¡Probe neñu!

by José Aniceto González

'N un establu tiradín,
Con les patines al xelu,
Ayeri ví á un rapacín
Más dulce q' un caramelu.
Yera un Neñu per graciosu,
Y llistu como una xana;
Más guapu que toos los neños
Que cuerren pe la quintana.
Una carina ¡ qué mona !
Unes manines... ¡ per belles !
Y unos güeyinos... ¡ qué güeyos !
Lo mesmo que dos estrelles.
Cuando el probín se reía,
Facía unos furaquinos
Metanes é nos papinos...
Que el veilos daba allegría.
¿ Qué faces, Niñín, i dixe,
Echadín ' n aqueses payes ?
Tás tan tienru y tan blandín
Que les espaldines mayes.
¿ Non ves cuantu fríu fai,
Y qué gran xelá cayó ?
Tapa isi cuerpín, mió Neñu,
Tápate, monín, por Dios
Y en sin movese siquiera,
Nin pestañar un migayu,
Con so boquina de gloria,
Y más llixerín qu' el rayu,
Dixo que baxás del cielu,
Pa ser de los homes guía,
Pos vió que la tierra taba
Por llaceries aflixía;
Y á predricar la probeza,
Por eso taba en carnines
Echadín; sin más camina
Q' unes poques de payines.
Mió vida con él pasaba;
Más temí quitai el sueñu,
Y faciéndome mil cruces,
Colé y dixe: ¡ probe Neñu !