banig may naghihingagdan na sarong gurang na lalaki: su gurang, na sinasakit na makahangos, nakakalakop nin pangalagkalag asin hinihilwas na nagtatangis an sarong pagngaran; iyo sanang saro su gurang; mandiitmandiit nadadangog an kinalingkaging nin sarong talikala o an sarong siniloksigok sa ibong kan lanob... dangan duman sa harayo sarong maogmang dulaan, haros pagsasamwang, sarong hagbayon, nagkukurdahaw, ibinobobho su arak sa mga birak asin su magtrang kapandok kan saiyang ama, nakakaagid saiya su hagbayon asin su ngaran na hinihilwas kaito na naghihibi saiya!
Iyo ini an nakikita sa saiyang atibang kan daing palad. Pinaralsok su mga ilaw sa harong na kahampang, natonong su togtog asin su ribok, alagad nadadangog pa ni Ibarra su makamomondong inagrangay kan saiyang ama, na sa mga hiring hidalé naghahanap kan saiyang aki.
Kan panahon na ito daing girimokgimok sa Manila; asin garong tororog su kagabsan; nadadangog su tinoraok kan manok na nakikipagsublian sa mga taknaan (40) sa mga batingawan (41) asin maboblay na kinorahat nin mahimat, alagad napupuyat nang bantay; nagpopoon nang magsirang an kabaak na tala-sinag (42); gabos garong nagpapahingalo, oho, si Ibarra natotorog na man, sakalé, napapagal huli sa saiyang mamondong pagakala o huli sa saiyang paglakbay.
Alagad daing gironggirong su franciscano na satong nakita nataodtaod pa sana, sa tahaw kan kaogmahan duman sa bidang, dai nagkatorog; nagpuka. Natutugmad su siko sa alindoonan kan gaha kan saiyang lalamban, su saiyang malungsi asin imyos na lawog natotokod kan saiyang palad, daing gimokgimok na nagtatanaw sa harayo nin sarong bitoon na nagbabanggraw sa madiklom na kalangitan. Nagromarom su bitoon asin dominiklom, nawaran su tala-sinag kan kadikit na bangraw kaito na minagikan sa bulan mansana o sa idtong sa kaagahon, alagad daing hirohiro su fraile sa saiyang namumugtakan; nagtatanaw sa harayong pinagsokmolan kan langit asin daga na nagpupurawas sa alopoop kan daliwawa, sa langtad nin Bagumbayan sa dagat sa namamayomo pa.
