Сьӧд нюлэслэн шораз,
Ошмеслэн йыр азяз,
Кырӟаса, бӧрдыса,
Пинал беглой сылэ.
Бутырка йырсиё,
Чебер сьӧд синкашо,
Мугорыз сюсьтыл кадь.
Пинал пи, вера, кыӵе
Сюлмаськонэд вань тынад:
Эшед вунэтӥз-а?
Кинэ ке яратӥд-а?
Анаед кулӥз-а?
Атаед куштӥз-а?
Яратон кышноед
Оло люкиськиз-а?
Оло бусыысь юэд
Сисьмыса кылле-а?
Я валэд, скалэд,
Я ыжед кулӥз-а?
Я гырыны потыны
Герыед ӧвӧл-а?
Висьыса кылльыса,
Кужымед быриз-а?
— Сюлмаськон нужнаен
Бӧрдыса улӥсько,
Одӥг ар пегаса
Беглойын ветлӥсько
Ӟеч шудо улонэз
Мон уг адӟы ни,
Яратон семьяям
Бертыса уг пыр ни.
Ортчем аръёсы
Мон ӟеч улэм вал.
Арбери лушкаса
Куштӥськеме ӧй вал.
Огпол эшеным
Мон дорын пукимы,
Юыса, кудӟыса,
Выдыса, изимы.
Уин пеймытэн
Урод мурт лыктыса,
Эшме кельтэм корка,
Чыртызэ вандыса.
Ӵукна султыкы,
Эш кылле выж вылын, —
Чыртыез вандӥськем,
Синъёсыз усьтӥськем.
Кышкамен чалякгес
Муртъёсыз чыректӥ,
Адями люкаськиз
Монэ думылӥз.
Кыӵе секыт кылъёс
Мон ӧй кылы соку!
Кыӵе юн мыжыкъёс
Мон ӧй си соку!
Сокы бамтӥм мынам,
Пӧсяса, вир вияз,
Эрке будэм мугоры
Мыжыклы но чидаз.
Жугыса, жугыса,
Кужымме быдтыса,
Монэ пеймыт гидэ
Куштӥзы, думыса.
Со гидын мон ӧжыт
Ог вадес ял кари,
Кор улысь изъёссэ
Октӥ но пегӟи.
Со дырысь одӥг ар
Пегаса ветлӥсько,
Ини жадьыны куськи,
Куштӥсько шуисько.
Беглойлэн синмысьтыз
Пӧсь синькыли усиз
Соку ик матын
Куара кылӥськиз.
«Тани кытсы пегӟем!
Ыбыса, сое вие!
Адями виисьлэсь
Тыбыр кузэ ние!»
Куазь чилекъям кадь,
Матын тыл ачкиз,
Куазь гудыръям кадь,
Пыӵал куара кылӥськиз
Ог кыл но вазьытэк,
Чик куара поттытэк,
Беглой пи пограз
Ошмеслэн йыр азяз.
