Валда ян/1928/03(4)/Эсь тевонь ваномась вачкотьф валть вельдя
„Валда Ян“.
| № 3(4) | Май ков. | № 3(4) |
Эсь тевонь ваномась вачкотьф валть вельдя.
Миннь масторнеськонь эса тийхтям од эряф. Тейнек эряви аф аньцек кеподемс хозяйствать и культурать, но ичкизи аськолдамс инголи.
Сяс ингольнек ащихть оцю и стак тефть. Синь сяда цебярьста и курокста тиевихть марстонь и дружнай лездомаса сембя трудяхнень вийса.
Нингя сяда курок туй социалистически строительстванеськ, к‘да минь аф карматам кяшеньдема аф сатыксонеконь. Синь эрявихть няфтемс и лифтемс сянкса штоба, петемс кальдявсь.
Тя тевса газетась и журналсь пяк лездыхть и нингя сяда пяк эряви келептемс сон тя пингоня, мзярда партиясь мярькс ванондомс и арьсемс эсь тевонь тиеньдемать.
Кулянь пачфти ялгатня, сембя общесственны тевонь тиихня газетать вельдя азондозь аф сатыкснень, нингя сяда пяк эряви корхтафтомс эсь мялхнень тяни.
Тевонь тиемаса лисеньдихть аф эрявикс тефть, лисеньдихть шьоряфкст. Кой киньди синь аф няевихть, кой-кия пели азомаснон, но сяц, кия няйсы, киннь мялец петемс и лездомс совстроительствати, лифтеза тяннь ушу. Ков сяда лама ломань кармай корхтафтома тевонь тиеманеконь, тов тяда курок и цебярьста сон петеви.
Сянкса тя тевти эрявихть серьгядемс сембя трудяхня. Катк синь цебярь азор лаца смякасазь аф сатыкснень и няфтихть кит, кода синь петемат.
Сембонда цебярь васц, конань вельдя можна няфтемс аф сатыкс вастонеконь, арси газетась и журналсь.
Тяса можна азомс цебярь тевнь тиемась, штоба сайнь лангозонза ванозь тиенделхть тяфта лиятня, тяса сьормадомат аф сатыксня, тяса азомат када синь петемат.
Кулянь пачфти ялгатненди эряви варжакстомс тя ширети и коса ушарды азомс газетаса эсь мяленц, коса видесь, коса кичкорсь, кода петемс, мес сон шнамс.
Омбоця пяльдя, вастова ащи организациятненди эряви эсь пингоня и цебярьняста ванандомс, газетава сьарматфнемс и тиемс коряваст мезя эряви.
Аньцек эста, мзярда келептеви вачкотьф валть вельдя эсь тийфонеконь колга сьорматфня и тя тевти серьгядевихть лама ломанндя, мзярда эрявикс учреждениятня кармахть ванома сьорматфнень меля, эста вачкотьф валсь (печаць) арай оцю вийкс, конань вельдя петевихть аф сатыксонекя.
А тяннь эряви аф аньцек содамс, но тяникигя тиемс.