"ყილოშიტყებამი"-შე ეშნაკორობა მარგალიტეფი
ღურუს მუთუნი ვადუმარგ,
ვართი გვალა დო ვართი კიდალა,
ვალიში მერქას გგათენც,
მუდგა გიღუდას ძალა,
იშო არძო ართი ორე,
ჭიჭე, დიდი, ალა- კვალა,
დეჩიჩი და ღურა უჯგუ,
რინას დუდი ვადანძალა!...
კარეს ლეკური გინურქინი:
ჯითა-ჯინჩა ქიგვოფინი!
სინჯა ბორკით მუკიფრქინი,
ჯაშა ქიმკუფინი ტვინი!
მათხილეფქ გეცის დო
გიაშქვეს კიჟინინი,
მუნვოქექი ჩქიმი ცხენცინი
ჭანდიცალო ქაწუოდინი!
ჟირი კოჩი მეურც შარას დო
აკას ვეგიორთუ ქუდი,
წოხლე აწოუნცუნი თიქ
ნაინჭშა ქოჩ დუდი,
უკოხოლენქ გეგნილას,
მუ ცოდაშა ეკმობუდი?!
შურო თოლც ვარწყედი და
წოხლე მუშა აწოპუნდი!
ინაძახ: სოთინი ვედა!
ოჯინე ვაგაი ბრელი,
ეშაღალა მოკო, სქანი,
თოკი მაფუ ოშიბელი.
თუდონქ უწუ: ე ჭკუათ
შორშა ვარექ გატებელი:
ვეგეიცადე, სო მალინე,
სო ვორექ მანტებელი?!
ვარდის უწის, თეში მასკვამა
მუქ ეგორჩქინ, ტანო, პირო?
მარა ძიგირი გორჩანც დო
სქანი წილუა მაფუ ჭირო...
ვარდიქ უწუ, მუ გიწუე,
ქოგიჩქუნო გოლუაფირო?
უხანდელო ნაშიბუს
ხანდებულო უჯგუ, ირო!
დეკვირესო, მიდგარენი,
წყარ-პიც ქინგარც, ქეკინძგერც.
უჩა ცხენი, ლაგამით,
ხეს უკინებუ გერგეზ-გერც.
გოძ, მარგალიტი, გორღვაფილო,
ლაგამი- ანჯარი- ონანგერც,
ვარდიში პეული გინოთილი აფუ
ჩილამურით ნანგარეფც.
კაბათ გინშიმბილი აფუ,
ყილოში ტყებით ფორილი ტანი.
ქუდი გიორთუნი თინა ხოლო
ყილოში ტყებიში რენო, ვანი?
ხეს მართახი უკებუნი,
კილეში უსქაში აფუ განი,
ძირეს მარა, ძამც ქაკონა;
უმოსი ხოლოს ქოძირანი!
ნჯილოს თიცალი ათუმბარი,
გოუნჭყორინე, ღორონთი, ჟინი!
თეცალი ნირგაქ სოლე მორთი,
ყოროფილც ხე კინოურქინი?!
სიაბარაქ გიშამილ,
მემიჩქ, ნეშე გინიფკინი...
შური გუოფარსალაფე,
გორგალც ლეკური გინურქინი!
ლეკური ქუოჟურგინე დო
ჸილო ხეშა ქისხუპენი,
ჸოროფილო მუმეთომუ დო
ხურხის მოკო ვაჯუნენი...
ჯღვალიკეფით გოფჭვამაკუ,
უსოფე დო უზინდენი,
ანწი მა ხოლო ქიმეფხვადი,
ჩქიმი ჸოროფილი ვაჸოფენი.
ვართი ფერაფიქ გომირთ დო
ვორწყექ, ვახვარ თეს მუთუნი,
მუკიფრქი დო დიხას ბზეპინი,
ცქირა აშო გეიშუუნი!
ქგმაშინ დო გურქ მიმადაც,
ჩქიმი ჸოროფილქ მეჩხუპუნი...
შურქ ვეშმოლ დო მუშა გიკვე
ჩილამურით იფრჩხუქუნი?!...