Ózbekstanım (Qayıpnazarov)
Eli-xalqı erkli baǵı-bostanım,
Kórki kózge ısıq gúl-gúlistanım.
Jemiske toltırıp dasturxan jayıp,
Barsam, xosh keldiń der Ózbekstanım.
Orta Aziyanıń eń gózzal jeri,
Hár bir azamatı miynettiń eri.
Tolqınlatıp aq altınnıń teńizin,
Jerdiń tilin bilgen húr ózbek eli.
Sen bir sheber xalıqsań miynetti súygen,
Kúshine baǵınıp jen bawırın iygen.
Jáhán xalqın kiyindirse jetkendey,
Aq paxtadan appaq-appaq taw úygen.
Bereket, baxıt bar birlikli elde,
Tuwısqan doslıqtıń kúshi bar belde.
Bul dańqlı, gúresli kúnlerde saǵan,
Baǵındı qumlar da, baǵındı shól de.
Sahra egis boldı, jer saqıy ashtı,
Islediń tabısqa-tabıs ulastı.
Keleshektiń molshılıǵın támiyinlep,
Taǵı alǵa umtıl, serme qulashtı.
Azatlıq erk bergen baǵı-bostanım,
Kórki kózge ısıq gúl-gúlistanım.
Jemiske toltırıp dasturxan jayıp,
Barsam, xosh keldiń der Ózbekstanım.