Jv/Serat Nitisruti

Sinom

1.

• Tyas kumlungkung kumawagya,
• luwih maning lamun uwis,
• munggwing luhuring turangga
• ngembat watang numbak siti
• katon èstanya kadi,
• kurang mungsuhing ngapupuh,
• anyadèraken kuda,
• mamprung alok cerik-cerik,
• kang mangkana mung samono notoging prana.

2.

• Dhapur amerang langenan,
• para tandang nyanyampahi,
• tandha candhula-candhala,
• mumawawa angarani,
• sabar mring liyan janmi,
• tan wruh lamun dhèwèkipun,
• katon ing jerihira,
• angucira nora wani,
• kang mangkana iku tingkah tan prayoga.

3.

• Yoga kaki singkirana
• tingkah kang saru kaeksi,
• nulada para sujana
• myang sarjana kang nimpuni,
• ngambar gandané wangi,
• apan ta uwus kasebut,
• ana ing layang wacan,
• caritané kyana patih
• ri sang Koja jajahan lan sri Naréndra.