Ai pici mituns dla prüma Comuniun
Pici mituns y pices mitans
Tignide ma sö dër bel les mans
Al é incö le de de osta pröma santa comuniun
Santa Maria y Gejú se ó pa a os tan bun
De bi tesurs te osc cör messëise incö i porté
Y che i orëis bun ince os i mostré.
Sun sëgn amez le mëis de ma
Olachʼ al florësc tan bel fora por i pra
Ciüfs de vigni corú
Da i porté a Santa Maria y Gejú
Ince te osc cör trëi de bi ciüfs dessel incö florí
Sce orëis i plajëi a Chël Bel Dî.
Le gile dla santa purité
Ne dess te osc cör mai mancé
Y dagnora bel blanch le mantigní
Spo i plajarëise a Chël Bel Dî
Y mai se le lascé roviné
Dales ries compagnies y dal picé.
Le violé dlʼ umilté
Che florësc dʼ aisciöda y no dʼ isté
Messëise te osc cör dagnora conservé
Y la superbia mai lascé entré
Mo dagnora ma ponsé
Da Chël Bel Dî unsʼ nos döt ciafé.
Le cisé dl vero amur
Chëra i plej le plü a nosc signur
Ëra florësc inanter spines
Mo les flus é impó dër fines
ʼCi desses de chëstes imparé
Da porté les crusc y un y lʼ ater se amé.
Pici mituns y pices mitans
Tignide chisc trëi ciüfs te osc cör y te ostes mans
Y nʼ i lascede mai sicé
Mo portéi cun os alʼ eternité
Spo i sciampëise ai patimënc
Y sëis sön paraisc dër bi contënc.