Атака

by Елькин Василий Иванович

Митя — челядьлӧн вожак.
Митя киын алӧй флаг,
Кодӧн ӧвтчӧ нӧрыс вылын,
Челядь чукӧртчасны мед.
Уна висьталӧм оз ков
Челядьяслы; налӧн лов
Котӧртӧмла ныръяс йылын —
Тайкӧ ортсӧ нин оз пет.

Миша сьӧрсьыс кыскис дадь,
Лызьӧн йӧткасис Аркадь.
Яшӧс вайис «пара вӧла» —
Выльӧн ньӧбӧм коньки гоз.
Кыптіс нӧрыс вылын шум,
Гажа серам, кыпыд нюм.
Повзис челядьысь, и чӧла
Вӧрӧ пышйис дед мороз.

Митя — челядьлӧн вожак,
Сійӧ бара лэптіс флаг,
Сувтіс Мишалы дадь бӧрӧ.
Сэсянь гӧлӧс кыліс збой:
— Кывзӧй, ёртъяс, ставныд ті,
Лымйысь мортӧс вӧчам ми
Нӧрыс улӧ, жуӧд йӧрӧ,
Сэсся восьтам сылы бой.

Уна гӧлӧс кыліс ёсь:
— Кось кӧ лоӧ — мед и кось!
Огӧ лоӧ кӧч кодь вӧйӧн,
Тані некод абу няр!
— Дерт жӧ, — кыліс Яклӧн кыв, —
Муна тіянкӧд ӧтвыв.
Менӧ оз повзьӧд и кӧин,
Меным тыри сизим ар!

Сёрни эштіс, сэсся пыр
Челядь исковтісны кыр.
Лымйысь лепитісны мортӧс,
Киас сетісны «кинжал».
Миша шуис: — Ныр и син, —
Ставсьыс тӧдчӧ белӧй чин!
Митя содтіс: — Вывті гордӧй,
Тайӧ — белӧй генерал!

Челядь кайисны бӧр чой.
Наын сьӧлӧм пуис збой.
Митя лӧньны найӧс корис,
Сетіс Мишалы приказ:
— Мун разведкаӧ, но, чур,
Враглы лапаас эн сюр.
Сюран — он во миян дорӧ,
Врагыд ловйӧн оз видз час.

Гӧра вывсянь, кыдзи ньӧв,
Миша лэбис. Быдӧн чӧв
Кутіс дасьтыны оружье,
Враглы паныд мунны мед:
Пищаль пыдди — кузьджык радз,
Бомба пыдди — лымйысь мач,
Пушка пыдди — ыджыд вужля, —
Залпӧн пырысь-пыр кӧть сет.

Здук мӧд прӧйдитіс, и вот
Кутіс чукӧртчыны «взвод».
Командирлы шуис Якӧ,
Киас «ружье» кутігтыр:
— Ставыс лои миян дась,
Ӧні жӧ кӧть вӧрзям тась
Вӧчны «враг» вылӧ атака,
Чужан муӧ оз мед пыр.

Митя — «краснӧй командир» —
Дыр нин дзоргис «бинокль» пыр,
Кытчӧ муніс збой разведчик,
Сэсся стройлы шуис тадз:
— Эм разведчиксянь сигнал:
Локтӧ «белӧй генерал».
Пыр жӧ ставӧн мӧдам сэтчӧ, —
Миян оз позь вӧрны надз!

Гӧнеч лэптіс ассьыс строй,
Медым врагкӧд панны бой.
Нӧрыс пӧлӧн сӧмын кайӧ
«Войска» бӧрын тшын да бус.
Со нин взводным миян сэн,
Со нин мунӧ врагкӧд вен.
Миян кытшалӧны найӧс,
«Белӧй» повзьӧма, кыдз трус.

Юргӧ сынӧдын «Ура»!
Таргӧ лыйсьӧм: тра-та-та!
— Водзӧ, водзӧ, повтӧм ёртъяс! —
Горзӧ «краснӧй командир»,
Ачыс прӧйдитіс нин лог,
Вывлань кыпӧдіс клинок,
«Генералӧс» сэсся ордйис,
Сӧтіс сылысь сьылідзир.

Лӧнис ставыс: горзӧм, свист.
Сӧмын ӧтнас том горнист
Тыр победа йылысь сэні
Горнӧн тутсіс: тру-ру-ру!
Митя — челядьлӧн вожак,
Митя лэптіс алӧй флаг:
— Тадзи быдӧнӧс ми венам,
Коді кӧсйӧ Сӧвет му!