Адӟисьёс (Герд)
| Адӟисьёс Автор: Кузебай Герд |
| Поттэмын: 1918. Источник: Куӟебай Герд. Люкам сочинениос : куать томен / Люказ Ф. К. Ермаков. — Ижевск: Удмуртия, 2004. — Т. 3. — Б. 31—34. |
- Судья — шоретӥ воргорон; весь кагаз бугыръя.
- Микаля Марья — туж кышкась кышномурт.
- Еремей Тӥрфон — губырес пересь мурт, 80 арес мар ке, пельтэм.
- Шальтра Онтон — капчи, ӝог вераськись воргорон, 30 арес, сторож.
Судья (сторожлы вера). Кыйлудын одӥг адямиез вииллям. Туннэ адӟисьёслэсь юаны-вераны кулэ.
Сторож. Микаля Марья. Тонэ ӧтё: пыр, пе!
Судья. Тон-а луод адӟись, Микаля Марья нимо мар ке?
Марья. Озьы, озьы, мон, мон…
Судья. Вера мыным, марлы виемын та гуртысь Лукьянлэн Исьтапанэз. Со вылэ кин ке йыркур муртъёс ӧй вал-а?
Марья. Map шуиськод?
Судья. Мон тынысьтыд юасько: Лукьянлэн Исьтапанэз вылэ йыркуро муртъёс ӧй вал-а?
Марья (мар шуны валатэк сылэ; ӧжыт улса вераны кутске). Ми Лукьян Исьтапанэн весь огазьын улӥм. Ми доры со туж ӵем ветлэ вал.
Судья. Мон тынысьтыд юасько: кин-о вииз Лукьян Исьтапанэз?
Марья (ӧжыт улса, кизэ шоналляса вераны кутске). Мынӥсько вал мон возь вылтӥ искалме утчаны, — куинетӥ нуналзэ искалэ уг бертылы ни вал. Туно доры ветлыса, туно кулэмъёслы куяськыны косӥз. Ӵукна вазьгес султыса, курегпуз табань пыжса, кулэмъёслы куяськыса, мынӥсько вал мон возь вылъёстӥ искалме утчаны. Мынӥсько каллен малпаськыса, Лукьян Исьтапан — ӟеч мед улоз со дуннеяз (вӧсяське) — ярдурын пыдзэ кутчаса пуке. Пуке озьы со, пыдзэ кутчаса, ас понназ туж кӧт ӝож луоно кадь кырӟаса, малпаськыса. Сюлмыз шӧдэ вылэм быронзэ.
Судья. Ужлы кулэзэ гинэ вера. Кин вииз Лукьян Исьтапанэз?
Марья. Верало… верало… али ик ваньзэ вераса быдто. Сылӥ, сылӥ мон Исьтапан дорын но «Ӟеч лу, озьы бере, Исьтапан», — шуисько. «Ачид ӟеч лу, Марья», — шуэ Исьтапан. Озьы вераськем берамы, мон кошки но, Исьтапан азьло интыяз ик сик дуре пукса кылиз. Сик дуртӥ кошкыкум, мыным оломар вужерак адскиз кадь сикын. Ӧжыт гинэ мон мынса вуи но, берам пыӵал ыбем куара кылӥськиз, собере олокин туж урод куараен кеськиз. Исьтапан лулыз потыку кесяське вылэм… Мон кышкаса, марзэ-созэ валатэк, бызьны кутски. Бызи… бызи но — тыэ нӧдӥ. Мырдэм тыысь потса, дорам кызьы бертэмме но уг тодӥськы ни. Али но искалме ӧй на шедьты на али. Котькызьы куяськыса но турттӥ ини но… Туноослэн ненокыӵе пайдазы ӧвӧл. Ми кадьёсыз гинэ ӧрекчало-а, мар-а, тунаткем нерге карса?
Судья. Дугдали! Татын туно дорын тон ӧвӧл… Вера мыным, кин вииз Исьтапанэз, со адямиез тон адӟид-а, ӧд-а?
Марья. Та интыям ик мед куло — ӧй адӟы, нокинэ но ӧй адӟы. Таман искалме но ӧй адӟы…
Судья. Нош татын (кагаззэ возьматэ) тон адӟисе гожтэмын ук!
Марья. Инмар, тыл понна, синтэм мед луо — номыре но уг тодӥськы (вӧсяське)… Урадник гожъяз… Тон, пе, Марья, адӟид-а Исьтапанэз? «Адӟи, — шуисько, — огазьын, одӥг гуртын улэм бере…» Мар-о, мон бертом-а ини, мар-а? Мынам татын пелляськись доры пыран уже вань на али. (Кӧтурдэссэ кутса вера.) Турнан тырысь весь кӧтурдэс ӵогъяса ёрми ини. Оптекысь эмъюм сётӥзы но — нокыӵе но пайдаез ӧвӧл.
Судья. Ойдо берт ини, берт, мынса пелляськы.
Судья (сторожлы вера). Пырны кос Еремейлэсь Тӥрфонзэ.
