Бирæгъ æмæ хъæдхой (Гæдиаты)

by Гæдиаты Секъа

БИРÆГЪ ÆМÆ ХЪÆДХОЙ

Бирæгъ фæтарсти
Хъæдхойы хъæрæй,
Бирæгь фæзылди:
— Фыдæбон дæ хай,
Хъæдхой, дæ сарæй!

Уыцы къуырт-къуырттæй,
Рагæй-æрæгмæ
Хæдзар нæ кæныс,
Гъе, цыргъ æхсырфæй
Дæргъауæдз хуымтæ
Миййаг нæ кæрдыс?

— Уæххай! — зæгъгæ,
Хъæдхой ысдзырдта, —
Куы дæ базыдтон,
Гъе, уæдæй нырмæ
Фосы фæдыл
Уыцы зылд кæныс,
Урс уæрыччытæ,
Бурхъус фыстæ
Уыцы хæрд кæныс...

Фæлæ дыл æз дæр
Кæрц нйкуы федтон,
Гъе, дæ даргъ худыл
Быдтæ нæ быдтон.

 * * *
Фыццаг зон дæ бон, —
Чи циу, уый йæ хон.

---