Ústirtten keler (Qayıpnazarov)

by Bayniyaz Qayıpnazarov

Polat trubalar islengen aǵla,
Mánzilin baǵdarlap jónelgen alǵa,
Ullı óndirisli, dańqlı Uralǵa,
Tawsılmas kók jalın Ústirtten keler.

Ásirler ármanı xalıqtıń ıqlası,
Jer astınıń tolqıp aqqan dáryası,
Zaman aǵımınday ǵazdıń arnası,
Aral jaǵasınan, Ústirgten keler.

Tańǵa aralasa órer kiyikler,
Jeti qabat jer baylıǵın irikler,
Buraw tereńlese, vıshka biyikler,
Biz kútken úmitler Ústirtten keler.

Ay taqırlar, keń jazıqlar salalı,
Gúldey ashılısıp húsni-jamalı,
Elpeń-elpeń ósken tańnıń samalı,
Xosh xabarlar alıp Ústirtten keler.