Бӧрдӧдчысь
Коркӧ олісны-вылісны пӧрысь гозъя. Пӧчӧыс висьмис дай кулі. Олӧны вӧлі найӧ сьӧд вӧр шӧрын. Некод матігӧгӧрын эз вӧв. Пӧльӧ ӧтнас коли, некод абу бӧрдысь ни казьтыштысь пӧчӧӧс. Босьтіс пӧль мешӧкӧ куим гоз чипан да мӧдіс бӧрдысьӧс корсьны. Паныдасис ош дай юасьӧ:
— Кытчӧ нӧ, пӧльӧыс, мӧдӧма?
— Бӧрдысьӧс корся, пӧчӧй кулі да.
— Босьт менӧ, — шуӧ ош. — Кужа ӧд бӧрдныд.
— Кужан тэ бӧрдны? — пӧль юалӧ.
Ош равӧстас:
Сёмайбырӧй дай пӧчанӧй менам!..
Жаль ӧд тэ меным зэв!..
— Он куж, он, бӧрдны. Лёкысь горзан сӧмын.
Бара мӧдіс водзӧ. Паныдасис ручкӧд.
Руч юалӧ:
— Кытчӧ нӧ, пӧльӧ, мӧдін?
— Бӧрдысьӧс корся, пӧчӧй кулі да.
— Ме зэв мастер бӧрдны. Босьт менӧ.
Лӧсьӧдчисны донысь: быд бӧрдӧмысь чипан.
Бӧрдӧ лыддьӧдлӧмӧн руч:
Шондібанӧй дай пӧчӧй,
Асылын водз чеччысьӧй,
Шыд-рок пуысьӧй,
Пӧльӧс пӧттӧдз вердысьӧй.
Мыйла бара эновтін
Ассьыд пӧльӧтӧ-а?
Бӧрдӧ руч кыз синваӧн.
Нормис тшӧтш пӧльӧлӧн сьӧлӧмыс: чужӧмбан пасьтаыс киссьӧ синваыс.
Модысь тшӧктіс лыддьӧдлыны, дай коймӧдысь, дай нёльӧдысь. Нёльӧдсьыд мынтысьныд нинӧмӧн лои, чипаныд оз тырмы, гортас весиг чипаныс эз коль.
— Он кӧ мынтысь чипаннад, асьтӧ сёя, — шуӧ руч.
— Ручильӧй-бӧжильӧй, — шуӧ пӧль. — Лок мунам гортӧ, мынтыся.
Руч вӧтчис пӧльӧ бӧрся. Гортас пӧль мешӧкӧ сюйис кык пон, вылас пуктіс куим чипан дай сетіс ручлы.
Кыскӧ руч мышку вылас ноп. Сувтіс шойччыны мыр бердӧ. Час пӧ шойччигмоз ӧти чипан сёя. Сёйис да бара мӧдӧдчис водзӧ. Мӧдысь шойччыны сувтіс да мӧд чипан сёйис. Сідзи куимнансӧ сёйис. Нёльӧдысь восьтігӧн мешӧкысь понъяс ас вылас уськӧдчисны. Руч муртса ловйӧн воис гортас, дзебсис дай юасьӧ:
— Пельясӧй, пельясӧй, синъясӧй, синъясӧй! Ті нӧ мый керинныд менам пикӧ волігӧн?
— Ми видзӧдім, понъясысь тэнӧ видзим.
— Кокъясӧй да кокъясӧй! Мый нӧ ті вӧчинныд менам пикӧ волігӧн?
— Ми котӧртім, видзим тэнӧ понъясысь.
— Тэ нӧ, дыш руньӧ бӧжӧй, мый керин?
Лӧгасис бӧж дай шуӧ:
— Ме мырйысь мырйӧ, пуысь пуӧ крукасьлі, мед тэнӧ понъяс кутасны!
— Аттӧ пӧ, со кутшӧм тэ вӧлӧмыд! Налӧ, понъяс, сёйӧ менсьым бӧжӧс!
Чургӧдіс руч бӧжсӧ гу вомӧдыс. Понъяс кватитісны бӧжсӧ ручлысь дай асьсӧ тшӧтш гусьыс кыскисны.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 102 years or less since publication. |
|