Бадӟым сяртчы (Герд)
| Бадӟым сяртчы Автор: Кузебай Герд |
| Поттэмын: 1918. Источник: Куӟебай Герд. Люкам сочинениос : куать томен / Люказ Ф. К. Ермаков. — Ижевск: Удмуртия, 2004. — Т. 3. — Б. 10—11. |
Улэм-вылэм пересь дядяй, губрес маке, пурысьтам маке. Коркаез солэн тэльын вылэм, паськыт тэльын, бадӟым тэльын. Кутскем дядяй шудо нуналын со сьӧд нюлэсэз тӥрен кораны: шунды ӝужан шоры паськыт сюрес, эркын сюрес ӵогыны. Люгыт сюресэз ӵогыса, бадӟым интыез сайкыса, сайкем интыяз сяртчы мерттэм, сяртчыезлы «кенеш» (совет) ним понэм. Нунал ортчем, толэзь ортчем — сяртчы туж бадӟым будэм, выжызэ пыдло лэзем… Пересь дядяй сяртчызэ учкыса, шумпотыса улэ вылэм…
Писпуослэн только кӧтсы сӧриськем, бадӟым сяртчылы йырзы кур луэм: соин артэ пересь дядяй тырос писпуосыз кораса куштӥз. Азьло писпуос эрказ уло вал, музъем пушкысь сиён сюпсьыса: пересь дядяйлэсь куашкам корказэ шундыез адӟонтэм ӵоктаса. Дэри пӧлын нумыр сеен пересь дядяй улэ вал: куашкам корказ курадӟыса, горд шундыез адӟытэк.
Пересь дядяйлэсь начар корказэ нош ик соослэн ӵоктамзы потэм: пересь дядяез шунды улысь пеймыт корказ ворсамзы потэм — асьсэлы эркыт улон понна, музъемлэсь вирзэ сюпсён понна.
Турттӥллям соос дядяез быдтыны, номыр карны быгатымтэзы, «кенеш» нимо бадӟым сяртчызэ ишкалтэмзы луымтэ. Медъяллям соос сяртчыез ишкалтыны Дутов нимо генералэз. Кыскем Дутов бадӟым сяртчыез, поттэмез лутэк гогыез вырӟем; пересь дядяй, кизэ чабкыса, нюлэс дурын серекъяса пукем…
Ӧтиллям писпуос сяртчыез поттыны англичанэн пранцузъёсыз: кыскем англичан, кыскем пранцуз — кӧтазы йӧтса, висьны усиллям. Ӧтиллям писпуос сяртчыез поттыны тӧдьы гвардияез — чекословакез. «Казыр мынса, ишкалтыса куштом» шуса, соос ушъяськыса лыктӥллям. Писпу сьӧрысь пересь дядяй соослэн кымсазы тэшкыльтэм. Кымессы бадӟым лёго луэм, синмысьтызы кизили пазьгиськем!.. Бадӟым сяртчыез адӟиллям соос, бадӟымезлы паймыса абдраллям.
Со виын пересь дядяй кымсазы тэшкыльтэм, беразы ӵыжем. Ӧлексы луса, чекословакъёс тӧдьыосын берзэс учкытэк бызьса кошкиллям. Пересь дядяй, кизэ чабкыса, сайкем тэляз серекъяса кылем…
Та выжыкылэз валамды ке потэ, кылзэ, эшъёс, верало: бадӟым писпуос, музъемез сюпсисьёс — куанер калыкез сюпсись узыръёс. Писпуэз корась пересь дядяй — курадӟись мурт, куанер мурт: вань ултозяз куашкам коркан пеймыт дуннеын со улӥз.
Солэн мерттэм бадӟым сяртчыез — асьме быръем советъёсмы: со кенешъёс выжыоссэс табере туж мур лэзизы. Нокинлэн сое быдтэмез уз лу, ас мерттэм кенешсэ, эркыт улонзэ куанер калык кионъёслы ачиз быртэк уз сёты!..