арсезь, кирдсь, прок эйдине, кедьсэнзэ. Аламос аштезь тотмадизе потмакс ёндо, ды сон панкшт панжовсь. «Костизе» теньгак.
Весе ушодовсь одс.