Судья. Тон-а луод Еремейлэн Тӥрфонэз?
Тӥрфон. Map шуиськод?
Судья. Мон шуисько: тон-а луод Еремейлэн Тӥрфонэз?
Тӥрфон (судьялэсь верамзэ уг кыл; бур пельзэ киыныз ӵоктаса кылзӥське; ӧжыт улса вераны кутске). Мон Кыйлуд нимо гуртысь. Пиналъёс уг кылзӥсько но, пересь йырын котькытчы ветлоно луисько. Туала арын пиналъёс вашкала дыръя кадь ӧвӧл ни.
Судья. Тодӥськод вал-а тон Исьтапанэз?
Тӥрфон. Map шуиськод?
Судья. Тодӥськод вал-а тон Исьтапанэз?
Тӥрфон. Кызьы уг тодӥськы! Солэн аиз мынам гажан юлтоше вал: весь огазьын улӥм, ваче сиса-юса. Котьмармы но тырос вал — сӥль но, вӧй но. Табере кытын туала калыклы озьы улны!
Судья. Мар-о, тон пельтэм-а, мар-а?
Тӥрфон. Map шуиськод?
Судья. Мон юасько: пельтэм-а, мар-а тон?
Тӥрфон. Марлы визьтэм? Та быдӟа луи ини но — визьтэм шуись ӧй вал на али. Азьло дыръя туж умой улӥ, туж айбат улӥ. Ненокин серекъясь ӧй вал, сизьым гинэ вал-искал возисько вал. Сӥзьылаз азбар тыр пудо пыртӥсько вал. Парсь вӧе гинэ олокӧня ведра вал…
Судья. Дугдали! Мон тынэсьтыд улэм-вылэмдэ уг юаськы. Тон мыным вера: кин-о вииз Исьтапанэз?
Тӥрфон. Кин-кин Исьтапанэз яратӥз? Весь гуртэн сое яратӥзы! Туж кырӟась, капчи адями вал со. Юон дыръя вань калыкез, кырӟаны кутке ке, бугыртыса лэзе вал: эктэ, крезьзэ шукке. Мон педло потало али: дӧдьыям изьые кылиз — олокин медаз лушка.
Судья. Тон-а луод Шальтра Онтон?
Онтон. Мон луо, мон… Гуртамы монэ ваньзы ик оломарлы Шальтра Онтон шуо.
Судья. Уд тодкы-а тон: кин вииз Исьтапанэз? Map понна сое виизы?
Онтон. Ма-а-а… мар понна виемын (йырзэ корма)… Соку-у-у тэк улон нунал вал. Мынӥськом ми тазьы соин, Исьтапанэн, гуртэтӥ… «Ойдо, Онтон, тэк улон понна юом», — шуэ Исьтапан. Пырим ми соин Эмельян кышно доры юны: со кабак винаен вузкаре вал. Ну, пырим ми со доры, юим одӥг сороковказэ, кырӟаны кутким.
Судья. Ужлы кулэзэ гинэ вера!
Онтон. Верасько ук, ужлы кулэзэ гинэ верасько! Эмельян кышно дорын пукемме верасько. Соку тэк улон нунал вал…
Судья. Одӥг кылдэ кык пол эн вера…
Онтон. Яралоз, яралоз, господин судья. Ну вот, юим ми соин кык сороковка. Собере Исьтапан шуэ: вай, пе, нош быдэн сюмык юом!.. Соку тэк улон нунал вал… Тэк улон понна ми кутким но нош быдэн сюмык но нош быдэн сороковушка юим на… Юим, юим но — отчы ик-а, мар-а пограськеммы, уг, уг тодӥськы. Ӵукна сайкакум гинэ искал коргидын сайкаськиз. Султыса учкисько котырме но — котырам нокин но ӧвӧл. Исьтапанлэсь кытчы пыремзэ но уг тодӥськы.
Судья. Татын гожтэмын: кызьы Исьтапанэз виемын, тон тодӥськод шуса (кагаззэ возьматэ).
Онтон. Уг тодӥськы, господин судья, номыре но уг тодӥськы!.. Соку тэк улон вал! Ми Исьтапанэн Эмельян кышно дорын юим (йырзэ корма). Искал коргидын мон изиськем… Урадниклы бон мар-о кулэ? Гожтӥ, пе, мон тонэ, Исьтапанэн огазьын юэм бере… Судын, пе, тодозы, шуиз но гожтӥз… Соку тэк улон вал… Соку ми Эмельян кышно дорын юса, искал гидын мон пограса изиськем… Ӧд ке валалэ, мон нош ик верало: мон вочак тодко — кызьы мар вал… Соку тэк улон вал… Ми Исьтапанэн юим… Мон Исьтапанлэсь кытчы луэмзэ уг тодкы…
Судья. Тырмоз ини, тырмоз… Та Исьтапанлэн ужез вуоно арнялы кельтӥське. Адӟисьёс шонер ужпумез верамтэенызы.