tana han kombento, nahabunal didto han mga bató ngan
namatay. Haros hadto ngahaw nga uras, usa liwát nga babayi
ginmawás didto han purtahan ngan maglinakat han
kakalsadahan naggiginuliat ngan naghaharóy bagá an tuyáw.
An mga maghirot nga mga umurukoy waray pag-
papasipara pagluwás han mga ngaran ngan kadam'an nanguribot
han ira mga anák nga babayi kay namagpasipara
pagluwás hin mga pulong nga makakaamóng. Tikang hadto,
naiha anay, han pagkakulóp na, usa nga tigurang inmabót
tikang didto hin usa nga baryo ngan nagtinuktok didto
ha purtahan han kombento, nga sinadhan ngan binantayán
hin mga sakristanes An tigurang nagtinuktok han kamaoo,
han ulo, nagginuliat hin tingog nga halarom, diri naluluwás
sugad hiton kanán mga ngula, tubtob ngadá han
pagpalakta kay igintikwang ngan gin-amatog. Tungód hiní
napakadto ha baláy han gobernadorsilyo, kundi didto
ginsiring nga an gobernadorsilyo waray didto kay aadto ha
kombento; napakadto ha Juez de Paz, kundi an Juez de
Paz waráy liwát didto kay ipinatawag ngadto ha kombento;
napakadto ha tenyente mayor, waray liwát kay nakadto
man ha kombento; napakadto ha kuwartel, an tenyente
han Guardia Civil nakadto ha kombento.... An tigurang
inmuli ngadto ha iya baryo nagtitinuok bagá in bata; an
iya mga kurahab hinbabatián didá ha butnga han kamingawan
han gab-i; an mga tawo nakagát han ira mga imim,
an kababayin'an namamagbendito han mga kamót
ngan an kaayaman nagpapanulód ha ira mga baláy, nagkakahahadlok,
nanmamahág an mga ikog!
—Hay Dios, hay Dios!—nasiring in usa nga makaluluoy nga babayi nga magasaay dará na han duro nga pagpuasa;-ha imo atubangan waray salapianon, waray kablasanon, waráy buság, waray itóm....! Ikáw an magbabawi han amon katadungan!
—Oo, —binabatón han bana,—basta ito nga Dios nga ira iginwawali diri ira la tuhatuha, usa nga limbong! Hirá ngahaw an siyahan nga diri natuod ha Iya!
Ha mga ikawaló an takna han gab-i, sinisiríng nga kapin hin pitó nga prayles tikang han mga higrani nga bungto, nakadto ha kombento kay may adá aragtubáng hin pagsarabot. Han pagkabuwás, hi Tandang Selo nawará ha kadayunan dida han baryo dará an iya sugób nga ipangaranop.
